¿Lloqsisunmanchu predicaq tardenkunata?
1. Huk qelqaq willasqan hina, ¿ima horatan apóstol Pablo predicaq?
1 Huk qelqan willan apóstol Pabloqa “tawa horas tardenmanta ch’isinkama” wasin-wasin predicasqanmanta (Daily Life in Bible Times). Manaña sut’intapunichu yachanchis ima horapi predicasqanmanta chaypas, Pabloqa “allin willakuykunaraykun” tukuy atisqanta ruwaq (1 Cor. 9:19-23). Payqa allintachá tiemponta t’aqarqan wasin-wasinta predicaspa aswan askha runakunata tarinanpaq.
2. ¿Imaraykun aswan allin kanman tardenkunata predicay?
2 Askha llaqtakunapi iñiqmasinchiskunan yachasqaña kanku tutamantan wasin-wasinta predicanankupaq. Ichaqa, ¿askha runakunatachu chay horapi tarinku? Huk precursormi nirqan: “P’unchaypiqa pisitan runakunata tariyku, ch’isintan ichaqa askhata”, nispa. Chay horatan wasimasinchiskuna wasinkupi tarikunku, liston kashanku parlarinanchispaqpas. Hinaspapas chay horapin qharikunata wasinkupi tarisunman. Chaymi atikusqanman hina umallikunaqa programata ruwananku tardenpi predicanapaq.
3. ¿Imaynatan rikuchisunman allin yuyaywan predicasqanchista?
3 Allin yuyaywan predicasun. Ch’isinta predicaspaqa allin yuyaywanmi predicananchis. Sichus mikhushaqtinku otaq imata ruwashaqtinkupas chayanchis chayqa, nisunmanmi kutinanchispaq. Laqhayaqpi punku kanman chayqa, k’anchaymanmi rinanchis rikuwananchispaq, lloqsimuqtintaq willananchispacha pi kasqanchista imapaq visitasqanchistapas. Hinaspapas iskay-iskaymantan purinanchis, manataqmi nishutaqa hukkunamanta karunchakunachu; allin k’anchay kasqan callekunapin predicananchis, manataqmi ch’in ladokunaman haykunachu. Manan nishu tutataqa predicanachu, yaqapachá wakinqa alistakushankuña puñunankupaq (2 Cor. 6:3). Wakin callekunaqa peligroson kanman ch’isinkunata, chaymi manaraq tutayashaqtin ripunanchis (Pro. 22:3).
4. ¿Ima allinkunan kanqa tardenkunata predicaqtinchis?
4 Allinpaqmi kanqa. Predicacionpi runakunawan parlaspan aswan kusikuyta tarinchis. Aswan askha runakunaman predicaqtinchismi askha runakuna cheqaq yachayta tarinqaku qespichisqapas kanqaku (1 Tim. 2:3, 4). ¿Manachu ñoqanchispas tiemponchista t’aqasunman tardenkunata predicanapaq?