Circuito asambleapaq mosoq programa

Runakunaqa kay pacha mana hayk’aq tukukunanpaq yuyananchista munan, ichaqa Diospa Simin Qelqa huknirayta niwanchis (1 Juan 2:15-17). Chaymantapas rikuchiwanchis ‘qhapaq kaykunata kay pachapi huñukuyqa’ yanqapaq kasqanta. Chay rayku Diospa llaqtan kallpachakunanpaq 2007 wata circuito asambleapi rimakunqa: “Qhapaq kaykunataqa hanaq pachapi huñukuychis” nisqa temamanta (Mat. 6:19, 20).

Efesios 2:2 nisqan hina qhapaqyayta munapayayqa ‘wayrapi atiyniyoq espirituq kamachikusqanta kasukuymi, chay espiritun kunan kallpachashan Diosta mana kasukuqkunata’. Imaynan wayrapas kashan tukuy cheqaspi, chay hinallataqmi ‘kay pacha espiritupas’ hinantinpi mast’arisqa kashan (1 Cor. 2:12). Sinchi waqllichiq kasqan rayku chay espiritumanta ‘atiyniyoqmi’ nikun. Circuito asambleapi yachachikusqanmi yanapawasun ama kay pacha runakuna hina qhapaqyayta munapayananchispaq, aswanpas Diospa munayninta ñawpaqman churananchispaq (Mat. 6:33). Chaymantapas yanapawasun Jehová Diosman hap’ipakuspalla predicananchispaq, imaymana sasachakuykunaña, mat’ipayaykunaña kaqtinpas.

Kallpachakuy iskaynin p’unchay chaypi kanaykipaq “makillapuni” uyarinaykipaqpas (Heb. 2:1). Uyarisqaykichus kawsayniykipaq predicanaykipaq hina kaqtinqa pisillapi qelqay. Sichus qallariymanta pacha tukuyninkama chay asambleapi sumaq yachachikuyta uyarinki chayqa, kallpachasqa lloqsinki ‘qhapaq kaykunata hanaq pachapi huñushanallaykipaq’.