Chayllaraq predicaqkunata imayna yanapanamanta
1. ¿Imaynataq tarikurqanki chayllaraq predicaq lloqsispayki?
1 ¿Yuyachkankichu chayllaraq predicaq wasin-wasin lloqsisqaykita? Seguropunim manchakuymanta llumpayta katkatatarqanki. Ichaqa, ¡mayna allinmi karqa yachachiqniki yanapasunaykipaq qanwan kasqanqa! Kunanqa Diospa Gobiernonmanta predicasqaykipim experienciayoqña kanki, hinaspa chayraq predicaqkunata yanapanaykipaqpas listom kachkanki.
2. ¿Imatam yachananku chayllaraq predicaqkunaqa?
2 Chayllaraq predicaqkunaqa wasin-wasin imayna parlaytam yachananku, Biblia servichikuyta, yapamanta watukuytawan Bibliamanta estudio qoytapas. Yachanankutaqmi maypi kaspankupas predicayta, callekunapi, negociokunapi hinaspa huklawkunapipas. ¿Imaynatam yanapawaq? Ejemplo kaspayki hinaspa consejaspayki.
3. ¿Imaynatam hukkunata yanapachwan imayna predicasqanchikwan?
3 Ejemplo kaspayki. Jesusmi qatiqninkunaman qawachirqa imayna predicanankupaq (Luc. 8:1; 1 Ped. 2:21). Chayta qatipakuspayá, chayllaraq predicaqwan predicanayki kaptinqa, pisi rimayllapi predicanapaq preparakuy, chaynapi qatipakunanpaq, chaypaqmi servichikuwaq qellqanchikkunapi rikuriq yanapakuykunata. Predicacionpiña, pay uyarinanpaq hina huk otaq iskay wasikunapi predicay, qatiqnin wasiman richkaspa tapuykuy predicasqayki imayna kasqanmanta. Chaynapim chayllaraq predicaqqa entiendenqa hukkunawan predicay imanasqa ancha allin kasqanta, hinaspam predicasqanmanta consejaptiki allinta chaskikunqa.
4. ¿Imaynatam chayllaraq predicaqta yanapachwan rimayta tukuruptin?
4 Consejay. Jesuspas qatiqninkunatam yachachirqa imayna predicanankupaq (Mat. 10:5-14). Chaynatayá qampas ruray. Chayrallaq predicaqpa imayna rimasqanta allinta uyariy. Predicayta tukuruptin alabaykuy allin kaqkunamanta, ichaqa amaraq niychu pantasqankunamantaqa, suyaykuyraq qatiqninpi imayna rurananta. Yaqapaschá runakunaman predicayta manchapakuchkanraq. Yuyariytaq, sapakamam imakuna ruray yachaqpas kanchik, hinaspa manam imatapas chaynallatachu ruranchik (1 Cor. 12:4-7).
5. Consejayta munaspa, ¿imatam niwaq?
5 Wakinpiqa chayllaraq predicaqmi consejota mañakusunki. Mana chayna kaptinqa, qamyá sumaqllata consejaykuy. ¿Imaynata? Experienciayoq iñiqmasinchikkunam ninku: “¿Imayna predicasqaykimanta yanapaykuykimanchu?”, otaq “¿Imatam piensanki imayna predicasqaykimanta?”, nispa. Chaymantapas niwaqmi: “Chayllaraq predicaspaymi sasachakurqani . . ., ichaqa yanapawarqam . . .”, nispa. Wakin kutipiqa allinmi kanman Diospaq Llamkayninchik qellqawan kuska yanapachikuynikichik. Ichaqa ama hukmanyachiychu, aswanqa huk kaq pantasqallanmanta consejay.
6. Predicayninchikmanta rimaspa, ¿imaynatam fierro limawan fierrota afilachkaq hina hukkunata yanapachwan?
6 Fierro limawanmi fierrota afilanku. Timoteoqa ancha experienciayoq yachachiqmi karqa, chayna kaptinpas, Pablom nirqa yachachiyninpi hinalla kallpanchakunanpaq hinaspa iñiyninpi ñawparinanpaqpas (1 Tim. 4:13, 15). Chayllaraq predicaq lloqsisqaykimanta achka wataña pasaruptinpas, hinallayá kallpanchakuy allinta predicanaykipaq. Wakinkuna mana ancha experienciayoq kaptinkupas, hinallayá predicaqmasikimanta yachay. Rikchan-rikchanllayá kasun iñiqmasinchikkunata kuyakuywan yanapanapaq, astawanqa chayllaraq predicaqkunata, chaynapi Dios serviyninpi allin llamkaq kanankupaq (Pro. 27:17).