Mateo

6 Shujtajcuna ricuchunllaca ñataj cashcata ruraj tucunguichijman. Chashna rurashpaca jahua pachapi caj cancunapaj Yayamantaca ima bendicionta mana chasquinguichijchu. 2 Pobrecunata ayudashpaca* ama shujtajcunaman huillangui.* Mishqui shimi jayaj shungucunami shujtajcuna alli nichunlla sinagogacunapi,* ñancunapipish ima allita rurashcata huillashpa purincuna. Cancunamanca mana llullanichu. Chashna rurashpaca paicuna japina cashcataca ñami tucui japishcacuna. 3 Shinapish pobrecunata ayudashpaca cambaj alli maqui imata rurashcata, cambaj lluqui maquica ama yachachunllapish. 4 Pobrecunata chashna pacalla ayudajpica tucuita ricuj cambaj Yayami cantaca bendicianga.

5 Shinallataj, Diosta mañacushpaca mishqui shimi jayaj shungucuna shina ama mañaichijchu. Paicunaca shujtajcuna ricuchunllami sinagogacunapi, jatun ñan esquinacunapi shayarishpa mañanata munancuna. Cancunamanca mana llullanichu. Chashna rurashpaca paicuna japina cashcataca ñami tucui japishcacuna. 6 Chaimanta, Diosta mañagrishpaca cambaj huasi ucuman yaicushpa, punguta huichcashpa pi mana ricuipaj cambaj Yayata mañai. Chashna mañajpimi tucuita ricuj cambaj Yayaca canta bendicianga. 7 Diosta mañacushpaca ama chaillatataj chaillatataj ninguichu. Diosta mana rijsij gentecunallami* Diosca uyangami yuyashpa cutin cutin chaillatataj rimarishpa mañancuna. 8 Chaimanta cancunapish ama paicuna shina caichijchu. Cancuna manaraj mañajpimi imata minishtishcataca cancunapaj Yayaca ña yachan.

9 Diosta mañacushpaca cashna mañanguichij:

‘Jahua pachapi caj ñucanchij Yaya, cambaj shutica jucha illaj nishca cachun. 10 Cambaj Gobierno mandanaman shamuchunmi munanchij. Cai allpapipish jahua pachapi shina can munashcata rurahuai. 11 Cunan punlla micunata* ñucanchijman cuhuai. 12 Ima shinami shujtajcunata perdonanchij chashnallataj ñucanchij juchacunatapish perdonahuai. 13 Shinallataj ima mana alli ruraicunapi urmachunpish ama saquihuangui. Diablopaj* maquimantapish quishpichihuangui’.

14 Shujtajcuna ima mana allita cancunata rurajpipish paicunata perdonajpica, jahua pachapi caj cancunapaj Yayapish cancunapaj juchacunata perdonangami. 15 Shinapish shujtajcuna cancunata ima mana allita rurajpi cancuna mana perdonajpica, jahua pachapi caj cancunapaj Yayapish cancunapaj juchacunataca mana perdonangachu.

16 Cancuna ayunacushpaca ama llaquilla ñahuita churanguichijchu.* Mishqui shimi jayaj shungucunallami paicuna ayunacushcata shujtajcuna ricuchun nishpa llaquilla ñahuita churancuna. Cancunamanca mana llullanichu. Chashna rurashpaca paicuna japina cashcataca ñami tucui japishcacuna. 17 Shinapish can ayunacushpaca ñahuita maillarishpa, umapipish aceiteta churaringui. 18 Chashnami can ayunacushcataca gentecunamanca mana ricuchingui. Ashtahuanpish jahua pachapi caj cambaj Yayallami yachanga. Paimi imalla rurashcata ricushpa cantaca bendicianga.

19 Cai pachapi charinacunata* ama huaquichishpa catichijchu. Chaicunaca ismushpa, polilla cꞌurucuna micujpica tucurinllami. Shuhuacunapish yaicushpa chaicunataca shuhuanllami. 20 Chaipaj randica cancunapaj charinacunata* jahua pachapi huaquichishpa catichij. Chaipica ima mana ismunchu, polilla cꞌurucunapish mana micunchu. Shuhuacunapish yaicushpa mana shuhuanchu. 21 Maipimi cambaj charinacunata* huaquichingui, chaipimi cambaj shungupish canga.

22 Cuerpopaj luzca ñahuimi. Cambaj ñahui alli cajllata ricujpica,* cambaj tucui cuerpomi achijlla canga. 23 Shinapish cambaj ñahui mana alli cajllata ricujpica* cambaj tucui cuerpomi amsa canga. Canpi tiyaj luz amsa tucujpica, cambaj tucui cuerpopishmi yallitaj amsapi canga.

24 Ishqui amotaca ni pi mana sirvi tucunchu. Shujtaca cꞌuyangami, caishujtaca pꞌiñangami. Shujtaca alli ningami, caishujtaca yangapimi churanga. Diostapish, charinacunatapish ishquindijtaca mana sirvi tucunguichijchu.

25 Chaimantami cancunataca cashna nini: ‘Imatataj micushun, imatataj ubyashun’ nishpa cancunapaj causaimantaca* ama yallitaj sustarichijchu. Shinallataj ‘imatataj churarishun’ nishpa cancunapaj cuerpomantapish ama yallitaj sustarichijchu. ¿Manachu cancunapaj causaica* micunatapish yalli valin? ¿Manachu cancunapaj cuerpoca churanatapish yalli valin? 26 Jahuata purij pajarocunata alli ricuichij. Paicunaca mana tarpunchu, mana tandanchu, granocunatapish mana huaquichinchu. Shinapish jahua pachapi caj cancunapaj Yayaca paicunamanca caranllami. ¿Manachu cancunacarin chai pajarocunatapish yalli valishca canguichij? 27 Cancunamantaca, ¿maijantaj yalli sustarishpapish quiquin causaitaca shuj minutollahuanpish mirachi tucunguichij? 28 Shinallataj ¿imatashi churarishun? nishpaca ¿imamantataj yallitaj sustaringuichij? Campopi huiñaj lirio sisacunata ricushpa yachaichij. Paicunaca mana sinchita trabajanchu, mana puchcanchu. 29 Shinapish ñucaca cashnami nini, Salomonca achca sumaj cosascunata charishpapish cai sisacuna shinaca manataj churarircachu. 30 Plantacunaca alajata cunan huiñacushpapish cayaca ninapi shitashca cangapajllami. Chashna cajpipish Diosca paicunataca sumajtami churachin. Ashalla feta charij runacuna, ¿manachu cancunatacarin chaicunatapish yalli churachinga? 31 Chaimanta: ‘¿Imatataj micushun? ¿Imatataj ubyashun? ¿Imatataj churarishun?’ nishpa ama yallitaj sustarichijchu. 32 Diosta mana rijsij gentecunallami* chaicunamantaca yallitaj sustarishpa causancuna. Jahua pachapi caj cancunapaj Yayaca cancuna tucui imalla minishtishcatami ña yachan.

33 Chaimanta Diospaj Gobiernotapish, cashcata ruranatapish* puntapi churashpa catichij. Chashna rurajpimi Diosca tucui cancuna imalla minishtishcata cunga. 34 Shinaca caya punllamantaca ama yallitaj sustarichijchu. Punllantami imamanta sustarinaca tiyan. Chaimanta cunan punlla charishca llaquicunallamanta sustarichij.