Estudiota qallarisun revista chaskiqkunawan
1. ¿Ima yuyaywanmi revistakunata munachinchis?
1 Sabadonpin La Atalaya ¡Despertad! revistakunata munachinchis predicaspa. Chaytaqa ruwanchis kay yuyaywanmi: allin sonqoyoq runakunaman cheqaq kayta yachachiyta munaspa. Qatimuq parrafokunapi yachasun imaynata Enseña librowan estudiota qallarisunman revisitata ruwaspa chayta. Chay yanapaykunataqa allichasunmanmi predicasqanchis runakunapaq hina, rimasqanchis rimayllapitaq rimasunmanpas. Hukniraytapas ruwallasunmantaqmi llaqtanchispaq hina kaqtinqa.
2. ¿Imaynatan estudiota qallarisunman Enseña libroq ñawpaq paginankunata qhawachispa?
2 Enseña libroq ñawpaq paginankunata qhawachisun. Kutisqanchis runakunamanmi nisunman: “Qayna saqesqay revistakunaqa Bibliaq nisqanman hinan yachachin. Qhawariy ima rayku Bibliata leenanchispuni”, nispa. Chayta nispataq leesunman Isaías 48:17, 18; 2 Timoteo 3:16 otaq mayqen textotapas chaypaq hina kaqtinqa. Chaymantataq Enseña librota qospaña kayta nisunman:
◼ “Bibliaqa cheqaq suyakuytan qowanchis.” Chaymantataq 4, 5 paginakunata qhawachispa tapusunman: “Kay promesakunamanta, ¿mayqen kaq hunt’akunanta munawaq?” nispa. Chay promesamanta rimaq capitulota qhawachispataq pisillapi willarisunman huk otaq iskay parrafokunamanta wasiyoq munaqtinqa.
◼ Khaynatapas nisunmanmi: “Bibliaqa kutichinmi ancha sasa tapuykunata”, nispa. Soqta paginapi librota kicharispataq tapusunman: ¿Hayk’aqllapas kaykunata tapukurankichu? nispa. Chaymantataq chay tapuykunata kutichiq capitulota kicharispa huk otaq iskay parrafokunata pisillapi estudiachisunman.
◼ Qhawachillasunmantaqmi índice nisqapi kaq capitulokunata, tapusunmantaq: ¿Mayqen temamanta yachayta munawaq? nispa. Chaymantataq akllasqan capitulota kicharispa pisillapi qhawachisunman Biblia imayna estudianata.
3. ¿Imaynatan Bibliamanta estudiokunata qallarisunman saqesqanchis revista a) kay pachapi sinchi mana allin kawsay kasqanmanta rimaqtin? b) familiamanta rimaqtin? c) Biblia iñinapaq hina kasqanmanta rimaqtin?
3 Predicasqanchis runaman huk tapuyta saqesun. Kaytapas ruwasunmanmi estudiota qallarinapaq: predicasqanchis runata preparasunman suyawananchispaq. Revistakunata chaskikuqman huk tapuyta saqesunman kutispa chaymanta rimanapaq. Ima p’unchay kutinapaq rimanakusqanchistataq hunt’ananchis (Mat. 5:37). Kutispataq tapusqanchista yuyarichisun, hinaspa Enseña librota kicharispa huk otaq iskay parrafota qhawachisun tapusqanchista kutichinapaq. Librotataq qosun paywan kuska estudianapaq. Qatimuqpi qhawasunchis imakunata tapusunman revistakunata chaskiqkunaman:
◼ Sichus saqesqanchis revista rimashan kay pachapi sinchi mana allin kawsay kasqanmanta chayqa, nisunmanmi: “¿Yachankichu imaynatan Dios chaykuna allichananta? Hukpi kutimuqtiy chaymanta rimasunman Bibliawan”, nispa. Kutispataq qhawarichisunman 4, 5 paginakunata. Otaq tapusunman: “¿Dioschu munaran chhaynapi kawsananchista?”, nispa. Kutispataq 1 capituloq 7, 8 parrafonkunata qhawachisunman.
◼ Familiamantachus revista rimashan chayqa, manaraq ripushaspa kayta tapusunman: “¿Familiapi kaqkuna imata ruwankuman familiantin kusisqa kawsanankupaq?” nispa. Kutispataq 14 capituloq 4 parrafonta qhawarichisunman.
◼ Sichus revista rimashan Biblia iñinapaq hinapuni kasqanmanta chayqa, manaraq ripushaspa kayta tapusunman: “¿Bibliaq yachachisqan tupanchu cienciaq nisqanwan?” nispa. Kutispataq 2 capituloq 8 parrafonta qhawarichisunman.
4. ¿Imatan ruwasunman Enseña librota mana chaskikuyta munaqtin?
4 Sapanka kutisqanchispin huk tapuyta saqenanchis hukpi kutichinapaq. Maypachachus estudiota qallarisun chayqa, qallariyninmanta Enseña nisqa librota estudiananchis. ¿Imatan ruwasunman Enseña librota mana chaskikuyta munaqtin? Chhayna kaqtinqa, apashallasunmanmi revistakunata, Bibliamantapas rimashallasunmanmi sapa kutisqanchispi. Rimapayashallasun chayqa, ichapas qhepaman Biblia estudiayta munanman.
5. ¿Imanaqtin mana revistata saqespallachu ripunanchis?
5 La Atalaya, ¡Despertad! revistakunaqa runakunaq sonqonta kuyurichinman Biblia estudiayta qallarinankupaq. Chay hinaqa tukuy atisqanchista ruwasun revista chaskiqkunawan estudiayta qallarinanchispaq. Chhaynapin kasukushanchis Jesuspa kay kamachisqanta: “Runakunata yachachimuychis, yachachisqaykuna kanankupaq”, nispa (Mat. 28:19, 20).