اوس شہر دا اِنتظار کرو جیہڑا ہمیشاں قائم رہوے گا

1.‏ یسوع نے یروشلم بارے کیہڑی پیشین‌گوئی کیتی؟‏

اپنی موت توں کجھ دن پہلاں یسوع نے اپنے شاگرداں نُوں شہر یروشلم تے ہیکل بارے اِک پیشین‌گوئی دَسی۔ ایہہ پیشین‌گوئی پہلی وار اوہدوں پوری ہوئی جدوں پہلی صدی چ یروشلم تے ہیکل نُوں تباہ کیتا گیا۔ یسوع نے اوہناں نُوں آگاہ کیتا کہ اِک وقت آئے گا جدوں فوجاں یروشلم نُوں ”‏گھیر“‏ لین گیاں۔ (‏لُوقا 21:‏20‏)‏ اوہنے اوہناں نُوں ایہہ وی کہیا کہ جیویں ای اوہ ویکھن کہ فوجاں نے یروشلم نُوں گھیر لیا اے تے اوہ فوراً یروشلم چھڈ کے چلے جان۔ یسوع دی ایہہ پیشین‌گوئی سچ ثابت ہوئی تے اِک وقت آیا جدوں رومی فوجاں نے یروشلم نُوں گھیر لیا۔—‏لُوقا 21:‏21، 22‏۔‏

2.‏ پولُس رسول نے یروشلم تے یہودیہ چ رہن والے مسیحیاں نُوں کیہہ نصیحت کیتی؟‏

² ایس واقعے توں کجھ ای سال پہلاں پولُس نے یہودیہ تے یروشلم چ رہن والے مسیحیاں نُوں اِک خط لکھیا جدے چ اوہنے مسیحیاں نُوں اِک بڑا اہم پیغام دِتا۔ اَج ایس خط نُوں عبرانیوں دے ناں خط کہیا جاندا اے۔ ایس خط چ پولُس نے مسیحیاں نُوں کجھ ایہو جہیاں نصیحتاں کیتیاں جنہاں دے ذریعے اوہ اپنے آپ نُوں آن والے وقت لئی تیار کر سکدے سن۔ پر بوہت چھیتی کیہہ ہون والا سی؟ یروشلم تباہ ہون والا سی۔ ایس مشکل وقت چ اپنی جان بچان لئی ایہناں مسیحیاں نُوں اپنا گھر بار تے اپنا کاروبار چھڈن لئی تیار رہن دی لوڑ سی۔ پولُس نے عبرانی مسیحیاں نُوں ایہہ لکھیا:‏ ایتھے ساڈا کوئی ایہو جیہا شہر نئیں جیہڑا قائم رہوے سگوں اَسی اوس شہر دا بے‌صبری نال اِنتظار کر رہے آں جیہڑا آن والا اے۔—‏عبرانیوں 13:‏14‏۔‏

3.‏ اوہ کیہڑا شہر اے جدیاں بنیاداں مضبوط نیں تے سانوں اوہدا اِنتظار کیوں کرنا چاہی دا اے؟‏

³ بوہت سارے لوکاں نے اوہناں مسیحیاں دا مذاق اُڈایا ہوئے گا جنہاں نے یہودیہ تے یروشلم نُوں چھڈن دا فیصلہ کیتا سی۔ لوک اَج ساڈا وی مذاق اُڈاندے نیں کیونکہ اَسی زیادہ پیسے کمان تے عیش و آرام دی زندگی گزارن لئی کوششاں نئیں کردے تے نہ ای دُنیا دے مسئلیاں دے حل لئی انساناں تے بھروسا کرنے آں۔ پر اَسی اِنج کیوں کرنے آں؟ کیونکہ اَسی جاننے آں کہ خدا دی بادشاہی بوہت چھیتی ایس بھیڑی دُنیا نُوں ختم کر دَوے گی۔ اَسی اوس شہر دا اِنتظار کر رہے آں جدیاں بنیاداں مضبوط نیں تے جیہڑا چھیتی آن والا اے۔ ایہہ شہر خدا دی بادشاہی اے۔‏a (‏عبرانیوں 11:‏10؛‏ متی 6:‏33‏)‏ ایس مضمون دے ہر ذیلی عنوان چ اَسی ایہناں گلاں تے غور کراں گے:‏ (‏1)‏پولُس دی نصیحت توں پہلی صدی دے مسیحیاں نُوں مدد کیویں ملی کہ اوہ اوس شہر دا اِنتظار کردے رہن جیہڑا آن والا اے، (‏2)‏پولُس نے اوہناں نُوں آن والے وقت لئی کیویں تیار کیتا تے (‏3)‏پولُس دی نصیحت توں اَج سانوں کیویں فائدہ ہوندا اے۔‏

یہوواہ تے بھروسا کرو کیونکہ اوہ توانوں کدی نئیں چھڈے گا

4.‏ یروشلم مسیحیاں لئی خاص کیوں سی؟‏

⁴ یروشلم مسیحیاں دی نظر چ اِک بڑا خاص شہر سی کیونکہ پہلی مسیحی کلیسیا 33 عیسوی چ یروشلم چ ای قائم ہوئی سی تے ایسے شہر چ بھراواں دی گورننگ باڈی وی سی۔ ایہدے علاوہ، ایس شہر چ بوہت سارے مسیحیاں دے گھر تے جائیداداں سن۔ پر یسوع نے اپنے پیروکاراں نُوں آگاہ کیتا کہ اوہ فوجاں نُوں ویکھ کے نہ صرف یروشلم سگوں یہودیہ چوں وی بھج جان۔—‏متی 24:‏16‏۔‏

5.‏ یروشلم تے آن والی تباہی توں پہلاں پولُس نے مسیحیاں نُوں کیویں تیار کیتا؟‏

⁵ پولُس چاہندا سی کہ مسیحی یروشلم نُوں چھڈن لئی تیار رہن۔ ایس لئی اوہنے مسیحیاں دی ایہہ سمجھن چ مدد کیتی کہ یہوواہ یروشلم بارے کیہو جہی سوچ رکھدا اے۔ اوہنے مسیحیاں نُوں یاد دَوایا کہ ہُن یہوواہ ہیکل چ کاہناں دی خدمت نُوں تے اوتھے چڑھائیاں جان والیاں قربانیاں نُوں پاک نئیں سمجھدا۔ (‏عبرانیوں 8:‏13‏)‏ ایس شہر دے زیادہ‌تر لوکاں نے مسیح نُوں قبول نئیں کیتا سی۔ نالے ہُن لوکاں نُوں یہوواہ دی عبادت کرن لئی ہیکل چ جان دی لوڑ نئیں سی سگوں ایہنے بوہت چھیتی تباہ ہو جانا سی۔—‏لُوقا 13:‏34، 35‏۔‏

6.‏ مسیحیاں نُوں اوس نصیحت دی ضرورت کیوں سی جیہڑی پولُس نے اوہناں نُوں عبرانیوں 13:‏5، 6 چ کیتی؟‏

⁶ جدوں پولُس نے عبرانی مسیحیاں نُوں خط لکھیا تے اوس ویلے یروشلم چ لوکاں دی زندگی بڑی خوشحال سی۔ اوس زمانے دے اِک رومی لکھاری نے یروشلم بارے کہیا کہ ”‏ایہہ مشرق دا سب توں مشہور شہر سی۔“‏ ہر سال فرق فرق علاقیاں توں یہودی ایتھے عیداں منان لئی آندے سن تے ایتھے آ کے بوہت سارے پیسے خرچ کردے سن۔ ایس وجہ توں یروشلم بوہت امیر شہر سی۔ یقیناً ایس شہر دے چنگے حالاتاں توں ایتھوں دے مسیحیاں نُوں وی فائدہ ہوندا ہوئے گا۔ شاید ایسے لئی پولُس نے ایہناں مسیحیاں نُوں کہیا:‏ تواڈی زندگی توں ظاہر ہوئے کہ تُسی پیسے نال پیار نئیں کردے سگوں اوہناں چیزاں تے مطمئن او جیہڑیاں تواڈے کول نیں۔ ایہدے بعد پولُس نے اوس وعدے دا حوالہ دِتا جیہڑا یہوواہ نے اپنے ہر بندے نال کیتا اے:‏ مَیں توانوں کدی نئیں چھڈاں گا۔ مَیں توانوں کدی رَد نئیں کراں گا۔ ‏(‏عبرانیوں 13:‏5، 6 نُوں پڑھو؛‏ اِستثنا 31:‏6؛ زبور 118:‏6)‏ یہودیہ تے یروشلم چ رہن والے مسیحیاں نُوں ایس وعدے نُوں یاد رکھن دی لوڑ سی۔ پر کیوں؟ کیونکہ ایس خط دے تھوڑے چِر بعد ایہناں مسیحیاں نُوں اپنا گھر، کاروبار، پیسے تے چیزاں نُوں چھڈنا پینا سی تے اِک نوِیں جگہ تے جا کے نوِیں زندگی شروع کرنی سی۔ اِنج کرنا اسان نئیں سی۔‏

7.‏ سانوں ہُن یہوواہ تے اپنے بھروسے نُوں مضبوط کرن دی لوڑ کیوں اے؟‏

⁷ اَسی کیہہ سکھنے آں؟‏ بوہت چھیتی ”‏وڈی مصیبت“‏ شروع ہوئے گی تے ایس بھیڑی دُنیا نُوں ختم کر دِتا جائے گا۔ (‏متی 24:‏21‏)‏ ایس لئی پہلی صدی دے مسیحیاں وانگوں سانوں وی چوکس تے تیار رہن دی لوڑ اے۔ (‏لُوقا 21:‏34-‏36‏)‏ وڈی مصیبت دے دوران شاید سانوں اپنیاں کجھ چیزاں یاں سب کجھ چھڈنا پووے۔ اوس ویلے سانوں ایس گل تے پورا بھروسا رکھنا ہوئے گا کہ یہوواہ سانوں کدی نئیں چھڈے گا۔ ہُن وی ساڈے کول ایہہ ثابت کرن دا موقع اے کہ اَسی یہوواہ تے بھروسا رکھنے آں۔ اپنے آپ کولوں پچھو:‏ ”‏کیہہ میرے کماں تے فیصلیاں توں ایہہ ظاہر ہوندا اے کہ مَیں پیسے تے نئیں سگوں یہوواہ تے بھروسا رکھنا واں جنہے وعدہ کیتا اے کہ اوہ میرا خیال رکھے گا؟“‏ (‏1-‏تیمُتھیُس 6:‏17‏)‏ سچ اے کہ پہلی صدی دے مسیحیاں دی مثال توں سانوں ”‏وڈی مصیبت“‏ دے دوران یہوواہ دے وفادار رہن چ مدد مِل سکدی اے۔ پر اَسی ایہہ صحی طرحاں کیویں جان سکنے آں کہ جدوں وڈی مصیبت شروع ہوئے گی تے سانوں کیہہ کرن دی لوڑ ہوئے گی؟‏

پیشوائی کرن والے بھراواں دے فرمانبردار رہوو

8.‏ یسوع نے اپنے شاگرداں نُوں کیہڑی ہدیت دِتی؟‏

⁸ جدوں عبرانی مسیحیاں نُوں پولُس دا خط ملیا تے ایہدے کجھ ای سالاں بعد اوہناں نے ویکھیا کہ رومی فوجاں نے یروشلم نُوں گھیر لیا اے۔ ایہہ ایس گل دا نشان سی کہ ہُن اوہناں نُوں یروشلم تے یہودیہ نُوں چھڈ کے بھجن دی لوڑ اے کیونکہ یروشلم تباہ ہون والا سی۔ (‏متی 24:‏3؛‏ لُوقا 21:‏20،‏ 24‏)‏ پر اوہناں نُوں بھج کے جانا کتھے سی؟ یسوع نے اوہناں نُوں صرف ایہہ کہیا سی:‏ ”‏جیہڑے یہودیہ چ ہون، اوہ پہاڑاں وَل بھج جان۔“‏ (‏لُوقا 21:‏21‏)‏ پر اوتھے تے بوہت سارے پہاڑ سن۔ تے فیر اوہناں نُوں کیہڑے پہاڑاں وَل بھج کے جانا سی؟‏

9.‏ مسیحیاں نے ایہہ کیوں سوچیا ہوئے گا کہ اوہناں نُوں کیہڑے پہاڑاں وَل بھجنا چاہی دا اے؟ (‏نقشے نُوں وی ویکھو۔)‏

⁹ کجھ ایہو جہے پہاڑاں تے غور کرو جنہاں وَل یروشلم تے یہودیہ دے مسیحی بھج کے جا سکدے سن:‏ سامریہ دے پہاڑ، گلیل دے پہاڑ، حرمون دا پہاڑ، لبنان دے پہاڑ تے دریائے یردن دے دُوجے پاسے دے پہاڑ۔ (‏نقشے نُوں ویکھو۔)‏ ایہناں پہاڑاں تے موجود کجھ شہراں نُوں ویکھ کے لگدا سی کہ اوتھے جانا بڑا محفوظ ہوئے گا۔ ذرا شہر گاملہ بارے سوچو۔ ایہہ شہر اِک اُچے پہاڑ دی ایہو جہی جگہ تے بنیا سی جتھے جانا بوہت مشکل سی۔ کجھ یہودیاں نُوں لگ رہیا سی کہ ایہہ شہر پناہ لین لئی بہترین اے۔ پر رومی فوج نے اوس شہر تے حملہ کر کے اوہنوں تباہ کر دِتا تے اوتھے رہن والے بوہت سارے لوک اپنی جان توں ہتھ دھو بیٹھے۔‏b

10، 11.‏ (‏الف)‏یہوواہ نے مسیحیاں دی رہنمائی کیویں کیتی؟ (‏عبرانیوں 13:‏7،‏ 17‏)‏ (‏ب)‏مسیحیاں نُوں اوہناں بھراواں دی فرمانبرداری کرن نال کیہہ فائدہ ہویا جیہڑے اوہناں دی پیشوائی کر رہے سن؟ (‏تصویر نُوں وی ویکھو۔)‏

¹⁰ اِنج لگدا اے کہ یہوواہ نے مسیحیاں دی رہنمائی اوہناں بھراواں دے ذریعے کیتی جیہڑے کلیسیا چ پیشوائی کر رہے سن۔ بعد چوں اِک تریخ‌دان یوسیبیس نے کہیا:‏ ”‏خدا نے یروشلم دی مسیحی کلیسیا چ پیشوائی کرن والے کجھ بندیاں تے ایہہ ظاہر کیتا کہ مسیحی جنگ توں پہلاں پیریہ دے شہر پیلا بھج جان۔“‏ مسیحیاں دے بھجن لئی شہر پیلا توں بہتر ہور کوئی جگہ نئیں ہو سکدی سی۔ ایہدی اِک وجہ ایہہ سی کہ ایہہ یروشلم توں زیادہ دُور نئیں سی۔ ایس لئی اوتھے بھج کے جانا تھوڑا اسان سی۔ دُوجی وجہ ایہہ سی کہ اوتھوں دے زیادہ‌تر لوک غیریہودی سن ایس لئی اوہناں تے اوہناں یہودیاں دا اثر نئیں سی جنہاں نے رومی حکومت دے خلاف بغاوت کیتی سی تے دنگے فساد کر رہے سن۔—‏نقشے نُوں ویکھو۔‏

¹¹ جیہڑے مسیحی پیلا دے پہاڑاں وَل بھج گئے سن، اوہناں نے پولُس دی نصیحت تے عمل کردے ہوئیاں اوہناں لوکاں دی فرمانبرداری تے تابع‌داری کیتی جیہڑے اوہناں دی پیشوائی کر رہے سن۔ ‏(‏عبرانیوں 13:‏7،‏ 17 نُوں پڑھو۔)‏ ایس لئی اوہناں دی جان بچ گئی۔ تریخ توں ایہہ گل ثابت ہوندی اے کہ یہوواہ نے اوہناں مسیحیاں دا ساتھ نئیں چھڈیا جیہڑے اوس شہر دا اِنتظار کر رہے سن جدیاں بنیاداں مضبوط نیں یعنی خدا دی بادشاہی۔—‏عبرانیوں 11:‏10‏۔‏

12، 13.‏ یہوواہ نے مشکل وقت چ اپنے بندیاں دی رہنمائی کیویں کیتی اے؟‏

¹² اَسی کیہہ سکھنے آں؟‏ یہوواہ اوہناں لوکاں دے ذریعے اپنے بندیاں نُوں ہدیتاں دیندا اے جیہڑے اوہدی تنظیم چ پیشوائی کر رہے نیں۔ بائبل چ ایہو جہیاں بوہت ساریاں مثالاں نیں کہ کیویں یہوواہ نے مشکل وقت چ اپنے بندیاں دی رہنمائی کرن تے اوہناں دا خیال رکھن لئی کجھ لوکاں نُوں مقرر کیتا۔ (‏اِستثنا 31:‏23؛ زبور 77:‏20)‏ اَج اَسی وی ایس گل دے ثبوت ویکھے نیں کہ یہوواہ پیشوائی کرن والے بھراواں دے ذریعے ساڈی رہنمائی کر رہیا اے۔‏

¹³ مثال لئی، جدوں کورونا دی وبا پھیلی تے پیشوائی کرن والے بھراواں نے کلیسیاواں نُوں ضروری ہدیتاں دِتیاں۔ ایہناں بھراواں نے بزرگاں نُوں ہدیتاں دِتیاں کہ اوہ کلیسیاواں لئی عبادتاں دا اِنتظام کیویں کرن۔ وبا شروع ہون دے کجھ ای مہینیاں بعد اَسی 500 توں وی زیادہ زباناں چ کنونشن کیتی۔ ساڈے بھین بھراواں نے کنونشن دے پروگرام نُوں اِنٹرنیٹ تے ٹی‌وی تے ویکھیا یاں ریڈیو تے سُنیا۔ ایس وبا دے دوران وی سانوں روحانی کھانا مِلدا رہیا۔ ایس وجہ توں اَسی اِک مُٹھ رہ سکے۔ اَسی ایس گل دا پکا یقین رکھ سکنے آں کہ بھانویں اَگے جا کے سانوں جیہڑی وی مشکل دا سامنا ہوئے، یہوواہ پیشوائی کرن والے بھراواں دی مدد کردا رہوے گا تاکہ اوہ صحی فیصلے کرن۔ وڈی مصیبت لئی پہلاں توں تیار ہون لئی سانوں یہوواہ تے بھروسا کرن تے اوہدے حکماں تے چلن دے علاوہ کجھ ہور خوبیاں دی وی لوڑ اے۔‏

اِک دُوجے نال بھین بھراواں وانگوں پیار کرو تے مہمان‌نوازی وکھاؤ

14.‏ یروشلم دی تباہی توں پہلاں مسیحیاں نُوں اپنے اندر کیہڑیاں خوبیاں پیدا کرن دی لوڑ سی؟ (‏عبرانیوں 13:‏1-‏3‏)‏

¹⁴ جدوں وڈی مصیبت شروع ہوئے گی تے سانوں اِک دُوجے لئی پہلے توں کِتے زیادہ محبت وکھان دی لوڑ ہوئے گی۔ ایس معاملے چ سانوں یروشلم تے یہودیہ چ رہن والے مسیحیاں دی مثال تے عمل کرنا ہوئے گا۔ اوہ مسیحی ہمیشاں اِک دُوجے لئی محبت وکھاندے سن۔ (‏عبرانیوں 10:‏32-‏34‏)‏ پر یروشلم دی تباہی توں پہلاں اوہناں نُوں اِک دُوجے لئی ہور زیادہ محبت تے مہمان‌نوازی وکھان دی لوڑ سی۔‏c ‏(‏عبرانیوں 13:‏1-‏3 نُوں پڑھو۔)‏ ایسے طرحاں جیویں جیویں ایس دُنیا دا خاتمہ نیڑے آ رہیا اے، سانوں وی اِک دُوجے لئی ہور زیادہ محبت وکھان دی لوڑ اے۔‏

15.‏ یروشلم تے یہودیہ توں بھجن دے بعد عبرانی مسیحیاں نُوں اِک دُوجے لئی محبت تے مہمان‌نوازی وکھان دی لوڑ کیوں سی؟‏

¹⁵ جدوں رومی فوجاں یروشلم نُوں گھیرن توں بعد اچانک اوتھوں واپس چلیاں گئیاں تے مسیحیاں نُوں اوتھوں بھجن دا موقع مِل گیا۔ پر اوہ اپنے نال بس کجھ ای چیزاں لجا سکے۔ (‏متی 24:‏17، 18‏)‏ ایس لئی اوہناں نُوں پہاڑاں تے سفر کردے ویلے تے شہر پیلا چ نوِیں زندگی شروع کرن لئی وی اِک دُوجے دی مدد دی لوڑ سی۔ بوہت سارے مسیحیاں نُوں کھانا، کپڑے تے رہن لئی جگہ دی لوڑ سی۔ ایس لئی اوہناں دے ہم‌ایماناں نُوں موقع ملیا کہ اوہ اوہناں نال اپنیاں چیزاں وَنڈ کے اوہناں لئی سچی محبت تے مہمان‌نوازی وکھان۔—‏طِطُس 3:‏14‏۔‏

16.‏ اَسی اپنے اوہناں بھین بھراواں لئی محبت کیویں وکھا سکنے آں جنہاں نُوں ساڈی مدد دی لوڑ اے؟ (‏تصویر نُوں وی ویکھو۔)‏

¹⁶ اَسی کیہہ سکھنے آں؟‏ اَسی اپنے بھین بھراواں نال بوہت پیار کرنے آں ایس لئی جدوں اوہناں نُوں ساڈی ضرورت ہوندی اے تے اَسی فوراً اوہناں دی مدد کرنے آں۔ مثال لئی، بوہت سارے بھین بھراواں نے خوشی نال اوہناں بھین بھراواں دی مدد کیتی اے جنہاں نُوں جنگاں یاں قدرتی آفت دی وجہ توں اپنا ملک چھڈ کے بھجنا پیا۔ اوہناں نے اپنے ایہناں بھین بھراواں نُوں ضرورت دِیاں شیواں دِتیاں تے اوہناں دا حوصلہ ودھایا تاکہ اوہ یہوواہ دی خدمت کردے رہن۔ یوکرین چ رہن والی اِک بھین نُوں جنگ دی وجہ توں اپنا گھر چھڈنا پیا۔ اوہ کہندی اے:‏ ”‏اَسی محسوس کیتا کہ یہوواہ بھین بھراواں دے ذریعے ساڈی مدد تے رہنمائی کر رہیا سی۔ یوکرین، ہنگری تے جرمنی چ وی بھین بھراواں نے ساڈا بڑا خیال رکھیا۔“‏ جدوں اَسی اپنے بھین بھراواں لئی مہمان‌نوازی وکھانے آں تے اوہناں دِیاں ضرورتاں دا خیال رکھنے آں تے اَسی یہوواہ نال مِل کے کم کر رہے ہنے آں۔—‏اَمثال 19:‏17؛‏ 2-‏کُرنتھیوں 1:‏3، 4‏۔‏

17.‏ ایہہ کیوں ضروری اے کہ اَسی ہُن توں ای اپنے بھین بھراواں نال پیار کرئیے تے اوہناں لئی مہمان‌نوازی وکھائیے؟‏

¹⁷ وڈی مصیبت دے دوران سانوں اپنے بھین بھراواں دی پہلے نالوں وی کِتے زیادہ مدد کرن دی لوڑ ہوئے گی۔ (‏حبقوق 3:‏16-‏18)‏ اَج یہوواہ ساڈی تربیت کر رہیا اے کہ اَسی اپنے ہم‌ایماناں نال بھین بھراواں وانگوں پیار کرئیے تے اوہناں لئی مہمان‌نوازی وکھائیے۔ وڈی مصیبت دے دوران وی ایہناں خوبیاں نُوں ظاہر کرنا بوہت ضروری ہوئے گا۔‏

مستقبل چ کیہہ ہون والا اے؟‏

18.‏ اَسی عبرانی مسیحیاں دی مثال تے کیویں عمل کر سکنے آں؟‏

¹⁸ تریخ توں پتہ چلدا اے کہ پہلی صدی چ جیہڑے مسیحی پہاڑاں تے بھج گئے سن، اوہ یروشلم تے آن والی تباہی توں بچ گئے سن۔ بھانویں کہ ایہناں مسیحیاں نُوں اپنا شہر تے اپنا سب کجھ چھڈنا پیا پر یہوواہ نے ایہناں نُوں نئیں چھڈیا۔ ایہدے توں اَسی کیہہ سکھنے آں؟ سچ اے کہ سانوں مستقبل چ ہون والی ہر گل دا نئیں پتہ۔ پر یسوع دی آگاہی دے مطابق سانوں تیار رہنا چاہی دا اے۔ (‏لُوقا 12:‏40‏)‏ سانوں اوہناں نصیحتاں تے وی دھیان دین دی لوڑ اے جیہڑیاں پولُس نے عبرانی مسیحیاں نُوں کیتیاں۔ ایہناں نصیحتاں تے عمل کرنا ساڈے لئی وی اوناں ای ضروری اے جِنّاں عبرانی مسیحیاں لئی سی۔ ایہدے علاوہ سانوں ایہہ وی یاد رکھن دی لوڑ اے کہ یہوواہ نے ساڈے نال وعدہ کیتا اے کہ اوہ سانوں کدی کلّا نئیں چھڈے گا۔ (‏عبرانیوں 13:‏5، 6‏)‏ آؤ،اَسی خدا دی بادشاہی دا اِنتظار کردے رہیے جیہڑی اِک ایہو جہے شہر وانگوں اے جیہڑا ہمیشاں قائم رہوے گا تے اوہدے چ سانوں ہمیشاں تک برکتاں مِلدیاں رہن گیاں۔—‏متی 25:‏34‏۔‏