Diosta hatunchasunchik imayna kasqanchikwan
1. ¿Imanasqataq asambleaman rispaqa suti reqsiylla kanchik?
1 Asambleaman rispaqa suti reqsiyllam kanchik. Achka llaqtakunapim periodistakuna willakunku chay llaqtapi ima ruwasqanchikmanta. Hotelkunaman hinaspa restaurantekunamanmi achka testigokuna yaykunku hinaspapas callekunapim achka iñiqmasinchikkuna purinku qasqonpi tarjetayoqkama. Qatiqninpim tarisunchik yanapakuykunata asamblea kasqan llaqtapi Diosta imayna hatunchanapaq (1 Ped. 2:12).
2. ¿Imaynatam Jehova Diospa sutinta hatunchasun asamblea kasqan llaqtapi?
2 Sumaqtam pachakuna. Asambleaman rinapaq sumaqta pachakusqanchikmi runakunata admirachin. Ichaqa allintaqmi kanman hotelman chayaspa, mikuq lloqsispa hinaspa rantipakuq rispapas allinta pachakuyninchikqa. Diospi mana iñiq runakunaqa sutillatam qawananku Dios yupaychaq kasqanchiktaqa (Rom. 12:2). Apananchiktaqmi qasqonchikpi tarjetanchiktapas, chaynapim runakunaqa yachanqaku asambleanchik kasqanta, atisuntaqmi Diospa sutin hatunchayta hinaspa iñiqmasinchikkunawan reqsichikuytapas.
3. ¿Imaynatam pacienciakuq hinaspa respetakuq kasqanchikta qawachichwan?
3 Pacienciawan respetakuq kaymanta. Kunan tiempopi runakunaqa kikillankupaq munaq hinaspa mana agradecekuqmi kanku. Chaymi pacienciakuq kasqanchikqa runakunapa allinninpaq kanman, astawanraqmi hotelpi hinaspa restaurantekunapi llamkaqkunapaqqa (2 Tim. 3:1-5). Manam kikillanchikpiqa piensanachu tiyananchikta sapaqchaspaqa nitaq mosoq qellqanchikkuna chaskiq rispapas (1 Cor. 10:23, 24). Huk runam asambleaman chayllaraq risqanmanta nirqa: “Manam yuyanichu ima yachachikuytapas ichaqa allintam yuyani lliw testigokunapa imayna kayninkutaqa”, nispa.
4. ¿Imanasqataq asambleapi yanapakunanchikpaq piensananchik?
4 Yanapakuq kaymanta. Cheqap cristianokunaqa yanapakuq kasqankuwanmi reqsichikunku (Sal. 110:3). ¿Qamqa yanapayta atiwaqchu? Huk kutipi asamblea apakunanpaqmi 600 masnin cristianokuna yanapakurqaku local pichaypi. Chaypi llamkaq runakunam admirasqallaña nirqaku: “Manam haykapipas kaytaqa rikurqanikuchu. Llapanku mana imallapaq llamkasqankum admirachiwarqaku”, nispa. Ancha kusikuywanmi suyachkanchik 2013 watapi kimsa punchaw asambleataqa, chaymanqa manam uyariqllachu nitaq yachaqllachu risunqa Jehova Diostapas hatunchasunmi.
[3-6 kaq paginakunapi recuadro]
2013 watapi kimsa punchaw asambleapaq yuyarichiykuna
◼ Imay hora qallarinanmanta. Punkukunam kichakunqa 8:00 hora tempranomanta. Kimsantin punchawmi uyarinallapaq takiqa qallarinqa 9:20 tempranomanta. Chay horam asambleanchik sumaqta qallarinanpaq maymi tiyananchikpiña kananchik. Viernestawan sabadotaqa 4:50 tardetam tukunqa, domingotañataqmi 3:35 tardeta (Ayacucho lawpiqa iskay punchawllam asambleaqa apakunqa, chaymantañam asamblea imay hora qallarinanmantaqa congregacionpi willakuy kanqa).
◼ Carrokuna maypi saqenamanta. Carro saqenapaq sitiota ñoqanchik cuentallikuspaqa manam pagasunchu, chayasqanchikman hinataqmi ordenninpi saqesun. Carro saqenapaq sitiokuna taksalla kasqanraykum kallpanchaykiku huk carrollapi achka rinaykichikpaq. Chaymantapas, mana puriy atiqkunapaq sapaqchasqa sitiopiqa paykunata apamuq kasqanmanta letreroyoq carrokunallam chaypiqa kanan.
◼ Tiyanamanta. Tiyananchikpaqmi sapaqchachwan carronchikpi ñoqanchikwan riqkunallapaq, wasinchikmanta riqkunallapaq chaynataq ñoqanchikwan Biblia estudiaqkunallapaq. Yuyaqkunapaqwan onqoqkunapa tiyanankuqa yupasqallam kachkan, chaymi lliw familiankunawan kuska tiyaytaqa manam atinmankuchu. Ama hina kaspa chay tiyanakunata saqey paykunapaq hinaspa yanapaqninkunapaq (1 Cor. 13:5).
◼ Mikuy apanamanta. Chawpi punchawpi mikuyta rantiq lloqsinamantaqa sapakamam mikuyninchikta apakunanchik. Ichaqa manam hatun mankapiqa apanachu, aswanmi tiyananchikpa ukunpi kamaqllata. Manataqmi imapas pakikuq kaqkunataqa apanachu.
◼ Qollqewan yanapakunamanta. Asambleamanta agradecekusqanchiktam qawachichwan sonqonchikmanta qollqenchikta qospa, chaywanmi enteron pachapi predicakunanpaq yanapasun. Chequepi qoyta munaspaqa “Asociación de los Testigos de Jehová” niqtam qellqananchik. Bancontakamapas débito hinaspa crédito niq tarjetakunawanmi qoyta atichwan.
◼ Hampikunamanta. Doctorpa nisusqayki hampita tomanayki kaptinqa ama hina kaspa chay punchawkuna tomanaykipaq apay, asambleapiqa manam chay hampikunataqa qonqakuchu. Diabetes onqoywan onqosqaykirayku inyeccionta churachikunaykipaq apaspaykiqa ama asambleapiqa nitaq hotelpiqa wikapaychu, kikikim wischunayki mana pipas tuksikunanpaq.
◼ Zapatomanta. Asambleapim sapa wata urmanku otaq chakinkuta qewinku zapatonku hatun tacoyoq kasqanrayku. Chaymi zapatoqa kanan gradaspi otaq maypiña puriptinchikpas mana sasachawananchikpaq hina.
◼ Karu uyariqkunamanta. Discursokunam uyarikunqa FM radiopi, chayqa kanqa local ukullapim. Chayta allinta servichikunaykipaqqa audifonoyoq radiochatam apawaq.
◼ Wawata apanapaq kaqkunamanta. Wawata apanapaq coche nisqankutaqa manam asambleamanqa apanachu. Wawata tiyachinapaq imatapas apaspaqa sillapa kamaqllantam apana.
◼ Perfumemanta. Yaqa llapan asambleakunam apakun mana ancha wayrapa yaykunan localpi. Chaymi llumpay asnayniyoq perfumewanqa mana churakunachu, hukkunata mana sasachanapaq (1 Cor. 10:24).
◼ Sírvase visitar (S-43) nisqamanta. Pimanpas predicaptinchik astawan yachayta munaptinqa sutintawan maypi yachasqantam Sírvase visitar nisqa papelchapi qellqananchik. Hinaspam Departamento de Publicaciones nisqaman qonanchik otaq asambleamanta kutiramuspa congregacionpi secretarioman.
◼ Restaurantekunamanta. Restaurantekunapi allinta portakuptinchikqa Jehova Diospa sutinmi hatunchasqa kanqa. Cristiano hina sumaq pachasqataqmi rinanchik. Propina qonapaq costumbre kaptinqa qowaqmi.
◼ Hotelkunamanta.
1) Ama sapaqchaychu mana servichikunaykipaq cuartokunataqa, cuartopi haykata samachinapaq nisqankuman hinalla samachiy.
2) Imapas mana urgente atiendenayki kaptinqa ama yanqachaychu hotelpi samapakunaykitaqa, imapas kaptinqa hotelpi cuentallikuqmanmi chaylla willanayki hukkunata samachinanpaq (Mat. 5:37). Hotelpi manaña samakuyta munaspaykiqa tiempowanraqmi willanayki.
3) Samapakusqayki hotelpi llamkaqkunawan rimaspaykiqa allin portakuq kasqaykita qawachiy. Paykunaqa achka runakunata atiendesqankuraykum munanku entiendeq, pacienciakuq hinaspa kuyapayakuq kananchikta.
4) Tayta-mamakunaqa warmankutam allinta cuidananku hotelpi kaspankuqa.
5) Lista de hoteles recomendados nisqa papelpi rikuriq preciokunaqa huk punchawllapaqmi. Sapaqmi impuesto cobrasqankuqa. Cuartomanta astawan cobrayta munasuptikiqa ama qoychu, aswanqa chaylla willay asambleapi Departamento de Alojamiento nisqa cuentallikuqkunaman.
6) Samapakusqayki cuartopi ima sasachakuypas kaptinqa Departamento de Alojamiento nisqamanmi willanayki.
◼ Servicio voluntariomanta. Yanapakuy munaqkunaqa rinmankum Servicio Voluntario nisqaman. Manaraq 16 watanpi kaq warmakunapas yanapakunmankum, ichaqa tayta-mamanwan kuska otaq paykunapa permisasqan yuyayniyoqwan.