Mekem Chance for Preach Kamap
1 Evriwan insaed Christian kongregeson garem difren kaen living. Nomata olsem, samting wea mekem iumi wan mind nao hem wei wea iumi disaed strong for praisem Jehovah. (Ps. 79:13) Sapos iumi no savve share evribit for talemaot gud nius from health hem no mas gud or eni nara hard samting stopem iumi, hao nao iumi savve mekem chance for preach kamap?
2 Long Evriday Living: Evritaem Jesus mekius long wei wea hem meetim pipol evriday for witness long olketa. Hem story long Matthew taem hem go pas long office for kolektem tax, hem story long Zacchaeus taem hem travel, and story long wanfala Samaritan woman taem hem rest. (Matt. 9:9; Luke 19:1-5; John 4:6-10) Long evriday living, iumi tu savve witness long eniwan iumi story witim. Sapos iumi tekem Bible and olketa tract or brochure witim iumi evritaem, diswan bae encouragem iumi for redi for storyim hope bilong iumi.—1 Pet. 3:15.
3 Waswe, iu faendem hem hard for share evritaem long haos tu haos waka from iu cripple or sik? Lukaotem eni chance for witness long eniwan wea iu meetim or eniwan wea kam long haos. (Acts 28:30, 31) Sapos samfala samting mekem iu for mas stap long haos evritaem, waswe, iu traem wei for witness long telephone or for raetem leta? Wanfala sista raetem leta evritaem long olketa famili member bilong hem wea no Witness. Hem storyim toktok for encouragem man from Bible and olketa experience hem kasem taem hem go preaching.
4 Long Wakples or Skul: Wei wea iumi laek praisem Jehovah tu bae muvim iumi for mekem olketa chance for plantim olketa seed bilong truth kamap long wakples or long skul. Wanfala pablisa wea eit year storyim long olketa long class bilong hem samting wea hem readim long Awake! abaotem moon. Bihaen teacher bilong hem savve long wea nao hem kasem information hia, evritaem disfala teacher acceptim Wastaoa and Awake! from olketa Witness. For putim datfala buk Bible Teach long ples wea olketa narawan long wakples savve lukim maet mekem samfala askem olketa kwestin and diswan maet lead go long chance for iumi givim witness.
5 Waswe, iu savve tingim olketa nara wei for mekem chance for preach kamap long evriday living bilong iu? Iumi laek for mekius long living bilong iumi, long wei for duim best bilong iumi each day for “givim wanfala sakrifaes bilong praise long God.”—Heb. 13:15.