Runamasinchisman rikuchisun ‘lliw runakunapaq k’anchayta’
1. ¿Diospa Simin Qelqari ima hatun k’anchay kananmanta willakuran? ¿Hayk’aqmi kay hatun k’anchaymanta yuyarisun?
1 Jehová Diosmi willaran profeta Isaiaswan: “Tutayaqpi purishaq llaqtan huk hatun k’anchayta rikurqan, sinchi laqhayaqpi tiyaq runakunatan k’anchay k’anchaykurqan”, nispa (Isa. 9:2). Chay ‘hatun k’anchayqa’ rikukuran Diospa Churin Jesucristoq ruwayninpi. Kay Allpapi ruwasqanpas wañusqanmanta beneficiokunapas kallpacharanmi laqayaqpi tiyaqkunata. Kunanpas chay k’anchayllatataqmi laqayaqpi kaq runakuna necesitanku. Chaymi Señorpa Cenanqa allinpuni kanqa runamasinchisman rikuchinapaq ‘lliw runakunapaq k’anchayta’ (Juan 8:12). Qayna wata millonninpi runakuna rikuchiranku noqanchiswan kuska Jesuspa kamachisqan kasukusqankuta, paymi niran: “Kayta ruwankichis yuyariwanaykichispaq”, nispa (Luc. 22:19). Jesuspa wañusqanta Yuyarinanchis sispaykamushanñataq chayqa, ¿imaynatan hukkunata yanapasun Jehová Diospa k’ancharichisqan hatun k’anchayta rikunankupaq? (Fili. 2:15.)
2. ¿Imata ruwaspan astawan munakusunchis qespichina sacrificiota, ima ruwanapaqtaq kay kallpachawasun?
2 Munakuyninchista yapasun: Jesuspa wañusqan Yuyarina kayllan p’unchaykunapi allintapuni yuyaymanasun kayta: Jehová Diospas Jesuspas runakunapaq munakuyninta rikuchiranku qespichina sacrificiota allichaspanku (Juan 3:16; 2 Cor. 5:14, 15). Ruwasqankupi yuyaymanaspan astawan munakusun chay ch’uya Yuyarinata. Llapanchismi yuyaymanananchis Jesuspa wañusqanta yuyarina p’unchaykunapaq akllasqa textokunata, chaykunan tarikun Examinando las Escrituras diariamente folletopi. Kacharichina sacrificiota ruwaspanmi Jehová Diosqa rikuchiran ancha hatun sumaq kayninkunata, chaymi umanchista hoqarisunman pay Diosninchis kasqan rayku. Chay kacharichina sacrificio imayna sapankanchista yanapawasqanchista yuyaymanaspan astawan munakusun Diosta, Churintapas, kallpachakusuntaq paypa munayninta ruwananchispaq (Gál. 2:20).
3. ¿Imaynatan rikuchisun Jesuspa wañusqan Yuyarinata tukuy-sonqo munakusqanchista?
3 Diospa qespichiy qokuyninta sonqomanta munakunchis chayqa kallpachasunchismi Bibliamanta yachachisqanchiskunata, revisita ruwasqanchiskunata, familianchiskunata, wasimasinchiskunata, escuelapi yachaqmasinchiskunata, llank’aqmasinchiskunata, hukkunatapas, Jesuspa wañusqanta noqanchiswan kusqa yuyarinankupaq (Luc. 6:45). Chayqa kallpachakusunchis lliw paykunaman invitacionta saqenapaq. Mana pitapas qonqananpaq askha wayqe-panakuna huk listata ruwanku, chaypitaq qelqanku invitananku runakunaq sutinta, sapa watataq huk listata ruwanku. Kay hinata allichakuspanchismi Jehová Diosta agradecekushanchis “mana niy atina qokuyninmanta” (2 Cor. 9:15).
4. ¿Ima yanapawasun marzo abril killakunapi astawan predicanapaq?
4 Astawan yapasun predicayninchista: Marzo abril killakunapi kallpachakusun astawan predicanapaq. Jehová Diosqa saminchawasunmi ‘lliphlli-kayniyoq Cristomanta allin willakuykunata’ willanapaq kallpachakusqanchismanta. Paymantan espiritual k’anchayqa hamun, chaymi kamachikuran: “Laqayaqpi k’anchay k’anchachun”, nispa (2 Cor. 4:4-6). Predicanapaq huñunakuykunata askhayachina kaqtinqa ancianokunan allichananku askha horariokunapi, askha cheqaskunapipas, chaymantapas paykunaqa yanapananku astawan predicay munaqkunata. Predicankumanmi tutallamanta callekunapi otaq qhatunakunapi, tardenpitaq telefonopi. Predicayninchista yapayta munaspaqa allichananchis hayk’a horatachus ruwananchista, kallpachakunataq hunt’anapaq. Askha wayqe-panakunaqa precursor auxiliar kaspankun Jehová Diosman qoshanku allin kaqninkunata (Col. 3:23, 24).
5. ¿Imaynata yanapan askha wayqe-pananchiskunata precursor auxiliarpa hunt’anan horata pisiyachikusqan?
5 ¿Precursor auxiliar kasunmanchu? Qanchis watañan karun precursor auxiliarpa hunt’anan horata pisiyachikusqanmanta, chaymi askha wayqe-panakuna precursor auxiliar kaspanku askha saminchaykunata chaskishanku. ¿Qanri hayk’aqllapas precursor auxiliar llank’ayta ruwarankichu? Wakinqa chaytan sapa wata ruwanku. Congregacionpichus askha publicadorkuna precursor auxiliar llank’ayta ruwanku kaq killallapi chayqa, chay wataqa ancha yuyanankupaq hinan. ¿Jesuspa wañusqan Yuyarina kayllan killakunapi t’aqawaqchu huk killata precursor auxiliar kanaykipaq? Wakinkunapaqqa abril killan aswan allin kanqa, pisqa sabadokuna domingokunapas kasqan rayku.
6. ¿Imakunatawan ruwanaykipaq yanapasunki precursor auxiliar kay?
6 Sichus congregacionniykiman circuitopi superintendente visitamunqa marzo abril killa ukhukunapi chayqa kanmanraqmi huk allinniykipaq. Willakusqanpas hina 2006 servicio watapi, pikunachus precursor auxiliar kanqaku circuitopi superintendente visitasqan killapi chayqa, precursor regularkunaq kuskannin huñukuyninman rinkumanmi. Chaypi espiritual kallpachaq yachachiykunaqa yanapanqan askha precursor auxiliarkunata precursor regular kanankupaq. Chaymantapas marzo killapiqa yanapasunmi runakunata espiritual k’anchaymanta beneficiakunankupaq ¿Qué enseña realmente la Biblia?, nisqa mosoq yachachina qelqawan. ¿Kallpachakuwaqchu kay mosoq qelqawan estudio qallarinaykipaq?
7, 8. a) ¿Ima yanapawasun precursor auxiliar kanapaq horario ruwaypi? b) ¿Imaynatan familiapas yanapanman chayta aypanapaq, imaynatataq beneficiakunkuman familia ukhupi kaqkunapas?
7 Pisqa chunka hora predicanaykipaq preparaspa huk horariota ruway, hinaspa sapa semana chunka iskayniyoq horata cheqaq kay k’anchayta k’ancharichinaykipaq. Yanapachikuy hukkunawan astawanqa ñawpaqpi yanapasuqniykikunawan, icha paykunapas kallpachakunkuman precursor kanankupaq. Allinta allichakuspaqa wayna-sipaskuna kuraqkunapas yachanku precursor auxiliarman chayay mana sasa kasqanta. Jehová Diosmanta mañakuy. Hinaspa atisqaykiman hina allichay ruwanaykikunata, ¡kusikuytaq precursor auxiliar kaspa! (Mal. 3:10.)
8 Mayninpiqa familiantinmi allichakunku, hukllankupas precursor auxiliar kananpaq. Qhawasunchis; huk familiapi rimanakusqaku pisqa paykunamanta precursor auxiliar kanankupaq, iskay sullk’a mana bautizasqa wawakunataq llank’ayninkuta yapanankupaq. ¿Ima saminchaykunata chaskiranku chhayna kallpachakusqankumanta? Qelqaranku: “Yuyarayasaqkupunin chay killata, kunanqa aswan hukllachasqan familiaykuqa. Jehová Diosta anchatapuni agradecekuyku kay saminchaykunamanta”, nispa.
9. ¿Imaynatan k’anchayninchista k’ancharichisunman Yuyarina kayllan killakunapi?
9 ¿Cheqaqtapunichu kallpachawasunman marzo abril killapi llank’asqanchis, achhuykusunmanchu astawan hanaq pacha Taytanchisman? Chaypaqqa astawanmi munakunanchis Diosta, Churintapas, kallpachakunanchistaq predicasqanchista yapanapaq. Salmista hina ruwanapaq yuyaykusun, paymi takiran: “Anchatapunin Señor Diosman graciasta qosaq, askha runa ukhupin payta yupaychasaq”, nispa (Sal. 109:30). Jesuspa wañusqanta Yuyarina kayllan killakunapi astawanraq llank’ayninchista yapasun chayqa, Jehová Diosmi saminchawasun, chaymi hatun k’anchayta k’ancharichisun askharaq laqayaqmanta lloqsinankupaq, hinaspa “kawsay k’anchayniyoq” kanankupaq (Juan 8:12).