رومیوں دے ناں خط
12 بھراوو، خدا نے تواڈے تے رحم کیتا اے۔ ایس لئی مَیں مِنت کرنا واں کہ اپنے جسم نُوں اِک ایہو جہی قربانی دے طور تے پیش کرو جیہڑی زندہ، پاک تے خدا نُوں پسند اے۔ نالے اپنی سوچن سمجھن دی صلاحیت نُوں استمال کر کے اوہدی خدمت کرو۔ 2 دُنیا دے لوکاں دی نقل کرنا چھڈ دَوو سگوں اپنی سوچ نُوں بدلو تاکہ تُسی اپنے آپ نُوں پوری طرحاں بدل سکو۔ اِنج توانوں یقین ہو جائے گا کہ خدا دی ہر گل چنگی، نیک تے بالکل صحی اے۔*
3 خدا نے میرے تے عظیم رحمت کیتی اے۔ ایس لئی مَیں توانوں ساریاں نُوں تاکید کرنا واں کہ اپنے آپ نُوں حد توں زیادہ اہم نہ سمجھو سگوں اپنے بارے صحی سوچ رکھو کیونکہ خدا نے ای ہر اِک نُوں ایمان دِتا اے۔* 4 غور کرو کہ جسم دے بوہت سارے حصے ہوندے نیں پر اوہ فرق فرق کم کردے نیں۔ 5 ایسے طرحاں اَسی وی بوہت سارے آں پر مسیح نال اِک مُٹھ ہون دی وجہ توں اِک جسم آں۔ بھانویں کہ اَسی فرق فرق حصیاں وانگوں آں پر اَسی اِکو جسم نال جُڑے ہوئے آں۔ 6 سانوں خدا دی عظیم رحمت دے ذریعے فرق فرق نعمتاں ملیاں نیں۔ جے سانوں پیشینگوئی کرن دی نعمت ملی اے تے آؤ اپنے اپنے ایمان دے مطابق پیشینگوئی کریئے۔ 7 جے سانوں خدمت کرن دی ذمےداری ملی اے تے آؤ اَسی جی جان نال خدمت کریئے۔ جنہوں تلیم دین دی نعمت ملی اے، اوہ مہارت نال تلیم دَوے۔ 8 جنہوں دُوجیاں نُوں حوصلہ* دین دی نعمت ملی اے، اوہ حوصلہ دین چ لگا رہوے۔ جنہوں دُوجیاں چ کجھ وَنڈن* دی نعمت ملی اے، اوہ دل کھول کے وَنڈے۔ جیہڑا پیشوائی کردا اے، اوہ لگن نال پیشوائی کرے۔ جیہڑا رحم کردا اے، اوہ خوشی نال دُوجیاں تے رحم کرے۔
9 دُوجیاں نال سچی* محبت کرو۔ بُرائی نال سخت نفرت کرو تے ہمیشاں بھلائی کرو۔* 10 اِک دُوجے نال بھین بھراواں وانگوں دِلوں پیار کرو تے نرمی نال پیش آؤ۔ اِک دُوجے دی عزت کرن چ پہل کرو۔ 11 محنت کرو تے سُستی نہ کرو۔ پاک روح دے ذریعے جوش نال بھرے رہوو۔* پورے دل نال یہوواہ دی غلامی کرو۔ 12 اپنی امید دی وجہ توں خوش رہوو۔ صبر نال مصیبتاں نُوں برداشت کرو۔ دُعا کرن چ لگے رہوو۔ 13 اپنیاں چیزاں نال ضرورتمند بھین بھراواں* دی مدد کرو۔ مہماننوازی وکھان دے موقعے لبھو۔ 14 جیہڑے تواڈے تے ظلم کردے نیں، اوہناں لئی دُعا کرو۔ اوہناں نُوں بُرا بھلا کہن دی بجائے اوہناں لئی برکت منگو۔ 15 خوشی منان والیاں نال خوشی مناؤ تے رون والیاں نال رووو۔ 16 دُوجیاں دی وی اونی فکر کرو جِنّی تُسی اپنی کردے او۔ اپنے آپ نُوں وڈا نہ سمجھو سگوں خاکسار بنو۔ ایہہ نہ سوچو کہ تُسی باقی لوکاں نالوں بوہتے سمجھدار او۔*
17 بُرائی دے بدلے بُرائی نہ کرو۔ اوہ کم کرو جیہڑا سارے لوکاں دی نظر چ صحی ہوئے۔ 18 اپنے وَلّوں سارے لوکاں نال صلح قائم رکھن دی پوری کوشش کرو۔ 19 پیارے بھینو تے بھراوو، بدلہ نہ لوو سگوں خدا نُوں اپنا غصہ ظاہر کرن دَوو کیونکہ پاک کلام چ لکھیا اے: ”یہوواہ کہندا اے: ”بدلہ لینا میرا کم اے، مَیں سزا دَواں گا۔““ 20 پر ”جے تیرے دُشمن نُوں بُھکھ لگی اے تے اوہنوں کھانا دے۔ جے اوہنوں پیاس لگی اے تے اوہنوں پین لئی کجھ دے۔ ایہہ ویکھ کے اوہ شاید حیران ہووے تے اوہدا دل نرم ہو جائے۔“* 21 بُرائی نُوں جِتن نہ دَوو سگوں چنگے کم کر کے بُرائی نُوں ہراؤ۔