Kia Matakite i te Au Peroveta Pikikaa!
TE AKAANGAROI ra tetai nga tokorua Paratiri i te po kua akarongo raua i te au kekeia i te tomoanga mai ki roto i to raua are. Kua rauka i nga tokorua mataku i te oro atu na roto i te maramarama o te pia moe e kua tereponi atu i te akava. Inara i muri ake kua rikarika tikai te vaine no teia kite anga kare rava aia i rauka ana i te moe i roto i te are e kua aere atu ki te kainga o tona mama.
Tetai ua atu tangata tei tomoia tona are me kare tei keiaia mei tetai tu ra ka tangi ia atu aia. Ka riro teia tu kite anga ei mea matakuia, e te tangi tikai e, e maata ua atu te au tangata te mamae ra i teia tu. Inara te vaira tetai tu keia tei kino rava atu i te tupuanga.
Eaa ra teia tu keia kino tikai, e koai ma te aronga keia? Kua oronga mai a Iesu Karaiti i etai akakite anga tuatua no runga i teia te tuatuaanga aia no runga i to tatou tuatau, kua karanga aia: “E tu mai oki ki runga te peroveta pikikaa e manganui, e manganui te ka vare ia ratou.” (Mataio 24:11) E kekeia te au Peroveta Pikikaa. Mei teaa te tu? Eaa ta ratou e keia ra? Te piri atura ta ratou keiaanga ki ta ratou totouanga. No reira e raukaʼi te marama i teia tikai, ka anoano tatou na mua i te kite e eaa te totouanga i tau ki te Puka Tapu.
Eaa te Aite Anga Kia Akakite
Me manako koe no runga i te totouanga, penei te mea mua ta tatou ka manako ko te akakiteanga i te tuatau ki mua. Kua riro tikai teia ei tuanga angaanga na te au peroveta a te Atua i taito ra, inara kare te reira i te angaanga puapinga rava atu ia na ratou. Ei akaraanga, i roto i tetai orama kua akakiteia te peroveta a Ezekiela kia “totou ki te aʼo,” kia oronga i tetai akauenga no ko mai i te Atua. (Ezekiela 37:9, 10) I te akava angaia a Iesu i mua i te au taunga, kua tutuaia aia e kua papakiia, e kua karanga te aronga takinga kino iaia e: “E akakite mai na, e te Mesia e, i tei papaki ia koe na.” Kare ratou i pati ia Iesu kia akakite mai i te tuatau ki mua. Kua akaao atu ratou iaia kia akataka mai na roto i te ririnui o te Atua e koai ma tei rutu atu iaia.—Mataio 26:67, 68.
Te tika ra, te manako tikai tei orongaia mai e te au tuatua o te reo Puka Tapu mua tei uriia “akakite” me kare “totou” ko te akakite atu i to te Atua manako no runga i teia mea me kare, mei ta te puka a Angaanga e tuatua ra, kia akakite i “te peu taka ke a te Atua.” (Angaanga 2:11) Koia oki i teia tu ra e e manganui te au tangata te keiaia ra e te au peroveta pikikaa.
Koai ra te au peroveta pikikaa, e eaa ta ratou e keia ra? Ei pau i teia uianga, ka akara ana tatou ki muri i te tuatua enua o te iti tangata Iseraela i te tuatau o Ieremia.