E Patoi Atu i te Au Anoano Tika Kore

1. Eaa te au timataanga e tupu ana kia tatou pouroa?

KUA rave ana koe i tetai apinga e kare a Iehova i mareka? Me ko tera, auraka e tuku i te ’au. Karanga te Pipiria: “Kare kotou i rokoia e te timataanga, mari ra mei ta te tangata nei rai.” (1 Kori. 10:13) Tera te aiteanga te tupu katoa ra taau timataanga e na roto ra ki tetai ke. Ma te tauturu a Iehova ka autu koe i te reira.

2. Eaa te au anoano tika kore ta tetai au Kerititiano e te aronga apii Pipiria e patoi pakari ra? (Akara katoa i te au tutu.)

² Akakite te Pipiria: “Kia akatatipakeia tetai, e kia riro ua atu i te kino, kua pikikaaia te reira tangata i tona uaorai anoano tika kore.” (Iako. 1:14) Tauturu teia irava ia tatou kia mārama e tukeke te au timataanga ka tupu kia tatou. Ei akaraanga, ka timataia tetai taeake kia akaturi ki tetai vaine ke, e tetai pae ka piri ainga ki te tane e te tane me kore vaine e te vaine. Ko te aronga tei akamutu i te akara i te au peu viivii penei ka akakeuia ratou kia akara akaou i te reira. Kua aite katoa ki te aronga tei akamutu i te kai apinga akakona e te inu maata i te kava. Ko teia te au anoano tika kore ta tetai au Kerititiano e te aronga apii Pipiria e patoi pakari ra. Kia tau ki ta te apotetoro ko Paulo i tata: “Kia anoano au i te rave i te mea meitaki ra, te vaitata ua nei te kino iaku.”—Roma 7:21.

3. Eaa ta tetai ka akamanako me te patoi ra aia i te au anoano tika kore?

³ Me te patoi ra koe i te au anoano tika kore, ka manako paruparu koe e ka timata ia koe kia rave i te au peu viivii. Ka ō katoa mai te manako puapinga kore, mei te mea atura e ka takore a Iehova ia koe. Inara auraka e irinaki i teia au pikikaa! Ka pau teia atikara i teia nga uianga: (1) Koai te inangaro ra ia koe kia akamanako i teia au anoano tika kore? (2) Akapeea koe me patoi i teia au anoano tika kore?

EAA TA SATANI E INANGARO RA KIA MANAKO TATOU

4. (a) Eaa a Satani i inangaro ei ia tatou kia manako paruparu me timataia? (e) Eaa i rauka ai ia tatou te patoi i te au anoano tika kore?

⁴ To Satani inangaro, kia manako paruparu tatou me timataia. Akakite a Iesu ki tana au pipi kia pure: “Auraka e akaruke ia matou kia timataia mai, e akaora ra ia matou i te kino.” (Mata. 6:13) Kua akaapa a Satani e kare te tangata e akarongo kia Iehova me timataia ratou. (Iobu 2:​4, 5) Eaa te tumu? No te mea kua akavare a Satani iaia uaorai e kare i vai tiratiratu kia Iehova. Irinaki aia kua aite tatou mei iaia, e ka viviki ua tatou i te akaruke ia Iehova me timataia. Manako a Satani e ka rauka iaia i te timata i te Tamaiti a te Atua kia rave i te tarevake! (Mata. 4:​8, 9) Inara ka rauka ainei ia tatou i te patoi i te au anoano tika kore? Ae ka rauka! Mei ta te apotetoro ko Paulo i tata: “E tika iaku te au mea ravarai nei i te Mesia, ko tei akamaroiroi mai iaku nei.”—Phili. 4:13.

5. Akapeea tatou i kite ei kua irinaki a Iehova ka rauka ia tatou i te patoi atu i te au anoano tika kore?

⁵ Irinaki a Iehova e ka rauka ia tatou te patoi i te au anoano tika kore. Akapeea tatou e kite ei i te reira? Kua totou a Iehova e e aronga maata rava tetai te ka vai tiratiratu kiaia e ka ora ratou i te mate maata. Akamanako i tera aiteanga. Karanga a Iehova, tei kore i pikikaa, e ka tomo ratou ki roto i te ao ou ma te mā e “kua orei i to ratou kakau, e kua akateatea i te toto o te Punua-mamoe.” (Apo. 7:​9, 13, 14) No reira, irinaki a Iehova e ka rauka ia tatou i te patoi atu te au anoano tika kore.

6-7. Eaa a Satani i inangaro ei kia manako paruparu tatou?

⁶ Ka inangaro a Satani kia manako paruparu tatou e te puapinga kore, e ka takore a Iehova ia tatou no te rave i te au peu viivii. Eaa a Satani i inangaro ei ia tatou kia manako pera? Kua kite oki aia e koia tei puapinga kore e ka takore takiriia aia e Iehova. (Gene. 3:15; Apo. 20:10) Te riri nei a Satani no te mea kua kite aia e manakonakoanga to tatou no te ora mutu kore. No reira ka tauta pakari aia i te akaparuparu ia tatou. Auraka e tuku i te ’au. Akakite te Pipiria e ka tauturu a Iehova ia tatou e “kare rava [aia] i anoano e kia mate atu tetai, kia rauka katoatoa ra te tataraara.”—2 Pete. 3:9.

⁷ Me tupu te manako paruparu e te puapinga kore kia tatou, te aru ra tatou i to Satani tu. No reira, me mārama meitaki tatou i teia e patoi pakari atu i tana au ravenga.—1 Pete. 5:​8, 9.

TO TATOU MANAKO NO TO TATOU TU ARA

8. Eaa tetai ravenga ke te ka akaparuparu ia tatou? (Salamo 51:5) (Akara katoa i te “Akamārama Anga Tuatua.”)

⁸ Teia tetai ravenga ke, te ka akaparuparu ia tatou e kia manako puapinga kore no te au anoano tika kore. Eaa te reira? Ko to tatou tu ara, tei iri mai kia tatou mei to tatou nga metua mua.a—Iobu 14:4; e tatau ia Salamo 51:5.

9-10. (a) Eaa tei tupu kia Adamu e Eva te ara anga raua? (Akara katoa i te tutu.) (e) Eaa te ka tupu kia tatou no te ara?

⁹ Akamanako ana i te ara anga a Adamu e Eva. Kua akarongo kore raua kia Iehova, kua pipini e kua arai raua i to raua kopapa. Kua ngere a Adamu e Eva i to raua pirianga kia Iehova. Noatu ta raua i rave, ka taitaia ua rai raua e ka tupu te manamanata. No reira, ka vai ua rai te ara kia raua.

¹⁰ Kare to tatou turanga i aite ki to Adamu e Eva. Kua orongaia mai te atinga oko kia tatou kia rauka ta tatou ara i te akakoreia e kia akavaitata atu ki te Atua. (1 Kori. 6:11) Noatu ra kua iri mai te ara ki runga ia tatou. No reira, ka tupu ua rai te manako akakino, taitaia e te akamā kia tatou. Akakite te Pipiria e ka ara ua rai te tangata e “te aronga katoa kare i rave i te ara mei te ara a Adamu.” (Roma 5:14) Inara kare tatou e anoanoia kia manako paruparu e te puapinga kore. Ka patoi pakari tatou i teia manako ekoko. Akapeea ra?

11. Eaa ta tatou ka rave me manako paruparu tatou e eaa te tumu? (Roma 6:12)

¹¹ No to tatou tu ara ua, penei ka manako paruparu tatou e kare e rauka ia tatou i te patoi i te au anoano tika kore. Kua aite te reira ki tetai reo e tuatua maira e kare rava e rauka ia tatou, inara auraka e akarongo atu. Eaa te tumu? Akakite te Pipiria auraka e tuku i te ara kia “autu” ia tatou. (E tatau ia Roma 6:12.) Tera te aiteanga, ka iki tatou kia kore e rave i te au anoano tika kore. (Gala. 5:16) Irinaki a Iehova e ka rauka ia tatou te patoi i te au timataanga. (Deu. 30:​11-14; Roma 6:6; 1 Tesa. 4:3) No reira, e tauta pakari i te patoi atu i te au anoano tika kore.

12. Eaa ta tatou ka rave me manako puapinga kore tatou e eaa te tumu?

¹² Ka tupu katoa te manako puapinga kore kia tatou no te au anoano tika kore. Kua aite te reira mei tetai reo e tuatua maira, kare rava a Iehova e inangaro ia tatou inara auraka e akarongo atu. Eaa te tumu? Akakite te Pipiria e kua mārama a Iehova i to tatou tu. (Sala. 103:​13, 14) Kua “kite aia i te au mea katoa” no runga ia tatou, kapiti mai te au mea ka akavareia tatou. (1 Ioa. 3:​19, 20) No reira, e tauta pakari i te patoi i te au anoano tika kore kia vai mā tatou ki mua ia Iehova. Eaa i papu ei ia tatou?

13-14. Noatu te au manako kino ka rauka ainei ia tatou i te akamareka ia Iehova? Akamārama mai.

¹³ Akaari maira te Pipiria i te tuke i rotopu i te anoano tika kore e te raveanga i te reira. Kare e rauka ia tatou te akatere i te manako kino, inara ka rauka ia tatou te patoi pakari i te reira. Ei akaraanga, kua rave tetai au Kerititiano o te anere mataiti mua i Korinetia i te au peu ainga viivii homosexual. Tata a Paulo: “Mei te reira oki tetai papaki o kotou.” Ko te aiteanga ainei kare rava ratou e manako akaou i te reira au peu viivii? Kare, ka vai rai te reira. Inara me akatere te au Kerititiano i to ratou tu, kia kore e rave i te au peu kino ka ārikiia ratou e Iehova. Kua “oreiia” ta ratou ara. (1 Kori. 6:​9-11) Ka rauka katoa ia koe.

¹⁴ Noatu te au timataanga, ka rauka ia tatou i te autu atu i te reira. E tika, kare e takoreia te reira, inara ka rauka ia koe i te patoi “i ta te kopapa e ta te ngakau i inangaro.” (Ephe. 2:3) Eaa tetai au ravenga te ka tauturu ia koe?

EAA TAAU KA ANOANOIA KIA RAVE

15. Kia patoi atu i te au anoano tika kore, eaa ta tatou ka anoanoia kia kite?

¹⁵ Kia patoi atu i te au anoano tika kore ka anoanoia koe kia kite i toou tu paruparu. E matakite auraka e “pikikaa” ia koe uaorai. (Iako. 1:22) Ei akaraanga, me e manamanata to tetai tangata no te inu maata i te kava, penei ka manako aia kare teia i te mea kino no te mea e inu maata ana tetai au taeake. Me kore me timataia koe i te akara i te au peu viivii penei ka akaapa koe e ka tuatua, ‘Kare au e akara atu i teia au peu, naringa taku vaine i inangaro mai iaku.’ Me manako akapera koe te kimi ra koe i tetai ravenga kia rave i te reira. No reira, auraka e kimi i tetai kotoeanga, kua apa rai koe no taau i rave.—Gala. 6:7.

16. Akapeea koe me akapapa ia koe kia kore e timataia?

¹⁶ I te kite anga i toou tu paruparu, ka anoanoia koe kia akaketaketa i toou akarongo kia kore koe e timataia. (1 Kori. 9:​26, 27; 1 Tesa. 4:4; 1 Pete. 1:​15, 16) Akamanako i te au mea te ka akaparuparu ia koe, no te mea e tukeke te au timataanga ka tupu kia koe i te au rā. Ei akaraanga, ka ngatā ainei ia koe i te patoi i te au anoano tika kore me kua roiroi koe me kore kua tupu te reira i te turuaipo? E akapapa ia koe i teianei kia paruru ia koe. E rave i teia i mua ake ka timataia ai koe.—Mase. 22:3.

17. Eaa te apiianga mei te akaraanga o Iosepha? (Genese 39:​7-9) (Akara katoa i te au tutu.)

¹⁷ Akamanako eaa ta Iosepha i rave te timataanga te vaine a Potiphara iaia. Kua patoi pakari aia i ta te vaine timataanga. (E tatau ia Genese 39:​7-9.) Eaa te apiianga no tatou? Kua kite a Iosepha i te kino me moe aia ki te vaine a tetai tangata ke, i mua ake ka timataia ai aia. Pera katoa, ka anoanoia tatou kia akamatutu i to tatou akarongo kia rave i te tika i mua ake ka timataia ai tatou. Na roto i teia ravenga, ka māmā ua ia koe i te iki i taau ka rave.

“E KIMI MATATIO”

18. Akapeea koe me autu i te patoi i te au anoano tika kore? (2 Korinetia 13:5)

¹⁸ Kia patoi i te au anoano tika kore, ka anoanoia koe kia “kimi matatio” koia oki kia akara putuputu eaa taau e rave ra. (E tatau ia 2 Korinetia 13:5.) I te au atianga ravarai e akamanako i taau e rave ra e kia akatanotano i te reira. Ei akaraanga, me kua autu koe i tetai timataanga e ui: ‘Kua viviki ainei au i te patoi atu?’ Me kua taroaroa koe eiaa e maromaroa. Mari ra, e akamanako eaa taau ka rave ei paruru ia koe me tupu akaou te reira. E ui i teia au uianga: ‘Me tupu te au anoano tika kore, ka rauka ainei iaku te takore viviki atu i te reira? E ngatā ainei iaku i te patoi i te au timataanga no te au tamataora taku i iki? Me kite au i te au tutu tau kore ka viviki ainei au i te uri ke mei te reira? Kua mārama ainei au noatu ka tauta au i te akatere i toku tu kia kauraro kia Iehova ka puapingaia au?’—Sala. 101:3.

19. Akapeea te au ikianga neneva me timata ia koe kia rave i te au anoano tika kore?

¹⁹ Eiaa e kimi i tetai kotoeanga. Karanga te Pipiria: “E pikikaa maata to te ngakau i te au mea katoa nei, e kua kino takiri.” (Iere. 17:9) Akakite a Iesu e ka akatupu te reira i te “manako kikino.” (Mata. 15:19) Ei akaraanga, kua akamutu tetai tangata i te akara i te au peu ainga viivii, e i muri mai kua manako aia kare i te mea kino kia akara akaou i te au tutu viivii. Me kore ka karanga aia, ‘Kare i te mea kino i te akamanako i te au anoano tika kore no te mea kare au e rave ana i te reira.’ Me manako akapera tetai te akatupu ra aia i to ‘te kopapa anoano.’ (Roma 13:14) Akapeea koe me kopae i te reira? E matakite i te au ikianga neneva.b E patoi i te au “manako kikino” te ka timata ia koe.

20. Eaa ta tatou ka tapapa atu no te tuatau ki mua, e eaa te ka tauturu ia tatou i teianei?

²⁰ Mei ta tatou i apii, ka oronga mai a Iehova i te tauturu kia patoi atu tatou i te au timataanga. Na roto i te atinga oko, ka akakoreia ta tatou ara e e manakonakoanga to tatou no te ora mutu kore i te ao ou. Ka mataora tatou i te tavini ia Iehova ma te manako e te ngakau mā! No reira, me tae ki tera tuatau kare tatou e manako paruparu e te puapinga kore no te au anoano tika kore. Ma te tauturu a Iehova, ka autu tatou!