Tiempoykita allinta servichikuy predicaspayki
1 Achkam rurananchikqa kachkan tiemponchikmi ichaqa mana haypawanchikchu llapanta ruranapaq (Juan 4:35; 1 Cor. 7:29). Allin arreglokunata ruraspaqa tiemponchiktam allinta servichikusunchik predicanapaq.
2 Preparakuy: Predicanapaq huñunakuyman manaraq richkaspa, predicanaykipaq qellqakunata alistay hinaspa imamanta predicanaykipaqpas preparakuy. Chay huñunakuy oracionwan tukuruptillan predicanayki lawman riy. Chaynatamá qanwan riqkunapas allinta tiempoykichiktaqa servichikunkichik predicanaykichikpaq.
3 Predicanapaq huñunakuyta ruranaykipaq encargasqa kaspaykiqa tiempowan qallarispa yachachiy aslla rimayllapi: chunka otaq chunka pichqayoq minutollapim chay huñunakuyqa kanan. Predicacionman manaraq richkaspam, llapanku yachananku piwanmi hinaspa maylawpi predicanankuta.
4 Predicacionpi: Predicanapaq huñunakuy tukuruptinqa manam yanqapuniqa demoranachu; aswanqa predicana lawmanmi rinayki. Manaraq predicacion tukuchkaptin kutimunayki kaptinqa predicacionta dirigeq wawqenchikman willay wakiqnin wawqe paninchikkunapas chaynata ruranankupaq. Predicaspaykiqa piensay wawqe-paninchikkuna suyasusqaykipi chay rayku ama unaytachu rimay. Allinpaschá kanman wawqe-paninchikkunarayku huk kutipiña yachay munaqkunamanqa kutiwaq otaq atipakuylla munaq runamantaqa allinllata despedikuy (Mat. 10:11).
5 Bibliamanta yachay munaqta watukuspanchikqa allinmi kanman hichpa-hichpa kaqkunaman watukuyqa kayman-wakman yanqa purinanchikmantaqa chaymantañam huklawmampas richwan. Wakinpiqa allinmi kanman wasinpi kasqanta yachanapaq telefonowan qayaypas (Pro. 21:5).
6 Jehová Diospa llaqtanman runakunata huñumuna tiempopim kawsachkanchik (Mat. 9:37, 38). Tukurunqañam kay rurayninchikqa. Chaymi tiemponchiktaqa allinta servichikunanchik predicaspanchikqa.