Sapa kuti revista saqesqanchis runawan estudiota qallarisun
1. ¿Imarayku Diospa llaqtan kallpachawanchis munaqkunaman revistakunata saqeshanallapaq?
1 Unayñan Diospa llaqtanqa kallpachawanchis revistanchiskunata leeqkunaman apashanallapaq manaña estudiayta munaqtinkupas. ¿Imarayku kallpachawanchis? Revistanchiskunata leeqqa pisi-pisimantan Diospa Siminmanta astawan yachayta munanman (1 Ped. 2:2). Askha runakunaq sonqonmanmi chayarqan revistanchispi willakuykuna hinaspa Bibliamanta estudiayta qallarirqanku.
2. ¿Imata ruwaspan qarpashallasun tarpusqanchis muhuta?
2 Qarpashallasun tarpusqanchis muhuta. Revistakunata saqenallamantaqa chhikallantapas rimapayasunmanmi, chayta ruwaspan yachasun imakunapi yuyaykusqanta, chaytaq yanapawasun imamanta rimanapaq imayna rimanatapas (Prov. 16:23). Chaypaqmi ichaqa preparakunanchis. Pisi tiempollapin willarisunman revistamanta huknin yachachikuyninta huk textopas qhawachisunman. Chayta ruwaspan sonqonpi Diospa Siminmanta tarpusqanchis muhuta qarpashallasun (1 Cor. 3:6). Anotananchismi hayk’aqchus visitasqanchista, ima qelqata saqesqanchista, imamanta rimasqanchista, ima textokunata qhawachisqanchistapas.
3. ¿Hayk’a tiempomanta kutisunman?
3 ¿Hayk’a tiempomanta kutisunman? Mosoq revistakunata apananchispaqmi kutisunman. Ichaqa huk kutikunapipas risunmanmi, chaypaqmi qhawarinanchis tiemponta yachay munasqantapas. Huk otaq iskay semanamanta kutispa nisunman: “Saqesqay revistamantan huknin yachachiyninta qhawachiyta munarqayki”, nispa. Chayta ruwaspan kallpachashanchis leenanpaq. Sichus niwasunman: “Ñan leerqoniña”, nispa chayqa, tapusunmanmi: “¿Imaninkin leesqaykimanta?”, nispa, chhaynapin huk chhikanta parlarinapaq. Revistanchiskunata leeqkunamanqa saqesunmanmi chay killapi munachisqanchis qelqata.
4. ¿Imaynatan estudiota qallarisunman revistakunata saqesqanchis runawan?
4 Visitasqanchis runakunaman estudiota qonapaqqa manan mañakunankutaraqchu suyananchis. Aswanpas ñoqanchismi kallpachananchis. Yaqapaschá ñawpaqpi mana estudiayta munarqanchu, chhaynaña kaqtinpas Qhawaq revistapi “Bibliamanta tapukuykuna” nisqatan t’aqwirisunman. Yaqapaschá chayta ruwaspa punkullanpiraq estudiota qoshasunmanña. Mana atikuqtintaq revistakunata apashallasun, chhaynapin qarpashallasunchis.