Sapa kuti revistata apasqanchik runamanmi Biblia estudiananpaq munachinanchik
1. ¿Imanasqataq Diospa organizacionninqa kallpanchawanchik revistanchikta leey munaqkunaman sapa kuti apanapaq?
1 Achka watakunañam Jehova Diospa organizacionninqa kallpanchawanchik revistanchikkuna leey munaqkunaman mosoq revista chayamuptin apanapaq (ruta de revistas). ¿Imanasqataq kallpanchananchik revistanchikkunata leenankupaq? Leesqankuman hinam pisi-pisimanta Diosmanta yachayta munanmanku (1 Ped. 2:2). Chaywanmi wakinqa Biblia estudiaytaña munanmanku.
2. ¿Imaynatam revistanchik leeqkunata Diosmanta astawan yachanankupaq yanapachwan?
2 Tarpusqanchiktaqa parqonam otaq qarpanam. Revistata saqeylla-saqenamantaqa chaskiwaqninchikwanmi imallamantapas parlarinanchik. Chaynata ruwaspaqa yachasunmi imayna tarikusqanmanta, imamanta yachay munasqanta chaynataq imapi creesqanmantapas, chayqa yanapawasunmi imamanta rimaspa yachachinapaq (Prov. 16:23). Chaypaqqa allintam preparakunanchik, chayman hinataqmi revistapi mayqen yachachikuytapas otaq mayqen textotapas pisi rimayllapi qawachinanchik. Chaymantapas anotananchikmi mayqen revistata ima qellqata otaq mayqen textota leepusqanchiktapas. Chaynata ruwaspaqa yakuta plantaman hichachkaq hinam kallpanchasunchik Diosmanta yachanankupaq (1 Cor. 3:6).
3. ¿Hayka punchawmantam kutichwan?
3 Hayka punchawmantam kutichwan. Revista chaskiqkunamanqa killamanta otaq iskay killamantam watukunchik. Ichaqa allinmi kanman semana pasayllata otaq iskay semanamanta kutiyninchikqa, chaypaqqa reparananchikmi imayna tarikusqanpi otaq astawan yachay munasqanpipas. Kutispaqa ichapas nichwan: “Saqesqay revistakunapim kay yachachikuymanta rimachkan”. Chaynata niptinchikqa ichapas astawan yachayta munanmanku. Leeruniñam niwaptinchikqa ichapas chaymanta tumpata parlarichwan. Qellqanchikkuna leey gustaqmanqa chay killapi predicananchikpaq tratadota, folletota otaq librotapas munachichwanmi.
4. ¿Imatam ruwachwan revistakunata sapa kuti chaskiqman Bibliata estudiachinapaq?
4 Manam suyanaraqchu Biblia estudiay munasqankumanta niwananchiktaqa. Aswanqa ñoqanchikmi munachinanchik. Qallariypi estudiayta mana munaptinpas wakin kutikunapim qawachichwan Willakuq revistapi lloqsimuq “Bibliamanta tapukuykuna” niq yachachikuyta. Ichapas chaywanqa punkullankupi estudiachiyta qallarichwan. Estudiayta manaraq munaptinpas hinallayá revistakunata apasunchik Diosmanta yachanankupaq.