Āriki i ta Iehova Akakoreanga Ara

1-2. Eaa ta Iehova ka rave me tataraara tatou? (Akara katoa i te tutu.)

KUA taitaia te Ariki ko Davida no te au kino i rave aia. (Sala. 40:12; 51:3) Kua tataraara aia ma te ngakau tae e kua akakore a Iehova i tana ara. (2 Samu. 12:13) Tei tupu, kua mataora akaou a Davida.—Sala. 32:1.

² Ka mataora katoa tatou me kite tatou kua akakore a Iehova i ta tatou ara. E mea pumaana e ka akakore a Iehova i ta tatou ara me tataraara tatou, pure kiaia kia akakore mai i ta tatou ara, akakite i te reira ki te aronga pakari e auraka e rave akaou! (Mase. 28:13; Anga. 26:20; 1 Ioa. 1:9) Mataora tatou kare a Iehova e akaapa e te taiku akaou i ta tatou ara!—Eze. 33:16.

3-4. Eaa te manako o te tuaine i muri ake i tona papetitoanga, e eaa ta tatou ka uriuri i teia atikara?

³ Tetai taime, ka irinaki tatou e kare a Iehova e akakore i ta tatou ara. Kua manako pera a Jennifer. Kua apii tona nga metua i te tuatua mou kiaia. Inara te mapu anga aia, kua rave aia i te au mea kino e kua uuna i te reira mei tona nga metua. I tetai au mataiti i muri mai, kua taui aia i tona oraanga, kua akatapu iaia kia Iehova e kua papetito. Karanga aia: “I mua ana, kua akapou au i toku oraanga no te kimi moni, rave i te au peu viivii, inu maata i te kava e e vaine riririri au. Irinaki au e kua akakore a Iehova i taku ara na roto i te atinga oko o Iesu. Inara, kua ekoko katoa au i te reira.”

⁴ E manako ana ainei koe penei kua mareka kore a Iehova ia koe no taau ara? E akamaara e Atua aroa a Iehova. Irinaki a Davida e ka akakore a Iehova i tana ara e kia pera katoa tatou. I teia atikara, ka uriuri tatou i te tumu kia āriki tatou i ta Iehova akakoreanga ara e eaa te ka tauturu ia tatou.

EAA TATOU KA ĀRIKI EI I TA IEHOVA AKAKOREANGA ARA?

5. Eaa ta Satani ka inangaro ia tatou kia irinaki? Oronga mai i tetai akaraanga.

⁵ Na te āriki anga i ta Iehova akakoreanga ara, ka patoi tatou i ta Satani au ereere. E akamaara, inangaro a Satani kia akamutu tatou i te tavini ia Iehova. Akamanako ana i tei tupu ki tetai tangata akaturi i Korinetia, tei akatakakeia mei te putuputuanga. (1 Kori. 5:​1, 5, 13) I muri mai, kua tataraara aia. Inara, kua inangaro a Satani i te putuputuanga kia kopae e kia kore e akakore i te ara a te reira tangata. Kua akavare a Satani i te tangata tataraara kia irinaki e kare a Iehova e akakore i tana ara e kia akamutu i te tavini ia Iehova. Te taangaanga nei rai a Satani i teia ereere. Inara, kua kite tatou i tana au ravenga no reira e patoi i te reira.—2 Kori. 2:​5-11.

6. Akapeea tatou e mataora ai e kare e manako akaapa?

⁶ Na te āriki anga i ta Iehova akakoreanga ara, ka mataora tatou e kare e manako akaapa. Me ara tatou, ka tupu te ngakau paruparu. (Sala. 51:17) E mea meitaki te reira no te mea ka akakeuia tatou kia taui i to tatou oraanga. (2 Kori. 7:​10, 11) Inara, me manako akaapa ua tatou, penei ka akamutu tatou i te tavini ia Iehova. Me āriki tatou e kua akakore a Iehova i ta tatou ara, ka mataora tatou. No reira, ka tavini ua atu tatou iaia ma te irinaki e te mareka ra aia ia tatou. Ko tera to Iehova inangaro. (Kolo. 1:​10, 11; 2 Timo. 1:3) Inara, eaa tatou ka irinaki ei e kua akakore te Atua i ta tatou ara?

EAA TE KA TAUTURU IA TATOU KIA ĀRIKI I TA IEHOVA AKAKOREANGA ARA?

7-8. Eaa ta Iehova i akakite nona uaorai, e eaa ta tatou i papu? (Exodo 34:​6, 7)

⁷ Akamanako i ta Iehova i akakite nona uaorai. Ei akaraanga, eaa ta Iehova i tuatua kia Mose i runga i te Maunga Sinai.a (E tatau ia Exodo 34:​6, 7.) Noatu e maata to Iehova au tu manea, kua akakite aia kia Mose e “e Atua takinga-meitaki e te aroa ua” Aia. Ka tāpu ainei a Iehova i te akakore i te ara a tona au tavini tei tataraara? Kare rava! E Atua aroa ua a Iehova.

⁸ Papu ia tatou me karanga a Iehova e e Atua aroa aia, e tuatua mou tana e kare e pikikaa. (Sala. 31:5) No reira, ka irinaki tatou i tana tuatua. Me kua ekoko koe e kua akakoreia taau ara, e ui: ‘Irinaki ainei au e Atua aroa e te takinga meitaki a Iehova e ka akakore ua rai aia i te ara a tetai tei tataraara?’ Me kua irinaki au, mea papu kua akakore katoa a Iehova i taku ara.

9. Eaa te aiteanga, kia akakoreia ta tatou ara? (Salamo 32:5)

⁹ Akamanako i ta Iehova i apii i roto i te Pipiria no tana akakoreanga ara. Ei akaraanga, kua akakite te tata Pipiria ko Davida i to Iehova tu akakore ara. (E tatau ia Salamo 32:5.) Karanga aia, ‘kua akakore mai koe i te kino o taku ara.’ Te tuatua Epera kia “akakore,” tetai aiteanga kia “apai ke,” kia “akaatea,” me kore kia “amo.” Te akakoreanga a Iehova i ta Davida ara, kua aite te reira mei tetai apinga teiaa tei akaateaia. E tei tupu, kua mataora akaou a Davida. (Sala. 32:​2-4) Ka mataora katoa tatou. No reira me tataraara tatou, kare e manako akaapa no te mea ka apai ke a Iehova i ta tatou ara.

10-11. Eaa te aiteanga o te tuatua e kua “akakore” a Iehova i ta tatou ara? (Salamo 86:5)

¹⁰ E tatau ia Salamo 86:5. Akakite a Davida no Iehova, kua tika iaia i te “akakore” mai i te ara. Ko tera te aiteanga, kare a Iehova e riri me rave tatou i te tarevake. Inangaro aia i te akakore i te ara a te aronga tei tataraara. Eaa te tumu? Karanga te tuanga rua o te irava: ‘E aroa maata [tona] i te aronga katoa e kapiki atu iaia.’ Mei ta tatou i kite i te atikara i mua ana, kua taputou a Iehova i te akaari i te aroa ki te aronga tei akaperepere iaia e kare rava aia e akaruke ia ratou. Me kua ara ratou e kua tataraara, ka aroa ua rai a Iehova ia ratou, ka akakore aia i ta ratou ara. (Isa. 55:7) Me ekoko koe e kua akakore a Iehova i taau ara, e ui: ‘Irinaki ainei au e kua akakore a Iehova i te ara a te aronga katoatoa tei tataraara, e tei pure no tona aroa takinga meitaki? Me kua irinaki au, papu i reira e ka akakore mai a Iehova i taku ara.’

¹¹ Akakite katoa te Pipiria e kua mārama a Iehova i to tatou tu e e aronga ara tatou. (Sala. 139:​1, 2) Ka kite tatou i teia i roto i tetai irava o salamo ta Davida i tata, te ka tauturu ia tatou kia āriki e kua akakore a Iehova i ta tatou ara.

TA IEHOVA E MANAKO RA NO TATOU

12-13. Ia Salamo 103:​14, eaa to Iehova manako ia tatou, e akapeea aia me akono mai ia tatou?

¹² E tatau ia Salamo 103:14. Akakite a Davida i tetai tumu kua papa ua a Iehova i te akakore i te ara a te aronga tei tataraara. Karanga a Davida “te manako ra [a Iehova] e, e one tatou,” tera te aiteanga kite aia e e aronga ara tatou e ka rave tatou i te kino. Ka uriuri tatou eaa te aiteanga o ta Davida tuatua.

¹³ Karanga a Davida no Iehova “kua kite oki aia i to tatou tu.” Kua anga a Iehova ia Adamu mei “te one-pueu o te enua.” Kua aite te one pueu ki te au turanga paruparu o te tangata. Ei akaraanga, te anoano katoa ra te tangata apa kore kia kaikai, kia moe e kia akaea. (Gene. 2:7) Te ara anga a Adamu e Eva, kua riro raua ei one pueu. Kua iri mai ta raua ara ki ta raua uanga e no reira ka tupu te kino. Kua kite meitaki a Iehova i te reira. Te tataanga a Davida e te “manako” ra a Iehova e one tatou, kua mārama aia e aronga ara tatou. No reira me rave tatou i te kino e kua tataraara ka akakore a Iehova i ta tatou ara.—Sala. 78:​38, 39.

14. (a) Eaa ta Davida i tuatua me akakore a Iehova i ta tatou ara? (Salamo 103:12) (e) Eaa te apiianga mei ta Iehova akakore anga i te ara a Davida? (Akara i te pia “Akakore a Iehova i te Ara, Kare e Manako Akaou i te Reira.”)

¹⁴ Eaa atu tetai ta tatou ka kite mei ia Salamo 103, me akakore a Iehova i ta tatou ara? (E tatau ia Salamo 103:12.) Karanga a Davida, me akakore a Iehova i te ara, kua aite te reira “mei te itinga o te rā e taka ke i te opunga o te rā.” Tera te aiteanga, e mamao te ngai e iti maira te rā mei te ngai e opu ra te reira. Eaa te apiianga me akakore a Iehova i ta tatou ara? Akakite tetai puka no runga i teia irava, ka apai ke a Iehova i ta tatou ara mei te mea atura kare te reira e kiteaia. No reira, papu ia tatou kare rava a Iehova e manako akaou i ta tatou ara.—Eze. 18:​21, 22; Anga. 3:19.

15. Eaa ta tatou ka rave me akamanako ua rai tatou i ta tatou ara?

¹⁵ Akapeea ta Davida au tuatua ia Salamo 103, me tauturu ia koe kia āriki e kua akakore a Iehova i taau ara? Me akamanako ua rai tatou i ta tatou ara, e ui: ‘Kua ngaropoina ainei iaku e kare a Iehova e akamaara akaou i taku ara, e me tataraara au ka akakore aia i taku ara? Te maara ra ainei iaku e kare a Iehova e akamanako akaou i taku ara?’ No reira, kare rava a Iehova e akamaara i ta tatou au ara i rave e kia pera katoa tatou. (Sala. 130:3) Me akakore a Iehova i ta tatou ara, auraka e taitaia mari ra e tavini ua atu iaia ma te rekareka.

16. Oronga mai i tetai akaraanga no te tumatetenga ka tupu me akamanako ua tatou i ta tatou au ara. (Akara katoa i te tutu.)

¹⁶ Akamanako i teia akaraanga. Me akaoro tetai i te motoka, ka akara aia ki roto i te i’o kia kite e koai to muri iaia. Inara me akara putuputu aia i te i’o ka tupu te tumatetenga. No reira, ka anoanoia aia kia akara tika ki mua kia kore e ū. I tetai taime, e mea meitaki i te akamanako i ta tatou ara no te mea ka tauturu tera ia tatou kia kopae i te reira. Inara, me maara ua tatou i te reira, ka tupu te maromaroa e ka akamutu tatou i te tavini ia Iehova. No reira, e tavini ua atu tatou ia Iehova e te akamanako i tana au taputou no te tuatau ki mua, no te mea “kare oki tei muatangana ra e maaraia.”—Isa. 65:17; Mase. 4:25.

E IRINAKI UA RAI I TA IEHOVA AU TUATUA

17. Eaa tatou ka irinaki ua rai e ka akakore a Iehova i ta tatou ara?

¹⁷ Kia irinaki tatou e te akaperepere ra a Iehova ia tatou e ka akakore aia i ta tatou ara. (1 Ioa. 3:19) Eaa te tumu? No te mea ka akavare a Satani ia tatou kia irinaki kare a Iehova e akakore i ta tatou ara. Ko tona akakoroanga, kia akamutu tatou i te tavini ia Iehova. I te openga e vaitata maira, ka tauta pakari a Satani i te akavare ia tatou no te mea e tuatau poto ua tona. (Apo. 12:12) No reira, auraka e tuku i te ’au e tavini ua atu rai ia Iehova!

18. Akapeea koe i papu ei i to Iehova aroa e kua akakore aia i taau ara?

¹⁸ Akaari mai te atikara i mua ana i taau ka rave kia papu i to Iehova aroa ia koe. Apii teia atikara ia tatou kia papu e kua akakore a Iehova i ta tatou ara. Akamaara i tana au ravenga i roto i te Pipiria no te akakore i te ara. Kua kite meitaki a Iehova e tangata ara koe e ka akakore aia i taau ara. E akamaara kare aia e akamanako akaou i te reira. Mei ia Davida tei irinaki i to Iehova aroa, ka pera katoa tatou kia tuatua, “Meitaki maata e Iehova kua ‘akakore mai koe i te kino o taku ara’!”—Sala. 32:5.