INTERNETPI QELQANCHISKUNA Watchtower
Watchtower
INTERNETPI QELQANCHISKUNA
quechua (Cusco)
  • BIBLIA
  • QELQAKUNA
  • JUÑUNAKUYKUNA
  • w13 15/6 17-21 paginakuna
  • Hunt’aq sonqo pampachakuq Diostaq

Manan kaypaq video kanchu

Pampachaykuway, manan atikushanchu kay videota qhawanaykipaq.

  • Hunt’aq sonqo pampachakuq Diostaq
  • Qhawaq Jehová Diospa Reinonmanta Willashan 2013
  • Subtitulokuna
  • Kaykunatawan qhaway
  • JEHOVÁ DIOSQA HUNT’AQ SONQON
  • DIOS HINA HUNT’AQ SONQO KASUN
  • JEHOVÁ DIOSQA PAMPACHAKUQMI
  • JEHOVÁ DIOS HINA PAMPACHAQ KASUN
  • DIOSPA SUMAQ KAYNINKUNATA CHANINCHASHALLASUN
  • Jehová Dios jinaqa manan pipas perdonawasunmanchu
    Qhawaq Jehová Diospa Gobiernonmanta Willashan (estudianapaq) 2022
  • Ama iskayaychu, Jehová Diosqa perdonasunkiñan
    Qhawaq Jehová Diospa Gobiernonmanta Willashan (estudianapaq) 2025
  • ¿Imayna perdonaqmi Jehová Dios?
    Qhawaq Jehová Diospa Gobiernonmanta Willashan (estudianapaq) 2025
Qhawaq Jehová Diospa Reinonmanta Willashan 2013
w13 15/6 17-21 paginakuna

Hunt’aq sonqo pampachakuq Diostaq

“Señor Diosníy, qanqa sumaqmi, hucha pampachaykuqmi kanki, llapa waqyakuqniykikunatan anchatapuni munakunki” (SAL. 86:5)

¿YACHANKICHU?

  • ¿Imaynapin Jehová Dios hina hunt’aq sonqo kasunman?

  • ¿Imatan ruwananchis Jehová Dios hina pampachaq kanapaq?

  • ¿Imaraykun kallpachakushanallanchis Diospa sumaq kayninkunamanta yachanapaq pay hina kanapaqpas?

1, 2. a) ¿Imaraykun hunt’aq sonqo, pampachakuyta yachaq amigota ancha chaninpaq qhawarinchis? b) ¿Imakunamantan kay estudiopi yachasun?

¿IMAYNA runatan qan niwaq “cheqaq amigo” nispa? Ashley iñiqmasin nirqan: “Cheqaq amigoqa qanmanta mana t’aqakuq runan, imapiña pantaqtiykipas pampachayta yachaq”, nispa. Llapallanchismi munasunman hunt’aq sonqo, pampachayta yachaq amigotaqa. Chhayna amigoyoq kaspaqa manan manchapakunchischu munasqataqmi sientekunchis (Prov. 17:17).

2 Jehová Diosmi mayqen runamantapas aswan hunt’aq sonqo pampachakuq amigoqa. Salmistan nirqan: “Señor Diosníy, qanqa sumaqmi, hucha pampachaykuqmi kanki, llapa waqyakuqniykikunatan anchatapuni munakunki”, nispa (Sal. 86:5). ¿Iman hunt’aq sonqo kay, hucha pampachaq kaypas? ¿Imaynatan Jehová Dios rikuchin chay sumaq kaykunata? ¿Imaynatan ñoqanchispas payta qatikusunman? Chaykunamanta yachasqanchismi yanapawasun ancha Hatun Amigonchista munakunapaq, iñiqmasinchiskunawan sumaqta kawsanapaqpas (1 Juan 4:7, 8).

JEHOVÁ DIOSQA HUNT’AQ SONQON

3. ¿Iman hunt’aq sonqo kay?

3 Hunt’aq sonqo runaqa tukuy tiempon munakun. Payqa manan atispallachu amigonta yanapan aswanmi allin tiempopi mana allin tiempopipas payllawan kashan. Biblian Diosmanta nin: “Hunt’aqpaqqa hunt’aqllataqmi kanki”, nispa. Manan pipas Diosninchis hina hunt’aq sonqoqa kanchu (Sal. 18:25).

4, 5. a) ¿Imaynatan Dios rikuchin hunt’aq Dios kasqanta? b) ¿Imaynan sientekunchis Dios hunt’aq sonqo kasqanta yachaspa?

4 ¿Imaynatan Jehová Dios rikuchin hunt’aq sonqo kasqanta? Hunt’aq kamachinkunata mana hayk’aqpas saqerparispan. Chaymi rey David chhayna Dios kasqanmanta hatuncharqan (leey 2 Samuel 22:26). Paytan Jehová Dios pruebakunapi tarikushaqtin pakaykurqan, pusarirqan, wañuymantapas qespichirqan (2 Sam. 22:1). ¿Imaraykun Jehová Dios Davidta hunt’aq sonqowan qhawarirqan? Davidpas ‘hunt’aq’ kasqanraykun. Arí, Diosqa hunt’aq runakunatan munakun, chaymi hunt’aqpaqqa paypas hunt’aqllataq (Prov. 2:6-8).

5 ¡Jehová Dios hunt’aq sonqo kasqanqa anchatan kallpachawanchis! Reed iñiqmasin nirqan: “Maytan yanapawan David sasa tiempokunapi kashaqtin Jehová Diospa yanapasqanmanta Bibliapi leesqay. Diosqa manapunin saqerparirqanchu qaqa t’oqokunapi David pakakushaqtinpas. ¡Anchatan chay kallpachawan! Ñoqapas hunt’aq sonqo kasaq chayqa, sinchi sasachakuykunapiña kashaqtiypas Diosqa manan saqerpariwanqachu”, nispa. Llapallanchischá chay hinata sientekunchis (Rom. 8:38, 39).

6. a) ¿Imakunapin Jehová Dios rikuchillantaq hunt’aq sonqo kasqanta? b) ¿Imaynapin allinninchispaq kanqa hunt’aq sonqo kasqan?

6 ¿Imakunapin Jehová Dios rikuchillantaq hunt’aq sonqo kasqanta? Kamachikusqanman hina tukuy imatapas ruwaspa. Pay kikinmi nin: “Yuyaqña kanaykichiskamapas kaqllapunin kashasaq”, nispa (Is. 46:4). Imata ruwanan kaqtinpas kamachikuyninman hinan ruwan, kamachikuyninqa manataqmi hayk’aqpas cambianchu (Mal. 3:6). Hinaspapas Diosqa tukuy rimasqantan hunt’an (Is. 55:11). Jehová Dios hunt’aq sonqo kasqanqa llapanchispa allinninchispaqmi, ¿imaynapi? Sichus kallpachakusun payta kasukunapaq chayqa tukuy prometewasqanchistan qowasun (Is. 48:17, 18).

DIOS HINA HUNT’AQ SONQO KASUN

7. ¿Imaynatan rikuchisunman Dios hina hunt’aq sonqo kasqanchista?

7 ¿Imaynatan ñoqanchispas rikuchisunman Dios hina hunt’aq sonqo kasqanchista? Chaytaqa ruwasunman sasachakuykunapi kaqkunata yanapaspan (Prov. 3:27). Yaqapaschá yacharusunman huk iñiqmasinchis pisikallpayasqanta, onqosqanta, familianpa hark’asqanta otaq pantarusqanmanta llakikusqanta. Paykunaman asuykuspan ‘kusichikuq sumaq simikunawan’ kallpachananchis (Zac. 1:13).a Chayta ruwaspan rikuchisun cheqaq hunt’aq amigo kasqanchista, “wawqemantapas aswan munakuq amigo” (Prov. 18:24).

8. ¿Imaynatan casado kawsaypi iñiqmasikunawan kawsaypipas rikuchisunman hunt’aq kasqanchista?

8 ¿Imaynatan munakusqanchis runakunaman rikuchisunman hunt’aq sonqo kasqanchista? Casado kaqkunaqa yachankun esposallankupaq qosallankupaq munakuyninku kananta (Prov. 5:15-18). Chaymi mana wasanchay huchaman apaq ruwaykunapi yuyaykullankupaschu (Mat. 5:28). ¿Imaynatan iñiqmasinchiskunaman rikuchillasunmantaq hunt’aq kasqanchista? Manan mayqenninkumantapas rimakunachu, yanqamanta tumpanachu, manataqmi chay hina rimaykunata ch’eqechinachu, nitaq uyarinapaschu (Prov. 12:18).

9, 10. a) ¿Pimanmi astawanqa hunt’aq sonqo kananchis? b) ¿Imaraykun mayninpi sasa kanqa Diosta kasukuy?

9 Ichaqa Jehová Diosmanmi astawanqa hunt’aq kananchis, ¿imaynatan chayta ruwasunman? Chaypaqqa kallpachakunanchismi paypa munakusqanta munakunapaq cheqnikusqanta cheqnikunapaqpas. Chaymi yanapawasun paypa munasqanman hina kawsanapaq (leey Salmo 97:10). Diospa yuyaykusqanta hina yuyaykuyta yachasun chayqa, manan sasachu kanqa payta kasukuy (Sal. 119:104).

10 Chaywanpas mayninqa sasan kanqa Diosta kasukuy. Yaqapaschá astawanraq kallpachakunanchis kanqa hunt’aq sonqo kanapaq. Chay hinapin wakin soltera cristianakuna tarikunku, paykunaqa casarakuytan munanku ichaqa manan casarakunankupaq hina cristiano qosata tarinkuchu (1 Cor. 7:39). Paykunatan mana iñiq llank’aqmasinkuna mayninqa pitapas munapayachinkuman casarakunankupaq. Sapanña sientekunku chaypas paykunaqa Diospaqmi hunt’aq sonqo kayta munanku. ¡Chay hina cristianakunaqa allin ejemplon kanku! Jehová Diosmi hunt’aq sonqo kasqankumanta kutichipunqa (Heb. 11:6).

“Kanmi [...] wawqemantapas aswan munakuq amigo” (Prov. 18:24) (7 parrafota qhaway)

‘Pampachaykunakuychis’ (Efes. 4:32) (16 parrafota qhaway)

JEHOVÁ DIOSQA PAMPACHAKUQMI

11. ¿Iman pampachaq kay?

11 ¿Iman pampachaq kay? Pampachaq runaqa manan phiñasqallachu kashan pay contra imatapas ruwaq runawan. Chaywanpas manan chayraykuchu ima ruwasqankutapas hinallata qhawan nitaq mancharikunchu chaykuna kasqanwan. Aswanmi kallpachakun phiñachiqnin runapaq ama sientepakunanpaq. Biblian Jehová Diosmanta nin: “Hucha pampachaykuqmi kanki”, nispa. Arí, Diosqa pampachanmi huchanmanta pesapakuq runata (Sal. 86:5).

12. a) ¿Imaynapin Dios rikuchin pampachaq kasqanta? b) ¿Ima ninanmi hucha ‘pichasqa kapusqan’?

12 ¿Imaynapin Jehová Dios rikuchin pampachaq kasqanta? Diosqa pitapas pampachaspaqa lliw huchantan pasaqpaq ‘pampachan’ (Is. 55:7). ¿Imaynapin lliw huchanta pampachan? Yuyaykusun Hechos 3:19 (leey) textoq nisqanpi. Apóstol Pedron uyariqnin runakunata nirqan: “Chay hinaqa, huchaykichista saqepuspa Diosman kutirikuychis”, nispa. Huchanmanta pesapakuq runaqa llakikunmi mana allinkuna ruwasqanmanta decidikuntaqmi chay huchanta saqepunanpaq (2 Cor. 7:10, 11). Hinaspapas Diosmanmi kutirikun, chaytaqa ruwan mana allin ñanta saqepuspa Diospaq hina kawsaspan. ¿Imatan chaskinkuman Pedrota uyariq runakuna huchankumanta pesapakuqtinku? Huchankun ‘pichasqa kapunman’. Chay simitan griego simipi rikch’anachikun ima qellitapas “qhetuspa pichaywan”. Chay hinatan Diospas huchallikuq runaq lliw huchanta pichapun (Heb. 10:22; 1 Juan 1:7).

13. ¿Imatan Dios nisharqan ‘manan yuyarisaqñachu huchankutapas’ nisqanwan?

13 ¿Imaynatan Jehová Dios rikuchin pasaqpaq pampachasqanta? Akllasqa cristianokunawan mosoq rimanakuymanta Jeremiaswan qelqachisqanpin chayta yachanchis (leey Jeremías 31:34). Diosmi prometerqan: “Ñoqan pampachasaq mana allin ruwasqankuta, manañataqmi yuyarisaqñachu huchankutapas”, nispa. Chaypi nisqan hina, Diosqa pampachawasqanchis qhepamanqa manañan chay hucha hawa ñoqanchis contra imatapas ruwanñachu. Payqa huchanchistan pasaqpaq qonqapun (Rom. 4:7, 8).

14. ¿Imaynatan yanapawanchis Jehová Dios imayna pampachasqanpi yuyaymanay?

14 Anchatan kallpachawanchis Jehová Dios imayna pampachawasqanchispi yuyaymanay. Yachasun Elena iñiqmasimanta.b Payqa unay watakunaña Diospa llaqtanmanta qarqosqa kasqan qhepamanmi kutimpurqan. Ichaqa manapas Dios pampachanmanchu hinan sientekuq, manapas Dios munakunmanchu hina. Ichaqa Dios imayna pampachakuq kasqanmanta Bibliapi rikch’anachiykunawan willasqanpi yuyaymanasqanmi payta kallpacharqan. Leesqanpin yacharqan imaynata Dios huchanchismanta ch’uyanchawasqanchista. Chay qhepaman manaña huchachakunanchischu kasqanta.c Paymi nin: “Ñoqaqa sonqoypin nirqani: ‘Diosqa manan pampachawanmanchu, hinatachá kay q’epiyta apasaq tukuy kawsasqay tiempo’, nispa. Chayraqmi kunan reparani yapamanta Diosman asuykuy atisqayta, chay hatun q’epitapas urayachikushayman hinan sientekuni”, nispa. Arí, Diosqa cheqaq pampachakuqmi munakuqtaqmi kanpas (Sal. 103:9).

JEHOVÁ DIOS HINA PAMPACHAQ KASUN

15. ¿Imaynatan Jehová Dios hina hukkunata pampachasunman?

15 Jehová Diosta qatikunapaqqa pay hinan hukkunata pampachananchis (leey Lucas 17:3, 4). Kayta yuyarisun: Jehová Dios huchanchista pampachaspaqa manañan huchallikusqanchispi yuyaykunñachu. Ñoqanchispas hukkunata pampachaspaqa qonqapunanchismi chay huchata manataqmi hayk’aqpas chayta yuyarinanchischu imaña kaqtinpas.

16. a) ¿Iman sonqomanta pampachay? b) ¿Imatan ruwananchis Dios pampachawananchispaq?

16 Hukkunata pampachayqa manan huchallikusqanta hinallata qhawaychu nitaq hinata imatapas ruwachikuychu. Pampachaq kayqa hukkunaq mana allin ruwasqankuta qonqapuymi. Hinaspapas kayta yuyarisun: Jehová Dios pampachawananchispaqqa ñoqanchispas contranchispi huchallikuqkunatan pampachananchis (Mat. 6:14, 15). Diosqa yachanmi pantaq runa kasqanchista yuyarintaqmi “ñut’u hallp’a kasqanchista” (Sal. 103:14). Chaytan ñoqanchispas yuyarinanchis pipas ñoqanchis contra imatapas ruwaqtin, chaymi yanapawasun paykunata sonqomanta pampachanapaq (Efe. 4:32; Col. 3:13).

Tukuy sonqowan mañakusun contranchispi huchallikuqkunapaq (17 parrafota qhaway)

17. ¿Iman yanapawasun contranchispi huchallikuq iñiqmasita mana cheqnipakunapaq?

17 Mayninqa sasan kanman contranchispi huchallikuqkunata pampachay. Ñawpaq tiempopi akllasqa cristianokunapaqpunin sasa karqan hukkunawan allipunakapuy (Filip. 4:2). Chhaynaqa, ¿iman yanapawasun iñiqmasinchiskunata sonqonchispi mana cheqnipakunapaq? Jobmanta yachasun. Paytan Elifaz, Bildad, Zofarpiwan sinchita sonqonta k’irirqanku yanqamanta tumpaspa (Job 10:1; 19:2). Chay ruwasqankumantan Jehová Dios paykunata anyarqan, hinaspan kamachirqan Jobman rispa Diosman sacrificiota haywanankupaq (Job 42:7-9). Ichaqa Jobpas paykunaraykun Diosmanta mañakunan karqan. Chayta ruwaspa chay runakuna pampachasqanta rikuchisqanraykun Jobmanpas bendicionninta qorqan (leey Job 42:10, 12, 16, 17). ¿Imatan chaymanta yachanchis? Sichus contranchispi huchallikuqkunapaq Diosmanta mañapusun chayqa, manañan sonqonchispi paykunata cheqnipakusunchu.

DIOSPA SUMAQ KAYNINKUNATA CHANINCHASHALLASUN

18, 19. ¿Imata ruwanapaqmi kallpachakushanallanchis?

18 Maytan kallpachawarqanchis kinsantin estudiopi Diospa sumaq kayninkunamanta yachasqanchis. Yacharunchismi Diosqa asuykunapaq hina, mana pimanpas sayapakuq, qoykukuq sonqo, entiendeq, hunt’aq sonqo, hucha pampachaq kasqantapas. Ichaqa astawanraqmi kan Diosmanta yachanapaqqa. Mayraqchá tiempo kanqa Diosmanta astawan yachanapaq (Ecl. 3:11). Ñoqanchisqa Pablo hinan ninchis: “¡May hatunpunin Diospa qhapaq-kayninpas, yachayninpas, yuyayninpas!”, nispa. Chay hinatan qhawarinchis soqta sumaq kayninkunata munakuynintapas (Rom. 11:33).

19 Kallpachakushallasun Diospa sumaq kayninkunamanta yachanapaq chaykunapi yuyaymananapaqpas, chayta ruwasun chayqa Diospa chay sumaq kayninkunan ñoqanchispi kanqa (Efes. 5:1). Chay hinapin Jehová Diosta astawan munakuspa payman k’askakusun. Salmista hinataqmi nisun: “Ñoqapaq aswan allinqa Diospa qayllanpi kayniymi”, nispa (Sal. 73:28).

a Astawan yachanaykipaq maskhay “¿Kallpacharqankichu pillatapas kay p’unchaykunapi?” temata, 1995 wata 15 enero La Atalaya revistapi, hinallataq “¿Imaynatan kallpachanakusunman munanakunapaq allin ruwaykunata ruwanapaqpas?” temata, 1995 wata 1 abril La Atalaya revistapi.

b Sutinqa cambiasqan kashan.

c Qhawariy Acerquémonos a Jehová libropi 26 capitulota 10 parrafota.

    Quechua (Cuzco) Qelqakuna (2001-2025)
    Wisq'ay
    Jaykuy
    • quechua (Cusco)
    • Jujman apachiy
    • Imaynatan munanki
    • Copyright © 2025 Watch Tower Bible and Tract Society of Pennsylvania
    • Imatan ruwawaq imatan mana
    • Datoskunata waqaychasqaykumanta
    • Configuración de privacidad
    • JW.ORG
    • Jaykuy
    Jujman apachiy