2009 watapi Jehová Diospa testigonkunaq kinsa p’unchaya huñunakuyninku

1. a) ¿Ima bendicionkunan kanqa kinsantin p’unchay huñunakuyman riqtinchis? b) ¿Imakunatan kunanmantapacha ruwashananchis?

¹ Maytachá munashanchis 2009 watapi hatun huñunakuyninchis chayamunanta, chhaynapi llapa ‘Diosta maskhaq’ iñiqmasinchiskunawan kuska huk nisqalla Jehová Diosta hatunchanapaq (Mat. 5:3). Jehová Diospa p’unchayninqa ñataq chayaramushanña chayqa kinsantin p’unchaymi chay huñunakuymanqa rinanchis chhaynapin llapa cristianomasinchiskunawan kuska kallpachanakusun iñiyninchispi allin takyasqa kananchispaq (Sof. 1:14). Chaymi profesorkuna patronkunapas yachananku chay huñunakuyninchisqa ancha allinpuni kasqanta. Chaymantapas tiempowanmi imatapas ruwananchis, chhaynapin Diospas yanapawasun chay huñunakuypi kashananchispaq (Isa. 50:10).

2. Manaña asamblea internacional nisqaman risunchu chaypas, ¿imaraykun kinsa p’unchay huñunakuyninchis chay huñunakuy hina kanman?

² ¿Imaynan kanqa asamblea internacional nisqa? Chay huñunakuykunaqa manan llapan nacionkunapichu nitaq llapa llaqtakunapichu aparikunqa, chayraykun chay huñunakuykunaman rinanku invitasqa kaqkunalla. Mana invitasqa kaqkuna chayman rinkuman chayqa, ñishutan hunt’arusunman (1 Cor. 14:40; Heb. 13:17). Manaña chay huñunakuyman invitasqachu kanchis chaypas, wakin kinsa p’unchay huñunakuykunaqa chay huñunakuy hinan kanqa. ¿Imarayku? Chaypiyá kanqaku wakin misionerokuna, huk nacionkunapi llank’aq betelitakuna, hinallataq siervos internacionales nisqa iñiqmasinchiskunapas.

3. ¿Imaynatan rikuchisunman iñiqmasinchiskuna munakusqanchista?

³ Hukkunata yanapay chay huñunakuyman rinankupaq: Yaqapaschá mayqen hermanopas hatun huñunakuyman rinanpaq yanapanata munashan, chhayna kaqtinqa, ¿manachu yanaparisunman? Hermanokunata yanapaspaqa Filipenses 2:4 textoq nisqanman hinan ruwashasun, chay texton nin: “Ama pipas pay kikinpa allinnillantaqa maskhachunchu, aswanpas hukkunaq allinnintapas maskhallachuntaq”, nispa.

4. ¿Maypin yachasunman maypichus ima p’unchaychus huñunakuykuna aparikunanta?

⁴ ¿Maypin astawan yachasunman? Maypichus ima p’unchaychus kinsa p’unchay huñunakuy aparikunanta yachanapaq sucursalta waqyashanamantaqa, 2009 wata 1 marzo killamanta La Atalaya nisqa revistata qhawariy otaq secretario nisqa umalliqta tapurikuy.

5. a) ¿Imaraykun tupawasqanchis huñunakuyllaman rinanchis? b) ¿Imakunatan ruwanayki huk huñunakuyman rinayki kaqtin?

⁵ Llapallanchismi rinanchis mayqen huñunakuymanchus tupawanchis chayman, huk ladokunaman riqtinchisqa manapaschá aypanqachu tiyanakuna, chayraq lloqsimuq librokuna hinallataq alojanapaq wasikuna ima. Sichus mana atirunkichu huñunakuyniykiman riyta chayqa, secretario nisqa umalliqmanta mañakuy alojakunapaq huk formulariota, chaymantataq chayta hunt’ay. Sichus chay rinayki llaqtapi askha huñunakuykuna aparikunqa chayqa, willay mayqen huñunakuymanchus rinki chayta. Chaykunata hunt’asqayki qhepamantaq secretarioman qoy payña apachinanpaq.

6-8. ¿Imakunatan mana qonqanachu alojakuna kaqtin? ¿Imaraykun chaykunata mana qonqanachu?

⁶ Alojamiento: Departamento de Alojamiento nisqapi llank’aqkunaqa kallpachakunkun hatun huñunakuyman hamuqkunapaq alojamientota alistanankupaq, chay huñunakuyman hamuqkunaqa cristianomasinchiskunaq wasinkupin alojakunku. ¿Pikunan chay wasikunapi alojakunkuman? Comité de Servicio nisqa umallikunaq aprobasqan kaqkunallan. Hermanokunaq wasinpiqa puñunkuman alojanapaq wasikunapi mana pagayta atiqkunallan. Alojaqkuna alojakuqkunapas munakuywan imatapas ruwasqankuraykun chay ruwayqa allinpuni karan ñawpaqmantapacha.

⁷ Tiyasqanchis llaqtapi kinsa p’unchay huñunakuy kaqtinqa, alojasunmanmi karu llaqtamanta hamuq iñiqmasinchiskunata. Wakin chay huñunakuykunamanqa askha hermanokunan hamunku, chaymi mayninpiqa pachakninpiraq alojana wasikuna necesitakun. Alojallaqpuni kasun chayqa Jehová Diosqa ancha allinpaqmi qhawariwasun, chaymi Hebreos 13:16 texto nin: “Amataq allinkaqta ruwaytapas yanapakuytapas qonqaychischu, chay hina sacrificiokunawanmi Diosqa kusikun”, nispa. Sichus alojayta munanki chayqa secretario nisqa umalliqwan rimay chhaynapi alojanapaq formulariota hunt’anaykipaq.

⁸ Alojana wasiqa huñunakuy p’unchaykunallapaqmi, chaymi mana rinachu chay wasiman manaraq chay p’unchaykuna chayamushaqtinqa, nitaq chay huñunakuykuna tukuytapas qhepakushanallachu maytapas rinanchisraykuqa. Munakuq cristianoqa alojaqta respetasqantan rikuchinqa ima kaqninkunata cuidaspa. Wawankunatapas yachachinanmi alojakusqanku wasipi mana maymanpas ch’inllaqa haykunankupaq. Sichus chay willakuykunata kasukusun chayqa, kusisqan kasun, iñiqmasinchiskunawanpas sumaqtan kallpachanakusun (Rom. 1:11, 12).

9, 10. a) ¿Iman yanapawasun tiyanakunata hap’ispa ama allinnillanchista maskhanapaq? b) ¿Imakunata ruwaspan rikuchisunman cristianomasinchiskuna munakusqanchista?

⁹ Diosta hatunchanapaq hinan tukuy imatapas ruwananchis: ¿Allinnillanchista maskhaspachu tiyanakunata ñawpaqmanta hap’irukunchis? Askhapiña allinyarunchis chaypas kashanraqmi allinyananchispaqqa. Chayraykun kallpachakunanchis cristianomasinchiskunata munakusqanchisrayku allinkaqta ruwashanallanchispaq.

¹⁰ Cristianokunaqa kuraq runakunata, chayraq hamuqkunatawanmi allinta qhawarinanchis, chaymi tapukunanchis: “¿Allin tiyanakunapi tiyayllatachu munani icha hukkunaraykuchu atisqayman hina mayqen tiyanapipas tiyani? ¿Imaypas tiyanakunapi kaqtin hoqarinichu chaykunata, chhaynapi hukkuna tiyanakunata mana maskhashanankupaq? ¿Yachanichu maypichus familiay tiyananta, chhaynapi amaña paykunapaq tiyanakunata maskhashanaypaq? ¿Kasukunichu acomodadorkunaq nisqanta?”, nispa.

11. ¿Imamanmi rinanchis kinsa p’unchay huñunakuyninchisman?

¹¹ Maypiña kaspapas imataña ruwaspapas santo espirituq ruruntan rikuchinanchis, chhaynapin allinta qhawarichisun Diospa llaqtanta hinallataq Jehová Diostapas. Chaymantapas manan hukkunata pantachisunchu imachus ruwasqanchiswan (1 Cor. 10:31; 2 Cor. 6:3, 4). Jesuspa nisqanman hinaqa kawsayninchisqa kanqa Jehová “Diospa llapa simin[ta]” imayna uyarisqanchismantan (Mat. 4:4). Chaymi Diosqa sapa watan chhayna hatun huñunakuykunapi qowanchis ‘mikhunata’ hina allin yachachikuykunata, chay mikhunata qowananchispaqqa “allin yuyayniyoq hunt’aq kamachi[tan]” churan (Mat. 24:45). Chay yachachikuytaqa manan huk ratullachu ruwakun, aswanmi unay tiempopi. Chhaynaqa 2009 watapi kinsa p’unchay huñunakuyninchispiqa Jehová Diosta hatunchanapaq hinayá imatapas ruwasun (1 Ped. 2:12).

[Uranpi willakuy]