Ioane

7 E MURI akera, kare aturā Iesu i aaere i Iudea, aaere ua iora aia na Galilea; no te mea te tapapa ra te ngati Iuda iaia e ta.

2 Te vaitata ra te oroa patia puakapa a te ngati Iuda.

3 Kua tuatua maira tona au taeake kiaia, Ka akaruke mai koe i teianei enua, ka aere atu koe ki Iudea, kia kite katoa te au pipi aau ra i te angaanga tini taau e rave nei.

4 Tei kimi oki i te rongo ra, kare ana e mea rave poiri; te rave nei koe i taua au mea ra, ka akakite ua atu koe ia koe uaorai ki te ngai tangata.

5 (Kare akerai tona au taeake tikai i akarongo iaia.)

6 Kua karanga aturā Iesu kia ratou, Kare rai i tae ki toku ora mou: ka tau ra te au ora katoa ia kotou.

7 Kare to te ao i makitakita mai ia kotou; te riri mai nei ra iaku, i te mea kua akakite ua atu au e, e tuatua kino ta to reira.

8 Ka aere kotou ki taua oroa ra; kare au e aere vave atu ki taua oroa ra; kare akerai i tae ki toku ora tikai.

9 E oti akera taua tuatua ra, noo ua iora aia i Galilea.

10 Kia riro ra tona ai taeake ra, kua aere katoa atura aia ki taua oroa ra, kare ra i aere akakite, i aere poiri ua.

11 Kua ui iora te ngati Iuda iaia i taua oroa ra, na ko akera, Teiea aia nei?

12 Maata rava akera te koumuumu anga a taua aronga katoa ra iaia; i karanga tetai papaki, E tangata meitaki aia: i na ko oki tetai papaki, Kare; te tapikipiki ua nei aia i te tangata.

13 Kare ra e tangata i tuatua akakite ua kiaia, i te mataku i te ngati Iuda.

14 E tae akera i rotopu i taua oroa ra, aere aturā Iesu ki roto i te iero, apii atura.

15 Kua va ua iora te ngati Iuda, na ko akera, Noea ra te kite o teianei tangata, kare oki aia i apiiia?

16 Kua karanga aturā Iesu kia ratou, na ko atura, Kare taku uaorai i taku e apii nei, nana ra, na tei tono mai iaku nei.

17 Ko tei anoano marie i te akono i tona inangaro, ka kite aia i taku e apii nei, e na te Atua ainei, e naku uaorai ainei.

18 Ko tei tuatua i te tuatua nona uaorai, te kimi ra ïa i tona uaorai kakā: ko tei kimi ra i te kakā no tei tono mai iaia ra, e tuatua-mou tana, e kare ua e tuatua-tika kore i roto iaia ra.

19 Kare ainei a Mose i tei tuku mai i te ture na kotou? kare rava tetai o kotou i akono i taua ture ra. Eaa kotou e umuumu mai ei iaku e ta?

20 Kua tuatua maira taua aronga ra, na ko maira, E demoni toou; koai tei umuumu ia koe e ta?

21 Kua karanga aturā Iesu, na ko atura kia ratou, Okotai aku angaanga i rave akenei, e te va ua nei kotou katoa i te reira.

22 I tuku mai a Mose i te peritome kia kotou; (kare ra ta Mose, na te ui tupuna ra;) e te peritome nei kotou i te tangata i te rā sabati.

23 I peritomeia te tangata i te rā sabati, kia kore e aatiia te ture a Mose; te makitakita mai ainei kiaku, i te mea, kua akaora rava au i tetai tangata i te sabati?

24 Auraka e akava ua i te tu i vao ake, ka akava ra i te tuatua-tau tikai.

25 Kua na ko akera tetai pae tangata no Ierusalema, Kare ainei teia te tangata ta ratou i kimi nei e ta?

26 E i na, te tuatua akakite ua nei aia, e kare ua a ratou tuatua kiaia. Kua kite pu tikai aina te au tutara e, ko te Mesia mou teia?

27 Kua kite ra tatou i te ngai no reira mai teianei tangata; kia tae maira te Mesia, kare e tangata e kite i te ngai no reira mai aia ra.

28 Kua kapiki ua aturā Iesu i te apii anga i roto i te iero ra, na ko atura, Te kite na kotou iaku, e te ngai no reira mai au nei: kare au i aere ua mai, kareka tei tono mai iaku nei, e tuatua-mou tana, kare kotou i kite iaia.

29 Kareka au, kua kite au iaia, mei reira mai oki au nei, e nana oki au i tono mai nei.

30 Kua kimi atura ratou i te ravenga e opu iaia; kare ra e tangata i rave ua atu te rima iaia, no te mea kare akera i tae i tona ora.

31 E manganui taua aronga i akarongo iaia ra; kua na ko akera, Kia tae mai te Mesia, e maata ainei tana akairo e rave i ta teianei tangata i rave?

32 Kite akera te au Pharisea ra e, te akapera ra te tangata i te koumuumu iaia ra; kua tono atura taua au Pharisea ra, e te kau taunga nunui, i te aronga taoonga e opu iaia.

33 Kua tuatua mairā Iesu kia ratou, Koi noonoo ake au ki o kotou nei, e te aere nei au kiaia i tei tono mai iaku nei.

34 E kimi kotou iaku nei, kare ra kotou e kite iaku; e te ngai e nooia e au ra, kare kotou e tae ki reira.

35 Kua tuatua iora te ngati Iuda ratou ratou uaorai, Ka aere ra aia kiea, ka kore tatou e kite atu ei iaia? Ka aere ainei aia ki te aronga i ngaro ke ki o te Eleni ra, ka apii atu ei i te Eleni?

36 Eaa teianei tuatua tana i karanga mai nei e, Ka kimi kotou iaku, e kare kotou e kite iaku: e te ngai e nooia e au ra, kare rava kotou e tae ki reira?

37 E tae akera ki te rā maata openga i taua oroa ra, kua tu akerā Iesu, kua kapiki maira, na ko maira, Te tangata e kaki vai ra, ka aere mai aia kiaku nei inu ei.

38 Te akarongo mai iaku nei ra, ka taʼe te vai ora no roto iaia, mei tei akakiteia mai e te tuatua i tataia ra.

39 No te Vaerua e orongaia mai i te aronga e akarongo iaia ra, taua tuatua tana i tuatua maira: kare ra oki i orongaia mai te Vaerua Tapu i reira; no te mea, kare akerai a Iesu i akateiteiia ra.

40 Kua na ko akera tetai pae maata o taua aronga i kite i taua tuatua ra, Ko taua peroveta mou rai teia.

41 Kua na ko akera tetai pae, Ko te Mesia teia. Kua na ko akera tetai papaki. No Galilea mai ainei te Mesia?

42 Kare ainei i na ko te tuatua i tataia ra e, no te uanga o Davida te Mesia, no Betelehema ra no te oire no reira Davida ra?

43 Kua tupu iora te tauetono i taua au tangata ra iaia.

44 Te anoano ra tetai pae tangata e opu iaia; kare ua ra e tangata e rave atu te rima iaia.

45 Kua oki maira taua aronga taoonga ra ki te kau taunga nunui ra e te au Pharisea; kua karanga atura ratou kia ratou, Eaa kotou i kore ei i arataki mai iaia?

46 Kua tuatua maira taua aronga taoonga ra, Kare rava e tangata e tau te tuatua i ta tera ra tangata.

47 Kua karanga atura te au Pharisea, Kua vavare katoa ainei kotou?

48 Kua akarongo ainei tetai o te ui rangatira, e o te au Pharisea, iaia?

49 Kareka teianei au tangata tei kore i kite i te ture nei, kua taumaaia ïa.

50 Kua karanga atura tetai tangata no ratou uaorai, ko Nikodemo te ingoa, (ko tei aere mai ia Iesu i te po ra,)

51 Ka tika aina i ta tatou nei ture kia akaapa atu tatou i te tangata, kare e timata na i te akarongo atu i tana tuatua, e kia kitea?

52 Kua tuatua maira ratou, na ko maira kiaia, No Galilea katoa aina koe? ka kimi ana, kia kite koe, kare rava e peroveta i tupu i Galilea.

53 Aere ua atura te tangata katoa ki tona kainga, ki tona kainga.