“Kacharichiyninchis tiempon chayamushanña” nisqa, Jehovaq Testigonkunaq 2006 Distrito Asamblean
1. ¿Ñawpa tiempopi Diospa llaqtan imaynatan rikuchiran cheqaq yupaychay munasqankuta, imaynapitaq ñoqanchispas chayta rikuchisunman?
1 Ñawpa Judá suyupi Ezequías reymi llaqtakunaman cartakunata apachiran Jerusalenpi huñunakunankupaq (2 Cró. 30:6, 13). Kay mink’ayman llaqta imayna kutichisqanmi rikuchiran cheqaq yupaychay munasqankuta (2 Cró. 30:10-12). Pisi tiempollamantan Jehová Diospa kamachinkunapas rikuchinqaku hayk’atan munakunku huñunakuyta Jehová Diosta yupaychanankupaq. Llapallanchismi mink’asqa kashanchis “Kacharichiyninchis tiempon chayamushanña” nisqa, Distrito Asambleaman. ¿Qan rinkichu?
2. ¿Imatan ruwashananchisña allinninchispaq distrito asamblea kananpaq?
2 Allichakushayña: Espiritual mikhuna munakuywan ruwasqanku allinninchispaq kananpaqqa, programapi yachachiykunata llapallanta uyarinanchis. Kunanmantapacha allichakushayña kinsantin p’unchay familiaykiwan rinaykipaq (Pro. 21:5). Yaqapaschá llank’anaykimanta permisota mañakunayki kanqa, mana iñiq qosaykiwan otaq warmiykiwan rimanayki kanqa, qorpachanata munaspaqa mañakunayki kanqa, otaq Bibliamanta yachachisqaykikunatapas yanapanayki kanqa kinsantin p’unchay asambleapi kanankupaq. Ama kay allin yuyarichiykunata qonqaychu asamblea chayamunankama. Aswanpas Jehová Diosmanta mañakuy, hap’ipakuytaq ‘paypa yanapayninpi’ (Sal. 37:5).
3. ¿Ima rayku kasukunanchis qorpachakunapaq yuyariykunata?
3 Asamblea ruwakunan llaqtapiqa Jehová Diospa llaqtanmi allichanña lliw qorpachakunankupaq. Asambleapi tukuy sonqowan wayqe-pananchiskunaq llank’asqankuta agradecekuymi, tanqariwasun kay qelqapi yuyariykunata kasukunapaq. Chaykunata kasukuspan rikuchisun Jehová Diospa kamachisqan llaqtata, asambleaman hamuqkunatapas respetasqanchista (1 Cor. 13:5; 1 Tes. 5:12, 13; Heb. 13:17).
4-6. ¿Ima importante ruwaykunatan yuyarina qorpachakunapaq, ima rayku?
4 Qorpachay: Qorpachakunapaq departamentopiqa kallpachakunkun wayqe-pananchiskunaq wasinkupi qorpachanankupaq, qorpachakunankupaqqa allin conductayoqmi wayqe-pananchiskuna wawankupas kananku, chaytaqa Congregacionpi Comité de Servicio nisqan aprobanan. Qorpachayqa mana tariy atiqkunallapaqmi. Qorpachakusqankupi allin kanankupaqqa, munakuywanmi yanapanakunanku qorpachaqpas qorpachakuqpas.
5 Tiyasqanchis llaqtapi asamblea kaqtinqa, munasunmi karu llaqtamanta hamuq wayqe-pananchiskuna qorpachayta. Asambleakunapaqqa necesitakunmi askha qorpachana wasikuna. Qorpachaqpuni kaqtinchisqa askha saminchaykunatan Jehová Diosmanta chaskisun, Hebreos 13:16 texton niwanchis: “Amataq allinkaqta ruwaytapas yanapakuytapas qonqaychischu, chay hina sacrificiokunawanmi Diosqa kusikun”, nispa. Qorpachanapaqqa congregacionpi secretariowanmi rimana formulariota hunt’anapaq.
6 Qorpachayqa asamblea p’unchaykunallapaqmi; manan allinchu kanman ima ruwanapaqpas asamblea ñawpaqta riyqa, nitaq asamblea tukuyta qhepakuypas. Munakuq cristianoqa wasiyoqta respetaspan rikuchinqa agradecido kasqanta. Wawakunatapas yachachinankun qorpachakusqanku wasita respetanankupaq, manan imantapas maskhakunankuchu nitaq malogranankuchu. Kay yuyariykunata kasukuyqa allinninchispaqmi kanqa, hukkuna hukkunawantaqmi kallpachanakusun (Rom. 1:11, 12).
7, 8. ¿Imaynatan yanapasunman yanapana necesitaqkunata?
7 Necesitaqkunata yanapasun: Proverbios 3:27 texton nin: “yanapayta atispaykiqa yanapana runata yanapaykuy”, nispa. ¿Imaynatan ñoqanchispas asambleaman hamuqkunata yanapasunman? Kuraqkuna, onqosqakuna, precursorkunapas necesitankumanmi carropi apanata otaq qorpachanatapas. Familiankun ñawpaqtaqa yanapananku (1 Tim. 5:4). Paykuna mana atiqtinkuqa cristiano wayqe-pananchiskunapaschá yanapankuman (Gál. 6:10). Libro estudianapaq superintendentekunan, gruponpi necesitaqkunata tapurinanku yanapanankupaq, ñawpaqmanta allinta allichakunankupaq.
8 Reparaq kaspaqa rikusunmanmi congregacionpi yanapana necesitaqkunata. ¿Risunmanchu paykunawan asambleaman? Precursorkunawan viajaspaqa experienciakunatan willawasunman. Kuraq kaqtinkuqa yaqapaschá cristiano kawsaynin sumaqllaña kanman willawananchispaq. Kay wayqe-pananchiskunan familianchistapas ñoqanchistapas kallpachawasun.
9. a) ¿Ima raykun rinanchis tupawasqanchis asambleaman? b) ¿Imakunatan ruwanayki huk asambleaman rinayki kaqtin?
9 Huk asambleaman rispa: Asambleapi llapallankupaq tiyanakuna, qelqakuna, qorpachaypas kananpaqqa, ama hina kaspa congregacionniykichisman tupaq asambleaman riychis. Huk llaqtapi asambleaman rinaykipaq necesitanki qorpachanata chayqa, congregacionniykipi secretariomanta qorpachanapaq formulariota mañakuspa hunt’ay. Chay llaqtapi askha asambleakuna kaqtinqa willay mayqenman rinaykita. Formulariota hunt’aspa secretarioman qoy, payñan apachinqa asamblea ruwakusqan llaqtapi oficinaman.
10. ¿Imaynatan kusikuyninchista yapasunman hamuq distrito asambleapi?
10 Yanapakuy munaqkuna: Llapanchistan kusichiwasun asambleaman riy, allinninchispaqtaqmi kanqa espiritual mikhuna chaskisqanchis, hukkunawan kallpachanakusqanchispas. Asamblea allin ruwakunanpaq imallapipas yanapakuspaqa astawanraqmi kusikusun (Hech. 20:35). Asambleapaq comité mañanqaña yanapakuy munaqkunata imapipas llank’anankupaq. ¿Qanri yanapakuwaqchu? (Sal. 110:3.)
11. ¿Imataq astawan kusichisunki distrito asambleapi, ima ruwaymantaq chay tanqarisunki?
11 Asambleapi kashaspan pisqa watayoq qhari erqecha niran: “Jehová Dios yupaychayniypiqa distrito asamblean astawan kusichiwan”, nispa. Chay rimasqanmi rikuchin distrito asambleaman riyqa kusikunapaq kasqanta. Salmistaq takisqan hina sentikunchis: “Aswan chaniyoqmi patioykikunapi huk p’unchay kashay hawapi waranqa p’unchay kashaymantaqa” (Sal. 84:10). Davidmi huk salmopi rimaran ‘tukuy kawsasqan p’unchaykunapi Señor Diospa wasinpi kaymanta, yupaychana wasinta kusisqallaña qhawananpaq’ (Sal. 27:4). Paypaqqa ancha kusikuymi karan Jehová Diosta yupaychaqkunawan huñunakuy. Ñoqanchispas rikuchisunmanmi cheqaq yupaychay munasqanchista, kinsantin p’unchay “Kacharichiyninchis tiempon chayamushanña” nisqa, Distrito Asambleaman rispa.
[3 paginapi recuadro]
Programapaq horario
Ñawpa kaq, iskay kaq p’unchaypiwan
Qallarinqa 9.30 tukunqataq - 5.05 tardeta
Kinsa kaq p’unchay
Qallarinqa 9.30 tukunqataq - 4.10 tardeta