Jehová Diospa Testigonkunaq 2008 Distrito Asamblean
1. a) ¿Imaraykun kay tiempopi ancha allinpuni judío cristianokunaman apóstol Pabloq yuyaychasqan? (Leey Hebreos 10:24, 25.) b) ¿Iman kanqa pisi tiempollamanta apóstol Pabloq yuyaychasqanta kasukunanchispaq?
1 Apóstol Pablo judío cristianokunata yuyarichiran huñunakuypas kallpachanakuypas ancha allinpuni kasqanta Señorpa kutimunan p’unchay ‘qayllaykamushasqanta yachaspa’ (Heb. 10:24, 25). Kay tiempopiqa sut’itapuni reparanchis chay p’unchay qayllaykamushasqanta, chaymi maytapuni munanchis wayqe pananchiskunawan huñunakuyta Diospa yachachikuyninkunata chaskiytapas kay sasa ‘tukukuy qaylla p’unchaykunapi’ yanapawananchispaq (2 Tim. 3:1). 2008 wata distrito asambleanchispin chayta ruwasun.
2. a) ¿Imaraykun kinsantin p’unchay asambleaman rinanchis? b) ¿Imaynatan kunanmantapacha allichakushawaqña?
2 Kinsantin p’unchay riy: Kallpachakuy kinsantin p’unchay asambleaman rinaykipaq. “Ama huñunakuyninchista saqesunchu” nisqa simiwanmi yachanchis kinsantin p’unchaypi lliw yachachikuyta chaskinanchispaq (Heb. 10:25). Kunanmantapacha allichakushayña asambleaman rinaykipaq. Ñawpaqmanta patronniykimanta permisota mañakuy chhaynapi llank’anapi ruwanaykikunata allichananpaq. Sichus wawakuna asamblea p’unchaypi escuelaman rinqaku chayqa, profesorkunaman willay asambleaman rinaykichista sut’inchaytaq chaypi Diosta yupaychamusaqku nispa. Jehová Diosqa saminchasunkin Reinonta ñawpaqta maskhasqaykimanta (Mat. 6:33).
3. ¿Imaynatan yanapasunman hukkunata asambleaman rinankupaq?
3 Hukkunata yanapay rinankupaq: Apóstol Pabloqa yuyaychallarantaqmi wayqe panankunata ‘hukkuna hukkunawan kallpachanakunankupaq’ (Heb. 10:24). Qelqamanta Yachanapaq Huñunakuyman hamuqkunamanta ¿kashanchu pillapas asambleaman rinanpaq yanapayta necesitaq? ¿Yanapawaqchu estudiachisqaykikunata huk p’unchayllapas asambleaman qanwan kuska rinankupaq? Mana iñiq familiaykikunaman asambleaman rinaykimanta willaspaqa paykunatapas mink’awaqmi rinankupaq. Ichapas chhaynapi rinkuman.
4. ¿Imaynatan yachasunman distrito asambleakuna maypi, hayk’aq aparikunanmanta?
4 Imaynata yachasunman: Sapa watanmi askha runakuna sucursalman waqyanku asambleamanta tapukunankupaq. Chay waqyaqkunaqa wayqe pananchiskunan kanku paykunaqa yachankuña maypi, hayk’aq asamblea aparikunanmanta, chayrayku manaraq waqyashaqtiykichis 2008 wata 1 marzo La Atalayata qhawaychis.
5. a) ¿Imaraykun rinanchis tupawasqanchis asambleaman? b) ¿Imakunatan ruwanayki huk asambleaman rinayki kaqtin?
5 Asambleapi llapallankupaq tiyanakuna, qelqakuna, qorpachaypas kananpaqqa, ama hina kaspa congregacionniykichisman tupaq asambleaman riychis. Manachus asambleaykiman riyta atinki, huk llaqtapi asambleamantaq rinayki kanqa chayqa, congregacionniykipi secretariomanta qorpachanapaq formulariota mañakuspa hunt’ay. Chay llaqtapi askha asambleakuna kaqtinqa willay mayqenman rinaykita. Formulariota hunt’aspa secretarioman qoy, payñan apachinqa asamblea ruwakusqan llaqtapi oficinaman.
6-8. ¿Imakunatan mana qonqanachu qorpachakuna kaqtin, imarayku?
6 Qorpachay: Qorpachakunapaq Departamentopiqa kallpachakunkun wayqe pananchiskunaq wasinkupi qorpachanankupaq, qorpachakunankupaqqa allin conductayoqmi wayqe pananchiskuna wawankupas kananku, chaytaqa Congregacionpi Comité de Servicio nisqan aprobanan. Qorpachayqa mana tariy atiqkunallapaqmi. Qorpachakusqankupi allin kanankupaqqa, munakuywanmi yanapanakunanku qorpachaqpas qorpachakuqpas.
7 Tiyasqanchis llaqtapi asamblea kaqtinqa, qorpachasunmanmi karu llaqtamanta hamuq wayqe pananchiskunata. Wakin asambleakunapaqqa pachakninpin qorpachana wasikuna necesitakun. Qorpachaqpuni kaqtinchisqa askha saminchaykunatan Jehová Diosmanta chaskisun, Romanos 12:13 texton niwanchis: “Watukamuqniykichiskunatapas qorpachallaychispuni”, nispa. Qorpachanapaqqa congregacionpi secretariowanmi rimana formulariota hunt’anapaq.
8 Qorpachayqa asamblea p’unchaykunallapaqmi; manan allinchu kanman ima ruwanapaqpas asamblea ñawpaqta riyqa, nitaq asamblea tukuyta qhepakuypas. Munakuq cristianoqa qorpachaqta respetaspan rikuchinqa agradecido kasqanta. Wawakunatapas yachachinankun qorpachakusqanku wasita respetanankupaq, manan maymanpas ch’inllaqa haykunankuchu. Kay willakuykunata kasukuyqa allinninchispaqmi, yanapawasuntaq wayqe pananchiskunawan astawan munanakunanchispaq (Juan 13:35).
9, 10. a) ¿Imakunan rikukun asambleakunapi? b) ¿Ima sumaq kaykunatan cristianokuna rikuchinanchis tiyanakunata hap’iqtinchis?
9 Allin ruwaykuna: Jehová Diosqa huñunakuspa yupaychananchispaqmi kamachiwanchis, chayta kasukuyqa allinninchispaqmi. Huñunakuykunapiqa Diospa sutinta hatunchanchis (Isa. 48:17). ‘Allin ruwasqanchiskunaqa sut’itapunin’ reparakun distrito asambleakunapi. Ichaqa llank’ananchisraqmi kashan. Wakin asambleakunapin kayta rikukun: punku kichakuqtin hina wayqe panakuna phawaylla haykunku allin tiyanakunata hap’inankupaq. Mayninpiqa acomodadorkunatapas manan kasunkuchu. Huk wayqenchis willakun: “Allillamanta haykuqkunaqa manaña tarinkuchu allin tiyanakunata”, nispa.
10 Chaymi kaykunata tapukunanchis, ¿imaninkumanmi chhayna ruwasqaymanta? ¿Rikuchishanichu hukkuna respetasqayta? ¿Cheqaq cristianokuna hinachu rikuchishani munakuyniyta? nispa (Fili. 2:4; Rom. 12:10.) Unay tiempoña Jehová Diosninchista servishanchis chayqa, kallpachakunanchismi allin ejemplota hukkunaman qonapaq. Allin tiyanakunataqa kuraq runakunapaq, onqosqakunapaq, chayllaraq hamuq runakunapaqwanmi saqenanchis acomodadorkunaq nisqanman hinataq tiyananchis (Mat. 7:12).
11. ¿Imaynata Mateo 4:4 texto rikuchin asambleapi llapa yachachikuyta makilla uyarinapaq?
11 Jesuspa nisqan hina, kawsayninchisqa ‘Diospa llapa siminta’ kasukuymanta kanqa (Mat. 4:4). Jehová Diosqa sapa watan asambleakunapi ‘allin yuyayniyoq hunt’aq kamachiwan’ tiempollanpi espiritual ‘mikhunata’ qowanchis (Mat. 24:45). Asambleapi chhayna sumaq yachachikuyta chaskinanchispaqqa askhatan llank’anku. Chayrayku, Jehová Diospa sumaq qhawariwasqanchismanta agradecikusqanchista rikuchisun kinsantin p’unchay asambleaman rispa yachachikuykunata makilla uyarispapas.
[3 paginapi recuadro]
Programapaq horario
Ñawpaqkaq, iskaykaq p’unchaypiwan
Qallarinqa 9.20 tutamanta tukunqataq 4.55 tardenta
Kinsakaq p’unchay
Qallarinqa 9.20 tutamanta tukunqataq 4.00 tardenta