2 Timoteo

2 E TENANA, e taku tamaiti, kia maroiroi koe i te aroa ua e vai ki roto i te Mesia ra ia Iesu.

2 E te au tuatua taau i akarongo iaku nei i te aroaro o te au kite katoa e manganui ra, ko taau ïa e tuku ki te aronga tuatua-mou, ko te tau kia apii atu ia etai ke ra.

3 E akakoromaki marie koe i te kino, mei te toa meitaki ki o Iesu Mesia ra.

4 Kare rava te tangata e aere ki te tamaki ra e taii iaia uaorai i te peu rikiriki no teianei ao, kia akarekareka i tei iki iaia ei toa ra.

5 E te tangata oki kia kukumi ra, kia kore aia e kukumi ma te akono i te ture ra, kare ïa e akakoronaia.

6 E akamata na te tangata tanu-kai i te rave i te angaanga e tikaʼi, ka kai ei aia i tei tupu ra.

7 E akamaara i taku e tuatua nei; e kia oronga mai oki te Atu i te kite i te au mea katou nei ia koe.

8 E akamanako ia Iesu Mesia, no te uanga o Davida, ko tei akatuia mai mei te mate maira, mei tei te evangelia naku nei.

9 I mate ei au nei i teianei kino, e kua tae rava ki te pirianganaoa nei, mei te mea e e tangata rave tuatua kino ra; kare ra te tuatua a te Atua i tapekaia ra.

10 I akakoromaki marie ei au nei i te au mea katoa no te aronga i ikiia ra, kia rauka katoa ia ratou te ora i te Mesia ra ia Iesu, ma te kakā mutu kore ra.

11 E tuatua-mou te manga tuatua e, Kia mate tatou ma ia katoa ra, e ora katoa tatou ma ia katoa oki:

12 Kia akakoromaki katoa tatou i te kino ra, e basileia katoa to tatou ki ona ra: kia uuna tatou iaia ra, e uuna katoa aia ia tatou:

13 Kia kore tatou e akono i te tuatua-mou, e tuatua-mou rai tana, kare e tika iaia kia uuna i tana uaorai.

14 E akakite atu ia ratou i teianei au tuatua, ma te ako atu ki mua i te aroaro o te Atu ra e, auraka ratou e tauetono i te tuatua rikiriki puapinga kore ra, e tatipake ei te aronga akarongo ra.

15 E akamaroiroi kia vai meitaki rai koe ki mua i te aroaro o te Atua, ei rave angaanga kare e akama anga, e te tika oki i te tua i te tuatua-mou ra. 16 Kareka te tuatua rikiriki puapinga kore ra, e patoi atu ïa; ko te tuatua kino oki te tupu i te reira, e e maata atu oki.

17 E te kakai oki ta ratou tuatua mei te maki kakai ra; no ratou oki a Humenaio e ko Phileto;

18 Ko tei ariu ke akenei i te tuatua-mou, i te māro anga e, kua oti te tuakaouanga; e kua akatatipoki i te akarongo o tetai papaki ra. 19 Kareka te tumu o te Atua ra, te vai keukeu kore nei ïa, e ma teianei akairo ki rungao, Kua kite te Atu i tona uaorai, e, Ko te tangata ravarai e taiku i te ingoa o te Atu ra, e akaruke anake ratou i te tuatua kino.

20 Kare ra to te are maata nei au āriki i te āriki auro anake, e te ario, e mea rakau tetai e te karakaraea, e no te meitaki oki tetai papaki, e no te kino tetai.

21 E teianei, kia tamā marie te tangata iaia uaorai i teianei au tuatua, e riro aia ei āriki no te meitaki, e akatapuia ïa, e te tau oki i to te Atu ra anoano, e te manea oki kia rave i te au angaanga memeitaki katoa ra.

22 E rere ke koe i te au anoano o to mea ou anga ra: e aruaru ra i te tuatua-tika, te akarongo, te aroa, te au, ko koe e te aronga katoa e akamori i te Atu ma te ngakau mā ra.

23 Kareka te ui neneva puapinga kore ra, auraka takiri ïa, ko te mea ïa e tupu ei te māro.

24 Kare oki te tavini o te Atu nei e tika kia māro; kia maru ra aia i te tangata katoa nei, e te tau oki kia apii ia etai ke, e te akakoromaki marie,

25 Ma te apii maru marie atu i te aronga i patoi maira; peneiake ko te oronga mai te Atua i te tataraara kia āriki i te tuatua-mou ra;

26 Kia ora ratou i te ereere a te diabolo ra, i tei riro ei tuikaa nana ra i tona ra anoano.