¿Listuku këkanki Jesus wanunqanta yarpäna reunionpaq?

1. ¿Imanirtan Jesus wanunqanta yarpäna reuniontaqa alläpa valorantsik? (Lücas 22:19, 20).

JEHOVÄPA sirweqninkunaqa, Jesus wanunqanta yarpäna reuniontaqa alläpam valorantsik. Y tsëta yarpäyänampaqmi Jesuspis mandakurqan (leyi Lücas 22:19, 20). Peru ¿imanirtan tsë junaqtaqa alläpa shuyarantsik? Wakinllata rikärishun.

2. ¿Imanirtan Jesus wanunqanta yarpäna reuniontaqa kushishqa shuyarantsik?

² Jesus wanunqanta yarpäna reunionqa yanapamantsik, Diosnintsik salvamanqantsikman pensanapaq y Jesus wanunqampita imanö agradecikunapaq kaqman pensanapaqmi (2 Cor. 5:14, 15). Tsënöllam tsë reunionchöqa wawqi panintsikkunawan juntakantsik y animanakuntsik (Rom. 1:12). Diosnintsikta sirwita dejashqakunapis cada watam Jesus wanunqanta yarpäna reunionman ëwayan, y tsëchö wawqi panikuna kushishqa chaskiyaptinmi Jehoväta yapë sirwir qallëkuyan. Y wakin nunakunapis rikäyanqanta y wiyayanqanta gustarmi Bibliapita yachakur qallëkuyan. Tsëmi Jesus wanunqanta yarpäna reuniontaqa llapantsikpis cada wata kushishqa shuyarantsik.

3. Jesus wanunqanta yarpäna reunionchöqa, ¿imatataq Jehoväpa sirweqninkuna cläru rikantsik? (Rikäri fötukunata).

³ Tsënöllam Jesus wanunqanta yarpäna reuniontaqa llapantsik shuyarantsik, Jehoväpa sirweqninkuna juknölla kayanqanta rikëta munar. Jehoväpa testïgunkunaqa entëru Patsachömi Inti o Rupay jeqar qallëkuptin juntakar qallëkuntsik. Tsëpitanam Jesus imanir wanunqanta yachatsikayämunqanta wiyantsik, cancionkunata cantantsik, tantatawan vïnuta pasapanakuntsik y chusku kuti mañakayämuptin llapan shonquntsikwan “amen” nintsik. Tsë fëchallachömi, entëru Patsachö llapan congregacionkuna tsëta rurantsik. Tsëta rurarnin llapan shonquntsikwan alabanqantsikta rikämarnintsikqa, ¡imaraq Jehoväwan Jesusqa kushikuyan!

4. ¿Imatataq këchö yachakushun?

⁴ Këchömi kë tapukuykunata contestashun: ¿imanötan Jesus wanunqanta yarpäna reunionpaq shonquntsikchö listu këkashwan? ¿Imanötan wakinkunata yanapashwan tsë reunionchö kayänampaq? Y ¿imanötan Jehoväta sirwita dejashqakunata yanapashwan? Tsëkunata yachakunqantsikmi yanapamäshun tsë reunionpaq listu këkänapaq.

¿IMANÖTAN JESUS WANUNQANTA YARPÄNA REUNIONPAQ SHONQUNTSIKCHÖ LISTU KËKASHWAN?

5. (1) ¿Imanirtan Jesus wanunqanman alli pensashwan? (Salmus 49:7, 8). (2) ¿Imanirtaq Jesusqa wanurqan? neq videupita yachakunqëkita parlakaramuy.

⁵ Jesus wanunqanta yarpäna reunionpaq listu këkänapaqqa yanapamäshun, Jesus wanunqan imanö yanapamanqantsikman pensanqantsikmi. Kikintsikllapitaqa manam jutsapita ni wanuypita salvakuyta puëdishwantsu karqan (leyi Salmus 49:7, 8; rikäri ¿Imanirtaq Jesusqa wanurqan? neq videuta).a Tsëmi Jehoväqa noqantsikrëkur kuyë Tsurin wanunanta permitirqan. Rasumpa kaqchöqa, Jehoväwan Jesusmi noqantsikrëkur tsëta rurayämurqan (Rom. 6:23). Jehoväwan Jesus noqantsikrëkur rurayämunqankunaman mas pensanqantsikmi yanapamäshun, Jesus wanunqanta valoranapaq. Kananqa yachakurishun, Jehoväwan Jesus noqantsikrëkur imakunata rurayämunqanta. Peru puntataqa yachakurishun vïdanwan Jesus imanir pagakunqantaraq.

6. ¿Imapitataq vïdanwan Jesus pagakurqan?

⁶ ¿Imanirtan Jesusqa noqantsikrëkur vïdanwan pagakurqan? Adanqa Diosnintsik kamanqan witsanqa jutsannaq nunam karqan y imëyaqpis kawakuytam puëdinman karqan. Peru jutsata rurarirqa, mananam imëyaqpis kawakuyta puëdirqannatsu y tsërëkurmi pëpita yureq nunakunapis wanuyarqanllana. Tsëmi Jesusqa jutsaman y wanuyman Adan churamanqantsikpita salvamänantsikpaq jutsannaq vïdanwan pagakurqan. Y Jesusqa jutsannaq nunam karqan y “manam engañakur parlarqantsu” (1 Pëd. 2:22). Pëqa jutsannaqmi wanurqan, tsëmi jutsata manaraq ruraptin Adanpa jutsannaq vïdanwan igualarqan (1 Cor. 15:45; 1 Tim. 2:6).

7. Imakunapa Jesus pasanqanta willakaramuy.

⁷ Kë Patsachö këkarqa, Jesusqa imëka mana allikunapa pasëkarpis Teytan Jehovätam llapanchö cäsukurqan. Wamra kanqan witsanqa jutsannaq këkarpis, jutsasapa teytankunatam llapanchö cäsukurqan (Lüc. 2:51). Y jövinna këkaptimpis, capazchi jövin mayinkunaqa niyarqan, papäninkunata mana cäsukunampaq y Jehovätapis mana cäsunampaq. Y mas edäna tikrarkuptinmi, Satanasqa tentarnin imëka mana allikunaman chätsita munarqan y Jehoväpitapis rakikäratsitam munarqan (Mat. 4:1-11). Satanasqa imëkatam rurarqan Jesusta mana alliman ishkitsinampaq, tsënöpa noqantsikpaq vïdanwan mana pagakunampaq.

8. ¿Imakunatataq Jesus aguantanan karqan?

⁸ Kë Patsachö yachatsikunqan witsampis Jesusqa imëkatam aguantarqan. Këllaman pensarishun: nunakunam alläpa chikiyarqan y wanutsitam munayarqan (Lüc. 4:28, 29; 13:31). Qateqninkuna jutsasapa karnin pantayanqankunatapis aguantarqanmi (Mar. 9:33, 34). Wanutsiyänampaq prësurirnam maqayarqan, pëpita burlakuyarqan y juk delincuentitanö tratayarqan (Heb. 12:1-3). Y wanunan höraqa manam Jehovä yanaparqannatsu, tsëmi ushanan kaq pruëbataqa kikinllana aguantanan karqan (Mat. 27:46).b

9. Noqantsikrëkur Jesus wanunqanman pensarqa, ¿imanötan sientikuntsik? (1 Pëdru 1:8).

⁹ Rikärinqantsiknömi noqantsikrëkur vïdanwan Jesus pagakunanqa fäciltsu karqan. Noqantsikrëkur tsë llapanta ruranqanman y pasanqanman yarpachakurqa, Jesustaqa alläpam kuyantsik (leyi 1 Pëdru 1:8).

10. ¿Imatataq Jehovä Diosnintsik aguantarqan?

¹⁰ Peru jutsapita y wanuypita salvamänapaq, ¿imatataq Jehoväqa aguantarqan? Musyanqantsiknöpis Jehoväwan Jesusqa alläpam kuyanakuyan (Prov. 8:30). Y Jehoväqa alläpachi llakikurqan kuyë Tsurinta kë Patsachö maqayaptin, despreciayaptin y wanutsiyaptin.

11. ¿Ima igualatsikuywantan entiendintsik Jesusta wanutsiyaptin Jehovä alläpa llakikunqanta?

¹¹ Wamrankunata wanupakushqa kaqkunaqa allichi entiendiyan juk wamra wanuriptin imanö sientikuna kanqanta. Kawarimunampaq kaqta markäkurpis o yärakurpis, kuyë wamrantsik wanuriptinqa alläpam llakikuntsik. Tsëwanmi entiendintsik, 33 wata 14 de Nisanchö kuyë Tsurinta sufritsir wanutsiyaptin Teytantsik Jehovä imanö sientikushqa kanqanta (Mat. 3:17).c

12. ¿Imatataq rurashwan Jesus wanunqanta yarpäna reunion manaraq chämuptin?

¹² ¿Imanirtan kikillëki o familiëkiwampis Jesus wanunqampita maslla yachakuyankitsu? Allim kanman Jesus wanunqanta yarpäna reunion manaraq chämuptin tsëta ruranqantsik. Tsënö yachakuyänëkipaqqa utilicëta puëdiyanki, Jehoväpa Testïgunkuna yachakur ashinapaq neq follëtuta o juk publicacionkunatam.d Tsënöllam, Jesus wanunqampaq parlaq textukunata leyita puëdiyanki Cristiänunö Kawakunapaq y Yachatsikunapaq neq höjachö yarqamoq textukunatapis. Y Jesus wanunqanta yarpäna reunion junaqpaq, yachatsikayämunqan videutapis rikëta qonqëtsu. Jesus wanunqanta yarpäna reunionpaq shonquntsikchö listu këkarqa, wakinkunatapis yanapëtam puëdishun (Esd. 7:10).

¿IMANÖTAN WAKINKUNATA YANAPASHWAN TSË REUNIONCHÖ KAYÄNAMPAQ?

13. ¿Pikunatataq invitashwan Jesus wanunqanta yarpäna reunionman shayämunampaq?

¹³ ¿Imanötan wakin nunakunata yanapashwan tsë reunionman shayämunampaq? Tsëpaqqa invitanantsikmi. Invitacionkunata dejapurpis, allim pensanantsik pikunata invitanapaq kaqman. Capaz invitashwan familiantsikkunata, trabajaq mayintsikkunata, estudiaq mayintsikkunata o wakin reqinakushqantsikkunata. Y invitacionnintsik ushakäriptinqa, allim kanman celularpa o Internetpa invitacionta aparatsinqantsik. Rasumpa kaqqa, manam musyantsiktsu pikuna tsë reunionman shayämunampaq kaqta (Ecl. 11:6).

14. ¿Imanötan musyantsik kikin nunata invitacionta entreganqantsikqa yanapakunqanta?

¹⁴ Wakin nunakunata invitacionta entreganqantsikqa alläpam yanapakun. Juk kutim juk panintsikta mana Testïgu qowan o runan willarqan Jesus wanunqanta yarpäna reunionman ëwanampaq kaqta. Tsënö willaptinmi paniqa alläpa espantakurqan. ¿Imanir? Panintsikqa qowanta atska kutim invitashqa kanaq Jesus wanunqanta yarpäna reunionman ëwanampaq, peru manam imëpis ëwanaqtsu. Peru juk kutim reqinqan anciänu tsë panipa qowanta invitacionta entregarqan, tsëmi pëqa tsë wata y qateqnin watakunapis seguïdu tsë reunionman ëwarqan.

15. Jesus wanunqanta yarpäna reunionman pitapis invitarqa, ¿imatataq yarpänantsik?

¹⁵ Jesus wanunqanta yarpäna reunionman shamunampaq invitanqantsik nunaqa, imëpis mana shamushqa karqa, capazchi tsë reunion imanö kanampaq kaqta musyëta munanqa. Allichi kanman, “imatapis musyëta munarqa tapumë” nirinqantsik y shumaq contestarinqantsik (Col. 4:6). Capazchi kënö tapumäshun: “¿Tsë reunionchöqa imatataq rurayanki? ¿Ëka tiemputaq kanqa? ¿Imanö vistishqatan shamushaq? ¿Tsë reunionman yëkamunäpaqqa pagakunäraqku? ¿Tsë reunionchöqa qellëta mañakuyankiku?”. Tsëkunata musyëta munaptinqa, allim tsë llapankunata shumaq entiendiratsishwan. Tsëpaqqa capaz utilizashwan Jesus wanunqanta yarpäshun o ¿Imanötaq reunionnïkuna? neq videukunata. Tsënöllam yanapamäshun, ¡Manana wanurmi kushishqa kawakushun! neq librupa 28 kaq yachatsikuynin.

16. Jesus wanunqanta yarpäna reunionman shamoqkunaqa, ¿imakunataraq musyëta munayanqa?

¹⁶ Jesus wanunqanta yarpäna reunionman shamurqa, maskunataran musyëta munanqa. Capazchi tapukunqa tantatawan vïnuta imanir mana mikunqantsikta o wallkaqlla imanir mikuyanqanta, watachö ëka kuti Jesus wanunqanta yarpäna reunionta ruranqantsikta y wakin reunionnintsikkuna imanö kanqanta. Y capazchi yachatsikayämunqanta shumaq wiyakushqa karpis, llapantaqa entiendinqatsu y yanapanantsiktaraq wananqa. Wakin tapukuyninkunata contestanapaqqa jw.org päginachö këkaq “Jehoväpa testïgunkunaqa, ¿imanirtan Señorpa Cënanta juk religionkunachönötsu rurayan?” neqtam utilizashwan. Jesus wanunqanta yarpäna reunionman manaraq shayämuptin o shamushqana kayaptimpis, llapan puëdinqantsikmannömi yanapëta munantsik tsë reunionta provechayänampaq (Hëch. 13:48).

¿IMANÖTAN JEHOVÄTA SIRWITA DEJASHQAKUNATA YANAPASHWAN?

17. ¿Imanötan anciänukuna Jehoväta sirwita dejashqakunata yanapayanman? (Ezequiel 34:12, 16).

¹⁷ Jesus wanunqanta yarpäna witsanchö, ¿imanötan anciänukuna Jehoväta sirwita dejashqakunata yanapayanman? Pëkunapaq yarpachakurnin y kuyayanqanta rikätsirninmi (leyi Ezequiel 34:12, 16). Anciänukuna, qamkunam Jesus wanunqanta yarpäna witsanchö, Jehoväta sirwita dejashqakunata ashiyänëki. Puëdirninqa, llapankunata ashiyë y pëkunapaq yarpachakuyanqëkita, kuyayanqëkita y yanapëta munayanqëkita niyë. Jesus wanunqanta yarpäna reunionman shayämunampaq invitayë y shayämuptinqa kushishqa kuyakuywan chaskiyë. Y Jesus wanunqanta yarpäna tiempu pasariptimpis, pëkunawan seguïdu parlayänëkipaq patsätsiyë y Diosta sirwir sïguiyänampaq wanayanqankunachö yanapayë (1 Pëd. 2:25).

18. ¿Imanötan Jehoväta sirwita dejashqakunata llapantsik yanapashwan? (Romänus 12:10).

¹⁸ Jehoväta sirwita dejashqakuna Jesus wanunqanta yarpäna reunionman shayämuptinqa llapantsikmi kushishqa, respëtuwan y kuyakuywan chaskinantsik (leyi Romänus 12:10). Pëkunapaqqa manachi fäciltsu kashqa tsë reunionman shayämunan. Capazchi yarpachakuyarqan wawqi panikuna imanö chaskiyänampaq kaqta o mantsapakuyarqan.e Tsëmi imatapis llutaqa parlanantsiktsu o tapupänantsiktsu, tsëta rurashqaqa mana allim sientikuyanqa (1 Tes. 5:11). Pëkunaqa wawqi panintsikkunam kayan, tsëmi Jehovä Diosnintsikta adoraq kutiyämuptinqa alläpa kushikuntsik (Sal. 119:176; Hëch. 20:35).

19. ¿Imanötan yanapamantsik Jesus wanunqanta yarpäna reunion?

¹⁹ Këchömi yachakurquntsik, Jesus imanir wanunqanta y kananqa masmi entiendintsik wanunqanta cada wata yarpänantsikpaq Jesus imanir mandakunqanta. Tsëta yarpanqantsikqa, noqantsikta y wakin nunakunatapis yanapamantsikmi (Is. 48:17, 18). Tsënöllam yanapamantsik Jehoväta y Jesusta mas kuyanapaq, noqantsikrëkur rurayämunqankunapita agradecikunqantsikta rikätsikunapaq, wawqi panintsikkunawan juknölla kanqantsikta rikätsikunapaq y Jesus wanunqanrëkur bendicionkunata chaskiyänampaq wakin nunakunata yanapanapaq. Tsënö këkaptinqa, Jesus wanunqanta yarpäna reunionpaq kananllapitana alistakushun, tsë rurëmi noqantsikpaqqa cada wata alläpa precisan.