Wanem Nao Helpem Iumi for Iusim Word Bilong Truth Long Stretfala Wei?

WANFALA savveman saed long drama wea raet for niuspepa hem go lukim wanfala drama. Hem no really laekem datfala drama so hem raet olsem: “Sapos iu laek for lukim samting wea no important and no interesting, then iu shud go and lukim disfala drama.” Bihaen, olketa man wea mekhae long drama hia mekem wanfala advertisement wea iusim toktok wea datfala savveman hem raetem. Toktok hia sei olsem: “Iu shud go and lukim disfala drama”! Datfala advertisement iusim barava toktok bilong datfala savveman, bat olketa chusim aot samfala word nomoa wea mekem toktok hia garem difren mining from tingting bilong datfala savveman.

Example hia showimaot hao full story wea stap raonem wanfala toktok hem important tumas. Wei for chusim aot samfala toktok nomoa from wanfala story savve twistim mining bilong hem, olsem wei wea Satan twistim mining bilong Scripture taem hem trae for giamanim Jesus. (Matthew 4:1-11) Long narasaed, wei for tingim full story hem helpem iumi for kasem stretfala mining. Dastawe, taem iumi studyim wanfala Bible verse, hem wise for evritaem lukluk long full story bilong hem for helpem iumi minim gud samting wea man wea raetem hem story abaotem.

Iusim Long Stretfala Wei

Full story hem minim evri part bilong wanfala story wea olketa raetem or talem wea stap bifor or bihaen long wanfala word or toktok wea bae affectim mining bilong datwan. Hem savve minim tu olketa samting wea affectim or lead go long olketa samting wea happen or wea go ahed long taem bilong datfala story. Taem hem raet long Timothy, Paul showimaot hao wei for tingim full story wea stap raonem wanfala scripture hem important, hem sei: “Duim best bilong iu for mekem God appruvim iu, wanfala wakman wea no shame long eni samting, wea iusim word bilong truth long stretfala wei.” (2 Timothy 2:15) For iusim Word bilong God long stretfala wei, iumi need for minim gud and then explainim long honest and stretfala wei long narawan. Respect for Jehovah, Man wea Raetem Bible, bae muvim iumi for trae for duim datwan, and wei for ting raonem full story bae helpem iumi tu.

Olketa Samting Abaotem Tu Timothy

Olsem example, iumi lukluk long Bible buk bilong Tu Timothy.a For startim wei wea iumi lukluk long diswan, iumi bae askem samfala kwestin abaotem disfala buk. Hu nao raetem Tu Timothy? Wanem taem? Hao nao living long datfala taem? Then iumi savve ask olsem, Wanem kaen living nao “Timothy,” wea nem bilong hem stap long title bilong buk, hem garem? Why nao hem needim information insaed buk hia? Olketa ansa bilong olketa kwestin hia bae barava mekem iumi ting moa hae long disfala buk and helpem iumi for lukim hao iumi distaem savve kasem gud samting from hem.

Olketa first verse bilong Tu Timothy showimaot hao disfala buk hem wanfala leta wea aposol Paul raetem for Timothy. Olketa nara verse showimaot hao, from hem duim waka bilong gud nius, Paul stap long prison taem hem raetem diswan. From planti lusim hem, Paul feel hem klosap for dae. (2 Timothy 1:15, 16; 2:8-10; 4:6-8) Diswan showimaot hao hem masbi raetem disfala buk taem hem stap mek-tu taem insaed prison long Rome, long samting olsem 65 C.E. No long taem bihaen datwan, Nero givim komand for killim hem dae.

Datwan nao olketa samting abaotem Tu Timothy. Bat, hem gud for lukim hao Paul no raet long Timothy for komplen abaotem olketa problem bilong hemseleva. Winim datwan, hem warnim Timothy abaotem olketa hard taem wea bae kasem hem and encouragem fren bilong hem for stap klia long olketa samting wea maet pullim tingting bilong hem, and for hem go ahed for “kasem paoa,” and pasim go olketa instruction bilong Paul long olketa narawan. Then diswan bae mekem olketa kamap fit for helpem olketa narawan. (2 Timothy 2:1-7) Datwan hem wanfala nambawan example wea showimaot wei for tingim narawan nomata long olketa hard taem! And datwan hem nambawan kaonsel wea fitim iumi distaem tu!

Paul hem kolem Timothy “wanfala pikinini wea mi lovem.” (2 Timothy 1:2) Olketa storyim disfala young man planti taem insaed Christian Greek Scripture olsem wanfala faithful fren bilong Paul. (Acts 16:1-5; Romans 16:21; 1 Corinthians 4:17) Taem Paul raetem disfala leta, luk olsem age bilong Timothy hem winim 30 year—wea olketa tingim olsem hem young yet. (1 Timothy 4:12) Nomata olsem hem garem finis nambawan record bilong faithful fasin, ‘hem waka hard witim Paul’ for samting olsem 14 year. (Philippians 2:19-22) Nomata Timothy hem young, Paul givim hem responsibility for kaonselem olketa elder “for no faet abaotem olketa toktok” bat for go ahed duim olketa samting wea important, olsem for garem faith and fasin for stand strong. (2 Timothy 2:14) Timothy kasem paoa tu for appointim olketa kongregeson overseer and ministerial servant. (1 Timothy 5:22) Nomata olsem, maet from hem feel hem no fit hem hol bak lelebet for duim olketa samting hia.—2 Timothy 1:6, 7.

Datfala young elder feisim samfala bigfala challenge. Wanfala nao hem wei wea tufala man, Hymenaeus and Philetus, olketa “spoelem faith bilong samfala,” long wei for teachim hao “resurrection hem happen finis.” (2 Timothy 2:17, 18) Luk olsem, olketa biliv hao spiritual resurrection nomoa bae kamap and hao datwan hem happen finis long olketa Christian. Maet olketa chusim aot nomoa toktok bilong Paul abaotem wei wea olketa Christian dae from sin bat olketa kamap laef thru long spirit bilong God. (Ephesians 2:1-6) Paul talem warning hao apostate tingting olsem bae kamap moa big. Hem raet olsem: “Wanfala taem bae kam wea olketa bae no acceptim datfala healthy teaching, . . . and olketa bae tanem ear bilong olketa awe from truth, for lisin long olketa giaman story.”(2 Timothy 4:3, 4) Datfala warning bilong Paul showimaot hao hem important tumas for Timothy kwiktaem followim kaonsel bilong datfala aposol.

Wei wea Buk Hia Hem Important Distaem

From olketa samting wea iumi lukim finis, iumi lukim hao Paul raetem Tu Timothy bikos: (1) Hem savve hao hem klosap for dae, and hem trae for preparem Timothy for taem wea hem bae no stap for helpem Timothy. (2) Hem laek for redyim Timothy for protectim olketa kongregeson from apostate fasin and from olketa nara nogud samting. (3) Hem laek for encouragem Timothy for go ahed for busy long service bilong Jehovah and for depend long stretfala savve abaotem olketa Scripture for helpem hem stand strong againstim olketa false teaching.

Wei for minim evri samting hia bae mekem Tu Timothy garem moa mining for iumi. Distaem tu, olketa apostate olsem Hymenaeus and Philetus stap wea mekhae long olketa idea bilong olketa seleva and laek for spoelem faith bilong iumi. And tu, iumi kasem nao olketa “nogud taem wea hard for deal witim” wea Paul profesi abaotem. Planti savve hao warning bilong Paul hem tru: “Evriwan wea laek garem fasin for lovem God wea join witim Christ Jesus bae kasem persecution tu.” (2 Timothy 3:1, 12) Hao nao iumi savve stand strong? Olsem Timothy, iumi need for followim kaonsel bilong olketa wea servem Jehovah for planti year finis. And thru long wei for study seleva, prea, and wei for kaban witim olketa Christian, iumi savve “go ahed for kasem paoa” thru long kaeness bilong Jehovah wea man no fit for kasem. And tu, from iumi trustim paoa bilong stretfala savve, iumi savve followim kaonsel bilong Paul: “Go ahed for followim datfala plan bilong healthy toktok.”—2 Timothy 1:13.

“Datfala Plan Bilong Healthy Toktok”

Wanem nao olketa “healthy toktok” wea Paul storyim? Hem iusim disfala toktok for minim olketa tru Christian teaching. Long first leta bilong hem long Timothy, Paul explainim hao olketa “healthy toktok” nao hem “bilong Lord bilong iumi Jesus Christ.” (1 Timothy 6:3) Taem man followim datfala plan bilong healthy toktok hem bae garem gudfala tingting, fasin for showimaot love, and fasin for tingim narawan. From ministry and teaching bilong Jesus hem wan mind witim olketa nara teaching wea stap long full Bible, disfala “healthy toktok” savve minim tu evri Bible teaching.

For Timothy, and evri Christian elder tu, datfala plan bilong healthy toktok hem wanfala “gudfala trust” wea olketa mas gardim. (2 Timothy 1:13, 14) Timothy mas “preachim word, hariap for duim long gudfala taem, long hardfala taem, stretem, kaonselem, encouragem, witim full long-safaring and gudfala wei for teach.” (2 Timothy 4:2) Taem iumi lukim wei wea olketa apostate teaching kasem planti ples long taem bilong Timothy, iumi minim why Paul hem strongim tumas wei wea hem important for teachim olketa healthy toktok. Iumi minim tu hao Timothy need for protectim flock long wei for iusim gudfala wei for teach for “stretem, kaonselem, encouragem” olketa witim fasin for long-safaring.

Timothy bae preachim datfala word long hu? Taem iumi lukim full story, hem showimaot hao from Timothy hem wanfala elder, hem bae preachim word insaed Christian kongregeson. Bikos long hevi wea olketa wea againstim hem putim long hem, Timothy need for keepim spiritual wei for balance and for talemaot word bilong God witim fasin for no fraet, no for talemaot olketa teaching bilong man, idea bilong hemseleva, or olketa iusles samting wea no garem eni faondeson. Tru nao, diswan maet mekem samfala wea no garem stretfala tingting for againstim hem. (2 Timothy 1:6-8; 2:1-3, 23-26; 3:14, 15) Nomata olsem, taem hem followim kaonsel bilong Paul, Timothy savve go ahed for satem apostate fasin, olsem Paul hem duim tu.—Acts 20:25-32.

Waswe, toktok bilong Paul abaotem wei for preachim word hem fitim tu wei for preach aotsaed long kongregeson? Yes, hem fitim, bikos story wea stap raonem diswan hem showimaot datwan. Paul sei moa: “Bat iu nao, iusim gudfala tingting long evri samting, stand strong taem iu safa, duim waka for talemaot gud nius, duim evribit ministry bilong iu.” (2 Timothy 4:5) Waka for talemaot gud nius—wei for preachim gud nius bilong salvation long olketa wea no biliv—hem barava important bilong Christian ministry. (Matthew 24:14; 28:19, 20) And olsem wei wea olketa preachim word bilong God insaed kongregeson nomata “long hardfala taem,” iumi tu go ahed for preachim word long olketa wea aotsaed long kongregeson nomata long olketa hardfala taem.—1 Thessalonians 1:6.

Faondeson bilong preaching and teaching waka bilong iumi nao hem Word bilong God. Iumi garem full trust long Bible. Paul talem Timothy: “Evri Scripture hem kam from God and hem gud for teach, for givim kaonsel, for stretem evri samting, for givim discipline long raeteous fasin.” (2 Timothy 3:16) Planti taem iumi iusim toktok hia long stretfala wei for showimaot hao Bible hem kam from God. Bat why nao Paul hem raetem disfala toktok?

Paul hem story long wanfala elder, man wea garem responsibility for “givim kaonsel, for stretem evri samting, for givim discipline long raeteous fasin” insaed long kongregeson. Dastawe, hem talem moa long Timothy for trustim wisdom bilong Word bilong God, wea Timothy lanem from taem hem smol yet. Olsem Timothy, olketa elder mas samfala taem stretem olketa wea duim rong samting. Taem olketa duim datwan, olketa mas olowe trustim Bible. And tu, from olketa Scripture kam from God, evri repruv wea kam from olketa hem really repruv from God. Eniwan wea rejectim repruv from Bible really rejectim, no olketa idea bilong man, bat kaonsel wea kam from Jehovah hemseleva.

Buk bilong Tu Timothy hem barava fulap witim wisdom bilong God! And hem garem moa mining taem iumi ting raonem full story bilong hem! Long disfala article, iumi lukluk nomoa long lelebet part bilong disfala nambawan information wea kam from God wea stap insaed disfala buk, bat hem inaf for showim hao hem savve barava helpem iumi sapos iumi ting raonem full story bilong samting wea iumi readim long Bible. Datwan bae helpem iumi for mek sure dat iumi “iusim word bilong truth long stretfala wei.”

[Footnote]

[Piksa long page 27]

Paul laek for redyim Timothy for protectim olketa kongregeson

[Piksa long page 30]

Paul remindim Timothy for trustim wisdom from Word bilong God