Marcus
1 Diospa Tsurin Jesucristupaq willakoq alli noticiakunaqa kënömi qallan: 2 Diospa willakoqnin Isaïas qellqanqannömi pasarqan. Pëqa kënömi nirqan: “¡Rikë! Willakoqnïtam puntëkita mandamushaq, pëmi qampaq nänita alistar puntëkita ëwanqa.+ 3 Tsunyaq sitiuchömi juk nuna fuertipa kënö nikan: ‘¡Teyta Jehoväpaq* nänita alistayë! Pëpaq derëchu nänita rurayë’”.+ 4 Jutsankunapita* perdonta chaskiyänampaq arrepentikur bautizakuyänampaq willakurmi, Bautizakoq Juanqa tsunyaq sitiuchö këkarqan.+ 5 Tsëmi entëru Judëa provinciapita y Jerusalenpita nunakuna pëman ëwayarqan. Y Jordan mayuchömi Juanqa pëkunata bautizarqan, y llapankunapa puntanchömi pëkunaqa jutsata* rurayanqanta willakuyaq.+ 6 Juanpa röpanqa camëllupa millwampitam karqan, y wachakannam qarapita karqan.+ Chukllushkunata* y jirka abëjapa mielnintam mikoq.+ 7 Y kënö nirmi willakoq: “Qepäta shamoqqa noqapitapis mas puëdeqmi, y noqalläqa manam puktïkur o umpuykur llanqinkunapa watunllatapis paskapuyta puëdïtsu.+ 8 Noqaqa yakuchömi qamkunata bautizayarqoq, peru pëqa santu espïrituwanmi bautizayäshunki”.+
9 Tsë witsanchö Galilëa provinciachö këkaq Nazaretpita Jesus shamuptinmi, Jordan mayuchö Juan bautizarqan.+ 10 Y yakupita yarqaramuptinmi, ciëlu kichakäreqta y Diospa santu espïritunta paluma niraqta Jesuspa jananman shamuykaqta rikarqan.+ 11 Tsënam Teyta Diosqa ciëlupita kënö nirqan: “Këmi kuyë Tsurï, pëpaqmi alläpa kushikü”.+
12 Tsënam santu espïrituqa tsunyaq sitiuman pusharqan. 13 Cuarenta junaqmi tsunyaq sitiuchö karqan, y tsëchömi Satanas tentëta munarqan.+ Tsëchöqa atska chukaru animalkunam karqan, peru angelkunam atiendiyaq.+
14 Juanta prësuyanqanchönam, Teyta Diospita alli noticiakunata willakoq+ Galilëa+ provinciaman Jesus ëwarqan. 15 Kënö nirmi willakoq: “Dispunishqa tiempum chämushqana, y Diospa Gobiernunmi këllachöna këkan. Arrepentikuyë+ y alli noticiakunaman confiakuyë”.
16 Galilëa qocha* kuchumpa ëwëkarnam, Simontawan wawqin Andresta+ rikarqan mällankunata qochaman jitëkäyaqta.+ Pëkunaqa pescadormi kayarqan.+ 17 Tsënam Jesusqa pëkunata kënö nirqan: “Qepäta shayämuy, nunakunata pesquëtam yachatsiyashqëki”.+ 18 Tsë höram mällankunata dejëkur qepanta ëwayarqan.+ 19 Tsëpita pasarkurnam, Zebedeupa tsurin Santiäguta y wawqin Juanta rikarqan mällankunata jirar barcuchö këkäyaqta,+ 20 y tsë höram pëkunatapis qayarqan. Tsënam pëkunaqa papänin Zebedeuta y trabajadorninkunata dejëkur Jesuspa qepanta ëwakuyarqan. 21 Y llapankunam* Capernaumman chäyarqan.
Säbadu junaq qallanqanchönam, Diosta adorayänan wayiman yëkurir yachatsikur qallëkurqan.+ 22 Imanö yachatsikunqanta wiyarmi nunakunaqa alläpa espantakuyarqan. Pëqa Teyta Diospita carguta chaskishqa nunanömi pëkunata yachatseq, y manam Leyta qellqaqkunanötsu.+ 23 Tsë höram, Diosta adorayänan wayichö mana alli espïrituyoq nuna këkarqan, y pëmi fuertipa kënö nirqan: 24 “¿Imatataq noqakunapita munanki Nazaret markapita Jesus?+ ¿Ushakätsiyämaqnïku shamurqunki? Noqaqa allim musyä, ¡qamqa Diospa Limpiu Tsurin kanqëkita!”.+ 25 Peru Jesusqa qayaparmi, “¡upälla kë, y pëpita yarquy!” nirqan. 26 Tsënam tsë mana alli espïrituqa, nunata tapsikacharkur fuertipa qaparïkur pëpita yarquskirqan. 27 Y nunakunaqa alläpa mantsakarmi kikinkunapura kënö ninakuyarqan: “¿Imanatan këqa? ¡Juk mushoq yachatsikuy! Mana alli espïritukunatapis mandëta puëdinmi, y ninqantam cäsukuyan”. 28 Tsëmi Jesuspaq willakuyanqanqa wakpa këpa entëru Galilëa provinciaman chärirqan.
29 Diosta adorayänan wayipita yarqurirqa, Simonpawan Andrespa wayinmanmi Santiäguwan y Juanwan ëwayarqan.+ 30 Chäriyänampaqqa, Simonpa suegranmi+ fiebrir cämarëkänaq, y tsë höram Jesusta tsëta willayarqan. 31 Tsënam Jesusqa, pëman witïkur makipita tsararkur sharkatsimurqan. Y fiebrin pasariptinmi llapankunata atiendir qallëkurqan.
32 Tsëpitanam, inti o rupay jeqashqana këkaptin, llapan qeshyëkaqkunata y demoniuyoqkunata pëman apayämurqan.+ 33 Y tsë markapita llapan nunakunam wayi punkuchö juntarëkäyarqan. 34 Tsëmi imëka qeshyawan qeshyëkaq mëtsika nunakunata alliyätsirqan,+ y mëtsika demoniukunatam qarqurqan, peru pë Cristu kanqanta demoniukuna musyayaptinmi* parlayänantaqa dejarqantsu.
35 Manaraq patsa atsikyaptin tempränulla sharkurmi, tsunyaq sitiuman ëwar Teyta Diosman mañakurqan.+ 36 Simon y pëwan këkaqkunaqa wakpa këpam ashiyarqan, 37 y tarïkurmi, “llapankunam ashikäyäshunki” niyarqan. 38 Peru pëqa kënömi nirqan: “Aku amänuchö këkaq markakunaman ëwashun, tsëchöpis willakunäpaq, noqaqa tsëta ruraqmi shamurqö”.+ 39 Tsënömi Jesusqa Diosta adorayänan wayikunachö willakur y demoniukunata qarqur entëru Galilëa provinciachö purirqan.+
40 Lepra qeshyayoq nunam puntanman qonqurikuykur, “noqaqa musyämi qam munarninqa alliyätsimëta* puëdinqëkita” nir rogakurqan.+ 41 Tsënam Jesusqa alläpa llakiparnin* yatëkur, “¡alliyänëkita munämi!” nirqan.+ 42 Y tsë höra lepran pasëpa* ushakaskiptinmi limpiu quedarirqan. 43 Tsëpitanam ëwakunampaq nirqan, peru puntataqa alli clärum kënö nirqan: 44 “Cuidädu pitapis willar këkankiman, tsëpa rantinqa sacerdötiman ëwar alliyanqëkita musyayänampaq,+ Moises mandakunqannö+ limpiu kanëkipaq qarënikita apë”. 45 Tsënö nikaptinmi, ëwakurqa wakchö këchö tsë pasanqanta willakur karqan. Tsëmi rikëkäyaptin më markamampis yëkuyta mana puëdir Jesusqa tsunyaq sitiukunallachöna quedakoq. Tsënö kaptimpis, nunakunaqa mëtsëpitam pëta asheq ëwayaq.+