یہوواہ سانوں نوِیں دُنیا دے وعدے دا یقین کیویں دَواندا اے؟‏

1.‏ یسعیاہ نبی بنی‌اِسرائیل نُوں یہوواہ بارے کیہہ دَس رہیا سی؟‏

یسعیاہ نبی نے یہوواہ بارے کہیا کہ اوہ سچائی دا خدا اے۔ (‏یسعیاہ 65:‏16)‏ ایس ایت چ جیہڑے لفظ دا ترجمہ سچائی کیتا گیا اے، اوہدا مطلب اے ”‏آمین۔“‏ ”‏آمین“‏ دا مطلب اے ”‏اِنج ای ہوئے“‏ یاں ”‏یقیناً۔“‏ بائبل چ جدوں ایہہ لفظ یہوواہ یاں یسوع لئی استمال ہوندا اے تے ایہدے توں ظاہر ہوندا اے کہ اوہناں نے جیہڑی گل کہی اے، اوہ بالکل سچ اے۔ ایہدے توں پتہ چلدا اے کہ جدوں یسعیاہ نبی یہوواہ نُوں سچائی دا خدا کہہ رہیا سی تے اوہدے کہن دا مطلب ایہہ سی کہ یہوواہ جو وی کہندا اے، اوہ ضرور پورا ہوندا اے۔ اوہنے ایہہ گل اپنے وعدیاں نُوں پورا کر کے ثابت کیتی اے۔‏

2.‏ (‏الف)‏ اَسی ایس گل تے پورا یقین کیوں رکھ سکنے آں کہ یہوواہ نے مستقبل بارے جیہڑے وعدے کیتے نیں، اوہ ضرور پورے ہون گے؟ (‏ب)‏ایس مضمون چ اَسی کیہڑے سوالاں تے غور کراں گے؟‏

² کیہہ اَسی ایس گل تے وی بھروسا رکھ سکنے آں کہ یہوواہ نے مستقبل بارے جیہڑے وعدے کیتے نیں، اوہ وی ضرور پورے ہون گے؟ یسعیاہ نبی توں تقریباً 800 سال بعد پولُس رسول نے دَسیا کہ خدا دے وعدیاں تے بھروسا کیوں کیتا جا سکدا اے۔ اوہنے کہیا:‏ خدا جھوٹھ نئیں بول سکدا۔ (‏عبرانیوں 6:‏18‏)‏ جیویں اِک مِٹھے پانی دے چشمے توں کھارا پانی نئیں نکل سکدا، اونویں ای یہوواہ سچائی دا خدا اے ایس لئی اوہ جھوٹھ نئیں بول سکدا۔ ایس وجہ توں اَسی یہوواہ دی کہی ہر گل تے اکھاں بند کر کے یقین کر سکنے آں تے ایہناں گلاں چ مستقبل بارے اوہدے وعدے وی شامل نیں۔ ایس مضمون چ اَسی ایہناں سوالاں تے غور کراں گے:‏ یہوواہ نے مستقبل بارے کیہڑا وعدہ کیتا اے؟ تے اوہنے ایہہ یقین کیویں دَوایا اے کہ اوہ اپنا ایہہ وعدہ ضرور پورا کرے گا؟‏

یہوواہ نے کیہہ وعدہ کیتا اے؟‏

3.‏ (‏الف)‏ یہوواہ دے بندیاں لئی اوہدا کیہڑا وعدہ بوہت خاص اے؟ (‏مکاشفہ 21:‏3، 4‏)‏ (‏ب)‏جدوں اَسی لوکاں نُوں ایہہ وعدہ دَسنے آں تے اوہناں وچوں کجھ لوک کیہہ کہندے نیں؟‏

³ ایس مضمون چ اَسی یہوواہ دے جیہڑے وعدے تے غور کراں گے، اوہ دُنیا بھر چ رہن والے اوہدے بندیاں لئی بوہت خاص اے۔ ‏(‏مکاشفہ 21:‏3، 4 نُوں پڑھو۔)‏ یہوواہ نے وعدہ کیتا اے کہ اِک ایہو جیہا وقت آئے گا جدوں نہ موت رہوے گی، نہ ماتم، نہ رونا، نہ درد۔ ساڈے وچوں بوہت سارے بھین بھرا ایس زبردست وعدے نُوں مُنادی دے دوران لوکاں نُوں دَسدے نیں۔ پر کجھ لوک شاید ایہہ وعدہ سُن کے کہن کہ ”‏یقین نئیں ہوندا کہ واقعی اِنج کدی ہوئے گا۔“‏

4.‏ (‏الف)‏ یہوواہ مکاشفہ 21:‏3، 4 چ لکھے وعدے بارے کیہڑیاں گلاں جان‌دا سی؟ (‏ب)‏یہوواہ نے ایس وعدے بارے دَسن توں علاوہ ہور کیہہ دَسیا؟‏

⁴ جدوں یہوواہ نے یوحنا رسول دے ذریعے مکاشفہ 21:‏3، 4 لکھوائی تے اوہنوں پتہ سی کہ اَسی ایہناں ایتاں چ لکھے وعدے نُوں بادشاہی دا پیغام سُناندے ویلے لوکاں نُوں دساں گے۔ یہوواہ ایہہ وی جان‌دا سی کہ لوکاں نُوں ایس وعدے تے یقین کرنا مشکل لگے گا۔ (‏یسعیاہ 42:‏9؛ 60:‏2؛‏ 2-‏کُرنتھیوں 4:‏3، 4‏)‏ تے فیر اَسی اپنے آپ نُوں تے دُوجیاں نُوں ایس گل دا یقین کیویں دَوا سکنے آں کہ ایہناں ایتاں چ جیہڑیاں گلاں لکھیاں نیں، اوہ ضرور پوریاں ہون گیاں؟ یہوواہ نے ساڈے نال صرف ایہہ زبردست وعدہ ای نئیں کیتا سگوں اوہ گلاں وی دَسیاں نیں جنہاں دی وجہ توں اَسی ایس وعدے تے بھروسا رکھ سکنے آں۔ اوہ گلاں کیہہ نیں؟‏

یہوواہ اپنے وعدے نُوں پورا کرن دا یقین دَواندا اے

5.‏ اَسی کیہڑیاں گلاں دی وجہ توں نوِیں دُنیا بارے خدا دے وعدے تے یقین رکھ سکنے آں تے ایہہ گلاں کتھے لکھیاں نیں؟‏

⁵ مکاشفہ 21:‏5، 6 توں سانوں یقین ہو جاندا اے کہ یہوواہ نوِیں دُنیا دے اپنے وعدے نُوں ضرور پورا کرے گا۔ ایہناں ایتاں چ لکھیا اے:‏ جیہڑا تخت تے بیٹھا سی، اوہنے کہیا:‏ ”‏ویکھو، مَیں سب کجھ نواں بنا رہیا واں۔“‏ اوہنے ایہہ وی کہیا:‏ ”‏ایہناں گلاں نُوں لکھ لے کیونکہ ایہہ بھروسے‌مند تے سچیاں نیں۔“‏ فیر اوہنے مینوں کہیا:‏ ”‏ایہہ گلاں پوریاں ہو چُکیاں نیں۔ مَیں الفا تے اومیگا واں، مَیں ای شروع تے آخر آں۔“‏

6.‏ مکاشفہ 21:‏5، 6 توں خدا دے وعدے تے ساڈا بھروسا کیوں ودھدا اے؟‏

⁶ ایہناں ایتاں دی وجہ توں خدا دے وعدیاں تے ساڈا بھروسا کیوں ودھدا اے؟ ایہناں ایتاں چ لکھیاں گلاں اِنج ای نیں جیویں یہوواہ لکھ کے ایہہ یقین دَوا رہیا اے کہ اوہ اپنے وعدے نُوں ضرور پورا کرے گا تے ایہدے آخر چ اوہ دستخط وی کر رہیا اے۔ مکاشفہ 21:‏3، 4 چ یہوواہ دا وعدہ لکھیا اے تے 5 تے 6 ایت چ لکھیاں گلاں اوہدے دستخط وانگوں نیں۔ آؤ ویکھنے آں کہ ایہناں ایتاں چ یہوواہ نے سانوں یقین دَوان لئی کیہڑے لفظ استمال کیتے نیں۔‏

7.‏ مکاشفہ 21:‏5 چ لکھی گل کنہے کہی سی تے ایہدے بارے جاننا ایناں اہم کیوں اے؟‏

⁷ مکاشفہ 21:‏5 دے شروع چ لکھیا اے:‏ جیہڑا تخت تے بیٹھا سی، اوہنے کہیا۔ مکاشفہ دی کتاب چ صرف تِن ایہو جہے موقعے نیں جتھے یہوواہ نے آپ گل کیتی تے 5 ایت چ لکھی گل اوہناں وچوں اِک اے۔ ایہدا مطلب اے کہ 5 تے 6 ایت چ کسے فرشتے یاں یسوع نے نئیں سگوں یہوواہ نے آپ اپنے وعدے نُوں پورا کرن دا یقین دَوایا اے۔ ایس وجہ توں ساڈا اوس گل تے بھروسا ہور ودھ جاندا اے جیہڑی 5 ایت چ اَگے کہی گئی۔ایہدی کیہہ وجہ اے؟ کیونکہ یہوواہ جھوٹھ نئیں بول سکدا۔ (‏طِطُس 1:‏2‏)‏ ایہدا مطلب اے کہ اَسی مکاشفہ 21:‏5، 6 چ لکھی گل تے پورا بھروسا کر سکنے آں۔‏

ویکھو، مَیں سب کجھ نواں بنا رہیا واں

8.‏ یہوواہ نے ایس گل تے کیویں زور دِتا کہ اوہ اپنے وعدے نُوں ضرور پورا کرے گا؟ (‏یسعیاہ 46:‏10)‏

⁸ آؤ غور کرنے آں کہ ایس توں بعد یہوواہ نے کیہہ کہیا۔ اوہنے کہیا:‏ ویکھو۔ (‏مکاشفہ 21:‏5‏)‏ جیس یونانی لفظ دا ترجمہ ”‏ویکھو“‏ کیتا گیا اے، اوہ مکاشفہ دی کتاب چ وار وار استمال ہویا اے۔ اِک کتاب چ ایہدے بارے دَسیا گیا اے کہ لفظ ”‏ویکھو“‏ ایس لئی استمال ہویا اے تاکہ ”‏پڑھن والا بندہ اگلی گل تے دھیان دَوے۔“‏ ایس توں بعد یہوواہ نے کیہہ کہیا؟ اوہنے کہیا:‏ مَیں سب کجھ نواں بنا رہیا واں۔ سچ اے کہ یہوواہ دَس رہیا سی کہ اوہ مستقبل چ کیہہ کجھ کرے گا۔ پر اوہنوں اپنے وعدے تے ایناں پکا یقین سی کہ اوہ اِنج گل کر رہیا سی جیویں اوہنے تبدیلیاں کرنیاں شروع کر دِتیاں نیں۔‏‏—‏یسعیاہ 46:‏10 نُوں پڑھو۔‏

9.‏ (‏الف)‏ ایس گل دا کیہہ مطلب اے کہ یہوواہ سب کجھ نواں بنا دَوے گا؟ (‏ب)‏ہُن جیہڑا اسمان تے زمین موجود اے، اوہدے نال کیہہ ہوئے گا؟‏

⁹ آؤ ہُن اَسی مکاشفہ 21:‏5 چ لکھی ایس گل تے غور کرنے آں:‏ سب کجھ نواں بنانا۔ ایہہ گل یہوواہ دے دو کماں وَل اشارہ کردی اے:‏ پہلا کم ایہہ کہ اوہ پرانیاں چیزاں نُوں ختم کرے گا تے دُوجا کم ایہہ کہ اوہ ساریاں چیزاں نُوں نواں بنا دے گا۔ مکاشفہ 21:‏1 چ لکھیا اے:‏ پہلا اسمان تے پہلی زمین مٹ گئی۔ پُرانے اسمان توں مُراد دُنیا دِیاں حکومتاں نیں جنہاں تے شیطان تے بُرے فرشتیاں دا اثر اے۔ (‏متی 4:‏8، 9؛‏ 1-‏یوحنا 5:‏19‏)‏ تے بائبل چ لفظ زمین اکثر ایہدے تے رہن والے لوکاں وَل اشارہ کردا اے۔ (‏پیدایش 11:‏1؛ زبور 96:‏1)‏ ایہدا مطلب اے کہ پرانی زمین توں مُراد زمین تے رہن والے بھیڑے لوک نیں۔ یہوواہ اوس زمین تے اسمان چ صرف بہتری نئیں لیائے گا جیہڑی ہُن موجود اے سگوں اوہ ایہناں نُوں پوری طرحاں ختم کر دَوے گا تے ایہدی جگہ نوِیں حکومت بنائے گا جدے چ نیک لوک رہن گے۔‏

10.‏ یہوواہ کنہاں نُوں نواں بناوے گا؟‏

¹⁰ مکاشفہ 21:‏5 چ اَسی پڑھنے آں کہ یہوواہ نے اوہناں چیزاں بارے کیہہ کہیا جنہاں نُوں اوہ نواں بنائے گا۔ غور کرو کہ یہوواہ نے ایہہ نئیں کہیا کہ ”‏مَیں ساریاں نوِیاں چیزاں بنا رہیا واں۔“‏ ایہدی بجائے اوہنے کہیا کہ ”‏مَیں ساریاں چیزاں نُوں نواں بنا رہیا واں۔“‏ یہوواہ زمین تے ایہدے تے رہن والے انساناں نُوں اِنج نواں بنائے گا کہ اوہ اوہناں نُوں ہر طرحاں دے عیب توں پاک کر دَوے گا۔ یسعیاہ نبی دی پیشین‌گوئی دے مطابق یہوواہ پوری زمین نُوں عدن دے باغ وانگوں خوب‌صورت بنا دَوے گا۔ اوہ ساڈیاں بیماریاں نُوں وی ٹھیک کر دَوے گا۔اوہدوں لنگڑے چلن گے، اَنھے ویکھن گے تے بولے سُنن گے، ایتھوں تک کہ مُردے وی زندہ ہو جان گے۔—‏یسعیاہ 25:‏8؛ 35:‏1-‏7۔‏

ایہہ گلاں بھروسے‌مند تے سچیاں نیں .‏ .‏ .‏ ایہہ گلاں پوریاں ہو چُکیاں نیں

11.‏ یہوواہ نے یوحنا نُوں کیہڑا حکم دِتا تے ایہدی کیہہ وجہ دَسی؟‏

¹¹ یہوواہ نے اپنے وعدے دا یقین دَوان لئی ہور کیہہ کہیا؟ اوہنے یوحنا رسول نُوں کہیا:‏ ”‏ایہناں گلاں نُوں لکھ لے کیونکہ ایہہ بھروسے‌مند تے سچیاں نیں۔“‏ (‏مکاشفہ 21:‏5‏)‏ یہوواہ نے یوحنا نُوں ایہہ گلاں صرف لکھن لئی نئیں کہیا سگوں ایہناں نُوں لکھن دی وجہ وی دَسی۔ اوہنے کہیا:‏ کیونکہ ایہہ گلاں بھروسے‌مند تے سچیاں نیں۔ شکر اے کہ یوحنا نے یہوواہ دا حکم من کے ایہہ گلاں لکھ لئیاں کیونکہ ایس وجہ توں اَسی بائبل چ زمین بارے خدا دے وعدے نُوں پڑھ سکنے آں تے اوہناں برکتاں تے سوچ وچار کر سکنے آں جیہڑیاں سانوں نوِیں دُنیا چ مِلن گیاں۔‏

12.‏ یہوواہ نے ایہہ کیوں کہیا کہ ایہہ گلاں پوریاں ہو چُکیاں نیں؟‏

¹² یہوواہ نے اَگے کیہہ کہیا؟ اوہنے کہیا:‏ ایہہ گلاں پوریاں ہو چُکیاں نیں۔ (‏مکاشفہ 21:‏6‏)‏ یہوواہ اِنج گل کر رہیا سی جیویں نوِیں دُنیا بارے اوہنے جیہڑیاں وی گلاں دَسیاں نیں، اوہ پوریاں ہو چُکیاں نیں۔ تے اوہ اِنج کہہ وی سکدا اے کیونکہ کوئی وی چیز اوہنوں اوہدے مقصد نُوں پورا کرن توں نئیں روک سکدی۔ ایہدے بعد یہوواہ نے اِک ہور گل وی کہی جدے ذریعے اوہنے یقین دَوایا کہ اوہ اپنے وعدے نُوں ضرور پورا کرے گا۔ اوہ کیہڑی گل اے؟‏

مَیں الفا تے اومیگا واں

13.‏ یہوواہ نے ایہہ کیوں کہیا کہ مَیں الفا تے اومیگا واں؟‏

¹³ جیویں کہ پہلے دَسیا گیا، یہوواہ نے یوحنا نُوں رویاواں وکھاندے ویلے تِن موقعیاں تے آپ اوہدے نال گل کیتی۔ (‏مکاشفہ 1:‏8؛‏ 21:‏5، 6؛‏ 22:‏13‏)‏ ایہناں تِناں موقعیاں تے یہوواہ نے کہیا:‏ مَیں الفا تے اومیگا واں۔ الفا یونانی زبان دا پہلا حرف تے اومیگا آخری حرف اے۔ جدوں یہوواہ نے کہیا کہ مَیں الفا تے اومیگا واں تے اوہ ایہہ ظاہر کر رہیا سی کہ جدوں اوہ کوئی کم شروع کردا اے تے اوہنوں ضرور پورا کردا اے۔‏

14.‏ (‏الف)‏ یہوواہ نے ”‏الفا“‏ کدوں کہیا تے اوہ ”‏اومیگا“‏ کدوں کہوے گا؟ (‏ب)‏پیدایش 2:‏1-‏3 توں سانوں کیس گل دا یقین ہو جاندا اے؟‏

¹⁴ جدوں یہوواہ نے آدم تے حوا نُوں بنایا تے اوہنے اوہناں نُوں دَسیا کہ اوہدا کیہہ مقصد اے۔ بائبل چ ایہدے بارے ایہہ لکھیا اے:‏ خدا نے اوہناں نُوں برکت دِتی تے کہیا کہ ودھو تے پھلو تے زمین نُوں بھر دیو۔ (‏پیدایش 1:‏28)‏ اوس ویلے یہوواہ نے اِک لحاظ نال ”‏الفا“‏ کہیا۔ اوہنے اپنا مقصد صاف صاف دَسیا یعنی کہ اوہنے دَسیا کہ اِک ایہو جیہا وقت آئے گا جدوں آدم تے حوا دی اولاد وچوں بے‌عیب تے فرمانبردار انسان زمین نُوں بھر دین گے تے ایہنوں عدن دے باغ وانگوں سوہنا بنا دین گے۔ اوس ویلے یہوواہ اِک لحاظ نال کہوے گا ”‏اومیگا۔“‏جدوں یہوواہ نے اسمان تے زمین تے ایہدیاں ساریاں چیزاں نُوں بنا لیا تے اوہنے اِک ایہو جہی گل کہی جدے توں سانوں ایہہ یقین ہو جاندا اے کہ اوہ اپنے مقصد نُوں ضرور پورا کرے گا۔ ایہہ گل پیدایش 2:‏1-‏3 چ لکھی اے‏۔ (‏ایہناں ایتاں نُوں پڑھو۔)‏ ایہناں ایتاں چ یہوواہ نے کہیا کہ ستواں دن پاک اے۔ اوہنے ایہہ گل کیوں کہی؟ ایس گل توں اوہنے یقین دَوایا کہ اوہ ستویں دن دے آخر تک زمین تے انساناں لئی اپنے مقصد نُوں پورا کر لوے گا۔‏

15.‏ شیطان نُوں ایہہ کیوں لگیا ہوئے گا کہ اوہنے یہوواہ دے مقصد نُوں ناکام بنا دِتا اے؟‏

¹⁵ جدوں آدم تے حوا نے یہوواہ دی نافرمانی کیتی تے اوہ گُناہ‌گار بن گئے تے اوہناں نے اپنی اولاد نُوں وی گُناہ تے موت ورثے چ دِتی۔ (‏رومیوں 5:‏12‏)‏ ایس وجہ توں شیطان نُوں لگیا ہوئے گا کہ ہُن خدا اپنے ایس مقصد نُوں کدی پورا نئیں کر سکے گا کہ بے‌عیب تے فرمانبردار انسان زمین نُوں بھر دین۔ شاید اوہنوں ایہہ وی لگ رہیا ہوئے گا کہ ہُن یہوواہ کدی ”‏اومیگا“‏ نئیں کیہہ سکے گا۔ اوہنے سوچیا ہوئے گا کہ ہُن یہوواہ کر ای کیہہ سکدا اے۔ اوہ ایہی کر سکدا اے کہ اوہ آدم تے حوا نُوں ختم کر کے اوہناں دی جگہ اِک ہور جوڑا بنائے جیہڑا اوہدے مقصد نُوں پورا کر سکے۔ پر جے خدا اِنج کردا تے شیطان اوہدے تے اِلزام لاندا کہ اوہ جھوٹھا اے۔ پر کیوں؟ کیونکہ پیدایش 1:‏28 چ یہوواہ نے آدم تے حوا نُوں کہیا سی کہ اوہناں دی اولاد پوری زمین نُوں بھر دَوے گی۔‏

16.‏ شیطان نے ایہہ کیوں سوچیا ہوئے گا کہ اوہ یہوواہ نُوں ناکام ہون دا طعنہ مار سکدا اے؟‏

¹⁶ شیطان نے ہور کیہہ سوچیا ہوئے گا؟ اوہنے سوچیا ہوئے گا کہ یہوواہ کول اِک ہور حل ایہہ وے کہ اوہ آدم تے حوا نُوں اولاد پیدا کرن دی اجازت دَوے جیہڑی کدی وی بے‌عیب نئیں ہو سکے گی۔ (‏واعظ 7:‏20؛‏ رومیوں 3:‏23‏)‏ جے یہوواہ اِنج کردا تے شیطان اوہنوں ناکام ہون دا طعنہ ماردا۔ پر کیوں؟ کیونکہ یہوواہ دا تے ایہہ مقصد سی کہ آدم تے حوا دی اولاد وچوں بے‌عیب تے فرمانبردار لوک زمین نُوں بھر دین۔‏

17.‏ یہوواہ نے شیطان تے آدم تے حوا دی نافرمانی توں بعد کیہہ حل کڈھیا تے ایہدا کیہہ نتیجہ نکلے گا؟ (‏تصویر نُوں وی ویکھو۔)‏

¹⁷ بھانویں کہ شیطان تے آدم تے حوا دی نافرمانی دی وجہ توں یہوواہ دے مقصد دی راہ چ رکاوٹ کھڑی ہو گئی پر اوہنے اپنے مقصد نُوں پورا کرن لئی اِک ایہو جیہا حل کڈھیا جدے بارے شیطان نے سوچیا وی نئیں ہوئے گا۔ (‏زبور 92:‏5)‏ یہوواہ نے آدم تے حوا نُوں بچے پیدا کرن دی اجازت دِتی تے اِنج اوہ سچا ثابت ہویا۔ اوہنے ثابت کیتا کہ اوہ ناکام نئیں ہوندا سگوں جیہڑی گل اوہ کہہ دیندا اے، اوہنوں ضرور پورا کردا اے۔ اوہنے اپنے مقصد نُوں پورا کرن لئی اِک نسل دے آن دا وعدہ کیتا جیہڑی آدم تے حوا دی اولاد وچوں وفادار لوکاں نُوں بچائے گی۔ ایہہ نسل یسوع مسیح سی جنہے انساناں نُوں بچان لئی اپنی جان فدیے دے طور تے دینی سی۔ (‏پیدایش 3:‏15؛ 22:‏18)‏ شیطان ایس گلوں حیران رہ گیا ہوئے گا۔ پر کیوں؟ کیونکہ فدیہ یہوواہ دی محبت دا ثبوت اے تے ایہہ خوبی شیطان چ نئیں ا ے۔ (‏متی 20:‏28؛‏ یوحنا 3:‏16‏)‏ فدیے دے بندوبست دی وجہ توں کیہہ کجھ ہو سکے گا؟ یسوع دی ہزار سالہ حکمرانی دے بعد آدم تے حوا دی اولاد وچوں بے‌عیب تے وفادار لوک زمین تے وَسن گے، بالکل اُنج ای جیویں شروع توں یہوواہ دا مقصد سی۔ اوس ویلے یہوواہ اِک لحاظ نال کہوے گا ”‏اومیگا۔“‏

اَسی نویں دُنیا دے وعدے تے اپنے بھروسے نُوں کیویں مضبوط کر سکنے آں؟‏

18.‏ کیہڑیاں تِن گلاں توں سانوں یقین ہو جاندا اے کہ یہوواہ اپنے وعدے نُوں ضرور پورا کرے گا؟ (‏بکس ‏”‏تِن گلاں جنہاں دی وجہ توں اَسی یہوواہ دے وعدے تے بھروسا رکھ سکنے آں‏“‏ نُوں وی ویکھو۔)‏

¹⁸ ایس مضمون چ اَسی جو کجھ سکھیا اے، اوہدی بنا تے اَسی دُوجیاں نُوں ایہہ کیویں دَس سکنے آں کہ نوِیں دُنیا ضرور آئے گی؟ سب توں پہلاں اَسی اوہناں نُوں ایہہ دَس سکنے آں کہ یہوواہ نے آپ نوِیں دُنیا دا و عدہ کیتا اے۔ مکاشفہ دی کتاب چ ایس بارے لکھیا اے:‏ جیہڑا تخت تے بیٹھا سی، اوہنے کہیا:‏ ”‏ویکھو، مَیں سب کجھ نواں بنا رہیا واں۔“‏ یہوواہ اپنے وعدے نُوں پورا وی کرنا چاہندا اے تے ایہنوں پورا کرن لئی اوہدے کول حکمت تے طاقت وی اے۔ دُوجی گل اَسی ایہہ دَس سکنے آں کہ یہوواہ دی نظر چ اوہدا وعدہ پورا ہو چُکیا اے۔ ایسے لئی اوہ کہہ سکدا اے:‏ ایہہ گلاں بھروسے‌مند تے سچیاں نیں۔ .‏ .‏ .‏ ایہہ پوریاں ہو چُکیاں نیں۔ تیجی گل اَسی ایہہ دَس سکنے آں کہ جدوں یہوواہ کوئی گل کہندا اے تے اوہ اوہنوں ضرور پورا کردا اے۔ ایس لئی اوہنے کہیا:‏ مَیں الفا تے اومیگا واں۔ یہوواہ شیطان نُوں جھوٹھا تے ناکام ضرور ثابت کرے گا۔‏

19.‏ جدوں کسے نُوں نوِیں دے وعدے تے یقین کرنا مشکل لگدا اے تے تُسی کیہہ کر سکدے او؟‏

¹⁹ جدوں وی تُسی مُنادی چ لوکاں نُوں یہوواہ دے وعدیاں بارے دَسدے او تے تواڈا اپنا بھروسا ایہناں تے ودھدا اے۔ اگلی وار جدوں تُسی کسے نُوں مکاشفہ 21:‏4 چ لکھے وعدے بارے دَسو تے جواب چ اوہ توانوں کہوے کہ پتہ نئیں ایہہ پورا ہوئے گا یاں نئیں تے اوہدوں تُسی کیہہ کر سکدے او؟ تُسی 5 تے 6 ایت وی پڑھ سکدے او تے ایہدی وضاحت کر سکدے او۔ اوہنوں دَسو کہ کیویں یہوواہ نے اپنے وعدے تے دستخط کر کے ایہہ یقین دَوایا اے کہ اوہ ایہنوں ضرور پورا کرے گا۔—‏یسعیاہ 65:‏16۔‏