Santiago
Rïcukunata olqüpashqan
5 ¡Rïcukuna, cäsukamay! ¡Juiciu finalcho fiyupami nakapäkunkipaq! ¡Tsaymi qaparayparaq waqapäkunki! 2 Lapan riquëzaykikunapis ismurmi ushakanqa. Röpaykikunatapis puyumi ushanqa. 3 Qorikipis qellaynikipis manami välinqanatsu. Ultimu tiempuchöna kaykaptintsipis riquëzakunata kikilaykipaqmi shuntarkaykanki. Tsaymi juiciu final junaqcho tsay riquëzaykikuna codiciösu kashqaykipita acusashunki. Tsaykuna salvashunaykipa trukanqa ninanömi rupar ushapäkushunkipaq.*
4 Mana pägaypa arutsishqaykipitami minkaynikikuna Tayta Diosta waqaparkaykan. Paykuna waqapashqanta lapanta mandaq Tayta Dios musyaykanmi.* 5 Qellayniki kaptinmi munashqaykita rurar kay patsacho kawarkaykanki. Tsayno kawarmi pishtanapaq werayätsishqa uywano karkaykanki. 6 Qamkunaqa defiendikuyta mana puëdiq jutsaynaq runakunatami wanutsishqanki.
Jesucristuta mana ajayaypa shuyäkunantsipaq nishqan
7 Wawqi panikuna, Señor Jesucristuta kutimunanyaq mana ajayaypa shuyarpay. Chakra aruqkunapis murunanpaq tamyataraqmi shuyarpan. Cosëchata shuntananpaqpis usyataraqmi shuyarpan. 8 Tsaynöla qamkunapis lapan shonquykiwan yärakur mana ajayaypa Señor Jesucristuta shuyarpay. Payqa kutimunanpaqnami kaykan.
9 Wawqi panikuna, ama jamurpänakuytsu. Jamurpänakuptikiqa Jesucristo kutimur juzgashunkipaqmi. Payqa runakunata juzgananpaqnami kaykan.
10 Wawqi panikuna, yarpapäkuy Tayta Diospa jutincho wilakuq profëtakuna imano kawashqantapis. Paykunaqa ima nakaycho karpis mana ajayaypami Tayta Dios munashqanno kawapäkurqan. Tsaynöla qamkunapis kawapäkuy. 11 Musyantsimi imano nakarpis mana ajayaypa Tayta Dios munashqanno kawaqkunata pay yanapashqanta.* Tsaynölashi Job fiyupa nakarpis Tayta Diosman mana ajayaypa yärakurqan.* Tsayno yärakuptinshi Tayta Dios ali shonqu y kuyapäkuq kashpan bendicionninta qorqan.*
12 Kuyay wawqi panikuna, imatapis awnir ama jurapäkunkitsu jana patsacho kaykaqkunapa jutincho ni kay patsacho kaykaqkunapa jutinchöpis. Ama imapa jutinchöpis jurapäkunkitsu. Tsaypa trukanqa cumplinaykipaq kaptin awnipäkunki y mana cumplinaykipaq kaptinqa ama awnipankitsu. Tsayno kawapäkuptikiqa Tayta Dios manami castigashunkitsu.*
Tayta Diosta manakunantsipaq nishqan
13 Lakishqa karqa Tayta Diosta manakäriy. Kushishqa karpis Tayta Diosta agradëcikur alabapäkuy. 14 Mayqaykipis qeshyar imarqa *mayor wawqikunata qayatsinki Tayta Diosta manakunanpaq. Paykunami Jesucristupa jutincho aceitita umaykiman winaparkushushpayki aliyänaykipaq Tayta Diosta manakärinqa.* 15 Lapan shonqunwan yärakur manakuptinqa Tayta Dios aliyätsishunkimi. Jutsata rurashqa kaptikipis perdonashunkimi. 16 Tsayno kaykaptinqa jutsa rurashqaykita yärakuq mayikita wilar confesakäriy. Nirkur jukniki juknikipaqpis Tayta Diosta manakäriy. Tsaynöpami qeshyashqaykipita aliyankipaq. Tayta Dios munashqanno kawaq runa manakushqantaqa Tayta Dios mayanmi.
17 Profëta Elías manakushqantapis Tayta Dios mayarqanshi. Noqantsino runala kaykarpis mana tamyananpaq lapan shonqunwan manakuptinshi kimsa wata y soqta killa mana tamyarqantsu.* 18 Yapay tamyananpaq manakuptinshi tamyarqanna.* Tsayshi runakuna murushqanpis wayurqanna.
19 Wawqi panikuna, mayqanikipis jutsaman tuniptiki pilapis tantiyatsishushpaykiqa 20 wanuypitami salvaykäshunki.* Tsaynöpami mayjina jutsata rurashqa karpis perdonashqa kanki.*