Niufala Simpol English Wastaoa
MIFALA hapi for talem hao for wanfala year bae iumi garem Wastaoa study magasin long simpol English. Sapos hem helpem staka pipol, bae mifala gohed for printim. Olketa long kongregeson bae kasem datfala magasin long semtaem olsem nara Wastaoa study magasin.
Hem important for evriwan minim information wea iumi studyim long Wastaoa Study evri week. Diswan hem bikos Wastaoa Study hem main wei wea “wakaman wea faithful and wise” teachim pipol bilong God distaem. (Matt. 24:45) Bat why nao iumi needim simpol English Wastaoa?
Staka brata and sista long world go long olketa meeting wea olketa iusim English nomoa, bat plande no minim English wea olketa raetem long Wastaoa. Olsem example, English hem languis wea staka brata long Africa, Asia, and South Pacific story long hem. Olketa brata and sista long olketa kantri hia iusim English long meeting and long preaching waka, bat maet olketa story long languis bilong olketa seleva taem olketa stap long haos. Nara samting, English wea olketa iusim long datfala kantri maet hem difren from English wea olketa raetem long Wastaoa. Samfala brata and sista muv go long kantri wea English nao main languis wea olketa iusim long meeting. Bat hem no isi for olketa minim gud Wastaoa bikos English hem no languis bilong olketa. Samfala young wan wea story long English tu no minim gud English wea olketa raetem long Wastaoa. Simpol English magasin bae helpem staka brata and sista long world for kasem gud samting from Wastaoa Study.
Nomata niu magasin bae iusim simpol English wea difren from nara Wastaoa wea iumi iusim evritaem, tufala evriwan teachim sem samting from Bible. Simpol English Wastaoa bae garem evri paragraf, kwestin, piksa, and review kwestin olsem nara English study magasin. Diswan minim iumi savve iusim eniwan long tufala Wastaoa hia long taem bilong Wastaoa Study. For lukim wei wea tufala Wastaoa hia hem difren, lukim example long daon wea kam from paragraf 2 long firstfala study long disfala Wastaoa.
Mifala savve niu simpol English Wastaoa bae helpem staka brata and sista and olketa young wan tu for redyim Wastaoa Study evri week. Jehovah “lovem evri brata” and iumi thankiu long hem from hem iusim “wakaman wea faithful and wise” for givim evri samting wea iumi needim long barava taem.—1 Pet. 2:17.
Governing Body bilong Olketa Jehovah’s Witness