Ioane

11 TE mate ra tetai tangata i te maki ko Lazaro te ingoa, no Betania no te oire o Maria e tona tuakana ko Mareta ra.

2 (Ko Maria i akatainu i te Atu i te manongi ra, e tei orei i tona vaevae i tona rauru, nona te tungane i mate i te maki ra ko Lazaro.)

3 Kua tono atura nga tuaine i te karere e akakite kiaia, na ko atura, E te Atu, i na, te tangata akaperepere naau ra, kua mate i te maki.

4 E kite akerā Iesu i taua tuatua ra, kua na ko akera, Kare te reira maki e riro ei maki mate, kia akakakāia ra te Atua, e kia akakakāia te Tamaiti a te Atua i te reira.

5 E akaperepere a Iesu ia Mareta, e tona teina, e ia Lazaro oki.

6 E kite akera e kua mate aia i te maki, noo iora aia i taua ngai ra e po rua.

7 E muri akera, kua karanga atura aia ki te au pipi, Ka oki akaou tatou ki Iudea.

8 Kua tuatua mai te au pipi kiaia, E Rabi, i anoano akenei te ngati Iuda ia koe e peî ki te toka, e te oki akaou rai koe ki reira?

9 Kua karanga aturā Iesu. Kare ainei okotai ngauru ma rua te ora i te ao okotai nei? Kia aere te tangata i te ao ra, kare e turori, no te mea kua kite aia i te mārama no teianei ao.

10 Kareka kia aere aia i te po ra, ka turori ïa, no te mea kare e mārama.

11 I akapera atura aia: e oti akera, kua karanga atura aia kia ratou, Kua moe to tatou oa ko Lazaro; e te aere nei au e akaara iaia.

12 Kua tuatua maira tana au pipi, E te Atu, te moe ra aia, ka ora ïa.

13 No te mate te tuatua a Iesu i karanga atura; i manako ra ratou e no te akāvai moe ua nei tana i tuatua maira.

14 Kua akakite pu aturā Iesu kia ratou, Kua mate takiri a Lazaro.

15 No kotou ra i rekarekaʼi au, i te mea kare au i reira, kia akarongo oki kotou; e teianei taki aere tatou kiaia ra.

16 Kua tuatua akera Toma, koia oki a Didimo ra, ki tona au taeake pipi ra, E taki aere tatou, kia mate katoa atu.

17 E tae aturā Iesu ra, kite akera aia e, kua po a atura aia ki roto i te vaarua.

18 Te vaitata ua ra Betania ki Ierusalema, ka tau i te ngauru ma rima te setadia ra:

19 Kua aere maira te ngati Iuda e manganui kia Mareta raua ko Maria ra, e akapumaana ia raua i to raua tungane ra.

20 Kite akerā Mareta e te aere mai nei a Iesu, aere atura aia e aravei akera iaia; karekā Maria, noo ua iora ïa ki roto i te are.

21 Kua karanga aturā Mareta kia Iesu, E te Atu, naringa koe i ko nei, kare e mate toku tungane.

22 Kua kite ra au e, ko taau e pati i te Atua ra, na te Atua ïa e o mai naau i teianei rai.

23 Kua tuatua mairā Iesu kiaia, Ka tu akaou mai ïa to tungane.

24 Kua karanga aturā Mareta kiaia, Kua kite au e, ka tu akaou maira aia i te tuakaouanga i te rā openga ra.

25 Kua tuatua mairā Iesu kiaia, Ko au te tuakaouanga, e te ora; ko te akarongo mai iaku ra, mate ua atu rai, ka ora ra ïa:

26 E te tangata ora katoa nei e akarongo mai iaku ra, kare rava atu ïa e mate.

27 Kua akarongo ainei koe i te reira? Kua karanga atura aia kiaia, E te Atu, a; kua akarongo au e, ko koe te Mesia, te Tamaiti a te Atua, ko te aere mai ki te ao nei.

28 E oti akera taua tuatua nana ra, oki maira aia e karanga atura kia Maria ki tona teina, koumuumu atura e, Tera ake te Orometua, e te tuatua maira ia koe.

29 E kite akera aia, tu ua akera aia ki runga i reira ra, aere atura kiaia ra.

30 Kare akerai a Iesu i tae ki roto i te vila, tei te ngai rai i aravei atu ei a Mareta iaia ra.

31 E te ngati Iuda i noo katoa i roto i te are, i te akapumaana iaia, kite akera ratou ia Maria i te tu vave anga ki runga, e te aere anga ki vao, kua aru maira iaia, na ko akera, Te aere atura aia ki te tanumanga e aue ei.

32 E tae aturā Maria ki taua ngai tei reirā Iesu ra, kite atura iaia, piko iora ki raro i tona pae vaevae, na ko atura, E te Atu, naringa koe i ko nei kare e mate toku tungane.

33 E kite akerā Iesu iaia i te aue anga, e te ngati Iuda i aere katoa maira i te aue anga, ngunguru iora aia i roto iaia, e taitaia atura.

34 E kua na ko atura, Teiea aia te vaio angaia e kotou? Kua na ko maira ratou, E te Atu ka aere mai ka akara.

35 Aue iorā Iesu.

36 Kua tuatua iora te ngati Iuda, Ka akara na i tona akaperepere iaia!

37 Kua na ko akera ra tetai pae o ratou, Kare ainei e tika iaia kia akakore mai i te mate o teianei tangata, ko tei akapuera i te mata o te tangata matapo ra?

38 Kua ngunguru akaou iorā Iesu i roto iaia ra, e tae atura ki te tanumanga; e ana, kua momaniia te ngutupa ki te toka.

39 Kua karanga aturā Iesu, Ka uri ke atu i te toka na. Kua tuatua mairā Mareta, te tuaine o taua tangata i mate ra, E te Atu, kua aunga i tenana, ko te po a oki teia.

40 Kua karanga aturā Iesu kiaia, Kare au i karanga kia koe e, Kia akarongo koe ra, ka kite koe i te kakā o te Atua?

41 Kua uri ke atura ratou i te toka i taua ngai i vaooiaʼi te tupapaku ra. Akara atura te mata o Iesu ki runga, kua karanga atura, E taku Metua, e akameitaki au ia koe, ko koe i akarongo mai iaku nei.

42 Kareka au, kua kite au e, ka akarongo ua mairai koe iaku; no teianei ra aronga i akapiri mai kiaku nei i karanga atu ei au, kia akarongo ratou e, naau au i tono mai.

43 E oti akera taua tuatua nana ra, kua kapiki atura aia ma te reo maata, E Lazaro, ka aere mai ki vao!

44 Kua aere maira taua tangata i mate ra ki vao, kua tākaiia nga rima e nga vaevae; i vaîia oki te mata i te kakau. Kua karanga aturā Iesu kia ratou, Ka tatara, e tuku atu iaia kia aere ana.

45 E te ngati Iuda i aere mai kia Maria ra; ko tei kite i ta Iesu i rave ra, manganui ïa tei akarongo iaia.

46 Aere atura tetai pae o ratou i te au Pharisea ra, kua akakite atura kia ratou i ta Iesu i rave ra.

47 Kua akaputuputu maira te kau taunga nunui ra e te au Pharisea i te Sunederi, na ko akera, Te aa ua nei tatou? maata rava ta teianei tangata akairo e rave nei.

48 I vaio ua atu rai tatou iaia mei teianei rai, ka ope takiri te tangata i te akarongo iaia; e ka tae mai oki to Roma e rave i to tatou nei ngai, e te enua katoa oki.

49 Kua tuatua akera tetai o ratou uaorai, ko Kaiapha, ko te taunga maata ïa i te reira mataiti,

50 Kare anake kotou i kite, E kare kotou i manako e, e mea meitaki ia tatou kia mate atu te tangata okotai, kia ora te tangata ravarai nei, auraka oki e mate te enua katoa.

51 I akapera atura aia, kare ra tana tikai taua tuatua ra: koia ra te taunga maata i te reira tuatau, kua akakite atea maira aia e, e mate a Iesu no te reira enua;

52 Kare ra no te reira enua anake ra, kia akaputuputu ra aia ki te ngai okotai i te tamariki a te Atua i pueurikiriki aere ra.

53 E mei taua rā mairai ratou i te akatau anga i ta ratou tuatua e ta iaia.

54 Kare aturā Iesu i aere akakite ki o te ngati Iuda; i aere atura ra aia i tetai ngāi i vaitata i te medebara ra, i tetai oire ko Epheraima te ingoa, noo atura i reira e tana au pipi katoa oki.

55 Kua vaitata te pasa a te ngati Iuda ra; e manganui to uta mai i aere atea ua na ki Ierusalema, e tamā ia ratou i te pasa.

56 Kua ui iora ratou ia Iesu, na ko akera ratou ratou uaorai i to ratou tu anga i roto i te iero ra, Eaa to kotou manako? kare aina aia e tae mai i teianei oroa?

57 Kua tuku mai ana te kau taunga nunui e te au Pharisea i te tuatua e, ko te tangata i kite iaia i te noo anga, ka aaki aia, kia opukia aia e ratou.