E Tamou Tikai i te Tu Rangatira mei te Atua Maira!
“E tamou tikai kotou i te rangatira ta te Mesia i akarangatira mai ia tatou nei, e auraka e ii akaou i te zugo tuikaa ra.”—GALATIA 5:1.
1, 2. I akapeea i kore ei te tu rangatira mei te Atua maira?
E RANGATIRA tikai te au tangata o Iehova. Inara kare ratou e kimi kia takake mei te Atua, no te mea ka riro te reira ei tuikaa anga kia Satani. Te akaperepere ra ratou i to ratou pirianga vaitata ma Iehova e te rekareka ra i te tu rangatira tana e oronga maira no ratou.
2 Kua ngere to tatou nga metua mua ra koia a Adamu raua ko Eva i te tu rangatira mei te Atua maira i te araanga e te riroanga ei tuikaa no te ara, te mate, e te Tiaporo oki. (Genese 3:1-19; Roma 5:12) No teaa ra, kua tuku a Satani i te ao katoa ki runga i te mataara no te ara ki te akapouanga! Inara ko te aronga tamou tikai i te tu rangatira mei te Atua maira ka aaere na te mataara ki te ora mutu kore.—Mataio 7:13, 14; 1 Ioane 5:19.
Tu Rangatira Mei te Tuikaa Anga Mai
3. Eaa te manakonakoanga ta te Atua i akakite mai ra i Edene?
3 Kua akakoro a Iehova e ko te au tangata te ka akangateitei i tona ingoa ka matara mai mei te tuikaa anga kia Satani, te ara, e te mate katoa. Kua akamouia mai te reira manakonakoanga i ta te Atua tuatua anga ki te ovi ta Satani i taangaanga i Edene ra: “Ka tuku oki au i te ke ia korua ko te vaine, e to uanga e tona uanga; nana e akaparuparu i to mimiti, e naau e akaparuparu i tona pooavae.” (Genese 3:14, 15) Ko Iesu Karaiti, te Uanga mei ko mai i te akaaerenga a Iehova i te rangi ra, kua mamae aia i te akaparuparu angaia tona pooavae i tona mate anga ki runga i te rakau, inara kua orongaia mai e te Atua tetai atinga oko ei tatara mai i te au tangata akarongo mei te ara e te mate oki. (Mataio 20:28; Ioane 3:16) A muri iora, ka akaparuparu a Iesu i te mimiti o Satani, koia te ovi taito ra.—Apokalupo 12:9.
4. Eaa te tu rangatira i rekarekaia Aberahama, e eaa ta Iehova i taputou atu kiaia?
4 I etai 2,000 mataiti i muri mai i te totou i orongaia ra i Edene, kua akarongo atura i te Atua te ‘oa o Iehova’ koia a Aberahama e kua akaruke aia i te oire o Ura no tetai atu ngai ke. (Iakobo 2:23; Ebera 11:8) E kua rauka iaia te tu rangatira mei te Atua maira e kua kore atura aia e noo ei tuikaa no te ao o Satani ma te akonoanga pikikaa, te au poritiki viivii, e te aronga okooko noinoi katoa ra. Kua kapitiia atura e te Atua ki te totou i Edene ra e ka akameitaki te pa enua katoa o te ao nei ia ratou uaorai na roto ia Aberahama e tona Uanga. (Genese 12:3; 22: 17, 18) Kua matara a Aberahama i te akaapa anga no te mea ‘kua akarongo atura aia ia Iehova, ko tei akono ra i te reira kiaia ei tuatua-tika nana.’ (Genese 15:6) Mei te reira katoa oki i teia tuatau nei ka apai mai te pirianga vaitata kia Iehova i te tu rangatira mei te Atua maira mei te akaapa anga e mei te tuikaa anga ki te ao te vai nei i roto i te mana o Satani.
Tetai Nuku Akamouanga Tei Akatutuia Maira
5. Eaa te au tu i kapitiia atu ki te anau anga a Isaaka ra?
5 Kia raukai tetai uanga no Aberahama, kua oronga tana vaine pa ra, ko Sara, i tona tamaine tavini kiaia, ko Hagara, ei anau mai i tetai tamaiti. Na roto mai iaia kua riro a Aberahama ei metua no Isemaela, inara kare te Atua i iki iaia ei te Uanga taputouia ra. Mari ra, i to Aberahama tae anga kia 100 mataiti e e 90 a Sara, kua oronga a Iehova i te tika kia anauia mai tetai tamaiti na raua e kua tapaia ko Isaaka. I te aviri anga a Isemaela ia Isaaka, kua tonokia a Hagara raua ko tana tamaiti kia aere ke atu, kua akarukeia mai ko ta Aberahama tamaiti na te vaine rangatira ra na Sara ei te uanga tikai o Aberahama kare e akaapaia. Mei ia Aberahama rai, kua akono katoa a Isaaka i te akarongo e kua rekareka i te tu rangatira mei te Atua maira.—Genese 16:1-16; 21:1-21; 25:5-11.
6, 7. Eaa ta etai aronga apii pikikaa i apii kia irinakiia e tetai papaki o te au Kerititiano i Galatia ra, inara eaa ta Paulo i akataka atu?
6 Kua akaataia mai e teia au tupuanga etai apinga puapinga maata no te aronga inangaro i te tu rangatira mei te Atua maira. Kua taikuia mai teia i tei tataia e te apotetoro ko Paulo ki te au putuputuanga o Galatia i vaitata i te 50 ki te 52 T.N. I tera tuatau kua oti te tuku anga tika a te pupu akaaere e kare e umuumuia te peritome anga no te au Kerititiano. Inara kua manono te aronga apii pikikaa i tetai papaki o to Galatia e e tuanga maata ia no te akonoanga Kerititiano.
7 Kua akakite a Paulo ki to Galatia e: Ka akatikaia tetai peretana i te akarongo ia Karaiti, kare na te angaanga a te Ture a Mose. (Galatia 1:1–3:14) Kare te Ture i akakore i te totou tei kapitiia ra ma te koreromotu kia Aberahama mari ra kua akakite mai i te au apa e kua rave ei puapii ei arataki atu kia Karaiti. (Galatia 3:15-25) Na tona matenga kua tatara maira Iesu i te aronga i raro ake i te Ture, kia riro ratou ei tamariki na te Atua. E no reira, ko te oki akaou anga ki tetai akanoonoo anga no te akono au ra, au marama, au tuatau, e te au mataiti ka riro te aite anga e te oki akaou ra ki te tuikaa anga. (Galatia 4:1-20) Kua tata a Paulo i reira:
8, 9. (a) I roto i taau au tuatua uaorai, e akataka poto ua mai eaa ta Paulo i akakite maira ia Galatia 4:21-26. (e) I teia nuku akatutu anga, koia, e eaa oki tei akatutuia mai e Aberahama e e Sara oki, e koai te Uanga tei totouia maira?
8 “Akakite mai kiaku, kotou tei inangaro i ta te ture, Kare ainei kotou e akarongo ana i te Ture? Ei akaraanga, kua oti i te tataia e, toko rua a Aberahama tamariki tamaroa, ko [Isemaela] tetai na te vaine tuikaa [na Hagara] e ko [Isaaka] tetai na te vaine rangatira [na Sara]; ko ta te vaine tuikaa ra i anauia mai ia i ta te kopapa akonoanga, ko ta te vaine rangatira ra na roto ia i tetai taputou. Ko eianei mea e nuku akatutu anga ia; no te mea ko eia nga vaine nei e rua koreromotu to raua aiteanga, ko tetai [ko te Ture koreromotu] mei Maunga Sinai maira [te ngai i akamanaiaʼi e te Atua taua koreromotu ma to Iseraela ra], nana i anau mai te au tamariki no te tuikaa, e ko Hagara ia. [Ko tetai atu koreromotu ko tei akonoia ma Aberahama no runga i tona Uanga.] I teianei ko Hagara ko Sinai ia, e maunga i Arabia, e koia tei akatutu maira i te Ierusalema o teia tuatau nei, no te mea e tuikaa aia ma tana tamariki [koia te anaunga a Aberahama, a Isaaka, e Iakoba ra]. Inara ko te Ierusalema i runga ra e rangatira ia, e koia to tatou metua vaine.”—Galatia 4:21-26, NW.
9 I teia nuku akatutu anga, e akatutu anga a Aberahama no Iehova. Ko “te vaine rangatira,” ko Sara, e akatutu aia no ta te Atua “vaine,” me kare akaaerenga tapu no te ao katoa e pini ua ake. Na te reira i anau mai ia Karaiti, koia te Uanga o taua vaine akatutuia ra e to te Aberahama Maata atura. (Galatia 3:16) E i akakite ki te au tangata i te mataara no te matara mai anga i te akamori viivii, te ara, e ia Satani oki, kua apii a Iesu i te tuatua mou e kua akaapa atea i te akonoanga pikikaa, inara kua vai atura a Ierusalema e tana tamariki ki roto i te tuikaa anga a te akonoanga no te mea kua kopae ke ratou iaia. (Mataio 23:37, 38) Kua matara mai ta Iesu au pipi ngati Iuda ra i te Ture, tei akakite ra i to ratou tuikaa anga ki te tu apa ua, te ara, e te mate oki. E tu rangatira tikai to te au tangata ravarai tei ariki ia Iesu e koia Tei anauia mai e te “vaine” a te Atua ra kia riro ei Ariki Mesia e Tei tatara maira ‘na te tutu aere anga i te ora ki te aronga tuikaa ra’!—Isaia 61:1, 2; Luka 4:18, 19.
E Kopae ke i te Tuko Tuikaa
10, 11. No raro mai i teea tuko tuikaa ta Karaiti tatara anga i tana au pipi, e eaa te au tu aiteite te ka rauka kia akamanakoia i teia tuatau nei?
10 Ki te aronga no te uanga o Aberahama kapiti katoa ia Karaiti, koia te Isaaka Maata ra, kua tuatua a Paulo: Te “Ierusalema i runga ra, ko te vaine rangatira ra ïa, ko to tatou ravarai ïa metua vaine. . . . E te au taeake ra, e tamariki tatou no tei tuatuaia maira, mei ia Isaaka katoa ra te tu. E mei iaia oki ko tei anau mai i ta te kopapa nei akonoanga [a Isemaela], i takinga-kino atu iaia i tei anau mai i ta te Vaerua ra [a Isaaka], koia katoa i teianei. . . . Kare tatou te tamariki na te vaine tuikaa, na te vaine rangatira ra. E tenana, e tamou tikai kotou i te rangatira [i te Ture] ta te Mesia i akarangatira mai ia tatou nei, e auraka e ii akaou i te zugo tuikaa ra.”—Galatia 4:26–5:1.
11 Me kua kauraro tetai ua atu pipi a Iesu i te Ture, kua ii atu ki roto i te tuko tuikaa i reira. Ko te akonoanga pikikaa i teianei e tuko tuikaa ia, e ko Kerititome te aiteite atura kia Ierusalema i taito ra e tana tamariki katoa. Inara ko tei akatainuia ra e tamariki anake ratou na Ierusalema i runga ra, koia ta te Atua ra akaaerenga rangatira i te rangi. Ko ratou e to ratou au taeake akarongo ra ma te manakonakoanga no te enua nei kare i te tuanga no teianei ao e kare e tuikaa anga kia Satani. (Ioane 14:30; 15:19; 17:14, 16) I te mea kua tataraia mai e te tuatua mou e te atinga oki o Iesu, kia tamou tikai tatou no to tatou tu rangatira mei te Atua maira.
Tamouanga i te Tu Rangatira Mei te Atua Maira
12. Eaa te mataara te akonoia nei e te aronga akarongo, e eaa te ka uriuri manakoia i teianei?
12 E au mirioni ua atu i teianei te rekareka ra i te tu rangatira mou ei Au Kite no Iehova. Te raveia ra te au apiianga Puka Tapu ma etai aronga e mirioni ua atu, e manganui io ratou “kua tau no te ora mutu kore.” I te riroanga ei aronga akarongo, ka rave ratou kia papa no te tu rangatira mei te Atua maira na te papetito angaia. (Angaanga 13:48, NW; Angaanga 18:8) Inara eaa te au takainga tau kia raveia i mua ake i te papetitoanga?
13. Eaa te pirianga o te reira i rotopu te kite e te papetito anga?
13 I mua ake ka papetitoiaʼi, ka tau ra tetai kia kimi e kia rave i te kite mou tikai i te au Tuatua Tapu. (Ephesia 4:13) E no reira, kua akaue atura Iesu i tana au pipi: “Ka aere . . . e akariro i to te pa enua katoa ei pipi, ka bapetizo atu ei ia ratou i te ingoa o te Metua, e no te Tamaiti, e no te Vaerua Tapu; Ma te apii atu ia ratou, kia akono i te au mea katoa taku i akaue atu kia kotou.”—Mataio 28:19, 20.
14. Eaa te kite anga te umuumuia ra no te papetitoia anga i te ingoa o te Metua, te Tamaiti, e to te vaerua tapu katoa oki?
14 Ko te aite anga o te papetitoia i te ingoa o te Metua kia akatika i to Iehova ra taoonga e tona mana ei Atua, e Tei Anga mei, e Tei Ngateitei i te Ao Katoa e pini ua ake. (Genese 17:1; 2 Ariki 19:15; Apokalupo 4:11) Ko te papetito anga i te ingoa o te Tamaiti te anoanoia ra te kite ei ariki anga i te taoonga e te mana o Karaiti ei mea ora vaerua tei akateiteiia, koia te Ariki Mesia, e na roto iaia ra ta te Atua oronga anga i “te oko tau.” (1 Timoteo 2:5, 6, NW; Daniela 7:13, 14; Philipi 2:9-11) Ko te tangata tei papetitoia i te ingoa o te vaerua tapu kua kite aia e ko te mana rave angaanga ia o te Atua ko ta Iehova i taangaanga i te anga mai anga e i te akauruanga i te aronga tata Puka, e pera katoa oki i etai atu au tu ke ra. (Genese 1:2; 2 Petero 1:21) Inara, e maata roa atu te vaira no te apii kia kite no runga i te Atua, e Karaiti, e te vaerua tapu.
15. Eaa i tau ei tetai tangata kia akono i te akarongo i mua ake i tona papetito angaia?
15 I mua ake i te papetito angaia, ka tau te tangata kia akono i te akarongo tei akatumuia ki runga i te kite mou tikai. “Kare e akarongo ra kare rava [a Iehova] e mareka meitaki mai.” (Ebera 11:6, NW) Ko tetai tangata te akono ra i te akarongo i te Atua, ia Karaiti, e te akakoroanga a te Atua ra ka anoanoia kia rave aia ei tetai o te Au Kite o Iehova, ma te akonoanga kia rotai ki te Tuatua a te Atua e te raveanga i tetai tuanga puapinga tikai i te tutuanga i te tuatua meitaki. Ka tuatua ra aia i te kaka o to Iehova ra arikianga.—Salamo 145:10-13; Mataio 24:14.
16. Eaa te tataraara, e akapeea tona pirianga ki te papetitoanga Kerititiano?
16 Ko te tataraara tetai apinga ka anoanoia i mua ake ka papetitoiaʼi. Ko te aite anga o te tataraara kia “taui tetai i tona manako no runga i te angaanga kua topa, me kare tu akono, no te mii me kare mareka kore anga,” e penei kia “manako mii, kia rikarika, me kare kia ngakau mamae no tana i rave, e penei no tei kore i raveia.” Kua anoanoia te aronga ngati Iuda o te anere mataiti mua ra kia tataraara i ta ratou au ara i rave kia Iesu Karaiti. (Angaanga 3:11-26) Kua tataraara tetai papaki o te aronga akarongo i Korinetia no te kanga akaturi, te akamori itoro, te akaturi, te rave totoma, te keia, te noinoi apinga, te kona kava, te akakinoanga, e te morimori apinga. No te reira tu kua ‘oreiia ratou kia ma’ i te toto o Iesu, kua “akatapuia” ei aronga akatakaia no ta Iehova angaanga, e kua ‘akatikaia ei aronga tuatua-tika’ i te ingoa o Iesu Karaiti e ma te vaerua o te Atua ra. (1 Korinetia 6:9-11) E no reira e takainga te tataraara e raukai te akara ngakau meitaki e te tu rangatira mei te Atua maira kia kore te akaapaanga a te ara.—1 Petero 3:21.
17. Eaa te aite anga o te ariu mai anga, e eaa te umuumuia ra e te reira no tetai te akapapa ra kia papetitoia aia?
17 E mea tau katoa oki kia tupu te ariu mai anga i mua ake ka papetitoiaʼi tetai ei Kite no Iehova. Ka raveia te ariu mai anga o tetai tei tataraara i muri ake i tona kopae ke anga i tona mataara tarevake e kua manako papu kia rave i te tika. Te aiteanga o nga tuatua verepa Ebera e te Ereni no te ariu mai anga e “anga ke mai, e ariu mai, me kare e oki mai.” Me taikuia te reira no te tu meitaki i te pae vaerua, te akataka maira i te ariu mai anga ki te Atua mei tetai matara tarevake ra. (1 Ariki 8:33, 34) I te ariu mai anga ka umuumuia te akono i “te au angaanga e tau ei i te tataraara,” kia rave tatou i ta te Atua i akaue maira, akaruke atu i te akonoanga pikikaa, e ka arataki atu i to tatou ngakau kia ngaueue kore kia Iehova e kia tavini atu kiaia anake ua. (Angaanga 26:20, NW; Deuteronomi 30:2, 8, 10; 1 Samuela 7:3) Te umuumuia ra e teia kia “akangakau ou, e te vaerua ou,” kia tauiia te manakoanga, ma te turanga, e te akakoro anga oki i te oraanga. (Ezekiela 18:31) Ka taui te tangata ou te ka tupu mai, i te au ravenga tau kore i te Atua ra, ki te au tu tau i te Atua ra. (Kolosa 3:5-14) Ae, ka akariro te tataraara mou tikai kia “ariu mai” tetai.—Angaanga 3:19.
18. Eaa i tau ei kia rave i te akatapuanga ki te Atua na roto i te pure, e eaa te tumu maata o te reira takainga ra?
18 Ka tau te akatapuanga ki te Atua na roto i te pure i mua ake ka papetitoiaʼi. (Akaaiteia atu kia Luka 3:21, 22.) Te aite anga o te akatapuanga e akataka ke anga no tetai akakoroanga tapu. No te puapinga maata o teia takainga ka tika roa tatou kia akakite atu ki te Atua na roto i te pure i ta tatou ikianga kia oronga kiaia anake ua i to tatou ngakau katoa e kia tavini kiaia e tuatau ua atu. (Deuteronomi 5:8, 9; 1 Paraleipomeno 29:10-13) Inara, kare ta tatou akatapuanga e ki tetai angaanga mari ra ki te Atua uaorai. Kua akataka meitakiia mai te reira i te tanumanga o te peretiteni mua o te Totaiete Punanga Tiaki, koia a Charles Taze Russell. I taua atianga ra i te 1916, kua akakiteia mai e W. E. Van Amburgh te tekeretere akono i te moni a te Totaiete e: “Ko teia angaanga maata i te ao katoa nei kare ia i te angaanga na tetai tangata ua nei. E maata roa te reira na te tangata. Na te Atua teia angaanga e kare te reira e tauiia. E manganui ta te Atua ra au tavini i taangaanga i te tuatau kua topa e kare e ekoko anga ka taangaanga Aia e manganui katoa i te tuatau ki mua. Kare to tatou akataka anga [akatapuanga] e ki tetai tangata, me kare angaanga na tetai tangata, mari ra kia rave i te anoano o te Atua, e Nana e akakite mai i te reira kia tatou na roto i Tana Tuatua e te aratakianga takinga meitaki. Te vaira ko te Atua te akatere ra.” Inara eaa atu te vaira kia raveia no runga i te akatapuanga ki te Atua?
19. (a) Akapeea te akakite anga ki te au tangata a te aronga tataki tai i te akatapuanga kia Iehova? (e) Eaa te akatutuia maira e te papetito anga i te vai?
19 Te akakiteateaia maira te akatapuanga kia Iehova a tetai tangata me ka papetitoia aia. Te akatutu maira te papetito anga i te akakiteanga e ko te tangata te tarukuia ra ki roto i te vai kua oti iaia i te rave i te akatapuanga arairai koreia ki te Atua ko Iehova na roto ia Iesu Karaiti. (Akaaiteia atu kia Mataio 16:24.) Kia tanumia te tangata papetitoia ra ki raro i te vai e ka taakiia mai ki runga mei reira, kua akatutu aia i tona mate anga ki tona tu mua i tona oraanga e kua akatuia mai ki tetai mataara ou no te oraanga, kia rave tapupu kore i teia nei te anoano o te Atua ra. (Akaaiteia atu kia Roma 6:4-6.) I to Iesu papetito angaia ra, kua oronga aia iaia uaorai ki tona Metua i te rangi ra na roto i te mataara tapupu koreia. (Mataio 3:13-17) E te akaari putuputuia maira i te au Tuatua Tapu e e mea tika no te aronga akarongo tau kia papetitoia ratou. (Angaanga 8:13; 16:27-34; 18:8) No reira kia riro mai, ei tetai o te Au Kite o Iehova i teia tuatau nei, ka tau rai tetai tangata ei tangata akarongo tei akono tikai i te akarongo e kia papetitoia.—Akaaiteia atu kia Angaanga 8:26-39.
E Tamou Tikai!
20. Eaa etai akaraanga no te Puka Tapu mai e ka akameitakiia tatou no te raveanga i te tamou tikai i te tu rangatira mei te Atua maira ei Au Kite papetitoia no Iehova ra?
20 Me kua rave koe i te tamou ngaueue kore i te tu rangatira mei te Atua maira na te papetito anga ei Kite no Iehova, ka akameitaki aia ia koe mei tana i akameitaki i tona au tavini i mua ana. Ei akatauanga kua akameitakiia e Iehova a Aberahama raua ko Sara ma tetai tamaiti mataku i te Atua ra, koia a Isaaka. No te akarongo o te peroveta ko Mose i iki ei kia takinga kinoia aia ma te iti tangata o te Atua ra kare “i te rave i te navenave poto ua o te tuatua-kino ra; E apinga maata oki iaia te akakino [i te riroanga ei tutu taito no] te Mesia nei [koia Tei Akatainuia a te Atua ra], i te au taonga katoa o Aiphiti ra.” (Ebera 11:24-26) Kua rauka ia Mose te akameitaki anga kia taangaangaia e Iehova kia arataki i to Iseraela ki vao i te tuikaa anga ki to Aiphiti ra. Pera katoa oki, i te mea i tavini tiratiratu aia ki te Atua, ka akatuakaouia mai aia kia tavini ei tetai o te “au tamaiti ariki i te enua katoa nei” i raro ake i Mose Maata, koia a Iesu Karaiti.—Salamo 45:16, NW; Deuteronomi 18:17-19.
21. Eaa etai akaraanga akamaroiroi te orongaia maira no te au vaine akono i te Atua i te tuatau taito ra?
21 Ka akamaroiroi katoaia oki te au Kerititiano akatapuia na te akamanakoanga i te au vaine tei riro maira kia rangatira tikai e kia rekareka. I rotopu ia ratou ko te vaine Moabi ko Ruta, i kite aia i te mamae ngakau no te tu takaua e pera katoa te rekareka no te tu rangatira mei te Atua maira i te atea ke mai anga i te akonoanga pikikaa. I te akaruke anga i tona iti tangata e tona au atua katoa, kua piri atu aia ki tona metua vaine ongai tei takauaia ra, koia a Naomi. “I te ngai taau e aere ra, e aere katoa ïa au,” ta Ruta i tuatua, “e te ngai taau e noo ra, e noo katoa ïa au ko toou iti-tangata, ko toku katoa ïa iti tangata; e toou ra Atua, ko toku ïa Atua.” (Ruta 1:16) Ei vaine na Boaza, kua riro mai a Ruta ei metua vaine no te tupuna tane o Obeda ra. (Ruta 4:13-17) Kua oronga a Iehova ki teia vaine taakaaka kare nei i to Iseraela, i te “tutaki maata” na te akatikaanga iaia kia riro mai ei tupuna vaine no Iesu te Mesia ra! (Ruta 2:12) Mei teaa ra te rekareka ia Ruta a tona tuakaou anga e ka kite e iaia taua tuanga meitaki ra! Mei te reira katoa te rekareka te ka akaki i nga ngakau o te vaine akaturi ra koia a Rahaba, tei tataraia maira i te rave akaturi e te akamori pikikaa, pera katoa oki te vaine i rave i te tarevake ra koia a Bate-Seba mari ra kua tataraara, me akatuakaouia mai no te mea ka kite katoa raua e i akatika ua a Iehova kia riro raua ei nga tupuna vaine no Iesu Karaiti.—Mataio 1:1-6, 16.
22. Eaa te ka uriuri manakoia i te tumu tuatua te ka aru mai?
22 Ka rauka kia aere ua atu te akamanako anga no te aronga i rauka ia ratou te tu rangatira mei te Atua maira. Ei akaraanga, te kapitiia ra ki to ratou numero te au tane e te au vaine akarongo tei taikuia ra ia Ebera pene 11. Kua mamae ratou i te au mate e te takinga kino anga, “kare oki teinaei ao i tau i taua aronga ra.” Kapitiia atu kia ratou ra te au pipi tiratiratu a Karaiti o te anere mataiti mua ra e etai atu aronga tiratiratu mei reira mai e nei, kapiti katoaia te aronga e au mirioni ua atu i teianei te tavini ra ia Iehova ei Au Kite nona. Mei ta tatou ka kite i muri akenei, me ko koe tetai kua rave tamou tikai ma ratou katoa ra i te tu rangatira mei te Atua maira, e manganui ua atu taau au tumu no te rekareka anga.
Akapeea Koe Me Pau?
◻ Eaa te manakonako anga ta te Atua ra i oronga mai i te kore anga te tu rangatira mei te Atua maira?
◻ Mei raro mai i teea “zugo tuikaa” ta Karaiti i tatara maira i tana au pipi?
◻ Eaa te au takainga te raveia ra i mua ake ka papetitoiaʼi ei Kite no Iehova?
◻ Eaa te au akaraanga no te Tuatua Tapu te akapapu maira e ka akameitakiia tatou no te tamou tikai i te tu rangatira mei te Atua maira?
[Tutu i te kapi 16]
Kua kite ainei koe eaa te au takainga na mua ake i te papetito angaia ei Kite no Iehova ra?