Hambol

Principle: “Iufala mas hambol and ting long narawan olsem hem winim iufala.”—Phil. 2:3.

Wat Paul Duim

Aposol Paul, wea olketa chainim hem witim wanfala gard, story lo wei wea showim respect lo King Agrippa, Governor Festus, and Bernice.

VIDEO: Paul Preach lo King Agrippa

1. Watchim VIDEO, or readim Acts 26:2, 3. Then ting raonem olketa kwestin hia:

Hao nao Paul showim hem hambol taem hem story lo King Agrippa?
Hao nao Paul showim hem mekhae lo Jehovah and Bible winim hemseleva?—Lukim Acts 26:22.

Wat Nao Iumi Lanem From Paul?

2. Pipol bae interest lo message blo iumi if iumi hambol and showim respect taem iumi story.

Followim Example blo Paul

3. No tinghae lo iuseleva. Avoidim wei for duim samting wea mekem man tingse iu nao savve lo evriting and hem no savve lo eniting. Story witim hem lo wei wea showimaot respect.

4. Talem hao message wea iu storyim hem kam from Bible. Olketa toktok wea stap lo Bible savve kasem heart blo pipol. Taem iumi iusim, iumi helpem olketa for trustim Bible.

5. Gohed hambol. No trae for pruvim dat iu nao stret. Iumi no laek for argue. Showim iu hambol taem iu story kaen and luksavve lo wat taem for lusim hem. (Prov. 17:14; Titus 3:2) Taem iu story kaen, maet datwan bae mekem man willing for lisin lo narataem.

LUKIM TU

Rome 12:16-18; 1 Cor. 8:1; 2 Cor. 3:5