Akapeea Tetai me Pure ki ‘Tei Akarongo mai i te Pure’

“E tei akarongo i te pure ra e, ka tae te tangata ravarai kia koe.”​—SALAMO 65:2.

1. Eaa te akataka ra i te au tangata mei tetai au mea ora i te enua nei, e eaa te au atianga ta teia e oronga maira?

I ROTOPU i te au tangata e te au mea ora katoatoa e tauatini ua atu, tei te au tangata anake ua te tu karape i te akamori i Tei Anga mai. Ko te au tangata anake ua te kite ra i te anoano i te pae vaerua e te inangaro ra kia akamerengoia te reira. Te oronga maira teia i te au atianga umere kia rauka ia tatou tetai pirianga ki to tatou Metua i te rangi.

2. Eaa te tupu anga kino ta te ara i tuku ki runga i to tetai tangata pirianga ki Tei Anga mai iaia?

² Kua anga te Atua i te tangata ma te kite kia komunikeiti ki Tei Anga mai iaia. Kare a Adamu raua ko Eva i angaia mai ma te ara. No reira, ka rauka ia raua i te komunikeiti rangatira ua ki te Atua mei tetai tamaiti e komunikeiti ra ki tona metua tane. Inara, no te ara kua akaateaia taua akameitaki anga mekameka. Kare a Adamu raua ko Eva i akarongo ana ki te Atua kua ngere raua i te pirianga vaitata kiaia. (Genese 3:8-13, 17-24) Ko te aite anga ainei te reira e kare e rauka akaou i te tamariki apa a Adamu i te komunikeiti ki te Atua? Kare, te akatika ua ra rai a Iehova ia ratou kia komunikeiti kiaia, me ka rauka ia ratou i te aru i tetai au umuumuanga. Eaa taua au umuumuanga ra?

Au Umuumuanga no te Pure Anga ki te Atua

3. Akapeea te au tangata tei ara me pure ki te Atua, e eaa te akaraanga te akatutu maira i teia?

³ Te tauturu maira tetai tupuanga te o maira nga tamariki tamaroa e rua a Adamu ia tatou kia kite e eaa ta te Atua e umuumu maira no tetai tangata apa te inangaro ra i te pure Kiaia. Kua tauta a Kaina raua ko Abela i te pure ki te Atua na te oronga anga i te au atinga kiaia. Kua arikiia ta Abela atinga, kare ta Kaina. (Genese 4:3-5) Eaa ra i tuke ei? Te akakite maira a Ebera 11:4 e: “No te akarongo i meitaki ravaʼi ta Abela atinga i apai i te Atua i ta Kaina, i tuatuaia mai ei aia e e tangata tuatua-tika aia.” Te taka meitaki ra i reira e, te umuumuia ra te akarongo kia arikiia mai te pure e te Atua. Ko tetai umuumuanga tei kiteaia i roto i te au tuatua a Iehova kia Kaina ra e: “Kia rave koe i te meitaki ra, kare ainei koe e kiteia mai?” Ae, ka arikiia mai tikai ta Kaina pure ki te Atua naringa e kua rave a Kaina i te mea meitaki. Inara, kua kopae a Kaina i ta te Atua akoanga, kua ta atura ia Abela, e kua riro mai ei tangata tuitarere. (Genese 4:7-12) No reira, mei te akamata anga mai, kua akakiteia mai te puapinga maata no te pure anga ki te Atua ma te akarongo pera katoa te rave anga i te au angaanga meitaki.

4. Eaa ta tatou ka kite mai no runga i ta tatou pure ki te Atua?

⁴ E puapinga maata tikai te kite anga i to tatou uaorai tu ara me te inangaro ra tatou i te pure ki te Atua. Kua ara te au tangata katoatoa, e kua riro te ara ei arai anga i te pure ki te Atua. Kua tata te peroveta ko Ieremia no runga ia Iseraela: “Kua ara matou . . . Kua tapoki koe ia koe uaorai ki te tumurangi, kia kore te pure e tae atu ki roto ra.” (Te Aue o Ieremia 3:42, 44) Noatu rai, kua akaari mai te Atua na roto i te tuatua enua o te tangata nei, e te ariki puareinga ua ra aia i te au pure a te aronga tei pure kiaia ma te akarongo e ma te tu ngakau tau, na te akonoanga i tana au akaueanga. (Salamo 119:145) Koai ma tetai o teia au tangata tataki tai, e eaa ta tatou ka kite mai mei ta ratou au pure?

5, 6. Eaa ta tatou i kite mai mei ta Aberahama pure ki te Atua?

⁵ Ko Aberahama tetai o taua tangata ra. Kua arikiia tana pure e te Atua, no te mea kua kapiki te Atua ia Aberahama e ko “toku oa.” (Isaia 41:8) Eaa ta tatou ka kite mai mei ta Aberahama pure ki te Atua? Kua pati teia pateriareka akarongo mou kia Iehova no tetai ei mono iaia, i te tuatua anga e: “Eaa taau e o mai noku? teia oki au ka aere ma te tamariki kore?” (Genese 15:2, 3; 17:18) I tetai atianga, kua akakite aia i tona manamanata e koai ma te ka akaoraia mai me tuku mai te Atua i te utunga ki runga i te aronga kino i Sodoma e Gomora. (Genese 18:23-33) Kua rave katoa a Aberahama i te patianga no tetai ke. (Genese 20:7, 17) E mei to Abela turanga rai, i to Aberahama pure anga ki te Atua kua oronga aia i tetai atinga kia Iehova i tetai au taime.​—Genese 22:9-14.

⁶ I teia au atianga ravarai, kua manako ngoie ua a Aberahama i te tuatua atu kia Iehova. Inara, kua kapitiia mai tana tuatua tapupu kore e te mataku kore ki tetai manako akaaka no tona turanga ki mua i Tei Anga mai iaia. E akara ana i tana au tuatua akaaka, tei kiteaia i roto ia Genese 18:27: “I na, kua timata io nei au i te tuatua atu ki taku Atu [“Iehova,” NW], e e one-pueu oki au, e te reu ai.” E tu meitaki tikai teia kia aruia!

7. Eaa te au tumu manako ta te au pateriareka i tuku kia Iehova na roto i te pure?

⁷ Kua pure te au pateriareka no runga i te au tumu manako tukeke, e kua akarongo marekaia mai ratou e Iehova. Kua tuatua a Iakoba i tetai pure na roto i tetai tia. I muri ake i te pati anga i ta te Atua turu anga, kua taputou ngateitei aia: “E te ngauru o te au mea katoa taau e o mai noku nei, ka apaiia ïa e au naau.” (Genese 28:20-22) I muri mai, te vaitata ra aia i te aravei i tona tuakana, kua pati akatenga a Iakoba i te paruru anga kia Iehova, i te tuatua anga e: “E akaora koe iaku nei, i te rima o toku tuakana, i te rima o Esau nei; te mataku nei oki au iaia.” (Genese 32:9-12) Kua pure te pateriareka ko Iobu kia Iehova no tona ngutuare tangata, te oronga anga i te au atinga no ratou. Te ara anga te au oa toko toru o Iobu i roto i ta ratou tuatua, kua pure a Iobu no ratou, e “kua kite mairai a Iehova ia Iobu.” (Iobu 1:5; 42:7-9) Te tauturu maira teia au papaanga ia tatou kia akataka i te au tumu manako ka tuku atu tatou kia Iehova na roto i te pure. Te kite katoa ra tatou e kua papa ua a Iehova i te ariki mai i te au pure a te aronga tei pure kiaia na roto i tetai tu tau.

I Raro Ake i te Ture Koreromotu

8. I raro ake i te Ture koreromotu, akapeea te au tumu manako te orongaia anga kia Iehova na roto i te pure no te tangata ravarai?

⁸ I muri ake i te akaora anga a Iehova i te iti tangata o Iseraela mei Aiphiti mai, kua oronga aia i te Ture koreromotu kia ratou. Te akakite maira te Ture i te akanoonooanga ei pure anga ki te Atua na roto i tetai taoonga taunga tei ikiia. Kua akanooia tetai au ngati Levi kia rave i te angaanga ei kau taunga no te au tangata. Me tupu mai tetai au tumu manako puapinga maata ki te iti tangata ra, ka oronga atu tetai komono no te tangata ravarai i te manamanata ki te Atua na roto i te pure, i tetai au taime na te ariki me kore na tetai peroveta e oronga atu. (1 Samuela 8:21, 22; 14:36-41; Ieremia 42:1-3) Ei akaraanga, i te akatapu anga i te iero, kua tuatua te Ariki ko Solomona kia Iehova na roto i te pure ngakau tae. Aru mai, kua akakite mai a Iehova e kua ariki aia i ta Solomona pure na te akaki anga i te iero ki Tona kaka e te tuatua anga e: “E ka akarongo mai oku taringa i te pure i pureia i teianei ngai.”​—2 Paraleipomeno 6:12–7:3, 15.

9. Eaa te umuumuia ra kia pure tau kia Iehova i ko i te ngai tapu?

⁹ I roto i te Ture tei orongaia kia Iseraela, kua kapiti mai a Iehova i tetai umuumuanga no te pure tau kiaia i ko i te ngai tapu. Eaa te reira? I te au popongi ravarai e te au aiai ravarai, kapiti atu ki te oronga anga i te au atinga manu, te umuumuia ra te taunga maata kia tutungi i te atinga kakara ki mua ia Iehova. I muri mai, kua oronga katoa te kau taunga i raro mai i teia angaanga nei, inara kare i te Ra Tapokiangaara. Me kare te kau taunga e oronga i taua akamori anga ngateitei, kare a Iehova e mareka mai i ta ratou angaanga.​—Exodo 30:7, 8; 2 Paraleipomeno 13:11.

10, 11. Eaa te akapapu anga tei rauka mai ia tatou e kua ariki a Iehova i te au pure a te au tangata tataki tai?

¹⁰ I Iseraela taito, ka rauka ainei i te pure ki te Atua na roto ua i te au komono tei ikiia? Kare, te akaari maira te au Tuatua Tapu e te ariki mareka maira a Iehova i te au pure a te au tangata tataki tai. I roto i ta Solomona pure no te akatapuanga i te iero, kua pati akatenga aia kia Iehova, i te tuatua anga e: “Ko te au pure katoa e te au patianga e patiia e te au tangata katoa, e to au tangata katoa e Iseraela nei, . . . kua oora tika mai i ona puke rima ki teianei are: Ei reira koe e akarongo mai ei i runga i te rangi.” (2 Paraleipomeno 6:29, 30) Te akakite maira ta Luka papaanga kia tatou e te oronga anga a Zekaria, te metua tane o Ioane Papetito, i te rakau kakara i roto i te ngai tapu, e manganui te aronga akamori o Iehova te ‘pure ra i vao mai’ kare no roto mai i te kau taunga. I te akaraanga, kua riro mai te reira ei peu na te au tangata kia akaputuputu mai na roto i te pure i vao ake i te ngai tapu i te tuatau e orongaia ra te rakau kakara kia Iehova i runga i te atarau auro.​—Luka 1:8-10.

¹¹ No reira, me pure kia Iehova na roto i te tu tau, ka ariki mareka mai aia i te au patianga no ko mai i te aronga tei komono i te iti tangata katoa e no ko mai i te aronga tataki tai tei kimi ana i te pure atu kiaia. I teia ra, kare tatou i raro ake i te Ture koreromotu. Noatu rai, e e au apiianga puapinga maata ta tatou ka kite atu no runga i te pure na roto i te au tu te pure anga te ngati Iseraela taito ki te Atua.

I Raro Ake i te Akanoonooanga Kerititiano

12. Eaa te akanoonooanga tei akanooia no te au Kerititiano kia pure kia Iehova?

¹² I teianei tei raro ake tatou i te akanoonooanga Kerititiano. I teia tuatau kare e iero tika tikai na te kau taunga ei komono i te au tangata ravarai o te Atua me kore ei aere anga atu na tatou kia pure tatou ki te Atua. Noatu rai, e akanoonooanga rai ta Iehova i akanoo no tatou kia pure tatou kiaia. Eaa te reira? Te akatainuia anga a Karaiti i te mataiti 29 T.N. e kua ikiia ei Taunga Maata, kua akamata tetai iero pae vaerua i te angaanga.a E akanoonooanga ou teia iero i te pae vaerua ei pure anga kia Iehova i roto i te akamorianga tei akatumuia ki runga i te atinga tarangaara o Iesu Karaiti.​—Ebera 9:11, 12.

13. No runga i te pure, eaa tetai tu aiteite i rotopu i te iero i Ierusalema e te iero i te pae vaerua?

¹³ Te akatutu meitaki maira te au tu e manganui o te iero i Ierusalema i te au ravenga tukeke o te iero i te pae vaerua, kapiti katoa mai te pure. (Ebera 9:1-10) Ei akaraanga, eaa te akatutuia maira e te rakau kakara tei orongaia, i te popongi e i te aiai, i runga i te atarau no te rakau kakara i roto i te ngai Tapu o te iero? E tau ei ki te puka o Apokalupo, “te kapu auro kua ki i te rakau kakara, koia te pure a te aronga tapu ra.” (Apokalupo 5:8; 8:3, 4) Kua akauruia a Davida kia tata e: “Kia ana atu taku pure ki mua ia koe mei te atinga kakara ra; te apai anga o toku rima ki runga mei te atinga kai aiai ra.” (Salamo 141:2) No reira, i roto i te akanoonooanga Kerititiano, te akatutu meitaki maira te rakau kakara reka i te au pure tei arikiia e te akapaapaa anga kia Iehova.​—1 Tesalonia 3:10.

14, 15. Eaa te ka karangaia no runga i te pure kia Iehova na te (a) au Kerititiano akatainuia? (e) no te “mamoe ke atu”?

¹⁴ Koai ma te ka akavaitata atu ki te Atua i roto i teia iero i te pae vaerua? I roto i te iero kitea uaia, kua orongaia te akameitakianga ki te kau taunga e te ngati Levi kia tavini i roto i te paepae i roto roa atu, inara ko te kau taunga ua te ka tomo ki roto i te ngai Tapu. Te rekareka ra te au Kerititiano akatainuia ma te manakonakoanga i te rangi i tetai turanga takake i te pae vaerua tei akatutuia mai e te paepae i roto roa atu e te ngai Tapu, te tauturu maira ia ratou kia oronga i te au pure e te akapaapaa anga ki te Atua.

¹⁵ Akapeea ra te aronga e manakonakoanga to ratou i te enua nei, koia oki te “mamoe ke atu”? (Ioane 10:16) Kua akakite mai te peroveta ko Isaia e ka aere mai te au tangata no te pa enua e manganui i te akamori ia Iehova i “te au rā openga ra.” (Isaia 2:2, 3) Kua tata katoa aia e ka piri atu taua ‘au tangata ke’ kia Iehova. I tona akakite anga e te papa ua ra aia i te ariki i ta ratou pure, kua tuatua te Atua: “E akarekareka au ia ratou i roto i toku are pure anga.” (Isaia 56:6, 7) Te oronga maira a Apokalupo 7:9-15 i tetai au akataka anga, i te akakite anga mai i te “aronga maata rava” no te “pa enua ravarai” tei akaputu taokotai mai i te akamori e te pure anga ki te Atua i te “po e te ao” ia ratou e tu ua ra i roto i te paepae i vao i te iero i te pae vaerua. Mei teaa ra te manako akapumaana anga e te rauka ra i te au tavini katoatoa o te Atua i teia tuatau i te pure ki te Atua ma te irinaki pu tikai anga e ka akarongoia mai ratou e ia!

Eaa te Au Pure ka Arikiia?

16. Eaa ta tatou ka kite mai no runga i te pure a te au Kerititiano mua?

¹⁶ E au tangata rave pure te au Kerititiano mua. No runga i teea au tumu manako i pure ei ratou? Kua pati te aronga pakari Kerititiano i te aratakianga i te iki anga i te au tane no te au apainga na te akaaereanga. (Angaanga 1:24, 25; 6:5, 6) Kua pure a Epaphera no tona au taeake irinaki. (Kolosa 4:12) Kua pure te au mema o te putuputuanga i Ierusalema no Petero i te tapeka angaia aia. (Angaanga 12:5) Kua pati te au Kerititiano mua ki te Atua kia oronga mai kia ratou te mataku kore i te aro atu anga i te patoianga, i te tuatua anga e: “E akara mai koe, e [“Iehova,” NW], i ta ratou nei akamataku anga mai, e akamaroiroi mai i to au tavini kia tuatua ua i taau tuatua ma te mataku kore.” (Angaanga 4:23-30) Kua tauta te pipi ko Iakobo i te akakeu i te au Kerititiano kia pure ki te Atua no te pakari mei tei raro ake ratou i te timataanga. (Iakobo 1:5) E kapiti mai ana ainei koe i taua au tumu manako i roto i taau au patianga kia Iehova?

17. Ka ariki a Iehova i taai ma pure?

¹⁷ Kare te Atua e ariki ana i te au pure ravarai. Akapeea i reira tatou i te pure anga ma te irinaki anga e ka arikiia mai ta tatou au pure? Ko te au tangata akarongo mou, te aronga ta te Atua i akarongo i te tuatau taito ra, kua pure ratou ma te ngakau tae e te ngakau tika tikai kiaia. Kua akaari ratou i te akarongo na te turu anga i teia na roto i te au angaanga meitaki. Papu ia tatou e ka akarongo mai a Iehova ki te aronga tei pure kiaia, pera rai i teia tuatau.

18. Kia akarongoia mai ta ratou pure, eaa te umuumuanga ta te au Kerititiano ka akono?

¹⁸ E umuumuanga ke atu tetai. Kua akataka mai te apotetoro ko Paulo i teia, i te tuatua anga e: “Nona oki tatou . . . i tae atu ei ki te Metua ra i te Vaerua okotai.” Te taiku ra a Paulo kiaai i tona tata anga e, “nona oki”? Kia Iesu Karaiti. (Ephesia 2:13, 18) Ae, ka rauka ia tatou i te pure rangatira ki te Metua na roto ua ia Iesu.​—Ioane 14:6; 15:16; 16:23, 24.

19. (a) I naea te atinga no te rakau kakara i Iseraela i riro mai e ei mea viivii kia Iehova? (e) Akapeea tatou e papu ei e te riro ra ta tatou au pure mei te mea aunga kakara rekaia ra kia Iehova?

¹⁹ Tei taiku takereia mai, ko te rakau kakara tei orongaia e te kau taunga ngati Iseraela te akatutu maira i te au pure tei arikiia na te au tavini akarongo mou a te Atua. Inara, i tetai au taime, e mea viivii te au atinga kakara a te au ngati Iseraela kia Iehova. Ko te turanga teia te tutungi anga te au ngati Iseraela i te rakau kakara i roto i te iero inara i taua taime rai te tupou ra ki te au itoro. (Ezekiela 8:10, 11) Pera katoa i teia tuatau, e mea aunga viivii kia Iehova te au pure a te aronga te karanga ra e te tavini ra iaia inara i taua taime rai te rave ra i te au angaanga te patoi ra i tana au ture. (Maseli 15:8) No reira, kia akono tamou ua atu tatou kia ma to tatou oraanga i roto i te au tu ravarai kia riro mai ta tatou au pure ei mea aunga kakara rekaia ki te Atua. Te rekareka ra a Iehova i te au pure a te aronga tei aru i tona arataa tika. (Ioane 9:31) Inara, te vai ra rai tetai au uianga. Akapeea tatou me pure? Eaa ta tatou ka pure? E akapeea te Atua i te pau mai anga i ta tatou au pure? I roto i ta tatou atikara e e aru mai nei ka akamanakoia teia au uianga e tetai atu au uianga ke.

[Tataanga Rikiriki i Raro]

Ka Rauka Ainei ia Koe te Akataka?

• Akapeea te au tangata apa i te pure anga ki te Atua ma te tu tau?

• I roto i ta tatou au pure, akapeea tatou te aru anga i te au pateriareka?

• Eaa ta tatou i kite mai mei te au pure a te au Kerititiano mua?

• I teea atu taime ka riro ei ta tatou au pure mei te mea aunga kakara rekaia ra ki te Atua?

[Tutu i te kapi 23]

Eaa te Atua i ariki ei i ta Abela atinga kare i ta Kaina?

[Tutu i te kapi 24]

“E one-pueu oki au, e te reu ai”

[Tutu i te kapi 25]

“Te ngauru o te au mea katoa taau e o mai noku nei, ka apaiia ïa e au naau”

[Tutu i te kapi 26]

Mei te rakau kakara reka ainei taau au pure kia Iehova?