“¡Cristota qatikusun!” nisqa distrito Asambleamanta willanapaq campaña
Publicadorkunan wakmanta mink’ana hojachata rakimusunchis
1 “¡Kacharichiyninchis tiempon chayamushanña!” nisqa Distrito Asambleapaq qayna wata mink’amusqanchisqa askha runakunaq sonqonta kuyurichiran. Chay invitacionta chaskispa chayllaraq asambleanchisman hamuqkunaqa ñoqanchiswan kuska espiritual mikhunata mikhuranku (Isa. 65:13). Kusirikurankun wayqe-pananchiskunawan kuska huñunakuspanku (Sal. 133:1). Kay watapas “¡Cristota qatikusun!” nisqa Distrito Asambleanchisman askha runakuna hamunankupaqmi wakmanta mink’ana hojachata teqsimuyuntinpi rakimusun.
2 Imaynan karan qayna wata: “¡Kacharichiyninchis tiempon chayamushanña!” nisqa Distrito Asambleapaq mink’amusqanchisqa ancha allinmi karan, chaytan reparanchis informekuna chaskisqanchispi. Askha llaqtakunapin allinta rimaranku campaña ruwasqanchismanta. Ejemplopaq, huk llaqtapi periodicon askhata willaran campañapi llank’asqanchismanta. Niranmi: “Jehová Diospa Testigonkunaqa manaraq asambleanku chayamushaqtinmi kallpachakuranku askha runakunaman mink’amunankupaq, chaypaqmi askha horata predicaranku, karuta puriranku, tiempota mana usuchispa askha runakunawan rimaranku”, nispa. Qayllallamanta invitacionkuna rakisqanchista qhawarispankun huk llaqtapipas periodicokuna allinta rimaranku campaña ruwasqanchismanta. Chaymi manaraq asamblea chayamushaqtin kinsa periodicopiraq mink’asqanchismanta willaykuna lloqsimusqa. Huk periodistan semanapaq lloqsimuq periodicopi iskay paginapiraq qelqasqa ñoqanchismanta. Chaypin willaran imakunapi iñisqanchismanta, Diospa llaqtan imayna kasqanmanta, mink’ana hojachata rakisqanchismanta, asambleanchismantapas. Huk pananchis chay p’unchaykunapi invitacionta huk warmiman munachishaqtinmi warmiqa pananchispa rimasqanta tatichisparaq niran: “Chay mink’asqaykichismantan periodicopi kunallan leesharani”, nispa. Huk runapas niran: “Kunallanmi qankunamanta periodicopi leesharani, ¡kunantaq kaypiña kashankichis! ¿Ñoqapaqchu chay invitación?” nispa. Chaymanta nillarantaq: “Kay ruwasqaykichisqa ancha allinmi”, nispa.
3 Askha runakunan makinkupi mink’ana hojachata hap’iykuspa asambleaman chayamuranku. Wakinqa karu llaqtakunamantaraqmi hamuranku. Tukuy sonqowan runakunaman mink’ana hojachata rakimusqanchiswanmi aswan askha runakuna asambleaman hamuranku. Huk suyupi distrito asambleaman riq runakuna yapakusqa pachakmanta iskay chunka qanchisniyoq runakuna (27%) ñawpaq wata asambleamantaqa.
4 Imaynatan territorionchispi lliw runakunaman rakimusunman: Publicadorkunan mink’ana hojachata rakiyta qallarinqaku asambleamanta kinsa semana ñawpaqta, chhaynapi territorionkuta tukunankupaq. Predicanaykichis territorio hatun kaqtinqa wasiq punkunpi saqewaqchis invitacionta mana pitapas tarispa, ichaqa asambleaq ñawpaqnin semanallata. Lliw congregacionkunan kallpachakunanku llapa mink’ana hojachakunata rakimunankupaq, kallpachakunankutaq territorionkuta tukunankupaq. Mink’ana hojachakuna puchuqtinqa precursorkunan rakinkuman.
5 Imatan niwaq: Kay hinatan niwaq: “Teqsimuyuntinpi lliw runakunaman mink’amushayku hatun huñunakuyman hamunankupaq. Kay invitacionta saqesqayki. Chaypi astawan willashan”, nispa. Pisillata rimaspaqa aswan askha runakunamanmi mink’amunki. Sichus wasiyoq imatapas tapusunkiman chayqa kutichiy tapukusqanta, astawan yachayta munaqtinqa qelqay sutinta maypi tiyasqantapas, pisi tiempollamantataq kutiy.
6 ¡Kallpachakunanchismi Cristota qatikunanchispaq! (Juan 3:36.) Kay distrito asambleanchismi yanapawasun chayta ruwananchispaq. “¡Cristota qatikusun!” nisqa Distrito Asambleaman mink’amusqanchiswanmi askha runakuna Diospa siminmanta uyarinqaku. Chay hinaqa kallpachakuy lliw runakunata mink’amunaykipaq. Jehová Diosqa saminchasunki wayqe-pananchiskunawan kuska kay llank’aypi yanapakusqaykimanta.