T’aqakunapi predicayqa allinninchispaqmi
1. ¿Ima allinkunatan tarisunman predicanapaq t’aqakunapi?
1 ¿Bibliamanta Estudianapaq Huñunakuytachu sapa kutin yuyarinki? Chhayna huch’uy t’aqapi huñunakuykunaqa ancha allinmi karqan, chaypin facilta amigokunatapas tarirqanchis (Pro. 18:24). Chay huñunakuypi umalliqa sapankanchispin interesakurqan necesitasqanchisman hinataq yanapawarqanchis (Pro. 27:23; 1 Ped. 5:2, 3). Kunanpas predicanapaq t’aqakunapin chaykunata tarisunman.
2. ¿Imatan ruwawaq predicanapaq t’aqaykipi allin amigokunata tarinaykipaq?
2 Kallpachakuy llapankuta reqsinaykipaq. Hayk’achus Bibliamanta Estudianapaq Huñunakuypi karqanku chay hinan predicanapaq t’aqakunapipas kanku. Sichus iñiqmasikunawan “huk sonqolla” predicasun chayqa, astawanmi reqsinakusun (Fili. 1:27). ¿T’aqaykipi llapa iñiqmasikunawanñachu predicarqanki? Llapallankuwan lloqsiwaq chayqa askha amigokunatan tariwaq (2 Cor. 6:13). Mayninqa wakin iñiqmasinkunatan wasiykiman invitawaq mikhunaykichispaq otaq Familiantin Diosta Yupaychana Ch’isimanpas. Huk ladokunapiqa predicanapaq t’aqakunan tupachinakunku discurso qoq umallita mikhunaman invitanankupaq. T’aqankuman tupaqtintaq llapallanku huñukunku kusirikunankupaq discurso qoq manaña paykunawanchu qhepakun chaypas.
3. ¿Ima yanapaykunatan predicanapaq t’aqanchispi chaskisunman?
3 Iskay kutillataña semanapi huñunakunchis chaypas umallikunaqa llapa iñiqmasikunatan iñiyninkupi yanapashanallanku. Predicanapaq t’aqakunapi umallikunan iñiqmasikunata kallpachananku, sapankankuta yanapananku, preparanankun predicanankupaqpas. Sichus predicanapaq t’aqapi umalli mana qanwan predicarqanchu chayqa, niwaqmi paywan predicay munasqaykita. Chaymantapas killa tukuytan superintendente de servicio nisqa huk t’aqata watukun. Huch’uy iñiq t’aqakunatataq watapi iskay kutita hina watukun. Superintendente de servicio nisqa t’aqaykita watukamuqtin, ¿kallpachakunkichu predicacionman lloqsinaykipaq?
4. a) ¿Imaynatan ruwakunman predicacionman lloqsinapaq huñunakuy? b) ¿Imaraykun wasinchis chay huñunakuy kananpaq yuyaykunanchis?
4 Sapanka t’aqakuna semana tukuyta predicasqankuqa may allinmi kanman. Askha t’aqakuna predicasqanku cheqaskunapi kaq horallapi huñukunqaku chayqa, iñiqmasikunan horanpi chay huñunakuyman chayanqaku hinaspa predicaq lloqsinqaku. Chaymantapas ratolla asignakunqa tiemponpi lloqsinankupaq. Hinaspapas predicacionta umalliqqa sapanka iñiqmasitan aswan allinta qhawarinqa. Mayninpin ichaqa atikusqanman hina iskay kinsa t’aqakunata huñukunman predicanapaq. Sichus iñiq t’aqa killapi ñawpaq sabadopi huñukunqaku llapallanku predicanankupaq, otaq Qhawaq revistata estudiasqanku qhepaman predicacionman lloqsinqaku chayqa, t’aqankuwan kuskan tiyananku chhaynapin umalliqqa manaraq mañakuyta ruwakushaqtin willanqa maypi predicanankuta. (Qhawariy “¿Qowaqchu wasiykita?” nisqa recuadrota.)
5. Manañan Bibliamanta Estudianapaq Huñunakuy kanchu chaypas, ¿imamantan mana llakikunanchischu?
5 Manaña Bibliamanta Estudianapaq Huñunakuy kanchu chaypas, Jehová Diosqa tukuy ima necesitasqanchistan qowanchis munayninta ruwashanallapaq (Heb. 13:20, 21). Payqa manan imatapas pisichiwasunchu (Sal. 23:1). Predicanapaq t’aqakunaqa askha bendicionkunatan apamun. Chaymi kallpachakunanchis tukuy atisqanchista ruwanapaq, yuyarinanchistaqmi ‘askhata tarpuqqa [...] askhallatataq hoqarinanta’ (2 Cor. 9:6).
[6 paginapi recuadro]
¿Qowaqchu wasiykita?
Huñunakunapaq wasikuna pisilla kasqanraykun wakin iñiq t’aqakuna semana tukuyta predicanapaq t’aqakunata huñunku. Predicanapaq huñunakuyqa huk huñunakuykuna hinan yanapawanchis, chaymi anchata munananchis wasinchispi aparikunanta. ¿Manachu qanpas qowaq wasiykita? Imaynallaña wasiyki kaqtinpas ama manchakuychu. Umallikunaqa maypi kasqanta, llapallanku chayman rinankupaq hina kasqantan astawanqa qhawarinqaku. Sichus wasiykita qoyta munanki chayqa, t’aqaykipi umalliman willay.