Kinsa p’unchay asambleanchispaq yuyarichiykuna
Horario. Punkukunan kichakunqa 8:00 tutamantanta. Uyarinapaq takiqa 9:20 tutamantanta kinsantin p’unchay qallarinqa. Chay taki qallariqtinmi llapallanchis tiyananchispiña kashana. Viernes, sábado p’unchaykunaqa 5:00 tardenta takiwan mañakuywan tukunqa, domingo p’unchaytaq 4:00 tardenta.
Jehová Diosta hatunchasun takikunawan. Ñawpaq tiempopin Diospa llaqtanqa Jehová Diosta takikunawan hatunchaqku. Kunan tiempopipas kaqllatataq ruwakun (Sal. 28:7). Sapa kutinmi asambleanchispi uyarinapaq takita churakun. Chaytaqa ruwakamurqan Jehová Diosta hatunchanapaq, paymanta yachachiwananchispaq ima. Sichus huñunakuyta qallarichiq willamun takita uyarinanchispaq chayqa, llapallanchismi tiyananchis, tukuy yuyaywantaq uyarinanchis. Chayta ruwaspan agradecekushanchis chay takikunata ruwamuq iñiqmasikunata. Paykunan watapi iskay kutita qolqenkuwan viajanku Patterson (Nueva York) llaqtaman, chaypin sumaq takikunata grabamunku. Asambleanchispi chay takikunata uyarisqanchis qhepamanmi Jehová Diosta hatunchanchis huk takita takispa.
Carrota sayachinapaq. Chayta alquilakuqtinqa manan cobrakunqachu, chayasqankuman hinataq carrokunata sayachikunqa. “Discapacitados” nisqakunapaq kaqtinqa, manan chaypiqa sayachinankuchu. Sayachinanku campoqa manapaschá hatunchu kanqa, chaymi allin kanman huk carrollapi askha rinkuman chayqa.
Tiyanakuna. Punkukuna kichakuqtinqa manan hukkunata tanqarisparaqchu phawananchis tiyanakunata hap’inapaq, aswanpas hukkunaq allinninta maskhananchis. Chhaynapin sut’ita rikuchisun cheqaq cristiano kasqanchista, chayta rikuspan hukkunapas Diosta hatunchanqaku (Juan 13:34, 35; 1 Cor. 13:5; 1 Ped. 2:12). Tiyanataqa hap’isunman wasinchispi tiyaqkunapaq, estudiantekunallapaqwanmi. Ama huk tiyanakunapiqa imatapas churaychu, chhaynapi hukkuna yachanqaku chay tiyanakuna libre kashasqanta. Kurakkunapaq onqosqakunapaq tiyanakunaqa paykunapaq yanapaqninllapaqwanmi.
Allin yuyaywan p’achakuna. Asambleanchismanqa allin hap’iq p’achawanmi churakunanchis manataq hatunchakunapaq hinachu kanan. Chhaynapin mana kay pacha runakunata qatikusunchu (1 Tim. 2:9). Hinaspapas manan comuntachu p’achakunanchis maypiña kashaspapas. Chayta kasukuspaqa mana p’enqakuspan asambleapaq churakusqanchis tarjetata apasun, manataq p’enqakusunchu pimanpas predicayta. Asambleanchispaq sumaqta p’achakusqanchis allinta portakusqanchis iman, allin sonqoyoq runakunata yanapanqa Bibliamanta astawan yachanankupaq. Hinaspapas chay ruwasqanchiswanmi Jehová Dios kusikunqa (Sof. 3:17).
Celularta otaq hukkunata utilizaspa. Sichus celularta, camarata, tabletata otaq huk aparatokunata apanchis chayqa, hukkunata ama distraenanpaq hina utilizasun. Amataq hukkunaq rikunantaqa tapasunchu. Ama yanqa qasi mensajekunata apachishanachu, chaykunata kasukuspan respetashanchis ladonchispi tiyaqkunata.
Qoqawa. Chawpi p’unchayta hawapi mikhunata rantishanamantaqa qoqawanchistan apakunanchis. Ichaqa manan q’epitaraqchu apana, aswanpas asientoq pachanpi cabenanpaq hinallan kanan, nitaq vidrio cosaskunatapas apanachu.
Donacionkuna. Asambleanchismanta agradecekusqanchistaqa rikuchisunman donacionninchista churaspan, chaytan qosunman hatun huñunakuypi. Sichus pipas cheque nisqapi qoyta munan chayqa “Asociación de los testigos de Jehová” nisqa sutipi ruwanan. Churallasunmantaq tarjeta de débito otaq crédito nisqawan.
Hampikuna. Sichus hampikunata tomanki chayqa, apakunaykin, ¿imarayku? Chay huñunakuypiqa manan qosunkikuchu. Diabetes onqoyniyoq kaqtiykiqa imachus necesitasqaykita apanayki, ichaqa utilizasqaykitaqa aman comunta q’opaman wikch’unaykichu alojakusqaykipi nitaq hatun huñunakuypipas.
Imayna zapatowan rinamanta. Cuidadowanmi purinanchis mana chayqa laq’akusunmanmi. Sapa watanmi k’irikunku hatun tacosniyoq zapatowan churakusqankurayku. Chaymi zapatonchisqa allin purinapaq hina kanan.
Sasata uyariqkunapaq. Asambleapi yachachikuyqa FM nisqapin uyarikullanqataq, ichaqa local ukhullapi. Chaypaqqa radiota audifonoyoqta necesitanki.
Wawakunapaq. Aman apanachu tanqakachana cochekunata, nitaq ima sillatapas. Ichaqa apawaqmi wawakunapaq sillakunata tiyana pataman churanapaq kaqtinqa.
Perfumekuna. Yaqa llapa asambleakunan wisq’asqa localpi ruwakun. Chaymi mana allinchu sinchi q’apaq perfumekunata churakuy, mana chayqa alergiayoq iñiqmasinchiskunatan onqochinman (1 Cor. 10:24).
Sírvase visitar (S-43) hoja. Chay hojapin anotawaq Bibliamanta astawan yachayta munaq runamanta. Hinaspa iñiq t’aqapi secretarioman qowaq otaq asambleapi qelqakuna rakiymanta encargakuqkunaman.
Restaurantekuna. Chaypi allinta portakusqanchisqa Jehová Diospa sutintan hatunchan. Chaymi allin p’achasqa rinanchis. Sichus chay llaqtapi costumbre kan propinata qonapaq chayqa ama pisitachu qoy.
Alojakuymanta. Pitapas alojayta munanki chayqa, secretariomanta mañakuy alojanapaq formulariota. Asambleapaq alojanata necesitanki chayqa, secretarioman willay, huk formulariota hunt’aspataq chayta qoy apachinanpaq. Tiempowanmi chaytaqa ruwanayki, mana chayqa alojakuymanta encargakuqkunan sasachakuypi rikukunkuman (1 Cor. 14:40). Pipas wawakunantin alojakuspaqa respetananku alojaqpa wasinta, manan imantapas llaminankuchu, nitaq malogranankuchu. Alojakusqanchis wasiqa huñunakuy p’unchaykunallapaqmi. Manan allinchu kanman askha p’unchaykuna qhepakuyqa.
Yanapakuy munaqkunamanta. Hatun huñunakuypi yanapakuyta munanchis chayqa, yanapakuy munaqkunamanta encargakuqkunaman asuykunanchis. 16 watankumanta urayman kaq wawakunapas yanapakunkumanmi tayta-mamankuq qhawasqan, otaq paykunaq encargasqanku cristianoq qhawasqan.