Askha runakunaq kasqanpi imaynata predicanapaq
1. ¿Imaynatan predicaqku ñawpa cristianokuna?
1 Ñawpa cristianokunaqa wasin-wasintan predicaqku, hinaspapas predicallaqkutaqmi runakunaq kasqanpipas (Hech. 20:20). Paykunaqa riqkun Dios yupaychana wasita, chaypin tarimuqku askha runakunata (Hech. 5:42). Pablopas Atenas llaqtapin sapa p’unchay plazapi predicaq (Hech. 17:17). Kunanpas allin willakuykunataqa wasin-wasintan predicamunchis. Ichaqa predicallanchistaqmi terminalkunapi, negociokunaq kasqanpi, plazakunapi, askha runakunaq purisqan callekunapipas. Diospa llaqtanpiqa kallpachawarqanchispunin askha runakunaq kasqanpi predicanapaq. Kunanmi chhayna predicayta aparikushan sucursalpa qhawarisqan hinallataq iñiq t’aqaq qhawarisqanpas, chaykunapin llapanchispas yanapakuyta atisun.
2. ¿Imayna predicaytan qallarikurqan 2011 noviembre killapi?
2 Hatun llaqtakunapi askha runakunaq kasqanpi predicay. Anuario 2013 libropin 16, 17 paginakunapi willashan hukniraymanta predicación aparikusqanmanta, chaytan Nueva York llaqtapi qallarikurqan, 2011 noviembre killapi. Askha runakunaq purinanpin churakurqan mesakunata apaykachanapaq carretakunatapas, chaykunapin churakurqan qelqanchiskunamanta propagandakunata, imaymana simikunapi qelqanchiskunatapas. Chhaynapin allin wisq’asqa edificiokunapi tiyaq runakunapas, wasinkupi mana tarikuq runakunapas chay qelqakunata rikuyta atirqanku. Huk killallapin rakirqanku 3.797 revistakunata 7.986 librokunatapas. Askha runakunan munarqanku Bibliamanta estudiaytapas. Chhayna predicaytaqa qallarikurqan estudiokunata astawan tarinapaqmi, chayraykun chay runakunaq sutinta apachirqanku tiyasqanku ladopi kaq iñiq t’aqakunaman, chhaynapi visitanankupaq.
3. ¿Imaynatan askha llaqtakunapiña predicakushan askha runakunaq kasqanpi?
3 Askha runakunaq kasqanpi predicay allinpuni kasqanraykun pachantinpiña chay ruwayta aparikushan. Ñawpaqtaqa sapanka sucursalmi qhawarinqa may llaqtakunapi predicay allin kasqanta. Chay llaqtakunapi askha terminalkuna, edificiokunapi askha oficinakuna kasqanraykun askha runakuna callekunapi tarikunku. Chaykunata qhawarispan sucursalqa iñiq t’aqakunaman willanqa imaynata aparinankupaq. Chaypaqmi akllanqaku precursor especialkunata, regularkunatapas, ichaqa kallankumantaqmi precursor auxiliarkunapas.
4. ¿Imaynatan aparinku askha runakunaq kasqanpi predicacionta?
4 ¿Imaynatan chayta aparikun? Mesakunata churaspa otaq apaykachana carretakunapi predicaq precursorkunaqa runakuna asuykuqtinmi mayqen munasqanku qelqakunatapas apakunankupaq ninku. Hinaspapas tapukusqankutan Bibliawan kutichinku. Mayqen qelqatapas apakuyta munaqtinkuqa manan qolqeta mañankuchu. Imaynata chay qelqakuna ruwakusqanmanta tapukullaqtinkun willanku qolqeta qoyta munaspaqa chay qelqapi kaq direccionman apachinankupaq. Atikuqtinqa tapunkun: “¿Munawaqchu pipas wasiykiman visitamunasuykita? Otaq, ¿anotakuyta munawaqchu Bibliata estudianaykipaq?”, nispa.
5. ¿Ima allinkunatan repararqanku huk casarasqa cristianokuna askha runakunaq kasqanpi predicaspa?
5 Chhaynata predicaqkunaqa kusikuytan tarinku. Huk casarasqa cristianokunan willakurqanku: “Mesa patapi qelqakuna churasqaykuq ñawpanta askha runakuna pasanku, chayta rikuspan reparayku pachantinpi runakuna Diosta reqsinankupaq tukuyta ruwakushasqanta. Diosqa llapa runatan llaqtanman pusamuyta munan, chaypi yuyaykuymi reparachiwanku tukuy imamantapas predicayta aswan importantepaq kawsayniykupi qhawarinaykupaq. Ñawpankuta runakuna pasasqanta rikuspan yuyaykuyku ‘Diosqa sapanka runaq sonqontachá t’aqwishan, pichus yachachikuyninta chaskikunanpaq hina kashan chayta qhawaspa’, nispa. Chhaynata predicaspan astawan reparayku angelkunaq yanapayninta”, nispa.
6. a) ¿Iman aparikushan askha iñiq t’aqakunapi? ¿Imaynapin hukniray hatun llaqtakunapi askha runakunaq kasqanpi predicaqkunaq aparisqankuwan? b) ¿Imaynatan iñiq t’aqakuna yanapanakunanku askha runakunaq kasqanpi predicanankupaq?
6 Iñiq t’aqaq qhawarisqan askha runakunaq kasqanpi predicay. Askha iñiq t’aqakunapin aparikushan askha runakunaq kasqanpi predicación, chay aparikunanpaqqa umallikunan qhawarinku. Chay predicaypiqa kikin llaqtamanta predicaqkunan iñiq t’aqanku predicasqan ladollapi huk mesata otaq apaykachanapaq carretata churanku, askha runakunaq purisqanpi. Hatun llaqtakunapi askha runakunaq kasqanpi predicaqkunan ichaqa askha iñiq t’aqakunamanta kanku, sucursalpa akllasqan llaqtakunapitaqmi predicanku (qhaway “Yanapanakunanchismi” nisqa recuadrota).
7. Sichus umallikuna qhawarinku askha runakunaq kasqanpi predicay allin kasqanta chayqa, ¿imaynatan chayta aparinku?
7 Umallikunan qhawarinanku iñiq t’aqanku predicasqan ladopi allinchus kanman mesata otaq apaykachana carretata churaspa predicay chayta. Allin kaqtinqa chaykunatan churakunman terminalkunapi, plazakunapi, askha runakunaq purisqan callekunapi, mercadokunapi, universidadkunapi, aeropuertokunapi, sapa watan fiestakuna ruwasqankupipas. Chaykunataqa churakunmanmi kasqan p’unchaypi, kasqan sitiollapi, kasqan horallapi. Hinaspapas hatun tiendakunamantaqa runakunaqa rantispa hinallan pasapunku, chayraykun aswan allinqa mercado ukhupi chaykunata churay. Askha runakunaq purisqan callekunapipas aswan allinqa apaykachana carretapi qelqakunata churaymi. Internet direccionninchispin kashan Qhawaq, ¡Rikch’ariy!, Imatapunin qelqakunamanta propaganda, chaytaqa umallikunan horqonkuman. Chhayna predicaypi yanapakuqkunaqa hatun llaqtapi askha runakunaq kasqanpi predicaqkuna hinan ruwallankutaq, paykunataqa umallikunan akllanqaku, superintendente de servicio iñiqmasiq nisqanta hinapunitaqmi ruwanqakupas. Sichus Bibliata estudiay munaq runata tarinqaku, manataq predicasqanku ladopichu tiyan chayqa Sírvase visitar (S-43) nisqa hojata hunt’aspan iñiq t’aqapi secretarioman qonqaku.
8. Manaña iñiq t’aqaykipi predicakunchu askha runakunaq kasqanpi chaypas, ¿imaynatan kallpachakuwaq askha runakunaq kasqanpi predicanaykipaq?
8 ¿Imaynatan sapallayki predicawaq askha runakunaq kasqanpi? Sichus iñiq t’aqaykipi mana kanchu mesakunata churaspa predicanapaq chayri, ¿imatan ruwawaq? Chaywanpas kallpachakuwaqmi askha runakunaq kasqanpi predicanaykipaq. ¿Iñiq t’aqaykiq predicasqankupi kanchu negociokuna, huch’uy mercadokuna otaq tiendakunapas? ¿Plazakunapi otaq huk ladokunapichu askha runakuna tarikunpuni? ¿Imatapas organizasqankuraykuchu askha runakuna chaypi tarikun? Chhayna kaqtinqa chaykunapin predicawaq.
9. ¿Imaraykun kallpachakunanchis runakuna may tarikusqankupi predicanapaq?
9 Diosmi munan “llapan runakuna qespichisqa kanankuta, cheqaq-kayta reqsinankutapas” (1 Tim. 2:4). Chayraykun tukuy atisqanchista ruwashanchis llapa runakunaman Diospa Gobiernonmanta willanapaq manaraq p’uchukay p’unchay chayamushaqtin (Mat. 24:14). Askha runakunan mana wasinkupi tarikunkuchu, ichaqa paykunatan tarisunman callekunapi otaq huk ladokunapipas. Chhaynata predicallaqtinchismi yaqapas paykunaqa Diosmanta allin willakuykunata yachanqaku. Chhaynaqa runakunaq may tarikusqankupi predicasun, allintataq hunt’asun Diospa kamachiwasqanchis ruwayta (2 Tim. 4:5).
[5 paginapi recuadro]
Yanapanakunanchismi
Mayninpiqa askha iñiq t’aqakunamanta predicaqkunan askha runakunaq kasqanpi predicanku kasqan callekunapi, terminalkunapi otaq mercadokunapipas. Chaymantapas askha iñiq t’aqakunamanta predicaqkunan kasqan edificiokunaq punkunpi revistakunata saqenku, kasqan negocio ruwaqkunata ima predicanku. Manaña kuskachu chayta ruwanku chaypas, chaykunaraykun mayninpiqa runakuna sinchi muyupayasqa sientekunku. Chaymi aswan allinqa askha runakunaq kasqanpi predicaspaqa iñiqt’aqanchispa predicasqankunallapi chaytaruwananchis.
Huk iñiq t’aqa predicasqan ladopi predicayta munaqkunaqa iñiq t’aqanpi kaq superintendente de servicio iñiqwanmi rimananku. Paymi huk iñiq t’aqapi kaq superintendente de servicio iñiqwan rimanqa. Sichus askha iñiq t’aqakuna huk ladollapi predicanku imaymana simikunapi chayqa, sapanka iñiq t’aqamanta superintendente de servicio iñiqkunan allinta rimanakunanku, chhaynapi runakunata mana sapa rato muyupayashanapaq, allinta rimanakuspa ruwakuqtinqa ‘tukuy imatapas chaninninpin ruwakunqa, maychus ruwanaman hinapuni’ (1 Cor. 14:40).
[6 paginapi foto]
[6 paginapi foto]