¿Imatataq rurashwan mana alli munënintsikkunata vencinapaq?

1. ¿Imata vencinapaqtaq llapantsikpis kallpachakuykantsik?

¿IMËLLAPIS mana allikunata rurëta munarqunkiku? Tsëta pensashqa karqa ama llakikuytsu, manam qamllatsu tsënö pensanki. Bibliachöqa nin, wakin nunakunanölla tentacionkunapa pasanqantsiktam (1 Cor. 10:13).a Biblia ninqannöpis manam qamllatsu mana allikunataqa rurëta munanki; wakin wawqi panikunapis mana alli munëninkunata venciyänampaqmi kallpachakuykäyan. Y yarpë, manam japallëkitsu këkanki; Jehovämi yanapëkäshunki mana alli munëkunata vencinëkipaq.

2. ¿Ima tentacionkunapatan wakin cristiänukuna y Bibliata estudiëkaqkuna pasayan? (Fötukunata rikäri).

² Bibliachöqa kënöpis ninmi: “Cada [nunam] munënin tentaptin y shonqunman chaptin pruëbata pasan” (Sant. 1:14). Kë versïculu ninqanwanmi entiendintsik llapan nunakunapis tsë tentacionllapa mana pasayanqanta. Capazchi wakin cristiänukuna y Bibliata estudiëkaqkunaqa, warmi karqa ollquwan këta munayan o ollqu karqa warmiwan këta munayan. O wakinkunaqa ollqu mayinkunawan o warmi mayinkunawan këta munayan. Y pornografïata rikëta dejashqakunaqa capazchi yapë rikëta munayan. O drögata y upyëta dejashqa kaqkunaqa capaz yapë munayanqa drögata shoquyta o upyëta. Imanö kaptimpis, llapantsikmi höra höraqa apostol Pablunö sientikuntsik. Pëmi kënö nirqan: “Alli kaqta rurëta munaptïmi, mana alli kaq noqachö këkan” (Rom. 7:21).

3. Mana alli munënikita vencinëkipaq unëpana kallpachakuykarqa, ¿imatataq capaz pensankiman?

³ Mana alli munënikita vencinëkipaq unëpana kallpachakuykarqa, capazchi pensanki tsë mana alli munënikita vencita mana puëdinëkipaq kaqta y mana wanurna kawakuyta mana puëdinëkipaq kaqta. Peru tsëqa, ¡manam rasumpatsu! ¿Pitan mana alli sientikunëkitaqa munan? Y ¿imatataq rurankiman mana alli munënikita vencinëkipaq? Tsëkunata yachakurishun.

¿IMANÖ SIENTIKUNATATAQ SATANAS MUNAN?

4. (1) ¿Imata pensanatataq Satanas munan? (2) ¿Imanirtan següru këkantsik mana alli munënintsikkunata vencita puëdinapaq kaqta?

⁴ Satanasqa pensanata munan tentacionkunapa pasarqa, vencita mana puëdinapaq kaqtam. Tsëmi Jesusqa, Jehoväman kënö mañakunantsikpaq yachatsimarquntsik: “Jutsaman imapis mana ishkitsiyämänampaq yanapëkayämë, y Diablupita salvëkayämë” (Mat. 6:13). Satanasqa pensan tentacionkunapa pasarqa, Jehoväta mana cäsukur jutsata ruranapaq kaqtam (Job 2:4, 5). ¿Imanirtan tsënö nin? Kikinnö kanqantsikta pensarmi. Pëqa mana alli munëninta vencinampa rantinmi, mana allikunata rurarqan. Satanasqa hasta Diospa Tsurin Jesuspaqpis jutsannaq këkaptinmi pensarqan, tentacionkunapa pasarqa mana allita ruranampaq kaqta (Mat. 4:8, 9). Peru ¿rasumpaku Satanas ninqannö mana alli munënintsikkunata vencita puëdintsiktsu? Manam rasumpatsu, mana alli munënintsiktaqa vencita puëdintsikmi. Tsëmi apostol Pablupis kënö nirqan: “Teyta Dios poderninwan yanapamaptinmi, imata ruranäpaqpis kallpä kan” (Filip. 4:13).

5. ¿Imapitataq Jehovä següru këkan, y imanötan tsëta musyantsik?

⁵ Peru Jehoväqa manam Satanasnötsu pensan. Jehoväqa segürum këkan mana alli munënintsikkunata vencinapaq kaqta. ¿Imanötan tsëta musyantsik? Palabranchömi nin alläpa sufrimientu witsanta mëtsikaq sirweqninkuna kawëkar pasayänampaq kaqta. ¿Imanirtan wallkaqllatsu pasayan sinöqa mëtsikaq? Mana alli munëninkunata vencishqa kar y Diospa rikëninchö limpiuna karmi. Tsëmi Bibliachöqa nin ‘yuraq röpayoq’ kayanqanta (Apoc. 7:9, 13, 14). Jehoväqa segürum këkan mana alli munënintsikkunata vencita puëdinapaq kaqta.

6, 7. ¿Ima mastataq Satanas creitsimënintsikta munan?

⁶ Tsënöllam Satanasqa creitsimënintsikta munan mana allikunata munanqantsikrëkur Jehoväpa amïgun këta mana puëdinapaq kaqta y manana wanurna kawakuyta mana puëdinapaq kaqta. Ama ninqanta creishuntsu. Pëtam Jehoväqa juzgashqana y condenashqana, tsëmi imëyaqpis kawakuytaqa shuyarannatsu (Gen. 3:15; Apoc. 20:10). Tsëmi Jehoväpa amïgun këta puëdinqantsikta musyar y mana wanurna kawakunapaq kaqta musyar alläpa chikimantsik, y pënö sientikunatam munan. ¿Tsënö chikikämashqatsuraq creishwan? Jehovä Diosnintsikqa nimantsik amïgun kanantsikpaq y imëyaqpis kawakunantsikpaq yanapamënintsikta munanqantam. Pëqa manam munantsu pï nunapis wanunanta, tsëpa rantinqa ‘llapankuna arrepentikuyänantam munan’ (2 Pëd. 3:9). Noqantsikqa mana wanurnam kawakushun. Peru Diabluqa, Diosnintsik condenashqa kaptinmi ushakanqa.

⁷ Tsëqa, ¿pitan creitsimënintsikta munan mana alli munënintsikkunata vencita mana puëdinapaq kaqta y Diospa amïgun këta mana puëdinapaq kaqta? Satanasmi. Tsëtam imëpis yarpänëki. Tsëta cuentachö katsirqa, manam llakikunkitsu. ¡Ama Satanaspa gustunta rurëtsu! (1 Pëd. 5:8, 9).

JUTSASAPA KARMI MANA ALLI SIENTIKUNTSIK

8. ¿Imanir mastan pensantsik mana alli munënintsikkunata vencita mana puëdinapaq kaqta o Diospa amïgun këta mana puëdinapaq kaqta? (Salmus 51:5; leyi “Maslla entiendinapaq” neqta).

⁸ Adanwan Ëva jutsata rurayanqanrëkurmi llapantsikpis jutsasapallana yurintsik. Tsënö jutsasapa karmi pensantsik mana alli munënintsikkunata vencita mana puëdinapaq kaqta o Jehoväpa amïgun këta mana puëdinapaq kaqta (Job 14:4; leyi Salmus 51:5).b

9, 10. (1) ¿Imanötan Adanwan Ëva sientikuyarqan jutsata rurarirnin? (Dibüjuta rikäri). (2) ¿Imanötan noqantsikpis sientikuntsik jutsasapa karnin?

⁹ Pensarishun Jehoväta mana cäsukur Adanwan Ëva jutsata rurarir imanö sientikuyanqanman. Pëkunaqa, jutsata rurarirqa penqakurmi ratakuyarqan o tsinkakuyarqan y röpannaq këkäyanqanta cuentata qokurmi cuerpunkunata tsapakuyarqan. ¿Imanirtan tsëta rurayarqan? Jutsasapana karmi. Diosta mana cäsukuyanqampitam mana alli sientikur qallëkuyarqan, y penqakushqallana y mantsakurllanam kawakuyaq. Adanwan Ëvaqa manam Jehoväpa amïgun këta puëdiyarqannatsu. Tsëmi alli sientikuyta munar imëkata rurarpis penqakuyaq, mantsakuyaq y Diosta mana cäsukuyanqampitam mana alli sientikuyaq.

¹⁰ Y noqantsikpis, Adanpa y Ëvapa kastan karmi pëkunanölla mantsakuntsik, penqakuntsik y Diosta mana cäsukur mana alli sientikuntsik. Tsëmi Bibliachöqa nimantsik “Adan jutsallakunqannö mana jutsallakushqa” këkashqapis, jutsaqa llapantsikta mana alli sientitsimanqantsikta (Rom. 5:14). Peru noqantsiktaqa manam Adantawan Ëvatanötsu Diosnintsik condenamarquntsik. Pëkunaqa manam puëdiyarqannatsu Jehovä Diospa amïgun këta. Peru noqantsikqa puëdintsikmi, kikin Jehovämi amïgun kanantsikta munar Jesucristupa vïdanwan pagakushqa. Tsënöpam jutsantsikpita perdonamantsik y amïgun këta puëdintsik (1 Cor. 6:11). Tsëmi pensanantsiktsu mana alli munënintsikkunata vencita mana puëdinapaq kaqta ni Diospa amïgun këta mana puëdinapaq kaqtaqa. Kananqa yachakurishun alli sientikunantsikpaq imakunata ruranapaq kaqta.

11. Mana alli munënintsikkunata vencita mana puëdinqantsikta pensashqaqa, ¿imanötan Romänus 6:12 yanapamantsik?

¹¹ Jutsasapa karmi höraqa pensashwan mana alli munënintsikkunata vencita mana puëdinapaq kaqta. Capazchi sientishwan shonquntsik kënö nikämanqantsiktanö: “Manam puëdinkitsu”. Peru tsëtaqa manam cäsunantsiktsu. Bibliachöqa clärum nimantsik jutsa dominamänata mana permitinantsikpaq (leyi Romänus 6:12). Tsëwanmi entiendintsik mana alli rurëkunata mana ruranantsikpaqqa, kikintsik decidita puëdinqantsikta (Gäl. 5:16). Jehoväqa musyanmi mana alli munënintsikkunata vencita puëdinapaq kaqta, tsëmi vencinantsikpaq nimantsik. Sinöqa manachi nimashwantsu karqan (Deut. 30:11-14; Rom. 6:6; 1 Tes. 4:3). Yachakurinqantsiknöpis mana alli munënintsikkunataqa, ¡vencita puëdintsikmi!

12. Mana allikunata rurëta munanqantsikrëkur Diosnintsik mana kuyamanqantsikta pensarqa, ¿imatataq yarpänantsik?

¹² Y höraqa capazchi shonquntsik kënö nikämanqantsiktanö sientishwan: “Qamqa mana allikunatam rurëta munanki, tsëmi Jehoväqa kuyashunkitsu”. ¡Ama tsëta cäsushuntsu! Jehoväqa musyanmi jutsasapallana yurikunqantsikta, y tsëtam Bibliachö cläru nimantsik (Sal. 103:13, 14). Jehoväqa allim “musyan” imanö kanqantsikta y jutsasapa karnin mana allikunata rurëta munanqantsikta (1 Juan 3:19, 20). Tsëmi këta yarpänantsik: mana allikunata rurëta munarpis jutsata mana rurarqa, Jehoväpa rikënimpaqqa limpium këkantsik. ¿Imanötan tsënö kanqanta musyantsik?

13, 14. Mana alli rurëkunaman pensarqa, ¿mananaku Jehoväpa amïgun këta puëdintsik?

¹³ Bibliachöqa nimantsik mana allikunata munanqantsikwan ruranqantsikqa jukläya kanqantam. Mana munëkarpis höraqa mana allikunata pensarishunmi, peru tsë mana allita ruranapaq o mana ruranapaq kaqtaqa kikintsikmi decidita puëdintsik. Tsëta entiendirinapaq Corintu cristiänukunaman pensarishun. Pëkunaqa manaraq cristiänu karqa, wakinqa ollqu mayinkunawanmi oqllanakuyaq. Peru cristiänu tikrarirqa, tsë rurëkunata dejariyarqanmi. Tsëmi apostol Pabluqa kënö nirqan: “Wakinnikikunaqa tsënömi kayarqëki”. Tsë cristiänukunaqa cristiänuna këkarpis, ollqu mayinkunawanqa oqllanakuytaraqchi munayarqan y tsë mana alli munëta dejayänanqa manachi fäciltsu karqan. Peru mana alli munëninkunata controlëta yachaq cristiänukunaqa manam tsë jutsaman ishkiyarqannatsu. Tsëmi Jehoväpaqqa limpiuna kayarqan y amïgun këta puëdiyarqan (1 Cor. 6:9-11).

¹⁴ Qampis Corintu cristiänukunanömi mana alli munënikikunata dominëta puëdinki. Capazchi tsë mana allikunata pensanqëkikunaqa peqëkipita o umëkipita chipyëpa yarqunqatsu. Tsënö kaptimpis, alli dominakurqa manam pensanqëkita o cuerpuyki munanqantaqa rurankitsu (Efes. 2:3). Peru ¿imatataq rurankiman mana alli pensëkunata vencinëkipaq? Yachakurishun.

¿IMATATAQ RURASHWAN MANA ALLI MUNËNINTSIKTA VENCINAPAQ?

15. Mana alli munënintsikta vencita munarqa, ¿imatataq reconöcinantsik?

¹⁵ Mana alli munënintsikta vencita munarqa, mana allikunata rurëta munanqantsiktam reconöcinantsik, y manam kikintsikta engañakunantsiktsu (Sant. 1:22). Capazchi kikintsikta engañakurnin kënö pensashwan: “Warmï maslla kuyamaptinqa manam pornografïa rikëman yarparämantsu”, “wakinkunaqa noqapitapis masmi upuyan”. Manam shonquntsikllachöpis tsënöqa pensanantsiktsu. Tsënö pensarqa, fäcil-llam ima tentacionmampis ishkirishun. Tsëmi tsapäkunapa rantin o jukta culpatsanapa rantinqa, kikintsik kallpachakunantsik mana alli munënintsikkunata vencinapaq (Gäl. 6:7).

16. ¿Imatataq rurankiman jutsa rurëman mana ishkinëkipaq?

¹⁶ Mana allita rurëta munanqëkita reconöcirqa, ¿imatataq rurankiman? Tentacionkunapa manaraq pasarmi decidinëki mana alli munëniki mana vencishunëkipaq (1 Cor. 9:26, 27; 1 Tes. 4:4; 1 Pëd. 1:15, 16). Tsëpaqqa capaz kënö pensankiman: “¿Imë hörakunatan masqa mana alli rurëkunaman pensä? ¿Imakunata ruranqätan mana allikunaman ishkiratsimanman?”. Tsëkunata musyarirqa, puntallapitanam alli alistakunëki o pensanëki tentacionkunapa pasarnin imata ruranëkipaq kaqman. Tsënö alli alistakurqa o alli pensarqa, manam tentacionpa pasar jutsa rurëman ishkinkitsu (Prov. 22:3).

17. ¿Imatataq Josëpita yachakuntsik? (Genesis 39:7-9; dibüjutawan fötuta rikäri).

¹⁷ Pensarishun Jacobpa tsurin Josë imata ruranqanman. Josëtaqa Potifarpa warminmi pëwan këta munar enamorëpa parlaparqan. Peru Josëqa raslla o sasllam, “manam” nirqan (leyi Genesis 39:7-9). ¿Imanirtan Josëqa jinan höra, “manam” nirqan? Tsë warmi manaraq tentaptinmi puntallapitana decidishqa karqan casäda warmiwan mana kakunampaq kaqta. ¿Imatataq Josëpita yachakuntsik? Noqantsikpis tentacionkunapa manaraq pasarmi puntallapitana decidinantsik alli kaqkunata ruranapaq. Tsënöpam tentacionkunapa pasarqa jinan höra, “manam” nita puëdishun.

‘IMANÖ KËKANQËKIMAN’ SEGUÏDU PENSË

18. ¿Ima mastataq rurankiman mana alli munënikita vencinëkipaq? (2 Corintius 13:5).

¹⁸ Mana alli munënikikunata vencinëkipaqqa, seguïdum pensanëki imanö këkanqëkiman (leyi 2 Corintius 13:5). Tsëmi yanapashunki pensëkanqëkita o rurëkanqëkita cambianëkipaq. Këllaman pensarishun: capazchi tentacionkunapa pasëkarpis mana alli rurëmanqa ishkirqunkitsu. Tsëqa kënömi pensanëki: “¿Jinan höraku, ‘manam’ nirqä? O ‘manam’ ninäpaqqa, ¿sasaku o ajaku karqan?”. Jinan höra “manam” nita mana puëdishqa karqa, ama qelanäkuritsu. Tsëpa rantinqa alli pensë, yapëchöqa jinan höra “manam” ninëkipaq. ¿Imatan tsëpaqqa yanapashunki? Kënömi pensanëki: “¿Mana alli pensëkanqäkunata rasllaku cambiëta puëdï? ¿Rikanqäkuna o wiyanqäkunaqa masku mana allikunaman pensatsiman? Rikëkanqächö imapis mana allinö yarqamuptinqa, ¿jinan höraku witikurï o juk lädupa tikrakurï? ¿Següruku këkä mana fäcil kaptimpis Jehovä mandakunqankunata cäsukunqäqa noqapaq alli kanqanta?” (Sal. 101:3).

19. ¿Imamantan chätsimashwan fäcil kaqkunachö mana allita decidinqantsik?

¹⁹ Tsënöllam yarpänëki shonquntsikqa imapitapis mas traicionëru kanqanta y imatapis raslla o saslla munanqanta (Jer. 17:9). Jesuspis nirqanmi nunakunaqa ‘shonqunkunachö mana allikunata pensarnin’ mana allikunata rurayanqanta (Mat. 15:19). Tsëmi shonquyki engañashunëkitaqa permitinëkitsu. Këllaman pensarishun: capazchi pornografïata juk tiempupa rikëta dejashqakunaqa pensayanman, mana allikunata munapätsikoq fötukunata o videukunata rikëqa allilla kanqanta. Y kënö niyanman: “Manam imanantsu, llapampis röpashqam këkäyan”. O wakinkunaqa capazchi piwampis oqllanakuykäyanqantanöna pensayanman. Y tsëpitaqa kënö niyanman: “Pensëkällam, manam rasumpatsu rurëkä”. Tsënö pensarqa, shonqunchömi alistakuykanna mana allikunata ruranampaq (Rom. 13:14). Tsëqa, ¿imatataq rurankiman tsënö mana pensanëkipaq? Yarpänëkim, mas fäcil kaqkunachö mana allita decidirqa, mas sasa o aja kaqkunachöpis mana allita decidinëkipaq kaqta.c Tsëmi shonquyki munanqantaqa cäsunëkitsu. Tsëta cäsurqa, jutsamanmi ishkinki.

20. ¿Shumaq Patsachöqa mana allikunata rurëta munashunraqtsuraq? ¿Kanan tiempuqa pitan yanapamäshun mana alli munënintsikkunata vencinapaq?

²⁰ Yachakurinqantsiknöpis, Jehovämi poderninwan yanapamantsik tentacionkunaman mana ishkinapaq. Y Tsurin Jesus wanunqanrëkurmi Shumaq Patsachö mana wanurna kawakuyta puëdishun. Tsë tiempuchöqa, ¡mananam mana allikunata rurëta munashunnatsu y kushishqam Jehoväta sirwita puëdishun! Peru tsë tiempu chämunqanyaqqa, mana alli munënintsikkunata vencinapaqmi kallpachakunantsik y Jehovä bendicimashqam mana alli munënintsikkunata vencita puëdishun.