Mareko

9 KUA karanga atura oki aia kia ratou, E tikai taku e karanga atu kia kotou nei, kare tetai papaki o te aronga e tu mai nei e rokoia e te mate, e kite ei i te basileia o te Atua, i te tae anga mai ma te mana.

2 E po ono akera, kua arataki aturā Iesu ia Petero, e Iakobo e Ioane, ko ratou anake orai, ki runga i tetai maunga teitei. E kua akatu keia aia ki mua ia ratou.

3 Kakā rava akera tona kakau, maata ua atura te teatea, mei te kiona ra; kare rava e tamā kakau i te ao nei e tau i te akaaite i te reira i te teatea.

4 Kua mama maira oki a Elia raua ko Mose kia ratou, e te tuatua ra raua e ko Iesu katoa oki.

5 Kua tuatua mairā Petero kia Iesu, E Rabi, e mea meitaki kia noo tatou i ko nei: e e akatu matou i e toru are puakapa; noou tetai, no Mose tetai, no Elia oki tetai.

6 Kare aia i kite i tana tuatua, e koiriria maata oki to ratou.

7 E tetai tiao maira i te tapoki anga mai ia ratou, e tetai reo maira oki, no roto i taua tiao ra, na ko maira, Taku Tamaiti akaperepere teia, ka akarongo iaia.

8 Akara iora ratou e pini ua ake, e kare rava e tangata i kitea, mari ra ko Iesu, e ko ratou katoa io.

9 E tei to ratou eke anga mai mei runga i taua maunga ra, kua ako atura aia kia ratou e, auraka rava e akakite atu ki tetai tangata i ta ratou i kite ra, e kia tu mai te Tamaiti a te tangata mei te mate maira.

10 Kua tamou marie iora ratou i taua tuatua ra, e kua akaeatu iora ratou uaorai i te akatau anga o taua tuakaouanga mei te mate maira.

11 Kua ui maira ratou kiaia, na ko maira, Eaa i tuatua mai ei te au tata tuatua ra e, ko Elia na te ka aere mai?

12 Kua karanga atura aia kia ratou, na ko atura, E na mua tikai oki a Elia i te aere anga mai, e akatika i te au mea katoa; (e mei tei tataia oki i te Tamaiti a te tangata nei,) e manganui tona mate, e e takinga-kinoia.

13 E karanga atura au kia kotou e, Kua riro mai ana oki a Elia, e mei tei tataia iaia ra, kua rave ratou i ta ratou i anoano iaia.

14 E kia oki mai aia ki tetai aronga pipi ana ra, kite maira aia i te urupu maata i te takako anga ia ratou, e te au tata tuatua i te ui anga kia ratou.

15 E kite akera te au tangata iaia, poitirere atura ratou, oro atura, e aroa atu iaia.

16 Kua ui atura aia ki taua au tata tuatua ra, Eaa ta kotou i ui kia ratou nei?

17 Kua tuatua maira tetai i taua urupu maata ra, na ko atura, E te Orometua e, i arataki mai nei au i taku tamaiti ia koe nei, e vaerua murare tona;

18 E te ngai e opukia mai ei aia iaia, e aaeia iora aia i reira ra, ukaia iora te vaa, e pakati oki te nio, e ikoke roa akera: i tuatua na oki au i to au pipi e tuaru i te demoni, kare ra i tika ia ratou.

19 Kua karanga atura aia kiaia, na ko atura, Aue ïa uki akarongo kore e! mei te aa te roa o toku noo anga ki o kotou nei? mei te aa te roa o toku akakoromaki anga atu ia kotou? e arataki mai iaia kiaku nei.

20 Kua arataki maira ratou iaia: e tei te kite anga aia iaia ra, aeaia maira aia e taua vaerua ra, topa iora aia ki raro i te one, takaviri ua atura, ukaia iora te vaa.

21 Kua ui atura aia ki tona metua tane, Mei naea mai tona rokoia anga i teianei maki? Kua na ko maira aia, Mei tona mea ngiti anga mai:

22 Kua manganui akenei te uri angaia ki roto i te ai, e ki raro oki i te vai, kia mate atu aia; e kia tika ia koe kia rave, e aroa mai koe ia matou, e e tauturu mai.

23 Kua karanga aturā Iesu kiaia, Kia tika ia koe kia akarongo ra, e tika te au mea katoa nei i te tangata akarongo ra.

24 Kua kapiki ua maira te metua tane o taua tamaiti ra i reira ra, na ko maira, ma te roimata katoa ra, E te Atu, kua akarongo au; ka tauturu mai koe i toku nei akarongo mea ngiti.

25 E kia akara aturā Iesu i te tangata i te oro ua anga mai, kua kauvae atura aia i taua vaerua viivii ra, na ko atura, E tera ra vaerua murare e te turi, e aere koe ki vao, te akaue atu nei au ia koe, auraka e tomo akaou ki roto iaia.

26 Kua kapiki ua maira taua demoni ra, kua aae nui maira iaia, e kua aere maira ki vao: tu tangata mate atura to taua tamaiti ra; e manganui te karanga e, Kua mate rava.

27 Kua rave iorā Iesu i tona rima, akatu akera iaia; e kua tu ua maira aia ki runga.

28 E tae maira aia ki roto i te are, kua ui poiri maira tana au pipi kiaia, Eaa i kore ei i tika ia matou nei kia tuaru atu iaia ki vao?

29 Kua tuatua maira aia, Kare teianei tu demoni e tae ua ki vao, mari ra i te pure e te akakoreanga kai.

30 Akaruke iora ratou i taua ngai ra, aere atura na Galilea: te inangaro ra oki aia e, auraka rava tetai tangata kia kite.

31 Te apii ra oki aia i tana au pipi, na ko atura kia ratou, E tukuia te Tamaiti a te tangata nei i te rima tangata, e e ta takiri ratou iaia, e kia oti i te ta, e tu akaou aia ki runga i te po toru.

32 Kare ra ratou i kite i taua tuatua ra, e mataku oki kia ui atu iaia.

33 E tae atura aia i Kaperenauma, kua ui atura aia kia ratou i roto i tetai are, I tauetono ana kotou i te aa i te arataa ra?

34 Muteki ua iora ratou; i tauetono ana oki ratou ratou uaorai i te arataa, i te ka maata ia ratou.

35 Noo iora aia ki raro, kua karanga atura ki te tino ngauru ma rua ra, na ko atura ia ratou, Ko te tangata i anoano e, ei mua aia, ei akaopenga rava aia e tikaʼi, e ei tavini no ratou ravarai.

36 Kua rave atura aia i tetai tamaiti iti, kua tuku atura i rotopu ia ratou, kua ikiiki iora, na ko atura ia ratou,

37 Ko te kite mai i tetai tamaiti iti mei teianei, no toku nei ingoa, kua kite mai aia iaku; e ko te kite mai iaku ra, kare ïa ko au anake tana i kite maira, koia ra, ko tei tono mai iaku nei.

38 Kua tuatua mairā Ioane kiaia, na ko maira, E te Orometua, i akara atura matou i tetai tangata i te tuaru anga i te demoni i toou na ingoa, e kare i aru mai ia tatou nei: kua karanga atura matou kiaia, Auraka, no te mea, kare aia i aru mai ia tatou nei.

39 Kua karanga aturā Iesu, Auraka te reira e akakoreia atu; kare rava e tangata e rave i te akairo i toku nei ingoa, e akakino vave mai iaku.

40 Ko tei kore oki e patoi maira, no tatou ïa.

41 Ko tei oronga mai oki i tetai kapu vai e inu na kotou no toku nei ingoa, no te mea, no te Mesia kotou, koia mou taku e karanga atu kia kotou na, kare aia e ngere i tana tutaki.

42 Kareka tei akatarevake i tetai o teianei au tangata rikiriki e akarongo mai iaku nei, e ngari ake aia, kia riia tetai toka tavirianga ki runga i tona kaki, e kia titiriia ki raro i te tai.

43 E te apa ra koe i to rima ra, ka tipu ke atu: e meitaki koe i te rima okotai kia tae ki te ao ra, i te rima rua kia tae ki te po, ki roto i te ai mate kore:

44 I te ngai e kore e mate to ratou tunga, e to ratou ai oki kare e tamateia.

45 E te apa ra koe i to vaevae ra, e tipu ke atu: e meitaki koe kia tae pirikoki ki te ao, i te vaevae rua, kia titiriia ki te po, ki roto i te ai mate kore:

46 I te ngai e kore e mate te ratou tunga, e to ratou ai oki kare e tamateia.

47 E te apa ra koe i to mata, koiti ke atu: e meitaki koe kia tae ma te mata okotai ki te basileia o te Atua, i te mata rua kia titiriia ki te ai i te po ra:

48 I te ngai e kore e mate to ratou tunga, e to ratou ai oki kare e tamateia.

49 E ope rava oki i te rapakauia i te ai; mei te au atinga ravarai i rapakauia i te tai.

50 E mea meitaki te tai; kia mangaro ra te tai, eaa ta kotou kia akataitai? Kia vai mairai te tai i roto ia kotou, e tamou oki i te au kotou kotou uaorai.