Kimsa punchaw hatun huñunakuyninchikpaq yuyarichiykuna
Imay hora qallarinanmanta. Punkukunam kichakunqa 8:00 hora tempranomanta. Kimsantin punchawmi uyarinallapaq takiqa qallarinqa 9:20 tempranomanta. Chay taki qallariptinqa maymi tiyananchikpiñam kananchik. Viernestawan sabadotaqa 5:00 tardetam tukunqa, domingotañataqmi 4:00 tardeta.
Takikunawan Jehova Diosta yupaychanamanta. Ñawpaq tiempopim Jehova Diospa llaqtanqa takispa payta yupaycharqaku. Kay tiempopipas takiwan Diosta yupaychayqa ancha allinmi (Sal. 28:7). Tempranon lawpi hinaspa tarden lawpim huñunakuyqa qallarin uyarinallapaq takiwan. Chayqa ruwasqa kachkan Diosmanta yachanapaqwan payta yupaychanapaqmi. Chaymi huñunakuyta qallarichiq iñiqmasinchik takiwan qallarinamanta niptinqa tiyananchikpiña kananchik hinaspa iñiqmasinchikkunawan rimanamantaqa takita uyarinanchik. Chayta ruwaspam orquesta de la Watchtower nisqapi yanapakuq iñiqmasinchikkunata agradecekusqanchikta qawachinchik. Paykunaqa kikinkupa qullqinkuwanmi watapi iskay kutita Patterson (Nueva York) lawman rispanku uyarinallapaq kaq sumaq takikunata grabamunku. Huñunakuypi uyarinallapaq kaq taki tukuruptinñataqmi Jehová Diospaqyá takisun niq qillqanchikpi kaq takitaña takisun.
Carrokuna maypi saqinamanta. Carrokunata saqinapaq sitiota ñuqanchik cuentallikuspaqa manam pagasunchu, chayasqanchikman hinataqmi saqina kanqa. Carro saqinapaq sitiokuna taksalla kasqanraykum kallpanchaykiku huk carrollapi achka rinaykichikpaq. Chaymantapas, mana puriy atiqkunapaq sapaqchasqa sitiopiqa paykunata apamuq letreroyuq carrokunallam chaypiqa kanan.
Tiyanamanta. Punkukuna kichakuptinqa, ama kallpayllaqa tiyananchikta maskaqqa risunchu. Hukkunapi piensasqanchikmi qawachinqa paykunapa allinninta munasqanchikta. Chay ruwasqanchikmi qawachin allin ruwaq kasqanchikta chayta qawaspankum hukkunapas Jehova Diosta hatunchanqaku (Juan 13:34, 35; 1 Cor. 13:5; 1 Ped. 2:12). Tiyanataqa sapaqchana carropi ñuqanchikwan riqkunallapaq, wasinchikpi yachaqkunallapaq chaynataq ñuqanchikwan Biblia estudiaqkunallapaqmi. Tiyanakunata mana sapaqchaspaykiqa ama imatapas hawanpiqa churaychu. Yuyaqkunapaqwan unquqkunapaqmi tiyanankuqa sapaqchasqalla kachkan, chaymi lliw ayllunkunawan kuska tiyaytaqa mana atinmankuchu. Ama hina kaspayá chay tiyanakunata saqiy paykunapaq hinaspa yanapaqninkunallapaq.
Sumaqta pachakunamanta. Hatun huñunakuyman rinapaqqa sumaqtam pachakunanchik, manam Diosta mana serviqkuna hinachu (1 Tim. 2:9). Allintataqmi pachakunanchik hotelman rispa utaq hotelmanta lluqsispanchikpas chaynallataq mana huñunakuypi kaspapas. Chayta ruwaspan qasqunchikpi tarjetanchikta apasqanchikmanta kusisqa tarikusun, hinaspapas mana pinqakuspam Diosmanta willakuyta atisun. Imayna pachakusqanchikwan imayna kayninchikqa manam runakuna hamunallankupaqchu kallpanchanqa, aswanqa Jehova Diostam hatunchanqa (Sof. 3:17).
Aparatokunata imayna servichikunamanta. Celularnikita utaq chayman rikchakuq ima aparatotapas apaspaykiqa ama waqananpaq churaykuy, chaynapi pitapas mana sasachananpaq. Fotota hurquchikunaykipaq, videota grabanaykipaq utaq chayman rikchakuq kaqkunata servichikuspaykiqa hukkunata mana tapaspalla nitaq sasachaspalla servichikuy. Yachachiq iñiqmasinchik rimamuptinqa ama celularnikiwan pukllaychu chaymi qawachinqa hukkunapa allinninta maskasqaykita.
Mikuy apanamanta. Chawpi punchawpi mikuyta rantiq lluqsinamantaqa sapakamam mikuyninchikta apakunanchik. Ichaqa manam hatun mankapiqa apanachu, aswanmi tiyananchikpa ukunpi kamaqllata. Manataqmi imapas pakikuq kaqkunataqa apanachu.
Qullqiwan yanapakunamanta. Tukuy yachasqanchikmanta agradecekusqanchiktam qawachichwan sunqunchikmanta qullqinchikta quspa, chaywanmi enteron pachapi Diosmanta willakuy apakunanpaq yanapasun. Chequepi quyta munaspaqa “Asociación de los Testigos de Jehová” niqtam qillqananchik. Bancontakamapas débito hinaspa crédito niq tarjetakunawanmi quyta atichwan.
Hampikunamanta. Doctorpa nisusqayki hampita tomanayki kaptinqa ama hina kaspa chay punchawkuna tomanaykipaq kaqta apay, huñunakuypiqa manam chay hampikunataqa qunqakuchu. Diabetes unquywan unqusqaykirayku inyeccionta churachikunaykipaq apaspaykiqa ama huñunakuypi nitaq hotelpa tachonpiqa wikapaychu, kikikim wischunayki maymi kasqanman.
Accidentekuna mana kananpaq. Hatun huñunakuyninchikpim sapa wata urmanku utaq chakinkuta qiwinku zapatonku hatun tacoyuq kasqanrayku. Chaymi zapatoqa kanan gradaspi utaq maypiña puriptinchikpas mana sasachawananchikpaq hina.
Karu uyariqkunapaq. Yachachikuykunam uyarikunqa FM radiopi, chayqa kanqa local ukullapim. Chayta allinta servichikunaykipaqqa audifonoyuq radiochatam apawaq.
Wawata apanapaq kaqkunamanta. Wawata apanapaq coche nisqankutaqa manam hatun huñunakuymanqa apanachu. Wawata tiyachinapaq imatapas apaspaqa sillapa kamaqllantam apana.
Perfumemanta. Yaqa llapan huñunakuyninchikqa apakun mana ancha wayrapa yaykunan localpim. Chaymi llumpay asnayniyuq perfumewanqa mana churakunachu, hukkunata mana sasachanapaq (1 Cor. 10:24).
Persona que mostró interés (S-43) nisqa papelchamanta. Hatun huñunakuy punchawkunapi Diosmanta willasqanchik runa astawan yachayta munaptinqa sutintawan maypi yachasqantam Persona que mostró interés nisqa papelchapi qillqananchik. Hinaspam departamento de publicaciones nisqaman qunanchik utaq maypi huñunakusqanchik secretario kaq ancianoman.
Restaurantekunamanta. Restaurantekunapi allinta portakuptinchikqa hinaspa sumaq pachasqa riptinchikqa Jehova Diospa sutinmi hatunchasqa kanqa. Propina qunapaq costumbre kaptinqa quwaqmi.
Samanapaq hotelkunamanta:
Ama sapaqchaychu mana servichikunaykipaq cuartokunataqa, cuartopi haykata samachinapaq nisqankuman hinalla samachiy.
Hotelpi samakunaykipaq rakisqaykitaqa ama yanqallamantaqa saqiychu imapas qunqayllamanta pasaruptin saqinayki kaptinqa chaylla hotelpi cuentallikuqman willay chaynapi huk runakuna samapakunankupaq (Mat. 5:37). Hotelpi manaña samakuyta munaspaykiqa tiempowanraqmi willanayki.
Samapakusqayki hotelpi llamkaqkunawan rimaspaykiqa allin portakuq kasqaykita qawachiy. Paykunaqa achka runakunata atiendesqankuraykum munanku entiendeq, pacienciakuq hinaspa kuyapayakuq kananchikta.
Tayta-mamakunaqa warmankutam allinta cuidananku hotelpi kaspankuqa.
Lista de hoteles recomendados nisqa papelpi rikuriq preciokunaqa huk punchawllapaqmi. Sapaqmi impuesto cobrasqankuqa. Cuartomanta astawan cobrayta munasuptikiqa ama quychu, aswanqa chaylla willay departamento de alojamiento nisqa cuentallikuqkunaman.
Samapakusqayki cuartopi ima sasachakuypas kaptinqa departamento de alojamiento nisqamanmi willanayki.
Yanapakuy munaqkunamanta. Hatun huñunakuypi yanapakuy munaqkunaqa rinmankum servicio voluntario nisqaman. Manaraq 16 watanpi kaq warmakunapas yanapakunmankum taytanwan utaq mamanwan kuska.