‘Diosta mana serviq runakunapa qayllanpiqa allintayá kawsasunchik’

1. ¿Imaynataq kananchik hamuq kimsa punchaw asambleaman otaq huklaw nacionniyoqkunapaqwan asambleaman rispaqa?

¹ Sapa watam kimsa punchaw asambleanchikman riptinchik runakuna qawawanchik, chaymi imayna kawsasqanchikwan Diospa serviqninkuna kasqanchikta allinta qawachinanchik (Lev. 20:26). Respetakuq kasqanchik hinaspa pachakusqanchikpas Jesuspa cheqap qatiqninkuna kasqanchiktam qawachinan. Hamuq kimsa punchaw asambleanman otaq huklaw nacionniyoqkunapaqwan asambleaman rispanchikqa, ¿imaynatam Diosta mana serviq runakunapa qayllanpi allin kawsasqanchikta qawachichwan? (1 Ped. 2:12.)

2. ¿Maykunapim imayna kayninchikta qawachichwan kimsa punchaw asambleapi?

² Imayna kayninchikta allinta qawachisun. Kuyanakusqanchik hinaspa runamasinchikwan imayna kasqanchikqa, manam chaynallachu Diosta mana serviqkunawanqa (Col. 3:10; 4:5; 2 Tim. 3:1-5). Ancha allinmi hotelkunapi llamkaqkunawan hinaspa mikuy rantikuqkunawanpas respetakuq hinaspa imaña kaptinpas pacienciakuq kayqa. Costumbre kaptinqa qollqetapas saqechwanmi agradecesqa kasqanchikta qawachinapaq.

3. ¿Imatam tayta-mamakuna ruwananku hinaspa imanasqa?

³ Tayta-mamakunam warmankuta allinta cuidananku asambleapi, maypipas mikusqankupi hinaspa hotelkunapipas (Prov. 29:15). Huk hotelpi llamkaqmi casarasqa iñiqmasinchikkunata nirqa: “Testigokunaqa agradoykupaqmi. Warmankupas respetakuq hinaspa kasukuqmi kanku. Lliwmi qamkunamanta allinta rimanku, chaymi munaymanku sapa semana tukuyta qamkuna hamunaykichikta”.

4. ¿Imaynam pachakuyninchik kanan asambleapa kasqan llaqtapi?

⁴ Sumaqtam pachakunanchik. Asambleaman rinapaqqa sumaqtam pachakunanchik, manam Diosta mana serviqkuna hinachu (1 Tim. 2:9). Allintataqmi pachakunanchik hotelman rispa otaq hotelta saqespanchikpas hinaspa asamblea tukuytapas. Chaynapim kusisqa tarikusun qasqonchikpi tarjetanchikta apasqanchikmanta, hinaspam mana penqakuspa Diosmanta willakuytapas atisun. Imayna pachakusqanchik hinaspa imayna kayninchikqa manam asambleaman runakuna hamunallankupaqchu kallpanchanqa, aswanqa Jehova Diostam hatunchanqa (Sof. 3:17).

2014 watapi kimsa punchaw asambleapaq yuyarichiykuna

◼ Imay hora qallarinanmanta. Punkukunam kichakunqa 8:00 hora tempranomanta. Kimsantin punchawmi uyarinallapaq takiqa qallarinqa 9:20 tempranomanta. Chay horam asambleanchik sumaqta qallarinanpaq maymi tiyananchikpiña kananchik. Viernestawan sabadotaqa 4:55 tardetam tukunqa, domingotañataqmi 3:50 tardeta (Ayacucho lawpiqa iskay punchawllam asambleaqa apakunqa, chaymantañam asamblea imay hora qallarinanmantaqa congregacionpi willakuy kanqa).

◼ Huklaw nacionniyoqkunapaqwan asamblea. Wakin llaqtakunapim huklaw nacionniyoqkunapaq asamblea apakunqa. Betel wasim tiyanankupaq, carrokuna kaptin maypi saqenankupaq hinaspa maypi samanankupaq qawaspa allinta tanteanku hayka congregacionkunata invitanankupaq. Pipas mana invitasqa kaspa riptinqa llumpaytam huntarunmanku. Tupasusqayki asambleaman riyta mana atispaykiqa, ama riychu huklaw nacionniyoqkunapaqwan asambleamanqa.

◼ Carrokuna maypi saqenamanta. Carro saqenapaq sitiota ñoqanchik cuentallikuspaqa manam pagasunchu, chayasqanchikman hinataqmi ordenninpi saqesun. Carro saqenapaq sitiokuna taksalla kasqanraykum kallpanchaykiku huk carrollapi achka rinaykichikpaq. Chaymantapas, mana puriy atiqkunapaq sapaqchasqa sitiopiqa paykunata apamuq kasqanmanta letreroyoq carrokunallam chaypiqa kanan.

◼ Tiyanamanta. Punkukuna kichakuptinqa, ama kallpayllaqa tiyananchikta maskaqqa risunchu gananakuypi kachwanpas hina. Hukkunapi piensasqanchikmi qawachinqa paykunapi interesakusqanchikta. Chay ruwasqanchikmi cheqap cristianokuna kasqanchikta qawachin hinaspa hukkunatapas yanapan Jehova Diosta hatunchanankupaq (Juan 13:34, 35; 1 Cor. 13:4, 5; 1 Ped. 2:12). Tiyananchikpaqmi sapaqchachwan carronchikpi ñoqanchikwan riqkunallapaq, wasinchikmanta riqkunallapaq chaynataq ñoqanchikwan Biblia estudiaqkunallapaq. Yuyaqkunapaqwan onqoqkunapa tiyanankuqa yupasqallam kachkan, chaymi lliw familiankunawan kuska tiyaytaqa mana atinmankuchu. Ama hina kaspa chay tiyanakunata saqey paykunapaq hinaspa yanapaqninkunapaq.

◼ Mikuy apanamanta. Chawpi punchawpi mikuyta rantiq lloqsinamantaqa sapakamam mikuyninchikta apakunanchik. Ichaqa manam hatun mankapiqa apanachu, aswanmi tiyananchikpa ukunpi kamaqllata. Manataqmi imapas pakikuq kaqkunataqa apanachu.

◼ Qollqewan yanapakunamanta. Asambleamanta agradecekusqanchiktam qawachichwan sonqonchikmanta qollqenchikta qospa, chaywanmi enteron Pachapi predicakunanpaq yanapasun. Chequepi qoyta munaspaqa “Asociación de los Testigos de Jehová” niqtam qellqananchik. Bancontakamapas débito hinaspa crédito niq tarjetakunawanmi qoyta atichwan.

◼ Hampikunamanta. Doctorpa nisusqayki hampita tomanayki kaptinqa ama hina kaspa chay punchawkuna tomanaykipaq apay, asambleapiqa manam chay hampikunataqa qonqakuchu. Diabetes onqoywan onqosqaykirayku inyeccionta churachikunaykipaq apaspaykiqa ama asambleapiqa nitaq hotelpiqa wikapaychu, kikikim wischunayki mana pipas tuksikunanpaq.

◼ Accidentekuna mana kananpaq. Asambleapim sapa wata urmanku otaq chakinkuta qewinku zapatonku hatun tacoyoq kasqanrayku. Chaymi zapatoqa kanan gradaspi otaq maypiña puriptinchikpas mana sasachawananchikpaq hina.

◼ Karu uyariqkunamanta. Discursokunam uyarikunqa FM radiopi, chayqa kanqa local ukullapim. Chayta allinta servichikunaykipaqqa audifonoyoq radiochatam apawaq.

◼ Wawata apanapaq kaqkunamanta. Wawata apanapaq coche nisqankutaqa manam asambleamanqa apanachu. Wawata tiyachinapaq imatapas apaspaqa sillapa kamaqllantam apana.

◼ Perfumemanta. Yaqa llapan asambleakunam apakun mana ancha wayrapa yaykunan localpi. Chaymi llumpay asnayniyoq perfumewanqa mana churakunachu, hukkunata mana sasachanapaq (1 Cor. 10:24).

◼ Sírvase visitar (S-43). Pimanpas predicaptinchik astawan yachayta munaptinqa sutintawan maypi yachasqantam Sírvase visitar nisqa papelchapi qellqananchik. Hinaspam Departamento de Publicaciones nisqaman qonanchik otaq asambleamanta kutiramuspa congregacionpi secretarioman.

◼ Restaurantekunamanta. Restaurantekunapi allinta portakuptinchikqa Jehova Diospa sutinmi hatunchasqa kanqa. Cristiano hina sumaq pachasqataqmi rinanchik. Propina qonapaq costumbre kaptinqa qowaqmi.

◼ Hotelkunamanta.

Ama sapaqchaychu mana servichikunaykipaq cuartokunataqa, cuartopi haykata samachinapaq nisqankuman hinalla samachiy.
Imapas mana urgente atiendenayki kaptinqa ama yanqachaychu hotelpi samapakunaykitaqa, imapas kaptinqa hotelpi cuentallikuqmanmi chaylla willanayki hukkunata samachinanpaq (Mat. 5:37). Hotelpi manaña samakuyta munaspaykiqa tiempowanraqmi willanayki.
Samapakusqayki hotelpi llamkaqkunawan rimaspaykiqa allin portakuq kasqaykita qawachiy. Paykunaqa achka runakunata atiendesqankuraykum munanku entiendeq, pacienciakuq hinaspa kuyapayakuq kananchikta.
Tayta-mamakunaqa warmankutam allinta cuidananku hotelpi kaspankuqa.
Lista de hoteles recomendados nisqa papelpi rikuriq preciokunaqa huk punchawllapaqmi. Sapaqmi impuesto cobrasqankuqa. Cuartomanta astawan cobrayta munasuptikiqa ama qoychu, aswanqa chaylla willay asambleapi Departamento de Alojamiento nisqa cuentallikuqkunaman.
Samapakusqayki cuartopi ima sasachakuypas kaptinqa Departamento de Alojamiento nisqamanmi willanayki.

◼ Servicio voluntariomanta. Yanapakuy munaqkunaqa rinmankum Servicio Voluntario nisqaman. Manaraq 16 watanpi kaq warmakunapas yanapakunmankum, ichaqa tayta-mamanwan kuska otaq paykunapa permisasqan yuyayniyoqwan.