¿Pitaq yachanman hamuq punchawkunapi imayna kananchikmanta?
Achka runakunam qipa punchawkunapi imayna kananchikta mana yachasqankurayku allinlla kanankupaq tukuyta ruwanku.
RUNAKUNAM KAYKUNAPI CREENKU
ADIVINAQKUNAPI UTAQ QAWAQKUNAPI. Achka runakunam vidanku hamuq punchawkunapi imayna kananta yachanankupaq imay punchawpi utaq ima killapi nacesqankuman hina horoscopo nisqankuta leenku, hinaspam chayman hina imatapas ruwanku sasachakuypi mana kanankupaq utaq allinta tantianankupaq.
CARTAKUNATA QAWAQKUNAPI. Wakin runakunañataqmi allin kanankupaq utaq imata tantiakunankupaqpas cartakunapi utaq cocapi qawachikunku.
WAÑUQKUNATAM MAÑAKUNKU. Wakin runakunaqa wañukuqkunatam allinlla kayta munaspanku utaq imamantapas harkaykunanpaq mañakunku. Wakinkuñataqmi pagaputa urqukunaman apanku allinlla kayta munaspanku. Vietnam nacionpi kaq Vana sutiyuq warmim nin: “Wañukuq aylluykunatam mañakuq kani wawaykunawan kuska allinlla kanaykupaq yanapawanankuta piensaspay”, nispa.
HUK CUERPOPIÑA KAWSARIMUNANKUPIM PIENSANKU. Wakinkum ninku wañuruspaqa huk cuerpopiña nacesqanchikta, chaymi ninku: “Ñawpa vidaypi kayna-wakna kasqayraykuch kunanqa kayna kani”, nispa.
Wakin runakunaqa chaykunapi creey yanqapaq kasqanta piensaspankupas hinatam rinku makinkuta qawachikuq, cartakunapi qawachikuq, ninkum: “Ichapas kaykuna yanapawanman vidaypi imayna kanaymanta yachanaypaq”, nispanku.
CHAYKUNAPI HAPIPAKUSQANKU ¿YANAPANCHU?
Chaykunapi creesqankuqa utaq hapipakusqankuqa, ¿runakunata yanapanchu hawkaña, kusisqa kawsakunankupaq?
Vietnam nacionpi kaq Hao sutiyuq runam vidanpi allin kawsakunanpaq manaraq imapaqpas tantiakuchkaspan wañukuq ayllunta mañakuq, cartakunapi qawachikuq. Paymi nin: “Chaykunapi hapipakusqayraykum negocioypipas fracasarurqani, manuyarurqani, aylluywanpas manam allinñachu kawsakurqani”, nispa.
Taiwanpi kaq Qiuming sutiyuq runapas wañukuq aylluntam mañakuq, cartakunapim qawachikuq yanapasqanta piensaspan, piensaqtaqmi vidanchik destinasqaña kasqanta, ichaqa cuentata qukuruspanmi nirqa: “Chaykunapi creeyqa yanqam. Cartakunata qawaqkunapa niwasqankuqa manam cumplikunchu. Wañuruspa huk cuerpopiña nacesqanchikta nisqankupas yanqam, ñawpaq vidanchikpi imayna kasqanchikta mana yachaspaqa, ¿imaynataq kaqmanta naceruspa allin runaña kachwan?”, nispa.
“Chaykunapi creeyqa yanqam. Cartakunata qawaqkunapa niwasqankuqa manam cumplikunchu” (QIUMING, TAIWAN).
Achka runakunam Hao hinaspa Qiuming hina cuentata qukurunku destinasqa kay, lucerokunata qatipay, wañukuqkunata mañakuy yanqa kasqanta, hinaspa vidanchik imayna kananmanta yachanapaq mana yanapawasqanchikta. Chaynaqa ¿manañachu imatapas ruwachwan vidanchikpi allin kananchikpaq?
Achka runakunam ninku kusisqa, hawka kawsakunapaqqa educacionniyuq, achka qullqiyuq kay allin kasqanmanta. Chayna kawsakunankupaq kallpanchakuqkunaqa, ¿imaynataq tarikunku?
a Wakin sutikunaqa manam kikinkupachu.
b Chayqa Diospa palabranpim Galatas 6:7 nisqanpi qillqasqa kachkan. Runakunapas kaynatam ninku: “Melonkunata tarpuspaqa melonkunatam cosechanki, habasta tarpuspapas habasllatam cosechanki”, nispa.