‘Allin willakuykunata willasun’
1. ¿Ima allin willakuykunatan runakunaman willananchis?
1 Kay pachapiqa mana allin willakuykunallatan uyarikun, chaymi ñoqanchispaqqa ancha sumaq ‘Diospa khuyapayakuyninmanta allin willakuykunata willay’ (Hech. 20:24). Runakunamanmi kayta willananchis: ‘Tukukuy qaylla p’unchaykuna’ p’uchukapuqtinmi, Jehová Diospa prometesqan mosoq pacha qallarinqa chaypin ‘ñawpaqkaqkunaqa manaña kapunqachu’, nispa (2 Tim. 3:1-5; Apo. 21:4). Kaykunatan willasunman: manaña onqoykuna kapunanmanta (Isa. 33:24); Diospa yuyarisqan wañuqkuna kawsarinpunanmanta chhaynapi familiankuwan, amigonkunawan kuska tiyanankupaq (Juan 5:28, 29); Hallp’antin sumaq paraisoman tukupunanmanta (Isa. 65:21-23), huk allin willakuykunatapas.
2. ¿Imarayku marzo, abril, mayo killakuna ancha allinpuni kanqa allin willakuykunata predicanapaq?
2 Marzo, abril, mayo killakunaqa ancha allinmi kanqa allin willakuykunata willanapaq, astawan predicayninchista yapanapaqpas. Hinaspapas, teqsimuyuntinpi Jesuspa Wañusqanta Yuyarisun sábado 22 p’unchay marzo killapi, Inti haykuy qhepata. Chaymi kunanmantapacha allichakushananchisña chay killakunapi astawan predicananchispaq.
3. ¿Iman familiata yanapanqa predicayninkuta yapanankupaq?
3 Precursor auxiliar kanapaq: ¿Allichawaqchu tiempoykita huk killa, iskay killa otaq kinsantin killa precursor auxiliar kanaykipaq? ¿Rimanakuwaqchischu chay killakunapi precursor auxiliar kanaykichispaq hamuq semanapi familiantin Bibliata estudiaqtiykichis? Sichus yanapanakunkichis chayqa, hukllapas otaq yaqa llapaykichispas atiwaqchismi precursor auxiliar kayta (Pro. 15:22). Precursor auxiliar kay munasqaykichismanta mañakuypi Jehová Diosman willaychis, payqa saminchanqa kallpachakusqaykichista (Pro. 16:3). Manaña familiantin precursor kayta atiwaqchischu chaypas, llapallaykichismi kallpachakuwaqchis predicayniykichista yapanaykichispaq, chhaynapi precursor auxiliar kaqkunata yanapanaykichispaq.
4. ¿Imaynatan tiempoykita allichawaq precursor auxiliar kanaykipaq ch’isiyaqtaña llank’aqtiykipas?
4 Sichus ch’isiyaqta llank’anki chayqa, tiempoykita allichakuspa precursor auxiliar kawaq. Yaqapaschá, chawpi p’unchay mikhuna horasta predicawaq. Hinaspapas, mañakuwaqmi llank’asqayki qayllallapi otaq wasiyki qayllallapi kaq territoriota sapallayki predicanaykipaq, chhaynapi manaraq llank’anaykiman rishaspa otaq llank’anaykimanta lloqsispa huk horata hinallapas predicawaq. Chaymantapas, astawan predicanaykipaq tiempoyki kananpaqqa ima ruway munasqaykikunatapas hukkaq killapaq saqewaq otaq ch’isiyaqta sabadonpi domingonpiwan predicawaq. Wakin wayqe panakunaqa huk otaq iskay p’unchayta llank’anankumanta permisota mañakuspa predicaq lloqsinku.
5. ¿Imaynatan yanapawaq kuraq wayqe pananchiskunata onqosqakunatapas precursor auxiliar kanankupaq?
5 ¿Kuraqñachu kashanki? ¿Onqoshankichu? ¿Kallpaykipas pisiyapushanchu? Chaywanpas, atiwaqraqmi precursor kayta pisillata sapa p’unchay predicaspa. Jehová Diosmanta mañakuy ‘hatun atiyta’ qonasuykipaq (2 Cor. 4:7). Huk pananchismi 106 watanpi precursor auxiliar karan. Kay pananchistaqa familiankuna wayqe pananchiskuna yanaparan, chaymi wasin-wasinta predicaran, revisitata ruwaran, Bibliamanta estudiota qoran, huk ruwaykunapipas yanapakuran. Chunka runakunamanmi Bibliamanta yachachiyta qallariran. Paymi niran: “Precursor auxiliar kasqaymanta yuyarispaymi ancha munakuywan sonqoymantapacha agradecekuni Jehová Diosta, Churinta, llaqtantawan. Arí, Jehová Diostan tukuy sonqoymanta agradecekuni”, nispa.
6. ¿Imaynatan escuelamanraq rishaq wayna sipaskuna precursor auxiliar kayta atinkuman?
6 Escuelamanraq rishanki chaypas, atiwaqmi precursor auxiliar kayta. Ch’isiyaqta llank’aqkuna hinan tiempoykita allichawaq, sabadonkunapi domingonkunapiwan predicanaykipaq, hinaspapas huk p’unchaykunapi lloqsiwaq huk horata hinallapas predicanaykipaq. Escuelaykipi feriado p’unchaykuna kaqtinpas allichawaqmi tiempoykita predicaq lloqsinaykipaq. Precursor auxiliar kayta munanki chayqa, tayta mamaykiwan rimay.
7. ¿Imatan congregacionpi umallikuna ruwananku Jesuspa Wañusqanta Yuyarinapaq killakunapi wayqe panakuna kusisqa predicanankupaq?
7 Kallpachay: Congregacionpi umallikunaq ruwasqanmi wayqe panakunata kallpachanqa kusikuywan predicanankupaq (1 Ped. 5:2, 3). Askha horariokunatan allichananku predicakunanpaq, tutallamanta lloqsiqkunapaq, escuelamanta lloqsiqkunapaq, llank’anankumanta lloqsiqkunapaqpas. Serviciopaq Superintendenten allin predicaq wayqekunata akllanan predicanapaq huñunakuyta umallinanpaq, allichanantaqmi chay killakunapi predicanapaq askha territorio kananpaq, revistakuna, huk qelqakuna kananpaqpas.
8. ¿Imatan yachachiwanchis huk congregacionpa experiencian?
8 Huk congregacionpin ñawpaq killakunamantaraq umallikuna wayqe panakunata kallpachaqku precursor auxiliar kanankupaq, sapa semanataq willaqku hayk’a mosoq precursor auxiliar kasqanmanta. Chhaynapin, astawan predicay munaq wayqe panakunaqa allinta sientekuranku umallikunaq yanapasqan kanankuta yachaspa. Hinaspapas, congregacionpi umallikunaqa huk horariokunata allicharanku predicacionman lloqsinankupaq, tutallamanta lloqsinankupaq ch’isinta lloqsinankupaqpas. Chaymi abril killapi 53 wayqe panakuna precursor auxiliar karanku, congregacionmanta yaqa kuskan precursor karanku.
9. ¿Imaraykun Jesuspa Wañusqanta Yuyarinapaq killakuna allinpuni kanqa chayllaraq predicaqkunapaq?
9 Hukkunata yanapay predicanankupaq: Sichus mosoqkuna wayqe panakunaq wawankunapas chayllaraq predicashanku chayqa, unayña predicaq wayqe panakunawanmi tupachinkuman. Jesuspa Wañusqanta Yuyarinapaq killakunapiqa askha wayqe panakunan predicayninkuta yapanqaku, chaymi allinpuni kanqa chayllaraq predicaqkunapaq. Chhaynaqa, ¿Bibliamanta estudiachisqaykikunamanta mayqellanpas iñiyninpi wiñarishanchu, Jehová Diospa kamachikuyninkunatapas kasukushanchu? ¿Manaraq predicaq wawaykikunapas kasukushankuchu, wiñarishankuchu iñiyninkupipas? Sichus mayqellanpas mana bautizasqa publicador kayta munan, hunt’ashanñataq predicananpaq chayqa, huk ancianowan rimay. Congregacionpi superintendente presidenteñan kamachinqa iskay ancianokunata qanwan wawaykiwan otaq estudiachisqaykiwanpas rimanankupaq.
10. ¿Imatan ruwananku ancianokuna iñiyninpi chiriyapuqkunata yanapanankupaq?
10 Chay killakunaqa allinmi kanqa iñiyninkupi chiriyapuq wayqe panakunata yanapanapaqpas, chhaynapi congregacionwan kuska hukmanta predicanankupaq. Qelqamanta Yachanapaq Huñunakuyta umalliq ancianokuna huk ancianokunapas kallpachakunqaku iñiyninpi chiriyapuq wayqe panakunata watukunankupaq mink’anqakutaq paykunawan kuska predicaq lloqsinankupaq. Unayña iñiyninpi chiriyapuqtinqa iskay ancianokuna qhawarinanku sichus predicayta atinman icha manachus chayta (km 11/00 pág. 3).
11. ¿Iman rikuchin ‘Diospa [ancha] khuyapayakuyninta’?
11 Allichakuy Jesuspa Wañusqanta Yuyarinapaq: Kacharichiy sacrificion rikuchin ‘Diospa [ancha] khuyapayakuyninta’ (Hech. 20:24). Sábado 22 p’unchay marzo killapi, Inti haykuy qhepata, teqsimuyuntinpi agradecido runakuna millonninpi huñukunqaku Cristoq wañusqanta yuyarinankupaq. Chaymi llapa allin sonqoyoq runakunata mink’amunanchis, maychus atisqanchisman hinataq yanapananchis kay sumaq huñunakuyman hamunankupaq, chay huñunakuypin yuyarisun imaynata Jehová Dios runakunata khuyapayaran chayta.
12. ¿Pikunatan mink’asunman Jesuspa Wañusqanta Yuyarinaman hamunankupaq?
12 Huk listapi mink’anayki runakunaq sutinta qelqay. Qelqawaqmi familiaykikunaq, wasimasiykikunaq, llank’asqaykipi otaq escuelapi reqsisqaykikunaq, ñawpaqpi otaq kunan Biblia estudiaqkunaq sutinta, sapa kutilla visitasqayki mayqen runakunaq sutintapas. Pillapas Jesuspa Wañusqanta Yuyarinamanta tapukunman chayqa, yanapachikuwaqmi ¿Imatapunin Biblia yachachin? nisqa librowan, chay libropin apéndice nisqapi 206-208 paginakunapi willashan Señorpa Cenanmanta. Chay librowan yanapachikuspaqa yaqapaschá Bibliamanta estudiota qallariwaq.
13. ¿Imaynata Jehová Dios samincharan iskay iñiqmasinchiskunata Jesuspa Wañusqanta Yuyarinapaq mink’asqankumanta?
13 Huk pananchismi listanpi qelqasqa 48 familiakunaq sutinta. Mink’asqanman hinataq sutinkuta marcaq ima p’unchaypi mink’asqantapas qelqaq. ¡Anchatan kusikuran 26 runakuna Jesuspa Wañusqanta Yuyarinaman hamusqankumanta! Huk wayqe tiendanpi llank’aq runata mink’asqa, chay runaqa sacerdote kasqa ñawpaqpi. Chay runaqa uyarikuranmi wayqenchispa mink’asqanta, huñunakuyman risqan qhepaman niran: “Huk horallapin Bibliamanta yacharani kinsa chunka wata Iglesia Catolicapi kasqaymantaqa”, nispa. Pisi tiempollamantan ¿Imatapunin Biblia yachachin? nisqa libroq yanapayninwan Bibliamanta estudiota qallariran.
14. ¿Ima llank’aytaq qallarinqa 1 p’unchay marzomanta?
14 Llank’ay: Sábado 1 p’unchay marzomanta 22 p’unchay marzokama teqsimuyuntinpi huk sumaq invitacionta runakunaman rakisun. Llapallanchismi chay llank’aypi tukuy sonqomanta yanapakusunchis. Invitaciontaqa kikin runakunamanpuni saqenanchis manan punkuq k’aqlluchankunapichu saqenanchis. Ichaqa, sichus congregacionpa predicanan territorio sinchi hatun kanman chayqa, yaqapaschá ancianokuna publicadorkunata kamachinman mana pitapas wasipi tariqtinku punkuq k’aqlluchanpi invitacionta saqenankupaq. Semana tukuypipas revistakunata munachisun.
15. ¿Ima nispa saqesunman Jesuspa Wañusqanta Yuyarinapaq invitacionta?
15 Pisi tiempollapitaq chay llank’ay ruwakunqa chayqa, pisillata rimaspa invitacionkunata saqenayki ichaqa kusi sonqo rimanayki. Khaynata niwaq: “22 p’unchay marzopin huk hatun huñunakuy kanqa, chaymi huk sumaq invitacionta apamushayki, kaytaqa familiaykikunamanpas reqsisqayki runakunamanpas saqemushaykun. Kay invitacionta saqesayki. Chaypin astawan willakushan imayna aparikunanmanta”, nispa. Wakin runakunaqa tapukunqakupaschá; wakintaq hamusaqmi ninqakupaschá. Astawan yachayta munaq runakunaq sutinta, maypi tiyasqantapas qelqay, willaytaq hukmanta visitanaykipaq.
16. ¿Ima experiencia kallpachawanchis Jesuspa Wañusqanta Yuyarinapaq huñunakuyman runakunata mink’amunanchispaq?
16 Qayna wata, huk soldado punkunpi tarisqa Jesuspa Wañusqanta Yuyarinapaq invitacionta. Hinan payqa purinanpaq yuyaykusqa, ichaqa sargentomanta permisota mañakunan karan. Sargentotaq chay invitacionta rikuspa upallalla karan; hinaspa niran, tayta mamaymi Jehová Diospa testigon karan ñoqataq paykunawan kuska huñunakuykunaman riq kani, nispa. Chaymi soldadoman permisota qoran, ichaqa paypas soldadowan kuska Jesuspa Wañusqanta Yuyarinapaq huñunakuyman riran.
17. ¿Imaynata rikuchinanchis Diospa khuyapayakuyninman hina kawsasqanchista?
17 Agradecido kasqaykita rikuchiy: 2008 wata Jesuspa Wañusqanta Yuyarina p’unchay sispaykamushasqanman hinan Jehová Diospa khuyapayakuyninpi yuyaymanananchis. Apóstol Pablo qelqaran: “Qankunata valekuykiku Diospa sumaq sonqo-kayninta ama pisichanaykichispaq”, nispa (2 Cor. 6:1). Diospa khuyapayakuyninman hinan kawsananchis, ichaqa ¿imaynata chayta ruwasunman? Apóstol Pablo niwanchis: ‘Tukuypi Diospa kamachinkuna kasqaykichista rikuchiychis’, nispa (2 Cor. 6:4). Arí, Jehová Diospa khuyapayakuyninmanta agradecido kasqanchistaqa rikuchinchis allin kawsayninchiswan tukuy sonqomanta allin willakuykunata predicasqanchispiwan. Jesuspa Wañusqanta Yuyarinapaq killakunaqa ancha allinpuni kanqa allin willakuykunata predicananchispaq.
[3 paginapi recuadro]
¿Pikunan kankuman precursor auxiliar?
◼ Llapallanku familiapi
◼ Ch’isiyaqta llank’aqkuna
◼ Kuraqkuna, onqosqakuna
◼ Escuelapi kaqkuna
[4 paginapi recuadro]
Jesuspa Wañusqanta Yuyarinapaq invitacionta rakispa:
◼ Pisillata rimay ichaqa kusi sonqowan
◼ Bibliamanta yachay munaq runakunaq sutinta qelqay, kutiytaq
◼ Semana tukuypi revistakunata munachiy