Pene 29

Raveanga i te Angaanga Meitaki i te Tapati Ra

KO TE tuatau tupuanga rau i te 31 T.N. E tokoiti ua nga marama i muri ake i ta Iesu tuatua anga ki te vaine i te punavai i Samaria ra iaia i aere atura mei Iudea ki Galilea.

I muri ake i tana apiianga maata takapini i Galilea ra, kua oki akaou atura a Iesu ki Iudea, e kua ako aia i roto i te au sunago. Me akaaiteia atu ki te akamanako anga i te Puka Tapu no tana angaanga i Galilea ra, e meangiti ua te akakitea maira no ta Iesu angaanga i Iudea i teia tere nei e i nga marama iaia i reira i muri ake i te Pasa tei topa ra. Penei kare tana angaanga i ariki meitakiia i Iudea mei tei raveia i Galilea ra.

Kare i roa ana kua aere atura a Iesu ki te oire maata o Iudea koia a Ierusalema, no te Pasa o te 31 T.N. I konei, e vaitata ua i te ngutupa mamoe, ko tetai vai pai, ko Beteseda te ingoa, e manganui te aronga maki, te matapo, e te pirikoki tei aere mai ana ki reira. Kua irinaki ratou e ka ora te au tangata na te aereanga ki roto i te vai pai ra e kia ngarepuia te vai ra.

E Tapati taua ra, kua akara atura a Iesu i tetai tangata i taua vai pai ra tei makiia e 38 mataiti. I tona kite anga i te roa o te maki anga o taua tangata ra, kua ui atura a Iesu: “Te anoano na koe i te ora?”

Kua tuatua maira aia kia Iesu: “E te Atu, kare ua e tangata i te tuku iaku ki raro i te vai, ngarepu te vai ra: te aere atura au, kua riro atura tetai na mua iaku.”

Kua karanga atura a Iesu kiaia: “Ka tu, ka rave i toou roi, ka aere.” Ora takiri akera taua tangata ra i reira, kua rave akera i tona roi, e kua akamata i te aere!

I te kite anga te au ngati Iuda ra i taua tangata ra, kua karanga atu ratou: “E sabati teia; kare e tau i te ture kia apai koe i to roi.”

Kua karanga atura taua tangata ra kia ratou: “Na tei akaora mai iaku, i tuatua mai kiaku e, Ka rave i toou roi, ka aere.”

“Koai ïa tangata i tuatua mai kia koe e, Ka rave i toou roi, ka aere?” ta ratou ia i ui atu. Kua tapae ke atu a Iesu ki te pae no te urupu i reira, e kare taua tangata i akaoraia ra i kite i te ingoa o Iesu. Inara, i muri akera, kua aravei a Iesu raua ko taua tangata ra i te iero, e kua kite taua tangata ra e naai i akaora iaia.

E kua aere atura taua tangata i akaoraia ra ki te au ngati Iuda ra e akakite kia ratou e na Iesu i akaora iaia kia meitaki. I te kiteanga i te reira, kua aere atura te au ngati Iuda ra kia Iesu. Eaa te tumu? Kia kite e na teaa i raukai iaia i te rave i te reira au mea umere? Kare. Mari ra e akaapa iaia no tona raveanga meitaki i taua au mea ra i te Tapati. E kua akamata ratou i te takinga kino iaia! Luka 4:44; Ioane 5:​1-16.

▪ Vaitata eaa te roa mei to Iesu aere anga openga ki Iudea ra?

▪ Eaa i rongonui meitakiiaʼi te vai pai tei karangaia ra e ko Beteseda?

▪ Eaa te semeio ta Iesu i rave i te vai pai ra, e eaa te tu manako o te au ngati Iuda no te reira?