Diospa Simin Qelqaqa allinpunin yachachinapaq

1. ¿Iman iskay p’unchay huñunakuyninchispa teman? ¿Ima tapuytan kutichikunqa?

¹ Jehová Diosqa ancha allin ‘yachachiqninchismi’ (Is. 30:20, 21). Payqa Simin Qelqawanmi yachachiwanchis, chay libron ima libromantapas aswan allinqa. ¿Imaynatan yachachiyninkuna yanapawasunman cuerponchispi, yuyayninchispi, sonqonchispi, iñiyninchispipas? Chay tapuytan kutichikunqa 2014 watapi iskay p’unchay huñunakuyninchispi. Chay huñunakuypa temanmi “Diospa Simin Qelqaqa allinpunin yachachinapaq” nisqa, chayqa 2 Timoteo 3:16 textomantan horqosqa kashan.

2. ¿Ima tapuykunan yanapawasun huñunakuyninchispi imakuna yachasqanchista entiendenanchispaq?

² ¿Imakunamantan yachasunchis? Qatimuq tapuykunata allinta qhawariymi yanapawasun iskay p’unchay huñunakuyninchispi imakunamantas yachasun chayta entiendenanchispaq.

• ¿Imaynatan yanapawanchis Diospa yachachikuyninkuna kawsayninchispi? (Is. 48:17, 18)

• ¿Imatan chaskisunchispuni kawsayninchispi imaymanata saqespa Diosta tukuy tiempo servisqanchismanta? (Mal. 3:10)

• ¿Imaynatan qhawarinanchis pantasqa yachachikuykunata? (Heb. 13:9)

• ¿Imaynatan Jesuspa ‘yachachisqanta’ hina yachachisunman? (Mat. 7:28, 29)

• ¿Imanaqtinmi iñiq t’aqapi yachachiqkuna paykuna kikinkuta yachachikunanku? (Rom. 2:21)

• ¿Imapaqmi allinpuni Diospa Simin Qelqa? (2 Tim. 3:16)

• ¿Imaynapin runakunaq allinninpaq nacionkunata Jehová Diospa ‘chhaphchisqan’? (Hag. 2:6, 7)

• ¿Ima ruway atinanchistan Jehová Dios yachan? (Efes. 5:1)

• ¿Imaraykun kallpachakunanchis Jehová Diospa yachachikuyninpi kashanallapaq? (Luc. 13:24)

3. ¿Imaraykun kallpachakunanchis llapa discursokunata uyarinapaq?

³ Tukukuy p’unchaykunamanta rimaspan apóstol Pablo qelqarqan: “Millay runakunapas q’otuq runakunapas aswan-aswanraqmi mana chanin-kayman chayanqaku, q’otuspanku q’otuchikuspanku ima”, nispa (2 Tim. 3:13). Chay qhepamanmi qelqallarqantaq Diospa Simin Qelqaqa allinpuni yachachinapaq kasqanta, chaymi iskay p’unchay huñunakuyninchispa temanpas. Sichus mana munanchischu pipas q’otuwananchista chayqa, kallpachakunanchismi Diospa yachachisqanman hina kawsananchispaq. Chay hinaqa kallpachakusun llapa discursokunata uyarinanchispaq.