Diospa munaynin ruwakuchun
1. ¿Imamantan rimakunqa 2012 watapaq huk p’unchay huñunakuypi? ¿Imaraykun Diospa munayninmanta yachana?
1 Diosmi munayninpi runakunata kamarqan (Apo. 4:11). Chaymi tapukunanchis, ¿imataq kanman munayninri? Sichus chayta yachasun chayqa manañan kawsayllachu-kawsasun aswanpas munayninman hinan kawsasun. Sasaña kanman chaypas kallpachakunanchismi ama ‘sonqonchispa millay munasqankunapi purinapaq, cuerponchispa munayninta yuyaykuynintawan ruwanapaq’ “Diospi mana iñiq runakunaq ruwasqanta” ama ruwanapaqwan (Efe. 2:3; 1 Ped. 4:3; 2 Ped. 2:10). Diospa yanapaynillanwanmi chaytaqa atipasun, mana chayqa Saqrachá hap’irqowasunman paypa munayninta ruwananchispaq (2 Tim. 2:26). 2012 watapaq huk p’unchay huñunakuypi yachasqanchismi yanapawasun chay mañakuyman hina kawsayta. Chaypin rimakunqa “Diospa munaynin ruwakuchun” nisqa Yayayku mañakuymanta (Mat. 6:9, 10).
2. ¿Ima tapuykunatan kutichikunqa huk p’unchay huñunakuyninchispi?
2 ¿Ima tapuykunatan kutichikunqa? Huk p’unchay huñunakuypi kutichinqaku kay tapuykunata: Diospa Siminta uyarisqamantapas, ¿imatawanmi ruwana? ¿Imaynapin yachashallasunman Diospa munayninmanta? ¿Imaraykun llapa runata yanapananchis? ¿Imatan ruwasunman sumaqta kawsanapaq? Wayna-sipaskuna, ¿imatan Jehová Diosman rikuchinaykichis? ¿Imatan chaskisun Diospa munayninta ruwasqanchismanta? ¿Imaraykun iñiqmasinchiskunata yanapananchis kallpachananchispas?
3. ¿Imatan ruwasunman hatun huñunakuypi yachasqanchista mana qonqanapaq?
3 Tukuy atisqaykita ruway huk p’unchay huñunakuypi kanaykipaq allintataq uyariy yachachisqankuta. Yaqapaschá Betelmanta hamunqa huk yachachiq otaq iñiq-t’aqapi watukuq umalli kanman. Manaraq huñunakuy qallarishaqtin otaq tukukusqan qhepaman allinchá kanman paywan esposanwanpas parlariyqa, sichus esposayoq kaqtinqa. Wasiman kutipuspa familiawan parlariychis yachasqaykichismanta ama ‘qonqanaykichispaq’ (Sant. 1:25). Kuska t’aqwiriychis imaynatan Diospa munayninta hunt’awaqchis chayta.
4. ¿Imaraykun Diospa munayninta ñawpaqman churananchis?
4 Diospa munayninta mana ruway munaqkunata paykunallapaq kawsaqkunatapas Jehová Dios ch’usaqyachipunqaña (1 Juan 2:17). Huk p’unchay huñunakuypi yachasqanchismi yanapawasun Diospa munayninta ñawpaqtan kasukunanchispaq. Chaymi Jehová Diosta agradesekusun chay yanapay chaskisqanchismanta.