Jehová Diospa Testigonkunaq 2007 Distrito Asamblean: “¡Cristota qatikusun!”
1, 2. a) ¿Ima niranmi Moisés Israel runakunata huñunakuymanta? b) ¿Imakunatan ruwashananchisña kunanmanta pacha?
1 Moisés kamachiran lliw Israel runakunata, paykuna ukhupi tiyaq waq llaqtayoqkunatapas sapa qanchis wata huñukuspa Kamachikuy Simi leesqata uyarinankupaq. ¿Ima rayku? ‘Dios manchakuyta yachanankupaq’ (Deu. 31:10-12). Kaypi qhawasqanchis hina Jehová Diosqa munanmi llaqtan askhanpi huñunakunanta. Pisi tiempollamantan Diospa llaqtan yapamanta huñukunqa “¡Cristota qatikusun!” nisqa Distrito Asambleapi.
2 ¿Allichakushankiñachu chay asambleaman rinaykipaq? ¿Mañakunaykichu llank’anaykimanta permisota? ¿Bibliamanta yachachisqaykikunata mana iñiq familiaykikunatapas yanapawaqchu qanwan kuska asambleaman rinankupaq? ¿Kanchu congregacionniykipi asambleaman rinankupaq yanapayta necesitaq wayqe-panakuna? ¿Congregacionniykiman mana tupaq asambleamanchu rinayki kanqa? ¿Qorpachakunaykichu kanqa asambleaq ruwakusqan llaqtapi? Qatiqninpi willakusqakuna yanapasunki allichakunaykipaq.
3. a) ¿Imaynatan hunt’akushan Isaías 25:6 textoq nisqan? b) ¿Ñawpaq kaq asamblea p’unchaypi imatan reparakun, imatataq sapankanchis ruwananchis?
3 Kinsantin p’unchay riy: Jehová Diosmi askha espiritual mikhunata qoshan llaqtanman (Isa. 25:6). Wakinnintaqa chaskikunchis sapa wata asambleakunapi. Ichaqa kaytan rikukushan: Ñawpaq kaq p’unchaypiqa pisillan huñukushanku huk p’unchaykunamantaqa. Chaymi kunanmanta pacha allichakushanaykiña Jehová Diospa allichasqan asambleaman kinsantin p’unchay rinaykipaq. Llank’anaykimanta permisota mañakunayki kaqtinqa Diosman willakuy mañakuyniykipi. Congregacionniykipi asambleaq hayk’aq ruwakunanta willakuqtintaq kallpachakuy patronniykiwan rimanaykipaq (1 Tes. 2:2; Neh. 2:4, 5). Kay hinatan niwaq: religionniypiqa sapa watan asambleata ruwayku, nispa. Ñawpaqmanta permisota mañakunki chayqa, patronniykiqa llank’anapi ruwanaykikunata allichanmanmi asambleaman rinaykipaq hina.
4. ¿Imaynatan yanapasunman Bibliamanta yachachisqanchiskunata, mana iñiq familianchiskunatapas asambleaman rinankupaq?
4 Imaynatan yanapasunman Biblia estudiaqkunata familianchiskunatapas: ¡May kusikuymi kanman Bibliamanta yachachisqaykikunawan distrito asambleapi kuska tiyay! Chhaynapin paykunapuni rikunkuman “hatun huñunakuypi” iñiqmasikunaq munanakuyninta (Sal. 22:25). Ñawpaqmanta willay, asambleaman rinankupaq tiemponkuta t’aqanankupaq. Willawaqmi imakunan asambleakunapi kusichisusqaykita. Asamblea imaynachus kasqanta yachanankupaqqa qhawachiwaqmi qayna asambleakunamanta videokunata, aswantaqa qhawachiwaq Unidos gracias a la enseñanza divina, nisqa videota. Mana iñiq familiaykikunamanpas willawaqmi asambleaman rinaykipaq allichakusqaykita. Rinkumanpaschá drama qhawaq, otaq huk p’unchayllapas qanwan kuska rinkuman.
5. ¿1 Timoteo 6:18 textoq nisqan hina imaynatan qoykukuq kasunman?
5 Wayqe-panakunata yanapay: Qhapaq wayqe-panakunatan apóstol Pablo niran: ‘Allinkunata ruwaspa t’ikariychis, hinallataq mana mich’akuspa qoykukuq yanapaykukuq kaychis’, nispa (1 Tim. 6:17, 18). Pabloq nisqanman hina ruwanapaqqa yanapananchismi kuraq wayqe-panakunata, onqosqakunata, precursorkunata, warmisapakunata, huk wayqe-panakunatapas asambleaman rinankupaq yanapana kaqtinqa. Kay wayqe-panakunataqa iñiq familiankunan yanapananku ima necesitasqankupipas, chaywanpas ancianokuna huk publicadorkunapas makilla kashananku imapas necesitasqankupi yanapanankupaq (Gál. 6:10; 1 Tim. 5:4).
6. a) ¿Ima raykun rinanchis tupawasqanchis asambleaman? b) ¿Imakunatan ruwanayki huk asambleaman rinayki kaqtin?
6 Huk asambleaman rispa: Asambleapi llapallankupaq tiyanakuna, qelqakuna, qorpachaypas kananpaqqa, ama hina kaspa congregacionniykichisman tupaq asambleaman riychis. Manachus asambleaykiman riyta atinki, huk llaqtapi asambleamantaq rinayki kanqa chayqa, congregacionniykipi secretariomanta qorpachanapaq formulariota mañakuspa hunt’ay. Chay llaqtapi askha asambleakuna kaqtinqa willay mayqenman rinaykita. Formulariota hunt’aspa secretarioman qoy, payñan apachinqa asamblea ruwakusqan llaqtapi oficinaman.
7-9. ¿Imakunatan mana qonqanachu qorpachakuna kaqtinqa, ima rayku?
7 Qorpachay: Qorpachakunapaq departamentopiqa kallpachakunkun wayqe-pananchiskunaq wasinkupi qorpachanankupaq, qorpachakunankupaqqa allin conductayoqmi wayqe-pananchiskuna wawankupas kananku, chaytaqa Congregacionpi Comité de Servicio nisqan aprobanan. Qorpachayqa mana tariy atiqkunallapaqmi. Qorpachakusqankupi allin kanankupaqqa, munakuywanmi yanapanakunanku qorpachaqpas qorpachakuqpas.
8 Tiyasqanchis llaqtapi asamblea kaqtinqa, qorpachasunmanmi karu llaqtamanta hamuq wayqe-pananchiskunata. Wakin asambleakunapaqqa pachakninpin qorpachana wasikuna necesitakun. Qorpachaqpuni kaqtinchisqa askha saminchaykunatan Jehová Diosmanta chaskisun, Hebreos 13:16 texton niwanchis: “Amataq allinkaqta ruwaytapas yanapakuytapas qonqaychischu, chay hina sacrificiokunawanmi Diosqa kusikun”, nispa. Qorpachanapaqqa congregacionpi secretariowanmi rimana formulariota hunt’anapaq.
9 Qorpachayqa asamblea p’unchaykunallapaqmi; manan allinchu kanman ima ruwanapaqpas asamblea ñawpaqta riyqa, nitaq asamblea tukuyta qhepakuypas. Munakuq cristianoqa wasiyoqta respetaspan rikuchinqa agradecido kasqanta. Wawakunatapas yachachinankun qorpachakusqanku wasita respetanankupaq, manan maymanpas ch’inllaqa haykunankuchu. Kay yuyariykunata kasukuyqa allinninchispaqmi kanqa, hukkuna hukkunawantaqmi kallpachanakusun (Rom. 1:11, 12).
10, 11. a) Manaraq asamblea wasiman chayashaqtinchis, ¿imakuna allichakuranña? b) ¿Imaynatan agradecekusunman kay asamblea allinta apakunanpaq llank’akusqanmanta? (Leey Hebreos 13:17.)
10 Yanapakuq kay: Asambleaman chayaspaqa reparanchismi may tukuytachus llank’akuran chay asamblea aparikunanpaq. Munakuq acomodador wayqenchiskuna chaskiwanchis, asambleapaq programata qowanchis, tiyananchismantaq pusawanchis. Wakin wayqe-pananchiskuna sumaqta picharanku asamblea ruwakunan wasita, plataformatapas sumaqta allicharanku. Chaymantapas allinta llank’akuran discursokuna preparaypi, huk ruwaykunapipas.
11 Sapanka asamblea allinta apakunanpaqmi askha wayqe-panakuna llank’aranku unay killakunamantaraq, paykunataqa familiankunan yanaparanku tiempota qospa, chay ruwaykunapi llank’anankupaq. ¿Chhayna llank’asqankumanta manachu sullpay nisunman? Agradecekusqanchista rikuchisun kaypi willakuykunata kasukuspa, asamblea ñawpaqta huk willakuykuna lloqsimuqtapas kasukuspa (Heb. 13:17). Llapallanchis tukuy sonqo yanapakuqtinchismi ‘tukuy imapas chaninninpi ruwakunqa, maychus ruwanaman hinapuni’ (1 Cor. 14:40).
12. a) ¿Ima raykutaq kay p’unchaykunapi Diospa llaqtan aswan chaniyoqta qhawarinan huñunakuykunata? b) ¿Imatan qan ruwawaq?
12 ‘Señorpa [...] p’unchaynin qayllaykamushasqanman’ hina, aswan chaniyoqtan qhawarinanchis huñunakuyninchiskunata (Heb. 10:25). Kay asambleakunapin allin yuyayniyoq hunt’aq kamachi yachachiwanchis Jehová Diospa ‘kamachikuy siminkunata makilla hunt’ananchispaq’ (Deu. 31:12). Chay hinaqa, kunanmanta pacha allichakuy “¡Cristota qatikusun!” nisqa Distrito Asambleaman kinsantin p’unchay rinaykipaq, chhaynapin allinta kallpachakunki espiritual yachachikuykunawan, iñiqmasiykikunawanpas.
[3 paginapi recuadro]
Programapaq horario
Ñawpa kaq, iskay kaq p’unchaypiwan
Qallarinqa 9.20 tukunqataq 5.05 tardenta
Kinsa kaq p’unchay
Qallarinqa 9.20 tukunqataq 4.10 tardenta