Letem Holy Spirit Leadim Iu and No Disfala World
“Iumi no kasem tingting bilong pipol long disfala world, bat iumi kasem holy spirit bilong God. God givim iumi diswan mekem iumi minim olketa samting wea hem kaen tumas for givim long iumi.”—1 COR. 2:12.
1, 2. (a) Olketa tru Christian insaed wanem kaen faet? (b) Wanem nao olketa kwestin wea iumi bae storyim?
OLKETA tru Christian insaed wanfala faet! Enemy bilong iumi hem barava strong, savve trikim man, and savve tumas hao for faet. Wanfala samting wea hem iusim for faet hem barava spoelem staka pipol finis. Nomata olsem, iumi mas no tingse hem hard for iumi winim hem. (Isa. 41:10) Iumi kasem wanfala samting wea savve protectim iumi from eni samting wea enemy iusim for attakim iumi.
2 Disfala faet hem spiritual faet. Enemy bilong iumi hem Satan, and main samting wea hem iusim for spoelem iumi hem “tingting bilong pipol long disfala world.” (1 Cor. 2:12) Holy spirit nao main samting for protectim iumi. For winim disfala faet and gohed fren gud witim God, iumi mas askem God for holy spirit and showimaot datwan hem leadim iumi. (Gal. 5:22, 23) Bat tingting bilong pipol long world hem start kam from hu, and why nao staka pipol garem datwan? Hao nao bae iumi luksavve sapos tingting hia hem affectim iumi? And wanem nao iumi savve lanem from Jesus abaotem hao for kasem holy spirit and for no letem tingting bilong pipol long world spoelem iumi?
Why Nao Staka Pipol Garem Tingting Bilong World?
3. Tingting bilong pipol long world hem start kam from hu, and hem savve mekem man for duim wanem?
3 Tingting bilong pipol long world hem start kam from Satan, “man wea rulim disfala world.” Olketa wea garem kaen tingting olsem nating followim holy spirit. (John 12:31; 14:30; 1 John 5:19) Disfala tingting savve mekem man for duim samting wea God no hapi long hem and againstim plan bilong God.
4, 5. Wanem nao Satan duim for mekem staka pipol followim tingting bilong world?
4 Wanem nao Satan duim for mekem staka pipol followim tingting bilong world? First samting, long garden bilong Eden Satan trikim Eve. Hem mekem Eve for tingse wei for no stap anda long God bae mekem laef bilong hem gud go moa. (Gen. 3:13) Satan barava laea! (John 8:44) Hem iusim Eve for switim Adam for no obeyim Jehovah tu. From Adam no obey, olketa man born sin. Datwan mekem olketa for garem feeling for no laek obey, wea hem nao wei bilong Satan.—Readim Ephesians 2:1-3.
5 Satan switim staka angel tu and olketa hia kamap demon. (Rev. 12:3, 4) Datwan happen bifor Flood long taem bilong Noah. Olketa angel hia tingse olketa bae kasem gud samting sapos olketa lusim waka bilong olketa long heven, and kam long earth for duim eni nogud samting wea olketa laekem. (Jude 6) Olketa demon hia kamap olketa spirit moa and olketa sapotim Satan for “giamanim olketa man long full earth.” (Rev. 12:9) Sorre samting nao, staka pipol long world no luksavve olketa demon blindim mind bilong olketa.—2 Cor. 4:4.
Waswe, Tingting Bilong Pipol Long World Affectim Iu?
6. Tingting bilong pipol long world bae spoelem iumi sapos iumi duim wanem?
6 Staka pipol no savve long olketa trik bilong Satan, bat olketa tru Christian savve bikos olketa lane abaotem datwan long Bible. (2 Cor. 2:11) Tingting bilong pipol long world bae affectim iumi sapos iumi letem datwan for happen. Bae iumi storyim fofala kwestin wea bae helpem iumi luksavve sapos holy spirit leadim iumi or tingting bilong pipol long world nao affectim iumi.
7. Wanem nao wanfala samting wea Satan iusim for mekem iumi no fren witim Jehovah?
7 Hapitaem wea mi chusim showimaot wanem abaotem mi? (Readim James 3:14-18.) Satan trae for switim iumi for laekem raf fasin mekem iumi no fren witim God. Hem savve Jehovah heitim eniwan wea laekem raf fasin. (Ps. 11:5) So Satan iusim olketa buk, magasin, movie, and olketa video game wea raf and wea mekhae long wei for durong for switim iumi. Nomata iumi laekem samting wea stret, Satan hem hapi taem iumi laekem nogud samting tu.—Ps. 97:10.
8, 9. Olketa wanem kwestin abaotem hapitaem nao iumi need for tingim?
8 Bat holy spirit mekem pipol for klin, stap gud witim narawan, and kaen and sorre long narawan. Tingim diswan: ‘Waswe, hapitaem wea mi chusim hem mekem mi for garem olketa gudfala wei?’ Wisdom wea Jehovah givim hem no mekem iumi for “laea.” Pipol wea kasem holy spirit no talem long narawan olketa mas klin and stap gud witim pipol and long semtaem olketa seleva gohed lukluk long olketa movie wea barava raf and wea pipol durong.
9 Jehovah laekem iumi for worshipim hem nomoa. Bat Satan hapi sapos iumi duim wanfala samting wea showimaot iumi worshipim hem, olsem hem laekem Jesus for duim. (Luke 4:7, 8) Tingim diswan: ‘Waswe, hapitaem wea mi chusim showimaot mi worshipim Jehovah nomoa? Waswe, hapitaem wea mi chusim mekem mi for garem tingting bilong pipol long world? Waswe, mi need for chusim difren kaen hapitaem?’
10, 11. (a) Wanem nao tingting bilong pipol long world abaotem olketa material samting? (b) Bible encouragem iumi for garem wanem kaen tingting?
10 Wanem nao tingting bilong mi abaotem olketa material samting? (Readim Luke 18:24-30.) Tingting bilong pipol long world hem for iumi ‘laekem nogud samting wea eye laekem,’ olsem wei for greedy and garem staka material samting. (1 John 2:16) Kaen tingting olsem hem mekem staka pipol laek for rich. (1 Tim. 6:9, 10) Pipol tingse wei for garem staka material samting bae mekem olketa sef. (Prov. 18:11) Bat sapos iumi laekem tumas selen winim wei for lovem God, Satan hem winim iumi nao. Tingim diswan: ‘Waswe, main samting long laef bilong mi hem for kasem staka material samting and for duim hapitaem?’
11 Bible encouragem iumi for garem stretfala tingting abaotem selen and waka hard for provaedem wanem iumiseleva and famili needim. (1 Tim. 5:8) Olketa wea kasem holy spirit followim wei bilong Jehovah for kaen long narawan. Olketa tinghae long pipol winim olketa material samting and hapi for sharem wanem olketa garem taem olketa fit for duim olsem. (Prov. 3:27, 28) And wei for worshipim God hem first samting long laef bilong olketa winim wei for kasem selen.
12, 13. Long wanem wei nao holy spirit savve helpem iumi for duim gud samting?
12 Waswe, wei bilong mi showimaot holy spirit leadim mi or mi followim tingting bilong pipol long world? (Readim Colossians 3:8-10, 13.) Pipol long world laek for duim olketa nogud samting. (Gal. 5:19-21) Taem eni hard samting kamap, hem nao taem wea iumi bae luksavve sapos holy spirit leadim iumi or iumi followim tingting bilong pipol long world, olsem taem wanfala brata or sista les for story witim iumi, mekem iumi feel nogud, or sin againstim iumi. Taem iumi stap long haos, waswe, iumi kaen long famili bilong iumi? Wanem iumi duim bae showimaot sapos iumi followim holy spirit or tingting bilong pipol long world. Maet iu need for lukluk gud long iuseleva and tingim diswan: ‘Long sixfala month wea go finis, waswe, toktok and wei bilong mi showimaot mi followim Christ or mi followim olketa nogud wei bilong mi bifor?’
13 Holy spirit savve helpem iumi for ‘lusim old wei bilong iumi and garem niufala wei.’ Datwan bae helpem iumi for lovem narawan and kaen long olketa. Bae iumi willing for forgivim narawan nomata sapos hem duim nogud samting long iumi. And taem narawan hem spoelem iumi, bae iumi no ‘feel nogud, laek pei bak, kros, singaot, and tok nogud.’ Iumi bae traem best for “sorre long hem.”—Eph. 4:31, 32.
14. Wanem nao tingting bilong staka pipol long world abaotem Bible?
14 Waswe, mi respectim and tinghae long wanem Jehovah sei hem stret? (Readim Proverbs 3:5, 6.) Staka pipol long world no laek followim wanem Bible talem. Olketa les for followim samfala toktok long Bible bikos olketa tingse hem hard tumas, bat olketa laek followim nomoa kastom and idea bilong man. (2 Tim. 4:3, 4) Samfala les for followim eni samting long Bible. Olketa tingse Bible no fitim iumi, no talem tru samting, and tingse olketa seleva nao wise. Olketa tingse wei for duim adultery, man sleep witim nara man, woman sleep witim nara woman, and wei for divorce hem no bigfala sin. Olketa “sei gud samting hem nogud and nogud samting hem gud.” (Isa. 5:20) Waswe, datkaen tingting affectim iumi? Taem iumi kasem problem, waswe, iumi depend long savve bilong man and tingting bilong iumiseleva, or waswe, iumi trae for followim wanem Bible talem?
15. Winim wei for followim tingting bilong iumiseleva, wanem nao iumi shud duim?
15 Holy spirit helpem iumi for respectim wanem Bible talem. Iumi garem sem tingting olsem man wea raetem psalm. Iumi ting long Bible olsem lamp for leg bilong iumi, and laet for road bilong iumi. (Ps. 119:105) Iumi no followim tingting bilong iumiseleva, bat iumi depend long Bible for helpem iumi luksavve long wanem hem stret and no stret. Iumi lane for respectim wanem Bible talem and laekem tumas for obeyim law bilong God tu.—Ps. 119:97.
Lane From Example Bilong Jesus
16. Wanem nao hem minim for “garem tingting bilong Christ”?
16 Sapos iumi laek for kasem holy spirit, iumi mas “garem tingting bilong Christ.” (1 Cor. 2:16) For “garem sem tingting olsem Christ Jesus” iumi mas savve long hao hem ting long samting and duim samting and then followim example bilong hem. (Rom. 15:5; 1 Pet. 2:21) Tingim samfala samting wea iumi savve duim for followim example bilong hem.
17, 18. (a) Wanem nao iumi lanem from Jesus abaotem prea? (b) Why nao iumi shud “gohed for ask”?
17 Askem God for givim iumi holy spirit. Bifor Jesus kasem hard taem, hem prea long God for givim holy spirit for helpem hem. (Luke 22:40, 41) Iumi tu need for askem God for givim holy spirit long iumi. Jehovah hapi for givim holy spirit long eniwan wea garem faith wea askem hem for datwan. (Luke 11:13) Jesus sei: “Gohed for ask and iufala bae kasem samting wea iufala ask for hem. Gohed for lukaotem samting and iufala bae faendem datwan. Gohed for noknok long door and bae hem open for iufala. Bikos evriwan wea ask bae kasem samting, and evriwan wea lukaotem samting bae faendem datwan, and door bae open for evriwan wea noknok long hem.”—Matt. 7:7, 8.
18 Taem iumi prea long Jehovah for givim holy spirit for helpem iumi, iumi mas no givap for askem datwan. Maet iumi need for prea staka taem and story gud long Jehovah. Samfala taem, Jehovah no kwiktaem for ansarem prea bikos hem laek savve sapos man wea prea hem garem faith and showimaot hem barava laekem wanem hem askem.a
19. Wanem nao Jesus evritaem duim, and why nao iumi shud followim example bilong hem?
19 Obeyim Jehovah long evri samting. Jesus evritaem duim wanem Dadi bilong hem laekem. Long wanfala taem, samting wea Jesus laek duim hem difren from wanem Dadi bilong hem laekem. Nomata olsem, hem sei long Dadi bilong hem: “No duim samting wea mi laekem, [bat] duim nomoa samting wea iu nao laekem.” (Luke 22:42) Tingim diswan: ‘Waswe, mi obeyim God nomata long taem wea hem no isi?’ For kasem laef, iumi mas obeyim God long evri samting bikos God nao wakem iumi and mekem iumi gohed for laef. (Ps. 95:6, 7) Hard for God hapi long iumi sapos iumi no obeyim hem.
20. Wanem nao important samting long Jesus, and hao nao iumi savve followim example bilong hem?
20 Savve gud long Bible. Taem Satan traem Jesus, Jesus talem olketa toktok from Word bilong God for againstim hem. (Luke 4:1-13) Jesus duim sem samting tu taem olketa bigman bilong religion kwestinim hem. (Matt. 15:3-6) Samting wea important long Jesus hem for savve long law bilong God and for mekem datwan kamap tru. (Matt. 5:17) Iumi tu mas gohed for studyim gud Bible mekem datwan strongim faith bilong iumi. (Phil. 4:8, 9) Maet samfala long iumi busy tumas and faendem hem hard for duim study seleva and famili study. Sapos olsem, hem gud for lukluk gud long wanem iu duim and markem taem for study.—Eph. 5:15-17.
21. Wanem arrangement nao kamap wea helpem iumi for minim Bible and followim?
21 “Wakaman wea faithful and wise” helpem iumi for garem taem for duim study seleva and famili study. Olketa mekem arrangement for iumi savve duim Famili Worship evri week. (Matt. 24:45) Waswe, iu followim datfala arrangement? For helpem iu garem tingting bilong Christ, maet iu savve study abaotem olketa samting wea Jesus teachim wea iu interest long hem! Iu savve iusim Watch Tower Publications Index for faendem information abaotem wanem iu laek studyim. Olsem example, start long 2008 go kasem 2010, pablik Wastaoa magasin garem article “Samting Iumi Lanem From Jesus.” Maet iu laek iusim olketa article hia taem iu study. Start long 2006, Awake! magasin garem article “How Would You Answer?” Disfala article garem olketa kwestin wea savve helpem iu for minim gud Bible. Hao sapos iu iusim article olsem taem iu duim Famili Worship?
Iumi Savve Winim World
22, 23. Wanem nao iumi mas duim for winim world?
22 Sapos iumi laekem holy spirit for leadim iumi, iumi mas no followim tingting bilong pipol long world. Hem no isi for duim datwan. Maet iumi mas stragol and traem best bilong iumi. (Jude 3) Nomata olsem, iumi savve winim world! Jesus talem olketa disaepol: “Iufala kasem hard taem long world, bat no fraet! Mi winim world finis.”—John 16:33.
23 Iumi tu savve winim world sapos iumi no followim tingting bilong pipol long world and traem best for kasem holy spirit. Tru tumas, “sapos God hem saedem iumi, no eniwan savve againstim iumi.” (Rom. 8:31) Sapos iumi kasem holy spirit and followim wanem Bible talem, bae iumi satisfae, garem peace, hapi, and garem hope for laef olowe long niu world wea klosap for kam.
[Footnotes]
a For savve moa abaotem diswan, lukim page 170-173 long buk Wanem Nao Really Samting wea Bible Teachim?
Waswe, Iu Tingim Yet?
• Why nao staka pipol garem tingting bilong world?
• Wanem fofala kwestin nao iumi shud tingim?
• Wanem thrifala samting abaotem wei for kasem holy spirit nao iumi lanem from Jesus?
[Piksa long page 8]
Hao nao samfala angel kamap olketa demon?
[Piksa long page 10]
Satan iusim tingting bilong pipol long world for kontrolem narawan bat iumi savve kamap free from datwan