Apai Mai te Tu Rangatira mei te Atua Maira i te Rekareka
“Ko te rekareka no Iehova ra ko to kotou punanga ketaketa ia.”—NEHEMIA 8:10, NW.
1. Eaa te rekareka, e eaa ka tupu ei te reira ki te aronga tei akatapuia ra ki te Atua?
TE AKAKI ra a Iehova i te au ngakau o tona au tangata i te rekareka. Ko teia tu o te mataora maata me kare rekareka anga e tupu anga mai ia no te merengo anga me kare te manakonako anga i te meitaki. Ka tupu ra te reira tu manako ngakau ki te au tangata akatapuia ki te Atua ra no te mea ko te rekareka e ua ia no tona vaerua tapu, me kare mana rave angaanga. (Galatia 5:22, 23) No reira noatu e ka rokoia tatou e etai timataanga manamanata, ka rauka rai ia tatou te rekareka ei au tavini no Iehova tei aratakiia e tona vaerua ra.
2. Eaa ra te au ngati Iuda i rekarekaʼi i tetai atianga takake i to Ezera tuatau ra?
2 I tetai atianga takake i te rima anere mataiti M.T.N., kua akono te au ngati Iuda ra i to ratou tu rangatira mei te Atua maira i te akono i tetai Oroa Patia anga Puakapa i Ierusalema. I muri ake i ta Ezera ratou ko etai atu ngati Levi ra tatau anga e te akataka anga i te Ture a te Atua kia ratou, “kua aere atura te au tangata ravarai e kai e te inu e te tuku atu i te au tuanga e te rave ua atu i te rekarekaanga maata, no te mea kua marama ratou i te au tuatua tei akakiteia kia ratou.”—Nehemia 8:5-12, NW.
Te Rekareka o Iehova ra to Tatou Punanga Ketaketa ia
3. I raro ake i teea au turanga ka riro ei “te rekareka o Iehova ra” ei punanga ketaketa no tatou?
3 I taua oroa ra, kua kite te au ngati Iuda i te tika o te au tuatua ra: “Ko te rekareka no Iehova ra ko to kotou punanga ketaketa ia.” (Nehemia 8:10, NW) Ko teia rekareka katoa oki to tatou punanga ketaketa me te tamou tika ra tatou i te tu rangatira mei te Atua maira ei Au Kite akatapuia no Iehova, e kua papetitoia. E tokoiti ua o tatou nei kua kite i te akatainuanga a te vaerua tapu e te akatamariki anga ki roto i ta te Atua ra anau ei tuanga kapitiia ma Karaiti katoa ki te rangi ra. (Roma 8:15-23) Ko te maata anga o tatou i teia tuatau nei kua tu i te manakonako anga no te oraanga ki roto i te parataito i te enua nei. (Luka 23:43) Ka tau tatou kia rekareka!
4. Eaa ka raukai i te au Kerititiano i te akakoromaki i te au mamae e te takinga kino anga?
4 Noatu rai e au manakonako anga umere to tatou, kare i te mea ngoie kia akakoromaki i te au mamae e te takinga kino anga. Inara, ka rauka ia tatou te reira, no te mea na te Atua e oronga mai tona vaerua tapu kia tatou. Ma te reira ka rauka ia tatou te rekareka e te akapapu anga e kare e apinga e raukai te akakore atu i to tatou manakonako anga me kare te aroa o te Atua ra. Pera katoa oki, ka papu ia tatou e ka vai rai ko Iehova to tatou punanga ketaketa me ka tamou tatou i te aroa iaia ma to tatou ngakau katoa, te meta katoa, te ririnui katoa, e te manako oki.—Luka 10:27.
5. Eaa ta tatou ka akamanako i teianei?
5 Te rekareka nei to Iehova au tangata i te au akameitakianga maata e e manganui te au tumu no te rekareka anga. Te akakiteia maira etai tumu no te rekareka i roto i te reta a Paulo ki to Galatia. Ko etai atu te akakiteia maira i etai atu tuanga o te au Tuatua Tapu. Ka taaki te reira i to tatou au vaerua ki runga me ka uriuri manako i te reira au akameitakianga rekareka ra.
Akaperepere i te Tu Rangatira Mei te Atua Maira
6. Eaa ra Paulo i raurau ei i te au Kerititiano o Galatia kia rave tamou tikai?
6 Ei au Kerititiano, tei ia tatou te akameitakianga rekareka no te turanga arikiia ma te Atua ra. I te mea na Karaiti i tatara mai i tana au pipi mei te Ture a Mose ra, kua raurauia to Galatia kia tamou tikai e auraka e ii akaou atu ki taua “tuko tuikaa ra.” Akapeea tatou nei? Me ka tamata tatou kia riro na te akonoanga i te Ture e akatika ia tatou ei aronga tuatua tika, ka akatakakeia tatou ia Karaiti i reira. Inara, na te tauturu anga a te vaerua o te Atua, ka tapapa atu tatou i te tuatua tika tei manakonakoia na te akarongo tei akonoia na roto i te aroa, kare na te peritome anga kopapa me kare etai atu au angaanga ke a te Ture ra.—Galatia 5:1-6, NW.
7. Eaa te manako tau no tatou no te angaanga tapu kia Iehova?
7 E akameitakianga tikai te akono i to tatou tu rangatira mei te Atua maira kia “tavini ia Iehova ma te rekareka.” (Salamo 100:2, NW) E tika, e angaanga te reira kare e rauka kia akaaiteia atu kia rave i te angaanga tapu kia “Iehova te Atua Mana katoatoa,” te “Ariki mutu kore” tikai ra! (Apokalupo 15:3, NW) Me takauri mai te au ngaru no te au manako taakaaka ia koe uaorai ki rungao ia koe na, penei e tauturu tau kia kite e na te Atua i akavaitata atu ia koe kiaia uaorai na roto ia Iesu Karaiti e kua orongaia mai kia koe tetai tuanga i “te angaanga tapu o te tuatua meitaki o te Atua ra.” (Roma 15:16, NW; Ioane 6:44; 14:6) E au tumu tikai no te rekareka e te akameitaki ki te Atua ra!
8. No runga ia Babulonia Maata, eaa te tumu tau no te au tangata o te Atua kia rekareka?
8 Ko tetai atu tumu no te rekareka ko to tatou tu rangatira mei te Atua maira kia matara mai meia Babulonia Maata, koia te patireia akonoanga atua pikikaa o teianei ao. (Apokalupo 18:2, 4, 5) Noatu rai e te akatutuia ra teia vaine akaturi akonoanga e “tei noo ki rungao i te au vai e manganui,” tona aiteanga “e au iti-tangata ïa, e au urupu tangata maata ïa, e au enua ïa, e au reo ke ke ïa,” kare ra aia e noo ana ki rungao te au tavini o Iehova, me kare e mana ana e te akatere na roto i te akonoanga atua ra. (Apokalupo 17:1, 15) Te rekareka nei tatou i ta te Atua ra marama umere roa, e te vaira te aronga turu ia Babulonia Maata ki roto i te poiri i te pae vaerua ra. (1 Petero 2:9) Ae, penei e rave anga ngata kia kite i etai “au mea oonu rai o te Atua ra.” (1 Korinetia 2:10) Inara na te pure no te pakari e te tauturu a te vaerua tapu e tauturu ia tatou nei kia marama i te tuatua mou o te Tuatua Tapu te ka akarangatira i te pae vaerua i te aronga tei ia ratou ra te reira.—Ioane 8:31, 32; Iakobo 1:5-8.
9. Eaa ta tatou ka tau kia rave, kia rekarekaʼi tatou i te akameitakianga no te tu rangatira tamouia te kore e piri atu ki te tarevake o te akonoanga atua?
9 Te rekareka nei tatou i te akameitakianga no te tu rangatira tamou tei akatakake maira i te tarevake o te akonoanga atua, inara e mou ei i tera matara anga, ka tau tatou kia kopae i te akonoanga akaruke i te tuatua mou. E meitaki ta to Galatia ra oroanga i te oro anga Kerititiano, inara te arairai ra tetai papaki ia ratou kia kore e akarongo i te tuatua mou. Kare te reira ravenga kino no ko mai i te Atua ra, e kua tika kia kopaeia atu. Mei te putunga opue meangiti te ka akaopue i te putunga katoa ra, ka rauka katoa i te aronga apii pikikaa me kare te irinakianga i te akonoanga akaruke i te tuatua mou kia akaviivii i te putuputuanga katoa ra. Kua inangaro a Paulo e ko te aronga akaue ra kia peritomeia e te kimi ra kia akakore i te akarongo o to Galatia ra, kare e kia peritome anakeia mari ra kia tataia ratou uaorai. E reo ketaketa tikai te reira! Inara ka tau katoa tatou kia ngaueue kore i te kopaeanga i te akonoanga akaruke i te tuatua mou kia raukai ia tatou i te tamou i to tatou tu rangatira na te Atua ra e kia takake i te tarevake o te akonoanga atua ra.—Galatia 5:7-12, NW.
Tavini Atu Tetai i Tetai ma te Aroa
10. Eaa ta tatou apainga ei tuanga no te taeake anga Kerititiano?
10 Na te tu rangatira mei te Atua maira i apai mai ia tatou ki roto i te taokotaianga ma te taeake anga aroa, inara ka tau tatou kia akaari i te aroa ei tuanga no te reira. Kare to Galatia ra i akatikaia kia akono i to ratou tu rangatira “ei akatupu i ta te kopapa nei” me kare ei kotoe anga no te rave noinoi aroa kore ra. E tavini atu ra ratou tetai i tetai na te aroa e akakeu. (Levitiku 19:18; Ioane 13:35) Ka tau katoa tatou kia kopae i te urutoe e te makitakita te ka akatupu kia takore atu tatou tetai i tetai. Inara, kare te reira e tupu me ka akaari tatou i te aroa taeake.—Galatia 5:13-15, NW.
11. Akapeea tatou e riro ei ei akameitakianga ia etai ke ra, e akapeea ratou i te akameitaki mai ia tatou?
11 Na te akonoanga i to tatou tu rangatira mei te Atua maira kia rotai ki te au aratakianga a te vaerua o te Atua, ka akaari tatou i te aroa e ka riro ei akameitakianga kia etai ke ra. E mea tau kia riro te reira ei ravenga kia tuku ia tatou uaorai na te vaerua tapu e akatere e te arataki katoa oki. I reira kare tatou e manako aroa kore kia akamerengo i to tatou kopapa ara nei te “patoi ra i te vaerua tona inangaro.” Me na te vaerua o te Atua e arataki ia tatou, ka rave rai tatou i te aroa kare ra e na te ture i akaue mai kia rave e na te au akautunga i te aronga rave tarevake ra. Ei akatauanga, na te aroa—kare na tetai ture anake—e kore ei tatou e tuatua akakino i etai ke ra. (Levitiku 19:16) Na te aroa e akakeu ia tatou kia tuatua e kia akaari i te au ravenga meitaki. No te mea te akaari ra tatou i te ua aroa o te vaerua ra, ka akameitaki mai etai ke ia tatou, me kare ka tuatua meitaki no tatou. (Maseli 10:6) Pera katoa oki, ka riro te taokotaianga mai kia tatou ei akameitakianga ia ratou ra.—Galatia 5:16-18, NW.
Akatukeanga i te Au Ua Ra
12. Eaa etai akameitakianga te piri atura ki te kopaeanga i te tu ara o “te au angaanga a te kopapa”?
12 E manganui te au akameitakianga te kapitiia atura ki to tatou tu rangatira mei te Atua maira tei tupu mai no te kopaeanga i “te au angaanga a te kopapa” i te ara. E mea matauia no te au tangata o te Atua kia kopae ke i te apiapi maata no te kore tatou e rave i te akaturi, te viivii, e te akono tau kore. Na te kopaeanga i te akamori itoro, tei ia tatou te rekareka te tupu maira no te akamarekaanga ia Iehova no tera tu. (1 Ioane 5:21) I te mea kare tatou e rave ana i te purepure, te matara ke ra tatou i te tutara a te au temoni. Kare to tatou taeakeanga Kerititiano e akakinoia e te makitakita, te tamaki, te vareae, te riri, te karo, te pae ke, te tuatua tarevake. E kare to tatou rekareka e ngaro i te kona kava e te kariei. Kua akamatakite a Paulo e ko te aronga rave i te au angaanga a te kopapa kare rava e o ki te Patireia o te Atua. Inara, no to tatou akarongo i tana au tuatua, ka rauka ia tatou te mou i te manakonakoanga no te Patireia.—Galatia 5:19-21, NW.
13. Eaa te au ua te akatupuia ra e te vaerua tapu o Iehova?
13 Te apai maira te tu rangatira mei te Atua maira i te rekareka no tatou no te mea te akono ra te au Kerititiano i te au ua o te vaerua o Iehova. Mei te au tuatua a Paulo ki to Galatia ra, te ngoie ua ra te kitea e te aite ra te au angaanga a te kopapa ara nei ki te tataramoa te tuke anga ki te au ua meitaki o te vaerua koia te aroa, te rekareka, te au, te akakoromakianga roa, te takinga meitaki, te meitaki, te akarongo, te maru, e te akatere iaia uaorai tei akatupuia ki roto i te au ngakau akono i te Atua ra. I te anoano papu anga kia tuke te ora anga ki to te anoano o te kopapa ara nei, te inangaro nei tatou na te vaerua o te Atua e arataki e kia akono i te oraanga kia tau i te reira. Ka akariro te vaerua ia tatou kia taakaaka e kia ponuia au, “eiaa e akateitei ua, ma te akatupuanga i te emoemo anga tetai e tetai, e te vareaeanga tetai i tetai.” No reira rai i riro ei ei rekareka anga kia taokotai atu ma te aronga te akono ra i te au ua o te vaerua!—Galatia 5:22-26, NW.
Etai Atu Au Tumu no te Rekareka
14. Eaa te rakei te anoanoia ra no tatou i ta tatou kukumi anga i te au nuku vaerua kikino ra?
14 Kapiti atu ki to tatou tu rangatira i te pae vaerua mei te Atua maira te akameitakianga no te paruru anga meia Satani e te au temoni. Kia autu i ta tatou kukumi anga i te au nuku vaerua kikino, ka tau tatou kia kakau “i te rakei katoa a te Atua ra.” Ka anoano tatou i te tatua i te tuatua mou e te tapoki umauma o te tuatua tika. Kia akatamakaia to tatou vaevae i te teateamamao o te tuatua meitaki no te au. Te anoano katoaia ra te paruru o te akarongo, ei tamate i te au tao ai a te vaerua kino ra. Ka rave katoa i te pare ra o te ora ka mou ei i “te koke a te Vaerua ra,” koia te Tuatua a te Atua. Ma te rave katoa tatou i “te pure tukumoe kore, i te au pure ravarai, i te pati a te Vaerua.” (Ephesia 6:11-18) Me ka kakau tatou i te rakei vaerua e ka kopae ke atu i te au akonoanga temoni, ka rauka kia mataku kore tatou e kia rekareka oki.—Akaaiteia atu kia Angaanga 19:18-20.
15. Eaa te au akameitakianga rekareka no tatou no to tatou tu akono ia tatou uaorai kia rotai ma te Tuatua a te Atua ra?
15 E rekareka to tatou no te mea te rotai ra to tatou tu akono ma te Tuatua a te Atua, e te matara ke ra tatou i te tu apa te akakino ra i te aronga e manganui te rave ra i te tarevake. Te ‘akamaroiroi nei oki tatou kare e tukumoe, eiaa ei apa i to tatou akava ngakau i te Atua, e te tangata nei.’ (Angaanga 24:16) E no reira, kare tatou e mataku i te akautunga a te Atua te ka tupu ki te aronga rave akakoro i te ara ma te tataraara kore. (Mataio 12:22-32; Ebera 10:26-31) Na te akonoanga i te ako ia Maseli 3:21-26, ka kite tatou i te tupuanga taua au tuatua ra: “E akono i te pakari tau ra e te manako kite, e ka riro ratou ei ora ki toou ra meta e ei apinga manea ki toou ra karaponga. I te reira tu ra ka aaere koe ma te tinamou i toou ra aerenga, e kare rava toou ra vaevae e u atu ki runga i tetai mea. Tetai ua atu ngai taau ka moe ki raro ra kare koe e kite ite mataku; e ka takoto tikai koe ki raro ra, e ka riro taau ra moe ei mea marekaia. kare rava koe e mataku i tetai ua atu mea tei matakuia, kare katoa te tairipoti ki rungao i te aronga kino ra, no te mea te aere maira teia. Ka riro a Iehova uaorai, mei teia te tu, ei akapapu anga noou ra, e ka akono aia i toou ra vaevae kia kore ia e opukia.”
16. Eaa te pure i riro ei ei tumu no te rekareka, e eaa te tuanga a te vaerua o Iehova te rave nei no teia tu?
16 Ko tetai atu tumu no te rekareka ko to tatou tu rangatira ia mei te Atua maira kia akavaitata atu kia Iehova na roto i te pure ma te manako papu e ka akarongoia mai tatou. Ae, te pauia mai ra ta tatou au pure no te mea ‘e mataku tapu to tatou ia Iehova.’ (Maseli 1:7) Pera katoa oki, te tauturuia ra tatou uaorai kia vai ki roto i to te Atua ra aroa na “te pure anga ma te Vaerua Tapu.” (Iuda 20, 21) Ka rave tatou i teia na te akakiteanga i te tu ngakau marekaia mai e Iehova ra e na te pureanga i raro ake i te mana o te vaerua no te au apinga te rotai ra ki tona anoano e tana Tuatua oki, na te reira e akakite kia tatou e akapeea te pure anga e eaa tei tau kia pati atu na roto i te pure. (1 Ioane 5:13-15) Me te timata pakariia ra tatou e kare e kite eaa ta tatou ka pure, ‘ka tauturu katoa mai te vaerua i to tatou apikepike, ma te patianga no tatou ma te ngunguru kare e tika kia tuatua ra.’ Te pau maira te Atua i te reira au pure. (Roma 8:26, 27) E pure tatou no te vaerua tapu e ka tuku na te reira e akatupu ki roto ia tatou taua au ua te anoano maataia no te aravei anga i tetai tu timataanga. (Luka 11:13) Ka akatupu katoa tatou kia maata to tatou rekareka me ka apii tatou ma te pure e te maroiroi i te Tuatua akauruia e te vaerua o te Atua ra e te au puka Kerititiano tei teateamamaoia i raro ake i te arataki anga a te vaerua.
Akameitakiia ma te Tauturu te Vai Nei
17. Akapeea te au tupuanga kia Mose e te au tuatua a Davida i te akaari anga e te vai ra a Iehova ma Tona au tangata katoa?
17 Na te akonoanga tika i to tatou tu rangatira mei te Atua maira, ka rekareka tatou i te kiteanga e te vaira a Iehova ia tatou nei. I te akariro anga te au tu kino ra kia akaruke a Mose ia Aiphiti, no te akarongo kua “maroiroi rava atura aia i te akara anga atu iaia, i tei kore e kitea kia akara ra.” (Ebera 11:27) Kare a Mose i aaere ko ia anake ua; kua kite aia e te vaira a Iehova i te pae iaia. Aiteite katoa oki, kua imene nga tamariki a Kora: “Ko te Atua to tatou akapuanga e te maroiroi, e tauturu vaitata roa ïa kia rokoia e te tumatetenga: E kore ei tatou e mataku, kia keukeu te enua, e kia uriia te au maunga ki raro ki rotopu i te tai: Kia aruru te tai e tikitiki akera, kia ngaueue te au maunga i tona ngaru.” (Salamo 46:1-3) Me ko te tu ia o toou akarongo i te Atua, kare roa ia e akaruke ia koe. Kua na ko a Davida: “Akaruke ua toku metua tane e toku metua vaine iaku, ei reirā Iehova e rave mai ei iaku.” (Salamo 27:10) Mei teaa ra te rekareka i te kiteanga e te manako maata maira te Atua i tona au tavini!—1 Petero 5:6, 7.
18. Eaa te aronga e rekareka to ratou no Iehova mai i tu ei i te tu rangatira mei te Atua maira kia kore te apiapi maata ra?
18 Tei ia tatou te rekareka o Iehova ra, tei ia tatou te tu rangatira mei te Atua maira kia kore te apiapi maata. “Auraka rava kotou e apiapi i te au mea katoa nei,” ta Paulo i tuatua, “e akakite ua ra ki te Atua i to kotou anoano i te au mea katoa ra i te pure, e te pati anga atu ma te akameitaki. E na te au o te Atua, ko tei maata ua atu i te kite tangata, e akamaroiroi mai i to kotou ngakau e to katou manako i te Mesia nei ia Iesu.” (Philipi 4:6, 7) Ko te au no te Atua ra kare ona aiteanga te tu maru noatu e maata te au tu timataanga. Ma te reira ka vai maru ei to tatou ngakau—ei meitaki no tatou i te pae vaerua, te manako ngakau, e te kopapa oki. (Maseli 14:30) Ka tauturu katoa ia tatou kia tamou i te manako tau, no te mea kua kite tatou kare te Atua e tuku i tetai apinga te ka akakino ia tatou e tuatau ua atu. (Mataio 10:28) Ko teia au tei tupu mai no te pirianga vaitata ki te Atua na roto ia Karaiti, no tatou ia no te mea kua akatapuia tatou kia Iehova e kua kauraro i te arataki anga a tona vaerua, na te reira i akatupu mai i nga ua mei te rekareka e te au ra.
19. Na te tamouanga i to tatou ngakau ki runga i teaa e tauturu ia tatou kia rekareka?
19 Na te tamou anga i to tatou ngakau ki runga i te tu rangatira mei te Atua maira e te manakonako no te Patireia ka tauturu ia ia tatou kia rekareka. Ei akaraanga, i etai taime e meangiti ua te ka rauka ia tatou i te rave no te apikepike te ora kopapa, inara ka rauka ia tatou i te pure no te pakari e te maroiroi kia rauka te akakoromaki i te reira e penei ka rauka te pumaana i te manakoanga i te maroiroi i te pae vaerua te rekarekaia nei e tatou i teianei e pera katoa te au rapakau no te kopapa te ka tupu i raro ake i te tutara o te Patireia. (Salamo 41:1-3; Isaia 33:24) Noatu rai me ka akakoromaki tatou i te au tu ngata i teia tuatau nei, kare e ngere anga i te au apinga no te oraanga i te enua Parataito te vaitata mai nei. (Salamo 72:14, 16; Isaia 65:21-23) Ae, na to tatou Metua i te rangi e akamatutu mai ia tatou i teianei e i te openga nana e akaki i to tatou rekareka anga.—Salamo 145:14-21.
E Akaperepere i Toou Tu Rangatira Mei te Atua Maira
20. Kia tau ki ta Salamo 100:1-5, akapeea tatou me oronga ia tatou uaorai ki mua i te aroaro o Iehova?
20 Ei au tangata no Iehova, e mea tika rava kia akaperepere tatou i te tu rangatira mei te Atua maira na te reira i apai mai i te rekareka no tatou e te akameitakianga e manganui. No reira rai a Salamo 100:1-5 (NW) i raurau mai ei ia tatou kia aere atu ki mua i to te Atua aroaro “ma te aue anga rekareka.” Na Iehova oki tatou nei e te akono ra aia ia tatou mei te Tiaki mamoe aroa ra. Ae, “e iti tangata tatou nona e e au mamoe no tana ra koro.” No te mea Nana i Anga Mai ia tatou e tona au tu memeitaki ka akakeu ia tatou kia tomo atu ki te paepae o tona ngai tapu ra ma te akapaapaa e te akameitaki anga. Kua akakeuia tatou kia “akameitaki i tona ingoa,” kia tuatua meitaki no te Atua ko Iehova. E pera katoa, ka rauka ia tatou te irinaki tamou i tona aroa takinga meitaki, me kare manako aroa, no tatou. “Ki tera uki ki tera uki” e tiratiratu a Iehova, e ngaueue kore i te akaarianga i te aroa ki te aronga tei rave ra i tona anoano.
21. Eaa te akamaroiroi anga tei orongaia mai i te puka mua o teia makatini nei, e eaa ta tatou ka tau kia rave no to tatou tu rangatira mei te Atua maira?
21 E au tangata apa ua nei, kare e rauka ia tatou i teianei kia tapae ke i te au timataanga katoatoa. Inara, na te tauturu mei te Atua maira, ka rauka kia maroiroi tatou e ei Au Kite rekareka na Iehova. E tau meitaki no teia tu te au tuatua i roto i te puka mua o teianei makatini ia (Tiurai 1879): “E akamaroiroi . . . e taku taeake me kare tuaine Kerititiano, tei kimi i te oroanga ma te takainga maromaroa na te mataara o iti. Auraka e manako i te ngata o taua arataa na; e tapu katoa ia e na nga vaevae akameitakiia o te Pu ra i akatapu. E akamanako i te au tataramoa katoa ei tiare ia; te au toka kokoi katoa ei takainga ia, i toou rapurapuanga kia tae ki te akakoroanga. . . . E tamou i toou mata ki runga i te tutaki ra.” Te aronga e au mirioni ua atu te tavini nei i teianei ia Iehova te tamou ra to ratou mata ki runga i te tutaki e e manganui ta ratou tumu no te maroiroi e te rekareka. E tamou tikai i te tu rangatira mei te Atua maira, ma ratou katoa ra. Auraka e aere ke i tana akakoroanga, e kia riro te rekareka o Iehova ra ei punanga ketaketa tamou noou.
Akapeea Koe Me Pau?
◻ Akapeea e raukai kia riro “te rekareka o Iehova” ei punanga ketaketa no tatou?
◻ I te pae o te akonoanga atua, eaa te au akameitakianga tei apaiia mai ki te au tangata o Iehova no te tu rangatira mei te Atua maira?
◻ Eaa ka tavini ei tetai no tetai na roto i te aroa?
◻ Eaa etai atu akameitakianga te kapitiia ra ma te tu rangatira mei te Atua maira?
◻ Akapeea e tamou ei te tu rekareka o te au tangata o te Atua ra?
[Tutu i te kapi 23]
“E akamanako i te au tataramoa katoa ei tiare ia; te au toka kokoi katoa ei takainga ia, i toou rapurapuanga kia tae ki te akakoroanga”