1 Timoteo

6 KO te au tavini katoa i roto i te zugo ra, kia akangateitei rava atu ratou i to ratou uaorai au pu; kia kore te ingoa o te Atua e tana tuatua e akakinoia.

2 E te au tavini e pu akarongo to ratou ra, eiaa ratou e akavaavaa atu, no te mea e e taeake; kia maata atura to ratou akono i reira, no te mea e aronga akarongo e te akaperepere a, tei rauka katoa taua meitaki ra. Ko teianei au tuatua taau e apii atu, e e ako atu oki.

3 E e tuatua ke ta tetai tangata e apii ra, kare i tau i te tuatua ora a to tatou Atu a Iesu Mesia, i te tuatua e tau i te akono i te Atua ra;

4 E nengonengo ïa, e te kite kore, kua auouo ua i te ui e te māro anga tuatua, e tupu ei te vareae, te tamaki, te tuatua akakino, te manako kino,

5 TE māro anga tika kore oki a te aronga ngakau kino ra, e kare ua e tuatua-mou ra, ko tei manako ko te mea e raukaʼi te apinga ra, ko te akono i te Atua ïa; e akataka ke atu koe i te reira.

6 Kareka te akono i te Atua e te mareka ua ra, ko te apinga maata ïa.

7 Kare ua oki a tatou apinga i apai mai ki teianei ao; e kua kitea tikaia e kare takiri e apinga e tika kia apai katoa kia aere ke tatou nei.

8 E teianei, e kai ta tatou, e te kakau, kia mareka tatou i te reira.

9 Kareka te aronga e māro e kia maata te apinga, e rokoia ïa e te timataanga, e te ereere, e te anoano neneva e manganui, e kino ei ra, e maremo takiri atu ei te tangata ki roto i te pou e te mate.

10 Ko te anoano maata oki i te moni te tumu o te au kino katoa nei; kua taka ke rava oki tetai aronga i te akarongo nei, i te umuumu anga i te reira, e kua ko mama rava ia ratou uaorai i te iriea e manganui.

11 Kareka koe, e te tangata o te Atua na, ka rere ke koe i te reira: e aruaru atu i te tuatua-tika, i te akono i te Atua, i te akarongo, i te anoano, i te akakoromaki, e te maru.

12 Kukumi ua ïa i te kukumianga meitaki ra i te akarongo; e opu atu i te ora mutu kore, i kapikiiaʼi koe, e kua aaki oki i te aakianga tuatua meitaki ki mua i te aroaro o te au kite e manganui ra. 13 Te akaue atu nei au ia koe ki mua i te aroaro o te Atua, ko te akaora i te au mea katoa nei, e to te Mesia ra to Iesu, ko tei aaki i te aakianga tuatua meitaki ki mua i te aroaro o Ponotio Pilato ra;

14 E e tamou tikai ko ei taua akauenga nei, eiaa ei ngai kino, eiaa ei apa, e tae ua atu i te mama anga mai o to tatou Atu o Iesu Mesia:

15 Ko tana e akakite mai kia tae ki tona tuatau, ta Tei meitaki, e Tei iaia anake ra te mana ra, ko te Ariki o te au ariki, e te Atu o te au atu ra;

16 Tei iaia anake ra te mate kore, e te noo ra oki ki roto i te mārama kare e taea e te tangata katoa; ko tei kore rava oki i akaraia e te tangata katoa, e kare takiri oki e tika kia akara; ei iaia te akangateitei, e te mana, e tuatau ua atu. Amene.

17 E ako atu i te aronga apinga maata i teianei ao, eiaa ei ngakau teitei, eiaa oki e irinaki i te apinga maata mou kore, ei te Atua ora ra, ko tei oronga ua mai i te au mea katoa nei ei rave anga na tatou;

18 Kia takinga-meitaki ratou, e kia apingaia ra i te angaanga meitaki ra, kia maata atu ïa ia ratou kia oronga aere, kia tau i te uipa;

19 I te akaputu marie anga i te meitaki tumu no ratou uaorai a muri atu, kia rave ratou i te ora mutu kore.

20 E Timoteo e, e akono meitaki i tei tukuia atu ia koe na, e ariu ke koe i te tuatua rikiriki mako kore kare e puapinga ra, e te tuatua taumāroia ra i tapikipikiia e e kite:

21 Ko tei tāpuia e tetai pae ra, e tatipake rava akenei i te akarongo. Ei ia koe te aroa ua. Amene.