Barava Hapi Long Word Bilong God

HAPI nao man wea “hapi long law bilong Jehovah.” Man olsem hem “read smol” long Word bilong God “day and naet.” (Ps. 1:1, 2) Waswe, iu experiencem kaen hapi olsem? Hao nao iu savve mekem hapi wea Word bilong God givim long iu kamap moa big?

Lisin Taem Jehovah Story

No readim olketa word nomoa. Piksarem long mind bilong iu olketa samting wea iu readim. Tingim sapos iu barava herem toktok bilong olketa wea story long scripture. Taem iu readim olketa firstfala chapter bilong Bible, herem Jehovah seleva talemaot each samting wea hem duim for mekem earth fit for man. Lisin taem hem talem Son bilong hem, datfala Nambawan Wakman, hao hem taem nao for wakem olketa firstfala man. Tingim diswan long mind bilong iu: Adam and Eve go againstim God, hem judgem olketa and then aotem olketa from datfala Paradaes. (Genesis, chap. 1-3) Garem feeling for respect long God taem iu readim hao wanfala voice from heven talemaot hao Jesus Christ, hem Son bilong God, wan wea hem lovem, and wea hem sendem for dae for olketa man. (Matt. 3:16, 17) Trae for tingim feeling bilong aposol John taem hem herem Jehovah talemaot: “Lukim! Mi bae mekem evri samting kamap niu.” (Rev. 21:5) Tru nao, for readim Word bilong God long wei olsem hem barava givim man hapi!

Go ahed for readim Bible, and isisi iu bae savve long Jehovah olsem wanfala man wea hem nambawan and wea fitim iumi for barava respectim. Iu bae garem feeling for barava want for kam klosap long Datwan wea lovem iumi, showim mercy long iumi, helpem iumi sapos iumi hambol for no givap for duim will bilong hem, and showim iumi hao for win long evri samting wea iumi duim.—Josh. 1:8; Ps. 8:1; Isa. 41:10.

From iu iusim moa and moa taem for readim Bible, savve bilong iu abaotem wanem nao will bilong God for iu bae grow, and feeling bilong iu for satisfae bae moa big. Bat hapi wea iu garem bae winim datwan. Taem samting wea iu readim provaedem help wea iu needim for deal witim olketa problem long wisefala wei, iu bae feel olsem man wea raetem Psalm taem hem sei: “Olketa kaonsel bilong iu nambawan. Dastawe soul bilong mi followim olketa.” (Ps. 119:129) Bae iu hapi tu taem iu luksavve from olketa scripture, olketa principle wea helpem iu for garem tingting and feeling for wantem samting, wea followim God.—Isa. 55:8, 9.

Bible provaedem kaonsel saed long fasin wea protectim iumi from danger and wea showim iumi stretfala wei for followim. Taem iumi readim Bible, iumi luksavve hao Jehovah hem wanfala Dadi wea savve long olketa problem wea bae kamaot sapos iumi givap long faet for againstim olketa samting wea body wea no perfect wantem. Hem no wantem iumi for safa long olketa barava nogud samting wea mas kamaot from wei for ting nating long olketa haefala mark bilong hem. Hem kea for iumi and wantem iumi for enjoyim best wei bilong living. Wei wea iumi readim Word bilong hem, hem helpem iumi for minim long beta wei hao hem wanfala blessing for garem hem olsem God and Father long heven.

Readim Bible Evriday

Man wea raetem psalm sei olsem abaotem man wea readim Bible evriday: “Evri samting wea hem duim bae win.” (Ps. 1:3) Tru nao, nomata iumi garem olketa wik point, nomata iumi stap insaed long wicked system bilong Satan, and nomata Devil traem eni wei for spoelem iumi, wei for readim Bible evritaem and for followim wanem nao insaed, bae mekem iumi fit for win long evri samting wea affectim wei wea iumi fren witim Jehovah.

From disfala system putim hevi long iumi, wei for kasem and ting raonem tingting bilong Creator, nomata iumi duim for tu-thri minute nomoa evriday, savve strongim iumi. Samfala wea stap long prison bifor from faith bilong olketa, garem nomoa samfala verse wea olketa faendem insaed long niuspepa. Olketa katemaot olketa verse hia from niuspepa, baeheartim, and ting raonem olketa. Jehovah blessim wei wea olketa trae hard long diswan, bikos olketa duim wanem olketa fit for duim for kasem savve from Word bilong God. (Matt. 5:3) Bat, klosap evriwan long iumi garem barava moa freedom winim datwan. Iumi shud no tingse wei for kwiktaem readim wanfala verse bilong Bible evriday bae barava helpem iumi. Bat iumi bae kasem olketa blessing sapos iumi changem lelebet olketa samting wea iumi mas duim, for mekem iumi savve readim wanfala sekson bilong Bible each day, ting raonem, and followim long laef bilong iumi.

Hem tru, samting savve kamap for spoelem gudfala plan bilong iumi. Taem datwan happen, iumi go ahed for duim olketa samting wea moa important. Olsem example, bae iumi no miss for drinkim wata for wan or maet tufala day. So nomata wanem samting hem kamap long evriday living bilong iumi, iumi shud iusim samfala taem for strongim iumiseleva witim olketa wata bilong truth.—Acts 17:11.

Readim Full Word Bilong God

Waswe, iu readim full Bible from start go kasem end? Samfala ting long wei for read from Genesis go kasem Revelation olsem hem tumas nao. Planti pipol wea want for readim full Bible start firstaem witim Christian Greek scripture. Why nao olsem? Maet from hem moa isi for lukim hao olketa scripture hia barava helpem olketa wea want for wakabaot followim olketa step bilong Christ. Or maet from hem luk olsem sekson bilong Christian Greek Scripture no big tumas for readim—smol haf bilong Bible nomoa. Bat bihaen olketa finis readim evriwan long olketa 27 buk hia, olketa start for readim and enjoyim olketa 39 buk bilong Hebrew Scripture. Taem olketa finisim Hebrew Scripture, olketa getius for readim Bible evritaem, so olketa go ahed readim Greek Scripture for mek-tu taem, and olketa nating finis for duim olsem. Mifala encouragem iu for mekem wei for readim Word bilong God samting wea iu duim for full laef bilong iu.

Waswe, eniwan long famili or kongregeson bilong iu no savve read? Waswe sapos iu offer for readim Bible long hem evritaem? Iu bae kasem gudfala samting, and hem tu bae kasem gudfala samting taem hem ting raonem olketa samting wea hem herem and trae for followim long laef bilong hem.—Rev. 1:3.

Gogo, maet iu want for duim samfala spesol project saed long Bible reading bilong iu. Samfala long olketa project hia savve helpem iu for minim long wei wea moabeta, hao olketa difren part bilong Bible join tugeta. Sapos Bible bilong iu garem olketa marginal reference, olketa maet leadim iu go long information abaotem history bilong samting wea iu read abaot and long olketa nara scripture wea provaedem moa information. Olketa maet helpem iu for savve long samting wea lead go for olketa raetem samfala psalm, and tu, samfala leta wea olketa aposol bilong Jesus Christ raetem. Insight on the Scriptures provaedem staka information abaotem pipol, olketa ples, and olketa fasin wea Bible storyim. Olketa chart showimaot wei wea olketa profesi long Bible fulfill, olketa king and profet wea laef long semtaem, and talem wanem nao maet olketa date bilong olketa samting wea Bible storyim.

Taem iu ting raonem olketa samting wea iu lanem, iu bae minim olketa reason why nao samfala samting kamap midolwan long pipol bilong God. Iu bae minim tu why nao Jehovah hem deal olsem witim pipol bilong hem. Iu bae lukim hao Jehovah ting long olketa samting wea olketa gavman, pipol, and man wanwan duim. Diswan bae givim iu moa savve abaotem tingting bilong hem.

History bilong Bible bae kamap samting wea iu moa interest long hem, taem iu piksarem long mind bilong iu ples wea olketa samting happen. Olketa Bible map showim olketa difren part bilong kantri, and tu, haomas kilometer for go long olketa ples. Olsem example, wea nao maet ples wea olketa Israelite katkros long Red Sea? Hao big nao Promis Land? Haomas kilometer nao Jesus wakabaot long hem taem hem go ahed long ministry bilong hem long earth? Wanem nao olketa samting wea Paul lukim long olketa missionary gogo bilong hem? Olketa map and information abaotem lukluk bilong olketa ples bae helpem iu for piksarem long mind bilong iu samting wea iu read abaot. Wea nao iu savve faendem olketa map bilong olketa kantri bilong Bible? Samfala stap insaed long New World Translation of the Holy Scriptures. Insight buk garem 70 map and garem wanfala map index long end bilong firstfala volume. Iusim Watch Tower Publications Index for faendem olketa nara map. Sapos iu no savve kasem olketa buk hia, iusim olketa map wea insaed long Wastaoa for helpem iu long Bible reading bilong iu.

Long Hebrew Scripture, King David praisem Jehovah, taem hem sei: “Tingting bilong iu barava spesol! O God, olketa hia kamap staka tumas!” (Ps. 139:17) Long Christian Greek Scripture, aposol Paul praisem Jehovah bikos Hem “shaen long heart bilong iumi for givim laet from nambawan savve bilong God thru long feis bilong Christ.” (2 Cor. 4:6) David and Paul laef long olketa difren century, bat tufala evriwan barava hapi long Word bilong God. Iu savve garem hapi tu sapos iu markem taem for readim evri samting wea Jehovah givim long iu insaed Word bilong hem.